ຜ່ານການເຮັດວຽກງານກວດກາຄົນເຂົ້າ-ອອກເມືອງໃຫ້ແກ່ປະຊາຊົນຫວຽດນາມ ແລະປະຊາຊົນລາວ ຜ່ານດ່ານຊາຍແດນຕາຮຸ່ງ ໃນແຕ່ລະມື້, ພັນຕີ ຟານກວາງວີ໊ງ ໄດ້ເຫັນວ່າ: ເຖິງວ່າປະຊາຊົນສອງຟາກຊາຍແດນຢູ່ທີ່ນີ້ຍັງປະສົບກັບຄວາມຫຍຸ້ງຍາກໃນການດໍາລົງຊີວິດກໍ່ຕາມ, ແຕ່ຍາມໃດກໍ່ສາມັກຄີ, ຮັກແພງ, ອຸ້ມຊູຊ່ວຍເຫຼືອເຊິ່ງກັນ ແລະກັນ. ໃນຊຸມປີສົງຄາມ, ຊາວເຜົ່າເວີນກ່ຽວ ຢູ່ຕາແສງເຮື໊ອງເລິບ, ເຮື໊ອງວຽດ (ເມືອງເຮື໊ອງຮວ໊າ, ແຂວງກວາງຈິ) ແລະບ້ານລາໂກ (ປະຈຸບັນຂຶ້ນກັບເມືອງເຊໂປນ) ຈຳນວນໜຶ່ງກໍ່ໄປເປັນທະຫານ, ຈຳນວນໜຶ່ງກໍ່ຢູ່ເຮືອນເພື່ອປູກພືດທັນຍາຫານສົ່ງໄປຍັງສະໜາມຮົບເພື່ອຕີຂັບໄລ່ຈັກກະພັດອາເມລິກາ.
ພາຍຫຼັງການວາງແຜນກຳນົດເສັ້ນຊາຍແດນປີ 1978, ປະຊາຊົນຢູ່ບ້ານລາໂກ ກາຍເປັນພົນລະເມືອງລາວ, ປະຊາຊົນ ຢູ່ຕາແສງເຮື໊ອງວຽດ ແລະເຮື໊ອງເລິບ ກາຍເປັນພົນລະເມືອງຫວຽດນາມ, ສະນັ້ນ, ເຖິງວ່າເປັນສອງປະເທດ, ສອງສັນຊາດກໍ່ຕາມ, ແຕ່ກໍ່ມີສາຍເລືອດດຽວກັນຂອງຊາວເວີນກ່ຽວ. ປະຊາຊົນຍັງຄົງຮັກສາການພົວພັນ, ໄປຢາມຍາດຕິພີ່ນ້ອງຢ່າງເປັນປະຈໍາ ແລະຍັງຈົດຈໍາຄໍາເວົ້າ: “ຫວຽດນາມ - ລາວ ອ້າຍນ້ອງ”. ຍ້ອນເຫດນັ້ນ, ໃນດວງໃຈຂອງພະນັກງານ ແລະນັກຮົບຄ້າຍທະຫານຊາຍແດນເຮື໊ອງເລິບ ເວົ້າລວມ ແລະພັນຕີ ຟານກວາງວິ໊ງ ເວົ້າສະເພາະ, ປະຊາຊົນຢູ່ບ້ານລາໂກ ຍາມໃດກໍ່ແມ່ນພີ່ນ້ອງຮ່ວມຊາດ, ຕ້ອງອູ້ມຊູຊ່ວຍເຫຼືອກັນຄືດັ່ງປະຊາຊົນຢູ່ຕາແສງເຮື໊ອງເລິບ ແລະເຮື໊ອງວຽດ.
    |
 |
|
ທ່ານ ພົງຄຳຮັກ ບຸດທະວົງ, ເຈົ້າເມືອງເຊໂປນ ມອບໃບຍ້ອງຍໍໃຫ້ພັນຕີ ຟານກວາງວີ໊ງ. ພາບ: bienphong.com.vn |
ເພື່ອຮັດແໜ້ນສາຍພົວພັນມິດຕະພາບລະຫວ່າງຫວຽດນາມ - ລາວ, ພັນຕີ ຟານກວາງວິ໊ງ ໄດ້ເປັນເສນາທິການໃຫ້ກົມກອງ ຈັດຕັ້ງລາຍການ ແລະການເຄື່ອນໄຫວຫຼາຍຢ່າງຄື: ການພົບປະແລກປ່ຽນລະຫວ່າງບັນດາກົມກອງປ້ອງກັນຊາຍແດນ ແມ່ນຄ້າຍທະຫານຊາຍແດນເຮື໊ອງເລິບ (ກອງບັນຊາການທະຫານຊາຍແດນແຂວງກວາງຈິ), ກອງຮ້ອຍທະຫານຊາຍແດນ 321 (ກອງບັນຊາການທະຫານແຂວງສະຫວັນນະເຂດ) ແລະຄ້າຍຕຳຫຼວດດ່ານຊາຍແດນລາໂກ (ກອງບັນຊາການປ້ອງກັນຄວາມສະຫງົບແຂວງສະຫວັນນະເຂດ); ຈັດລາຍການ “ບຸນໄຫວ້ພະຈັນ ຢູ່ເຂດຊາຍແດນ” ແລະການພົບປະແລກປ່ຽນຖອດຖອນບົດຮຽນລະຫວ່າງໂຮງຮຽນປະຖົມສຶກສາອາເວຍ, ໂຮງຮຽນມັດທະຍົມຕອນຕົ້ນຊົນເຜົ່າກິນນອນລາໂກ ກັບໂຮງຮຽນປະຖົມສຶກສາຊົນເຜົ່າເຄິ່ງກິນນອນ ແລະມັດທະຍົມຕອນຕົ້ນເຮື໊ອງວຽດ. ບັນດາລາຍການໄດ້ຈັດຕັ້ງຢູ່ຫຼັກໝາຍຊາຍແດນທີ 591, ໝົດທຸກຄົນໄດ້ພ້ອມກັນຫວນຄືນມູນເຊື້ອຄວາມສາມັກຄີແບບພິເສດລະຫວ່າງສອງປະເທດ, ພ້ອມທັງຢືນຢັນຄວາມຮັບຜິດຊອບຂອງລຸ້ນໜຸ່ມໃນການຮັກສາ ແລະເສີມຂະຫຍາຍການພົວພັນມິດຕະພາບ, ກໍ່ສ້າງເສັ້ນຊາຍແດນແຫ່ງສັນຕິພາບ, ມິດຕະພາບ, ການຮ່ວມມື, ພ້ອມກັນພັດທະນາ.
ເພື່ອໃຫ້ລາຍການດໍາເນີນໄປປະສົບຜົນສຳເລັດ, ພັນຕີ ຟານກວາງວີ໊ງ ໄດ້ເປັນເຈົ້າການຕິດຕໍ່ກັບຜູ້ໃຈບຸນໃຈກຸສົນ. ເລື່ອງລາວ “ຫວຽດນາມ - ລາວ ອ້າຍນ້ອງ” ທີ່ທ່ານພັນຕີ ຟານກວາງວີ໊ງ ໄດ້ເລົ່າສູ່ຟັງດ້ວຍຄວາມຈິງໃຈ, ຍ້ອນເຫດນັ້ນ ປະຊາຊົນ ຈຶ່ງຍິນດີໃຫ້ການສະໜັບສະໜູນບັນດາລາຍການ ດ້ວຍວັດຖຸສິ່ງຂອງທີ່ຈໍາເປັນ, ສ້າງການຫາເງິນລ້ຽງຊີບ ເພື່ອໃຫ້ປະຊາຊົນຢູ່ກຸ່ມບ້ານລາໂກ ພັດທະນາເສດຖະກິດ, ມີການດຳລົງຊີວິດເປັນປົກກະຕິ, ບືນຕົວຂຶ້ນຫຼຸດພົ້ນອອກຈາກຄວາມທຸກຍາກ. ທ່ານນາງ ດິງທິທູຮ່ຽນ (ຜູ້ອຳນວຍການບໍລິສັດ CEA PROJECTS ຈຳກັດ) ໃຫ້ຮູ້ວ່າ: “ກ່ອນໜ້ານີ້, ຂ້າພະເຈົ້າຄິດວ່າ ເລື່ອງລາວ ຫວຽດນາມ-ລາວ ແມ່ນເລື່ອງການທູດຂອງສອງພັກ ແລະສອງລັດ, ແຕ່ຍ້ອນອາໄສຄ້າຍທະຫານຊາຍແດນເຮື໊ອງເລິບ, ອາໄສບັນດາເລື່ອງລາວຂອງພັນຕີ ຟານກວາງວີ໊ງ, ຂ້າພະເຈົ້າຈຶ່ງເຂົ້າໃຈວ່າ ນັ້ນແມ່ນຄວາມຮັບຜິດຊອບຂອງປະຊາຊົນແຕ່ລະຄົນ. ຂ້າພະເຈົ້າຮູ້ສຶກດີໃຈຫຼາຍເມື່ອໄດ້ປະກອບສ່ວນເລັກໆນ້ອຍໆ ເຂົ້າໃນການຮັດແໜ້ນສາຍພົວພັນມິດຕະພາບລະຫວ່າງສອງປະເທດຫວຽດນາມ-ລາວ".
ພັນຕີ ຟານກວາງວີ໊ງ ມິີຄວາມເອົາໃຈໃສ່ເປັນພິເສດຕໍ່ກັບເດັກນ້ອຍ, ສະນັ້ນ, ໃນການພົບປະແລກປ່ຽນ ຈະມີຂອງຂວັນມອບໃຫ້ພວກນ້ອງນັກຮຽນ, ຄື: ປຶ້ມຂຽນ, ເຄື່ອງນຸ່ງຫົ່ມ, ເກີບ, ເຂົ້າສານ, ທັນຍາຫານ, ທຶນການສຶກສາໃຫ້ແກ່ນັກຮຽນທີ່ທຸກຍາກ.
|
|
 |
|
ພັນຕີ ຟານກວາງວີ໊ງ ພ້ອມດ້ວຍນັກຮຽນຫວຽດນາມ ແລະລາວ ທີ່ລາຍການ “ບຸນໄຫວ້ພະຈັນ ຢູ່ເຂດຊາຍແດນ” ປີ 2023. ພາບ: bienphong.com.vn |
ໃນ 3 ປີມໍ່ໆມານີ້, ທ່ານພັນຕີ ຟານກວາງວີ໊ງ ໄດ້ເປັນເສນາທິການ ໃຫ້ກົມກອງຈັດຕັ້ງລາຍການ “ບຸນໄຫວ້ພະຈັນຢູ່ເຂດຊາຍແດນ” ໃຫ້ແກ່ນັກຮຽນໂຮງຮຽນປະຖົມສຶກສາອາເວຍ, ໂຮງຮຽນມັດທະຍົມຕອນຕົ້ນຊົນເຜົ່າກິນນອນລາໂກ ກັບໂຮງຮຽນປະຖົມສຶກສາຊົນເຜົ່າເຄິ່ງກິນນອນ ແລະມັດທະຍົມຕອນຕົ້ນເຮື໊ອງວຽດ ເຂົ້າຮ່ວມ “ງານບຸນໄຫວ້ພະຈັນ”. ລາຍການ “ເດືອນມີນາ ຢູ່ເຂດຊາຍແດນ” ປີ 2025 ໂດຍຄ້າຍທະຫານຊາຍແດນເຮື໊ອງເລິບ ຈັດຕັ້ງໃນວັນທີ 14-15 ມີນາ. ນອກຈາກການມອບສະບຽງອາຫານ ສ້າງການຫາເງິນລ້ຽງຊີບໃຫ້ແກ່ປະຊາຊົນຢູ່ເຂດບໍລິເວນດັ່ງກ່າວແລ້ວ, ຄ້າຍທະຫານຊາຍແດນເຮື໊ອງເລິບ ໄດ້ມອບໄກ່, ເປັດ, ປາ, ໝູແມ່ພັນນັບພັນໂຕ ໃຫ້ແກ່ພະນັກງານ, ຄູອາຈານ ແລະນັກຮຽນຂອງໂຮງຮຽນປະຖົມສຶກສາອາເວຍ ແລະໂຮງຮຽນມັດທະຍົມຕອນຕົ້ນຊົນເຜົ່າກິນນອນລາໂກ.
ພັນຕີ ຟານກວາງວີ໊ງ ຍາມໃດກໍໄດ້ເອົາໃຈໃສ່ເປັນພິເສດ ຕໍ່ກອງຮ້ອຍທະຫານຊາຍແດນ 321, ເຊິ່ງແມ່ນຜູ້ທີ່ຄຽງບ່າຄຽງໄຫຼ່ໃນການປ້ອງກັນຊາຍແດນ, ຫຼັກໝາຍຊາຍແດນ, ກໍ່ສ້າງເຂດຊາຍແດນໃຫ້ມີສັນຕິພາບ, ມິດຕະພາບ, ການຮ່ວມມື, ພ້ອມກັນພັດທະນາ. ພັນຕີ ຟານກວາງວີ໊ງ ໄດ້ເຊື່ອມຕໍ່ກັບຜູ້ໃຈບຸນໃຈກຸສົນ ເພື່ອມອບຂອງຂວັນໃຫ້ແກ່ບັນດານັກຮົບທະຫານຊາຍແດນຂອງລາວ. ພັນຕີ ພູທອງ, ຫົວໜ້າກອງຮ້ອຍທະຫານຊາຍແດນ 321 ໃຫ້ຮູ້ວ່າ: “ໃນໄລຍະຜ່ານມາ, ພວກຂ້າພະເຈົ້າໄດ້ຮັບການໜູນຊ່ວຍຢ່າງຫຼວງຫຼາຍຈາກຄ້າຍທະຫານຊາຍແດນ ເຮື໊ອງເລິບ. ທາງກົມກອງໄດ້ມອບອຸປະກອນກິລາ ແລະຊ່ວຍກໍ່ສ້າງເດີ່ນບານສົ່ງ ເພື່ອຝຶກຝົນຫຼໍ່ຫຼອມ, ອອກກຳລັງກາຍ, ຮັກສາສຸຂະພາບ; ມອບສັດລ້ຽງ ແລະສະບຽງອາຫານໃຫ້ແກ່ພະນັກງານ, ນັກຮົບໃນກອງຮ້ອຍທີ່ປະສົບກັບຄວາມຫຍຸ້ງຍາກ. ສອງກົມກອງພວກເຮົາມີຄວາມສະໜິດຕິດພັນທັງໃນການເຮັດວຽກ ແລະການດຳລົງຊີວິດ, ຍ້ອນເຫດນັ້ນຄວາມສາມັກຄີຈຶ່ງນັບມື້ນັບແໜ້ນແຟ້ນ, ໝັ້ນແກ່ນຍິ່ງໆຂຶ້ນ”.
ທ່ານ ວົງວີໄລ (ຢູ່ບ້ານອາເວຍ, ກຸ່ມບ້ານລາໂກ) ເກີດຢູ່ຕາແສງເຮື໊ອງເລິບ ມີຊື່ເອີ້ນພາສາຫວຽດວ່າ ໂຮ່ກາດີ້ງ. ໃນໄລຍະຍັງເປັນໄວໜຸ່ມ, ທ່ານ ໂຮ່ກາດີ້ງ ໄດ້ເຂົ້າຮ່ວມກໍາລັງການທະຫານເມືອງເຮື້້ອງຮວ໊າ ແລະສູ້ຮົບຢູ່ສະໜາມຮົບ ແຄແຊງ. ພາຍຫຼັງປົດປ່ອຍ, ທ່ານ ໂຮ່ກາດີ້ງ ໄດ້ກາຍເປັນເລຂາຄະນະຊາວໜຸ່ມເມືອງເຮື໊ອງຮວ໊າ. ເຖິງຢ່າງໃດກໍຕາມ, ປີ 1978, ເສັ້ນຊາຍແດນໄປຜ່ານຕາແສງເຮື໊ອງເລິບ ແລະເຮື໊ອງວຽດ ຖືກແບ່ງອອກເປັນສອງປະເທດຫວຽດນາມ ແລະລາວ, ທ່ານ ໂຮ່ກາດີ້ງ ພ້ອມດ້ວຍພັນລະຍາ ໄດ້ກັບຢູ່ກຸ່ມບ້ານລາໂກ, ຖືສັນຊາດລາວ. ເຖິງຢ່າງໃດກໍຕາມ, ໃນຕະຫຼອດຫຼາຍປີມານີ້, ທ່ານ ໂຮ່ກາດີ້ງ ຍັງຮັກສາການພົວພັນອັນສະໜິດສະໜົມກັບຍາດຕິພີ່ນ້ອງຢູ່ ຫວຽດນາມ.
ສຳລັບພະນັກງານ ແລະນັກຮົບຂອງຄ້າຍທະຫານຊາຍແດນ ເຮື໊ອງເລິບ, ທ່ານ ໂຮ່ກາດີ້ງ ຍັງເປັນຜູ້ທີ່ມີຄຸນງາມຄວາມດີຕໍ່ການປະຕິວັດຫວຽດນາມ, ສະນັ້ນ, ໃນວັນບຸນ, ບຸນເຕັດຍັງໄດ້ຮັບຂອງຂວັນເພື່ອເປັນການສະແດງໃຫ້ເຫັນຄວາມຮູ້ບຸນຄຸນຂອງຄົນລຸ້ນຫຼັງທີ່ມີຕໍ່ກັບລຸ້ນກ່ອນ. ຄວາມເບີກບານມ່ວນຊື່ນຂອງທ່ານທີ່ເປັນຄົນລາວ ແຕ່ມີເລືອດເນື້ອເຊື້ອສາຍຫວຽດນາມຄົນນີ້ແມ່ນການເຫັນປະຈັກຕາການປ່ຽນແປງຂອງເສັ້ນຊາຍແດນ, ປະຊາຊົນດຳລົງຊີວິດຢູ່ໃນສັນຕິພາບ, ເອກະລາດ, ອິດສະຫຼະພາບ, ມີຄວາມຜາສຸກ, ອີ່ມໜໍາສໍາລານ. ສິ່ງທີ່ດີໃຈໄປກວ່ານັ້ນແມ່ນ ເຖິງວ່າຈະກາຍເປັນຊາວລາວ ຫຼືຊາວຫວຽດນາມ, ປະຊາຊົນຢູ່ທີ່ນີ້ກໍ່ຍັງຄົງສາມັກຄີ, ຮັກແພງກັນ, ຊ່ວຍເຫຼືອເຊິ່ງກັນ ແລະກັນພ້ອມກັບນັກຮົບທະຫານຊາຍແດນເພີ່ມພູນຄູນສ້າງນໍ້າໃຈມິດຕະພາບລະຫວ່າງສອງປະເທດໃຫ້ຂຽວສົດງົດງາມໝັ້ນຄົງຂະໜົງແກ່ນໄປຊ່ົວກາລະນານ.
ໂດຍ: ທູຈາງ