ເນື່ອງໃນໂອກາດການຢ້ຽມຢາມ, ນັກຂ່າວສໍານັກຂ່າວສານຫວຽດນາມ ປະຈຳບັນດາປະເທດເອກະລາດ (SNG) ໄດ້ສຳພາດທ່ານ ດັ້ງມິງຄອຍ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສສ ຫວຽດນາມ ປະຈຳ ສະຫະພັນລັດເຊຍ ທັງຄວບຕຳແໜ່ງ ປະຈໍາ ອຸຊະເບັກກິດສະຖານ ແລະ ອາກເມນີ.

ນັກຂ່າວ: ຂໍຮຽນທ່ານເອກອັກຄະລັດທູດ ໃຫ້ຮູ້ຂີດໝາຍສໍາຄັນໃນການພົວພັນລະຫວ່າງ ຫວຽດນາມ ແລະ ອາກເມນີ, ຫວຽດນາມ ແລະ ອຸຊະເບັກກິດສະຖານ ໃນປະຈຸບັນ?

ທ່ານ ດັ້ງມິງຄອຍ ເອກອັກຄະລັດຖະທູດຫວຽດນາມ ປະຈຳສະຫະພັນລັດເຊຍ: ສາມາດເວົ້າໄດ້ວ່າ ການພົວພັນລະຫວ່າງຫວຽດນາມ ແລະ ສາທາລະນະລັດ ອາກເມນີ ແມ່ນພິເສດທີ່ສຸດ. ສອງປະເທດໄດ້ສ້າງຕັ້ງການພົວພັນທາງການທູດຢ່າງເປັນທາງການໃນປີ 1992. ແຕ່ວ່າ ເມື່ອຫວນຄືນໄລຍະປະຫວັດສາດນັ້ນ, ນີ້ແມ່ນສອງປະເທດສາທາລະນະລັດ ໃນສະຫະພາບໂຊວຽດ. ວັນທີ 30 ມັງກອນ ປີ 1950, ພວກເຮົາໄດ້ສ້າງຕັ້ງການພົວພັນທາງການທູດຢ່າງເປັນທາງການ ກັບສະຫະພາບໂຊວຽດ, ລວມທັງສອງປະເທດດັ່ງກ່າວ. ດັ່ງນັ້ນ, ສາມາດເວົ້າໄດ້ວ່າ ການພົວພັນລະຫວ່າງຫວຽດນາມ - ອາກເມນີ - ອຸຊະເບັກກິດສະຖານ ແມ່ນຢູ່ໃນໄລຍະທາງ 75 ປີ ແລະ ໃນໄລຍະຕົ້ນ, ອາກເມນີ ແລະອຸຊະເບັກກິດສະຖານ ໄດ້ສະໜັບສະໜູນ ແລະ ຊ່ວຍເຫຼືອພວກເຮົາຫຼາຍຢ່າງ, ກໍຄືກັບບັນດາປະເທດສະມາຊິກຂອງສະຫະພາບໂຊວຽດ. ພາຍຫຼັງ 30 ປີແຫ່ງການສ້າງຕັ້ງການພົວພັນທາງການທູດຢ່າງເປັນທາງການມາຮອດປະຈຸບັນ, ທ່ານ ເຈິ່ນແທັງເໝິນ ປະທານສະພາແຫ່ງຊາດຫວຽດນາມ ຈະໄປຢ້ຽມຢາມ 2 ປະເທດດັ່ງກ່າວ ຢ່າງເປັນທາງການ ແຕ່ວັນທີ 2-8 ເມສາ ປີ 2025. ນີ້ແມ່ນການຢ້ຽມຢາມຄັ້ງທຳອິດ, ບໍ່ພຽງແຕ່ແມ່ນຂອງທ່ານປະທານສະພາແຫ່ງຊາດຫວຽດນາມ ເທົ່ານັ້ນ ຫາກຍັງແມ່ນຂອງການນຳຂັ້ນສູງຂອງຫວຽດນາມ ໄປຍັງສອງປະເທດດັ່ງກ່າວອີກດ້ວຍ. ຈຸດປະສົງຂອງການຢ້ຽມຢາມແມ່ນເພື່ອແນໃສ່ຮັກສາ, ເພີ່ມທະວີການພົວພັນມິດຕະພາບທີ່ເປັນມູນເຊື້ອໃນເມື່ອກ່ອນ ແລະຊອກຫາກາລະໂອກາດເພື່ອຊຸກຍູ້ການພົວພັນຮ່ວມມື ຂຶ້ນລະດັບສູງໃໝ່. ສິ່ງໜຶ່ງທີ່ພິເສດຕ້ອງຮັບຮູ້ວ່າ ທັງການນຳ ແລະປະຊາຊົນ ອາກເມນີ ແລະ ອຸຊະເບັກກິດສະຖານ ລ້ວນແຕ່ສະຫງວນອາລົມຈິດແບບພິເສດຕໍ່ກັບຫວຽດນາມ. ການນຳຂອງສອງປະເທດດັ່ງກ່າວກໍ່ໄດ້ມາຢ້ຽມຢາມຫວຽດນາມ ຫຼາຍຄັ້ງແລ້ວ.

leftcenterrightdel
ພິທີຕ້ອນຮັບທ່ານ ເຈິ່ນແທັງເໝິນ ປະທານສະພາແຫ່ງຊາດຫວຽດນາມ ແລະພັນລະຍາ ທີ່ສະໜາມບິນສາກົນ Zvartnots, ນະຄອນຫຼວງ Yerevan, ສາທາລະນະລັດ ອາກເມນີ ໃນວັນທີ 1 ເມສາ 2025. ພາບ: ສໍານັກຂ່າວສານຫວຽດນາມ

ນັກຂ່າວ: ຕາມທ່ານເອກອັກຄະລັດຖະທູດ ແລ້ວ, ອັນໃດແມ່ນຈຸດສຸມໃນແງ່ຫວັງການຮ່ວມມື ທີ່ຫວຽດນາມ ສາມາດສ້າງກັບ 2 ປະເທດ ດັ່ງກ່າວ?

ທ່ານ ດັ້ງມິງຄອຍ ເອກອັກຄະລັດຖະທູດຫວຽດນາມ ປະຈຳສະຫະພັນລັດເຊຍ: ອຸຊະເບັກກິດສະຖານ ໄດ້ຊ່ວຍພວກເຮົາພັດທະນາຂະແໜງນ້ຳມັນອາຍແກັດເປັນຢ່າງດີ. ສະນັ້ນ, ພວກຂ້າພະເຈົ້າຕັ້ງຄວາມຫວັງອັນໃຫຍ່ຫຼວງທີ່ສຸດ ຕໍ່ການຢ້ຽມຢາມຄັ້ງນີ້ ຂອງທ່ານປະທານສະພາແຫ່ງຊາດ. ຕາມປະສົບການຂອງພວກຂ້າພະເຈົ້າ, ການຢ້ຽມຢາມຂັ້ນສູງໄດ້ສວມບົດບາດສຳຄັນທີ່ສຸດ ໃນການເພີ່ມທະວີການພົວພັນລະຫວ່າງສອງປະເທດ, ນັບທັງບົດບາດຂອງລັດຖະສະພາ, ການທູດລະຫວ່າງສະພາແຫ່ງຊາດ. ໃນຂອບເຂດການຢ້ຽມຢາມ, ທ່ານ ເຈິ່ນແທັງເໝິນ, ປະທານສະພາແຫ່ງຊາດ ຫວຽດນາມ ມີແຜນການພົບປະສອງຝ່າຍກັບປະທານສະພາແຫ່ງຊາດອາກເມນີ, ປະທານສະພາສູງ, ປະທານສະພາຕໍ່າອຸຊະເບັກກິດສະຖານ, ເຂົ້າຢ້ຽມຂໍ່ານັບປະທານາທິບໍດີ ແລະນາຍົກລັດຖະມົນຕີຂອງສອງປະເທດນີ້. ນອກຈາກການແລກປ່ຽນ, ເພີ່ມທະວີການຮ່ວມມືລະຫວ່າງລັດຖະສະພາສອງປະເທດ, ແລກປ່ຽນປະສົບການໃນການກໍ່ສ້າງລະບອບລະບຽບການ, ກົດໝາຍ, ເພີ່ມທະວີການຮ່ວມມືລະຫວ່າງກຸ່ມສະມາຊິກລັດຖະສະພາມິດຕະພາບແລ້ວ, ຍັງສຸມໃສ່ແລກປ່ຽນກັບການນຳຂອງສອງປະເທດດັ່ງກ່າວ ກ່ຽວກັບບັນດາທິດນໍາໃຫຍ່, ກໍຄືມາດຕະການລະອຽດ ເພື່ອສືບຕໍ່ເປີດກວ້າງການຮ່ວມມືລະຫວ່າງສອງປະເທດໃນທຸກຂົງເຂດ, ໂດຍສະເພາະແມ່ນດ້ານການເມືອງ, ເສດຖະກິດ, ການຄ້າ, ວັດທະນະທຳ, ການສຶກສາກໍ່ສ້າງ.

ໃນຂອບເຂດການຢ້ຽມຢາມຄັ້ງນີ້, ລັດຖະບານສອງປະເທດ ຈະຈັດຕັ້ງເວທີປາໄສວິສາຫະກິດ ທີ່ເຕົ້າໂຮມວິສາຫະກິດທັງພາກລັດ ແລະ ເອກະຊົນຂອງສອງປະເທດ ເພື່ອປຶກສາຫາລືກ່ຽວກັບການຮ່ວມມືລະອຽດ.

ນັກຂ່າວ: ຂໍທ່ານເອກອັກຄະລັດຖະທູດ ໃຫ້ຮູ້ຈຸດພົ້ນເດັ່ນກ່ຽວກັບປະຊາຄົມຊາວຫວຽດນາມ ທີ່ພວມດໍາລົງຊີວິດຢູ່ສອງປະເທດດັ່ງກ່າວ?

ທ່ານ ດັ້ງມິງຄອຍ ເອກອັກຄະລັດຖະທູດຫວຽດນາມ ປະຈຳສະຫະພັນລັດເຊຍ: ປະຊາຄົມຊາວຫວຽດນາມ ຢູ່ອຸຊະເບັກກິດສະຖານ ແລະ ອາກເມນີ ແມ່ນມີໜ້ອຍທີ່ສຸດ. ພາຍຫຼັງສະຫະພາບໂຊວຽດ ແຕກສະຫຼາຍ ແລະປະເທດອຸຊະເບັກກິດສະຖານ ແລະ ອາກເມນີ ເປັນເອກະລາດນັ້ນ, ຈຳນວນຊາວຫວຽດນາມ ອາໄສຢູ່ 2 ປະເທດດັ່ງກ່າວໄດ້ຫຼຸດລົງຢ່າງແຮງ. ແຕ່ໃນຊຸມປີມໍ່ໆມານີ້ພັດເລີ່ມກັບມາເພີ່ມຂຶ້ນ. ຕົວຢ່າງຄື ຢູ່ປະເທດອຸຊະເບັກກິດສະຖານ ມີປະມານ 40-50 ຄົນ ທີ່ດໍາລົງຊີວິດ, ເຮັດວຽກ ແລະຮໍ່າຮຽນ, ໃນນັ້ນມີຫຼາຍຄົນໄດ້ເຊື່ອມຕົວເຂົ້າກັບສັງຄົມປະເທດປະຈໍາຖິ່ນ ເປັນຢ່າງດີ.

ຢູ່ປະເທດອາກເມມີ, ໃນຊຸມປີມໍ່ໆມານີ້, ເກືອບຄືວ່າ ບໍ່ມີຊາວຫວຽດນາມ ດໍາລົງຊີວິດຢູ່. ແຕ່ໃນປີ 2024, ພິເສດແມ່ນໃນຊຸມເດືອນທຳອິດ ຂອງປີ 2025, ຈຳນວນຊາວຫວຽດນາມ ໄປຍັງ ອາກເມນີ, ພິເສດແມ່ນ Yerevan ໄດ້ເພີ່ມຂຶ້ນຢ່າງວ່ອງໄວ. ປະຊາຄົມຊາວຫວຽດນາມ ຂອງພວກເຮົາ ຢູ່ທີ່ນີ້ຍັງບໍ່ທັນໄດ້ສ້າງຕັ້ງຂຶ້ນຢ່າງເປັນທາງການ, ມີປະມານ 20-30 ຄົນ, ໄປມາດ້ວຍວີຊາທ່ອງທ່ຽວ ຫຼືພວມປະກອບເອກະສານ. ເຖິງຢ່າງໃດກໍຕາມ, ຂ້າພະເຈົ້າເຊື່ອໝັ້ນວ່າ ດ້ວຍການຮ່ວມມືລະຫວ່າງສອງປະເທດ, ພິເສດແມ່ນພາຍຫຼັງການຢ້ຽມຢາມຂອງທ່ານ ເຈິ່ນແທັງເໝິນ ປະທານສະພາແຫ່ງຊາດຫວຽດນາມ ກໍ່ຄືຄວາມສາມາດບ່ົມຊ້ອນ ແລະ ກາລະໂອກາດຂອງສອງປະເທດ ໃນການຮ່ວມມືດ້ານເສດຖະກິດ, ການຄ້ານັ້ນ, ປະຊາຄົມຊາວຫວຽດນາມ ຢູ່ນະຄອນຫຼວງ Yerevan ຈະເພີ່ມຂຶ້ນຢ່າງວ່ອງໄວໃນໄລຍະຈະມາເຖິງ.

ນັກຂ່າວ: ຂໍຂອບໃຈທ່ານເອກອັກຄະລັດຖະທູດ!

ໂດຍ: ທູຈາງ