ທ່ານເອກອັກຄະລັດຖະທູດ ຫງວຽນມິງເຕິມ ຢືນຢັນວ່າ ພັກປະຊາຊົນປະຕິວັດລາວ ໄດ້ຮັບການສ້າງຕັ້ງຂຶ້ນຢ່າງເປັນທາງການໃນວັນທີ 22 ມີນາ 1955 ເພື່ອແນໃສ່ຕອບສະໜອງບັນດາໜ້າທີ່ໃໝ່ຂອງການປະຕິວັດ, ສືບທອດພາລະກິດອັນສະຫງ່າລາສີຂອງພັກກອມມູນິດອິນດູຈີນ. ການກຳເນີດຂອງພັກປະຊາຊົນປະຕິວັດລາວ ແມ່ນເຫດການທີ່ຂີດໝາຍບາດລ້ຽວສໍາຄັນໃນປະຫວັດສາດການປະຕິວັດລາວ. ພາຍຫຼັງການສ້າງຕັ້ງ, ພັກປະຊາຊົນປະຕິວັດລາວ ໄດ້ວາງອອກໜ້າທີ່ປະຕິວັດໃນຕໍ່ໜ້າແມ່ນ “ສາມັກຄີນໍາພາທົ່ວປວງຊົນສູ້ຊົນສໍາເລັດພາລະກິດປົດປ່ອຍຊາດ, ກໍ່ສ້າງປະເທດລາວ ສັນຕິພາບ, ປະຊາທິປະໄຕ, ເອກະພາບ ແລະເອກະລາດ”. ໃນຕະຫຼອດໄລຍະການເຄື່ອນໄຫວປະຕິວັດ, ພັກປະຊາຊົນປະຕິວັດລາວ ໄດ້ນຳພາປະຊາຊົນລາວ ບັນດາເຜົ່າຕໍ່ສູ້ຍາດເອົາເອກະລາດ, ປົດປ່ອຍຊາດ, ເປີດເສັ້ນທາງພັດທະນາປະເທດຊາດ.
    |
 |
|
ທ່ານ ຫງວຽນມິງເຕິມ ເອກອັກຄະລັດຖະທູດຫວຽດນາມ ປະຈຳ ລາວ ຕອບສຳພາດຕໍ່ນັກຂ່າວສຳນັກຂ່າວສານຫວຽດນາມ ປະຈຳ ລາວ. ພາບ: ສໍານັກຂ່າວສານຫວຽດນາມ |
ໃນໄລຍະ 70 ປີຜ່ານມາ, ພັກປະຊາຊົນປະຕິວັດລາວ ໄດ້ຄົ້ນຄວ້າ, ຊອກຫາແນວທາງທີ່ເໝາະສົມກັບສະພາບການຕົວຈິງຂອງປະເທດໃນແຕ່ລະໄລຍະລະອຽດ. ພິເສດແມ່ນນັບແຕ່ປີ 1986 ເປັນຕົ້ນມາ, ພັກປະຊາຊົນປະຕິວັດລາວ ໄດ້ກຳແໜ້ນສະພາບການຕົວຈິງຂອງປະເທດ, ຄົ້ນຄວ້າ ແລະຖອດຖອນບົດຮຽນຈາກສາກົນ, ວາງອອກແນວທາງທີ່ຖືກຕ້ອງ ເພື່ອກ້າວຂຶ້ນສັງຄົມນິຍົມເທື່ອລະກ້າວ, ສືບຕໍ່ກໍ່ສ້າງ ແລະປັບປຸງລະບອບປະຊາທິປະໄຕປະຊາຊົນ; ກໍ່ສ້າງພື້ນຖານເສດຖະກິດເອກະລາດ, ເປັນເຈົ້າຕົນເອງ; ເຕົ້າໂຮມກຳລັງແຮງຄວາມສາມັກຄີຂອງທົ່ວປວງຊົນທັງຊາດເພື່ອປົກປັກຮັກສາ, ສ້າງສາ ແລະພັດທະນາລະບອບໃໝ່...
ທ່ານເອກອັກຄະລັດຖະທູດ ຫງວຽນມິງເຕິມ ເນັ້ນໜັກວ່າ ບົນພື້ນຖານສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານ ຫວຽດນາມ-ລາວ, ພັກກອມມູນິດຫວຽດນາມ ແລະປະຊາຊົນຫວຽດນາມ ມີຄວາມປິຕິຍິນດີເປັນຢ່າງຍິ່ງ, ຕີລາຄາສູງ ແລະຊົມເຊີຍບັນດາຜົນງານອັນໃຫຍ່ຫຼວງທີ່ພັກປະຊາຊົນປະຕິວັດລາວ ບັນລຸໄດ້ໃນໄລຍະ 70 ປີຜ່ານມາ. ຜົນງານຂອງພັກປະຊາຊົນປະຕິວັດລາວ ບໍ່ພຽງແຕ່ມີຄວາມໝາຍເລິກເຊິ່ງຕໍ່ພາລະກິດສ້າງສາ, ປົກປັກຮັກສາ ແລະພັດທະນາປະເທດລາວ ເທົ່ານັ້ນ, ຫາກຍັງແມ່ນແຫຼ່ງລະດົມກຳລັງໃຈອັນໃຫຍ່ຫຼວງຕໍ່ພັກ, ລັດ ແລະປະຊາຊົນຫວຽດນາມ ໃນພາລະກິດປ່ຽນແປງໃໝ່, ກໍ່ສ້າງ ແລະປົກປັກຮັກສາປະເທດຊາດໃນປະຈຸບັນ.
ພັກ, ລັດ ແລະປະຊາຊົນຫວຽດນາມ ສະໜັບສະໜູນກິດຈະການປ່ຽນແປງໃໝ່ຢູ່ລາວ ຢ່າງແຮງ ແລະເຊື່ອໝັ້ນວ່າ ເສີມຂະຫຍາຍມູນເຊື້ອປະຕິວັດອັນສະຫງ່າລາສີ, ສືບທອດມູນເຊື້ອອັນດີງາມຂອງລຸ້ນກ່ອນ ແລະເສີມຂະຫຍາຍບັນດາຜົນງານທີ່ຍາດມາໄດ້, ພັກ, ລັດ ແລະປະຊາຊົນລາວ ອ້າຍນ້ອງຈະສືບຕໍ່ຍາດໄດ້ຜົນງານໃໝ່, ຍິ່ງໃຫຍ່ກວ່າອີກໃນພາລະກິດປ່ຽນແປງໃໝ່, ປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນປະຕິວັດລາວ ຢ່າງມີໄຊ, ຈັດຕັ້ງກອງປະຊຸມໃຫຍ່ອົງຄະນະພັກທຸກຂັ້ນສຳເລັດຜົນ, ກ້າວໄປເຖິງກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກໃນຕົ້ນປີ 2026; ກໍ່ສ້າງປະເທດລາວ ສັນຕິພາບ, ເອກະລາດ, ປະຊາທິປະໄຕ, ເອກະພາບ ແລະຈະເລີນຮຸ່ງເຮືອງຕາມເປົ້າໝາຍສັງຄົມນິຍົມ.
ທ່ານເອກອັກຄະລັດຖະທູດ ເນັ້ນໜັກວ່າ ສອງປະເທດຫວຽດນາມ ແລະລາວ ພາກພູມໃຈເມື່ອເຫັນວ່າ, ພ້ອມກັບຜົນງານສຳຄັນທີ່ສອງພັກ, ສອງລັດ ແລະປະຊາຊົນສອງປະເທດ ຫວຽດນາມ-ລາວ ບັນລຸໄດ້ໃນໄລຍະຜ່ານມາ, ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ, ການຮ່ວມມືຮອບດ້ານທີ່ຫາຍາກໃນໂລກລະຫວ່າງ ຫວຽດນາມ-ລາວ ໂດຍປະທານໂຮ່ຈີມິນ ຜູ້ຍິ່ງໃຫຍ່, ປະທານ ໄກສອນ ພົມວິຫານ ແລະປະທານ ສຸພານຸວົງ ທີ່ແສນເຄົາລົບຮັກກໍ່ຕັ້ງ, ຝຶກຝົນຫຼໍ່ຫຼອມ ແລະການນໍາສອງພັກ, ສອງລັດ ແລະປະຊາຊົນສອງປະເທດເພີ່ມພູນຄູນສ້າງ, ໄດ້ຮັບການປັບປຸງ ແລະພັດທະນາຢ່າງບໍ່ຢຸດຢັ້ງ, ນັບມື້ນັບເຂົ້າສູ່ລວງເລິກ, ແທດຈິງ ແລະມີປະສິດທິຜົນໃນທຸກຂົງເຂດ, ນຳມາເຊິ່ງຜົນປະໂຫຍດໃຫ້ປະຊາຊົນແຕ່ລະປະເທດ, ປະກອບສ່ວນຢ່າງຕັ້ງໜ້າເຂົ້າໃນພາລະກິດປ່ຽນແປງໃໝ່, ກໍ່ສ້າງ ແລະປົກປັກຮັກສາປະເທດຊາດຢູ່ແຕ່ລະປະເທດ, ປະກອບສ່ວນເຂົ້າໃນສັນຕິພາບ, ສະຖຽນລະພາບ, ການຮ່ວມມື ແລະການພັດທະນາຢູ່ພາກພື້ນ ແລະໃນໂລກ.
ໂດຍ: ຈາງຫງວຽນ