ຄວາມຈົ່ງຮັກພັກດີ

ການເດີນທາງທີ່ເຕັມໄປດ້ວຍຄວາມໝາຍ

ໃນກາງເດືອນ ມີນາ ປີ 2025, ຄະນະປະຕິບັດງານກອງບັນຊາການທະຫານແຂວງກວາງຫງາຍ ໄດ້ຈັດຕັ້ງການໄປຢ້ຽມຢາມ ແລະເຮັດວຽກຢູ່ແຂວງຈຳປາສັກ. ນີ້ແມ່ນຄັ້ງທີ 4 ທີ່ພັນຕີ ນາງ ເຈິ່ນທິຮຽບ, ເຊິ່ງເປັນແພດປະຈຳຢູ່ສຸກສາລາ B21 (ກອງບັນຊາການທະຫານແຂວງ ກວາງຫງາຍ) ໄດ້ໄປພ້ອມກັບຄະນະປະຕິບັດງານ ກອງບັນຊາການທະຫານແຂວງຈຳປາສັກ.

ພັນຕີ ນາງ ຮຽບ ແບ່ງປັນວ່າ, ພາຍຫຼັງການເດີນທາງແຕ່ລະຄັ້ງ, ຂ້າພະເຈົ້າມີຄວາມຮູ້ສຶກພິເສດ. ຢູ່ແຂວງຈໍາປາສັກ ປະຊາຊົນຍັງປະສົບກັບຄວາມຫຍຸ້ງຍາກໃນການເຂົ້າເຖິງການບໍລິການສາທາລະນະສຸກ, ດັ່ງນັ້ນ ຂ້າພະເຈົ້າ ແລະທ່ານໝໍຈຶ່ງພະຍາຍາມກວດພະຍາດ ແລະໃຫ້ຄໍາປຶກສາແກ່ປະຊາຊົນກ່ຽວກັບວິທີເບິ່ງແຍງ, ຮັກສາສຸຂະພາບຂອງເຂົາເຈົ້າ. ຂ້າພະເຈົ້າຫວັງວ່າ ກອງບັນຊາການທະຫານແຂວງ ກວາງຫງາຍ ຈະຮັກສາການເຄື່ອນໄຫວທີ່ມີຄວາມໝາຍນີ້ໄວ້ ເພື່ອຊ່ວຍປະຊາຊົນແຂວງຈໍາປາສັກ ໃຫ້ເປັນປົກກະຕິ.

ທ່ານໝໍ ຢູ່ສຸກສາລາ B21 (ກອງບັນຊາການທະຫານແຂວງກວາງຫງາຍ) ກວດພະຍາດໃຫ້ປະຊາຊົນຢູ່ເມືອງສຸຂຸມມາ, ແຂວງຈໍາປາສັກ (ປະເທດລາວ). ພາບ: ແທ່ງຢຸຍ

ຕັ້ງແຕ່ເຊົ້າໆ, ຢູ່ທີ່ຫໍປະຊຸມບ້ານ Maysensuc, ເມືອງສຸຂຸມມາ, ແຂວງຈຳປາສັກ, ປະຊາຊົນໄດ້ພາກັນມາເຕົ້າໂຮມແຕ່ເຊົ້າໆເມື່ອໄດ້ຍິນຂ່າວວ່າ ມີຄະນະທ່ານໝໍ ແລະພະຍາບານ ກອງທັບປະຊາຊົນຫວຽດນາມ ມາກວດພະຍາດ ແລະມອບຂອງຂວັນໃຫ້. ຍ້ອນເງື່ອນໄຂດ້ານພູມສັນຖານ, ສະພາບການສັນຈອນໄປມາສັບສົນ, ໝູ່ບ້ານແຫ່ງນີ້ຕັ້ງຢູ່ໃກ້ກັບຊາຍແດນໄທ, ຖະໜົນຫົນທາງໄປມາຫຍຸ້ງຍາກທີ່ສຸດ, ສະນັ້ນ ປະຊາຊົນຢູ່ທີ່ນີ້ຍາກທີ່ຈະໄດ້ໄປກວດ, ປິ່ນປົວພະຍາດຢູ່ຮາກຖານການແພດ.

ທ່ານ ບຸນຍູ ປາລາມີ ຮອງເຈົ້າເມືອງໆສຸຂຸມມາ (ແຂວງຈໍາປາສັກ) ແບ່ງປັນວ່າ: ກອງບັນຊາການທະຫານແຂວງກວາງຫງາຍ ໄດ້ມາກວດພະຍາດ, ສະໜອງຢາປົວພະຍາດໃຫ້ແກ່ປະຊາຊົນຢູ່ເມືອງສຸຂຸມມາ ຫຼາຍຄັ້ງແລ້ວ. ກຸ່ມບ້ານແຫ່ງນີ້ມີ 6 ບ້ານ, ທັງໝົດແມ່ນມີຄວາມຫຍຸ້ງຍາກຫຼາຍ, ພິເສດແມ່ນກ່ຽວກັບລະບົບການຄົມມະນາຄົມ. ສະນັ້ນ, ເມື່ອມີຄະນະທ່ານໝໍ, ພະຍາບານຫວຽດນາມ ມາໜູນຊ່ວຍປະຊາຊົນຢູ່ທີ່ນີ້, ພວກຂ້າພະເຈົ້າສະແດງຄວາມຂອບໃຈ.

ພັນເອກພິສດ ຫງວຽນຣາ, ຮອງຜູ້ບັນຊາການ, ຫົວໜ້າເສນາທິການກອງບັນຊາການທະຫານແຂວງ ກວາງຫງາຍ ມອບງົບປະມານໜູນຊ່ວຍຄ່າສ້ອມແປງເຮືອນຢູ່ໃຫ້ແກ່ປະຊາຊົນ, ພະນັກງານ, ນັກຮົບຂອງແຂວງຈໍາປາສັກ ທີ່ປະສົບກັບຄວາມຫຍຸ້ງຍາກເປັນພິເສດ. ພາບ: ແທ່ງຢຸຍ

ໃນການຢ້ຽມຢາມຄັ້ງນີ້, ພ້ອມກັບການໄປກວດ, ປິ່ນປົວພະຍາດໃຫ້ປະຊາຊົນທ້ອງຖິ່ນແລ້ວ, ຄະນະປະຕິບັດງານກອງບັນຊາການທະຫານແຂວງກວາງຫງາຍ ຍັງໄດ້ມອບເງິນຊ່ວຍເຫຼືອສ້ອມແປງເຮືອນຊານໃຫ້ແກ່ 12 ຄອບຄົວ, ພະນັກງານ, ນັກຮົບກອງບັນຊາການທະຫານແຂວງຈຳປາສັກ ທີ່ປະສົບກັບຄວາມຫຍຸ້ງຍາກເປັນພິເສດ, ໄດ້ມອບຂອງຂວັນ 150 ພູດ, ຢາປົວພະຍາດ 1.000 ກວ່າຖົງໃຫ້ປະຊາຊົນ 6 ບ້ານ ດ້ວຍຍອດມູນຄ່າທັງໝົດ 500 ລ້ານດົ່ງ. ຂອງຂວັນເຖິງວ່າບໍ່ຫຼາຍປານໃດກໍ່ຕາມ, ແຕ່ແມ່ນເຕັມໄປດ້ວຍຄວາມຮັກແພງຂອງທະຫານຫວຽດນາມ ທີ່ມີຕໍ່ປະຊາຊົນທີ່ຍັງປະສົບກັບຄວາມຫຍຸ້ງຍາກຢູ່ທີ່ນີ້.

ຮັດແໜ້ນນໍ້າໃຈມິດຕະພາບແບບພິເສດ

ທ່ານພົນຈັດຕະວາ ວິລະຕູ່ ວໍລະຈິດ, ຫົວໜ້າການເມືອງກອງບັນຊາການທະຫານແຂວງຈໍາປາສັກ ເນັ້ນໜັກວ່າ: ການຢ້ຽມຢາມ ແລະເຮັດວຽກຂອງກອງບັນຊາການທະຫານແຂວງກວາງຫງາຍ ມີຄວາມໝາຍສໍາຄັນໃນການເສີມຂະຫຍາຍສາຍພົວພັນ, ຄວາມສາມັກຄີມິດຕະພາບແບບພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດ ກໍ່ຄືກອງທັບ ແລະປະຊາຊົນແຂວງກວາງຫງາຍ-ຈໍາປາສັກ. ນ້ຳໃຈສາມັກຄີມິດຕະພາບແບບພິເສດລາວ-ຫວຽດນາມ ໄດ້ກາຍເປັນມໍລະດົກອັນລ້ຳຄ່າ. ການຢ້ຽມຢາມ ແລະການຊ່ວຍເຫຼືອຂອງກອງບັນຊາການທະຫານແຂວງກວາງຫງາຍ ໃນຄັ້ງນີ້ ໄດ້ປະກອບສ່ວນປັບປຸງຊີວິດການເປັນຢູ່ຂອງປະຊາຊົນຢູ່ບາງທ້ອງຖິ່ນຂອງເມືອງສຸຂຸມມາ ໃຫ້ດີຂຶ້ນກວ່າເກົ່າ ແລະປະຊາຊົນຢູ່ທີ່ນີ້ ກໍ່ລໍຄອຍການຕ້ອນຮັບຄະນະຜູ້ແທນ.

ການນໍາກອງບັນຊາການທະຫານສອງແຂວງກວາງຫງາຍ ແລະຈໍາປາສັກ (ລາວ) ເຊັນບົດບັນທຶກໜູນຊ່ວຍງົບປະມານກໍ່ສ້າງຄ້າຍທະຫານ ແລະສ້ອມແປງເຮືອນຢູ່ໃຫ້ແກ່ພະນັກງານ ແລະປະຊາຊົນແຂວງຈໍາປາສັກ. ພາບ: ແທ່ງຢຸຍ

ຕາມທ່ານພັນເອກພິເສດ ຫງວຽນຣາ, ຮອງຜູ້ບັນຊາການ, ຫົວໜ້າເສນາທິການກອງບັນຊາການທະຫານແຂວງກວາງຫງາຍ ແລ້ວ, ໃນຊຸມປີຜ່ານມາ, ເພື່ອຮັກສາສາຍພົວພັນແຮກສ່ຽວພິເສດລະຫວ່າງກອງບັນຊາການທະຫານ 2 ແຂວງ, ໃນແຕ່ລະປີ, ກອງບັນຊາການທະຫານ 2 ແຂວງ ໄດ້ປະຕິບັດບັນດາເນື້ອໃນຕາມລາຍການຮ່ວມມືທີ່ໄດ້ລົງນາມ; ພົບປະ, ຢ້ຽມຢາມຖາມຂ່າວ, ແລກປ່ຽນ, ໜູນຊ່ວຍເຊິ່ງກັນ ແລະກັນໃນທຸກດ້ານຂອງວຽກງານຢ່າງເປັນປະຈໍາ, ເພີ່ມທະວີການແລກປ່ຽນຂໍ້ມູນຂ່າວສານດ້ານປ້ອງກັນຊາດ-ປ້ອງກັນຄວາມສະຫງົບ, ສົມທົບກັນກໍ່ສ້າງກຳລັງປະກອບອາວຸດທ້ອງຖິ່ນໃຫ້ເຂັ້ມແຂງຮອບດ້ານ. ຄຽງຂ້າງນັ້ນ, ໃນແຕ່ລະປີ, ກອງບັນຊາການທະຫານແຂວງກວາງຫງາຍ ກໍ່ໄດ້ຈັດຕັ້ງຄະນະຜູ້ແທນໄປຢ້ຽມຢາມບັນດາແຂວງຂອງລາວ, ໜູນຊ່ວຍງົບປະມານກໍ່ສ້າງຄ້າຍທະຫານ, ສ້ອມແປງເຮືອນຢູ່, ກວດພະຍາດ, ສະໜອງຢາປົວພະຍາດ, ພ້ອມທັງຊ່ວຍເຫຼືອປະຊາຊົນປະເທດເພື່ອນ ຜ່ານຜ່າຄວາມຫຍຸ້ງຍາກຈາກໄພທຳມະຊາດ ແລະໂລກລະບາດ.

ໃນການຢ້ຽມຢາມຄັ້ງນີ້, ຄະນະປະຕິບັດງານໄດ້ມອບຂອງຂວັນຫຼາຍຢ່າງ ພ້ອມກັບເຄື່ອງໃຊ້ທີ່ຈຳເປັນ ເພື່ອຊ່ວຍເຫຼືອປະຊາຊົນແຂວງຈຳປາສັກ ຕ້ອນຮັບບຸນປີໃໝ່ລາວ ຢ່າງມີຄວາມເບີກບານມ່ວນຊື່ນ, ມີຄວາມສຸກ ແລະອົບອຸ່ນ. ຜ່ານນັ້ນ, ປະກອບສ່ວນຮັດແໜ້ນສາຍພົວພັນສາມັກຄີລະຫວ່າງປະຊາຊົນສອງປະເທດ ກໍ່ຄືກອງບັນຊາການທະຫານຂອງສອງແຂວງ ກວາງຫງາຍ ແລະຈຳປາສັກ ໃຫ້ນັບມື້ນັບແໜ້ນແຟ້ນກວ່າອີກ.

ການໄປປະຕິບັດງານຢູ່ລາວ ໃນແຕ່ລະປີຂອງກອງບັນຊາການທະຫານແຂວງກວາງຫງາຍ ແມ່ນມີກິດຈະກຳເຄື່ອນໄຫວທີ່ມີຄວາມໝາຍຫຼາຍຢ່າງ ໄດ້ປະກອບສ່ວນຮັດແໜ້ນນ້ຳໃຈມິດຕະພາບທີ່ປະຊາຊົນ, ທະຫານສອງແຂວງ, ສອງປະເທດຫວຽດນາມ ແລະລາວ ໄດ້ເພີ່ມພູນຄູນສ້າງມາແຕ່ກ່ອນເຖິງປະຈຸບັນ, ເພື່ອຈາກນັ້ນເພີ່ມທະວີຄວາມໄວ້ເນື້ອເຊື່ອໃຈ, ຄວາມສະໜິດຕິດພັນ, ສະຫງວນອາລົມຈິດ, ຄວາມຮັກແພງໃຫ້ກັນໃຫ້ເລິກເຊິ່ງກວ່າ. ນັ້ນແມ່ນພື້ນຖານອັນໜັກແໜ້ນເພື່ອເພີ່ມທະວີ ແລະພັດທະນາສາຍພົວພັນມິດຕະພາບ, ຄວາມສາມັກຄີແບບພິເສດຫວຽດນາມ - ລາວ ໃນໄລຍະໃໝ່.

ໂດຍ: ຈາງຫງວຽນ