ຊຸກຍູ້ການພົວພັນລະຫວ່າງນະຄອນໂຮ່ຈີມິນ ແລະບັນດາທ້ອງຖິ່ນຂອງ ລາວ
ກປ.ອອນໄລ - ຕອນຄໍ່າວັນທີ 29 ສິງຫາ, ສະຫາຍ ຫງວຽນວັນເນນ ເລຂາພັກນະຄອນໂຮ່ຈີມິນ ໄດ້ຕ້ອນຮັບສະຫາຍ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ; ສະຫາຍ ວິໄລວົງ ບຸດດາຄໍາ ເລຂາພັກແຂວງ, ເຈົ້າແຂວງຈໍາປາສັກ ແລະສະຫາຍ ສັນຕິພາບ ພົມວິຫານ ເລຂາພັກແຂວງ, ເຈົ້າແຂວງສະຫວັນນະເຂດ, ເນື່ອງໃນໂອກາດ ຄະນະຜູ້ແທນ ມາຢ້ຽມຢາມນະຄອນ ໂຮ່ຈີມິນ ເຂົ້າຮ່ວມພິທີສະເຫຼີມສະຫຼອງ 60 ປີແຫ່ງວັນສ້າງຕັ້ງການພົວພັນທາງການທູດ (5-9-1962 / 5-9-2022) ແລະ 45 ປີແຫ່ງວັນເຊັນສົນທິສັນຍາມິດຕະພາບ ແລະການຮ່ວມມື ຫວຽດນາມ-ລາວ (18-7-1977 / 18-7-2022).
|
|
ສະຫາຍ ຫງວຽນວັນເນນ ພ້ອມດ້ວຍຄະນະຜູ້ແທນຫວຽດນາມ ແລະ ລາວ ຖ່າຍຮູບເປັນທີ່ລະນຶກ. ພາບ: thanhuytphcm.vn |
ສະຫາຍ ຫງວຽນວັນເນນ ເນັ້ນໜັກວ່າ ຫວຽດນາມ ແລະລາວ ໄດ້ສ້າງຕັ້ງການພົວພັນມິດຕະພາບແບບພິເສດ, ຍິ່ງໃຫຍ່, ຫຼາຍລະດັບ, ຫຼາຍຂະແໜງ, ຫຼາຍຂົງເຂດ ນັບແຕ່ສູນກາງລົງຮອດທ້ອງຖິ່ນ; ສະຫາຍ ຢັ້ງຢືນວ່າ ບົນເນື້ອໃນຈິດໃຈຮ່ວມມືຢ່າງຮອບດ້ານ, ນະຄອນໂຮ່ຈີມິນ ໄດ້ ແລະພວມຮີບຮ້ອນຄົ້ນຄວ້າປະຕິບັດຄວາມເຫັນດີເປັນເອກະພາບ ກັບນະຄອນຫຼວງວຽງຈັນ, ແຂວງຈໍາປາສັກ ແລະສະຫວັນນະເຂດ ໃນການໄປປະຕິບັດງານຂອງຄະນະຜູ້ແທນນະຄອນ ທີ່ບັນດາທ້ອງຖິ່ນຂອງລາວ ໃນໄລຍະຜ່ານມາ ແລະບັນດາຂໍ້ຕົກລົງກ່ອນໜ້ານັ້ນ.
ການນໍານະຄອນຫຼວງວຽງຈັນ, ແຂວງຈໍາປາສັກ ແລະສະຫວັນນະເຂດ ສະແດງຄວາມຕື້ນຕັນໃຈ ເມື່ອເຫັນວ່າ ຫວຽດນາມ, ນະຄອນໂຮ່ຈີມິນ ຈັດຕັ້ງຫຼາຍກິດຈະກໍາຢ່າງຟົດຟື້ນເນື່ອງໃນໂອກາດສະເຫຼີມສະຫຼອງປີສາມັກຄີມິດຕະພາບ ຫວຽດນາມ-ລາວ, ລາວ-ຫວຽດນາມ 2022; ພ້ອມທັງສະແດງຄວາມເຊື່ອໝັ້ນວ່າ ການພົວພັນຮ່ວມມືລະຫວ່າງສອງປະເທດ ນັບມື້ພັດທະນາໄວ ແລະຍືນຍົງ.
ພາຍຫຼັງການຕ້ອນຮັບ, ການນໍານະຄອນໂຮ່ຈີມິນ ແລະນະຄອນຫຼວງວຽງຈັນ, ແຂວງຈໍາປາສັກ ແລະແຂວງສະຫວັນນະເຂດ ໄດ້ຮ່ວມເປັນສັກຂີພິຍານພິທີລົງນາມບົດບັນທຶກຊ່ວຍຈໍາວ່າດ້ວຍການຮ່ວມມືລະຫວ່າງສະຫະພັນແມ່ຍິງນະຄອນໂຮ່ຈີມິນ ກັບສະຫະພັນແມ່ຍິງນະຄອນຫຼວງວຽງຈັນ ແລະສະຫະພັນແມ່ຍິງແຂວງຈໍາປາສັກ.
ໂດຍ: ກວຽດເຕິມ