ທ່ານ ຫງວຽນກ໊ວກຢຸງ ຮອງລັດຖະມົນຕີກະຊວງການຕ່າງປະເທດຫວຽດນາມ ຕ້ອນຮັບເອກອັກຄະລັດຖະທູດລາວ ເຂົ້າຢ້ຽມຂໍ່ານັບ
ກປ.ອອນໄລ - ຕອນເຊົ້າວັນທີ 8 ພະຈິກ, ທີ່ສໍານັກງານກະຊວງການຕ່າງປະເທດ, ທ່ານ ຫງວຽນກ໊ວກຢຸງ ຮອງລັດຖະມົນຕີກະຊວງການຕ່າງປະເທດຫວຽດນາມ ໄດ້ໃຫ້ການຕ້ອນຮັບທ່ານ ແສງເພັດ ຮຸ່ງບຸນຍວງ ເອກອັກຄະລັດຖະທູດລາວ ເຂົ້າຢ້ຽມຂໍ່ານັບ, ເນື່ອງໃນໂອກາດທ່ານມາຮັບໜ້າທີ່ຢູ່ຫວຽດນາມ.
ທີ່ການຕ້ອນຮັບ, ທ່ານ ຫງວຽນກ໊ວກຢຸງ ຂໍ່ານັບຮັບຕ້ອນທ່ານ ແສງເພັດ ຮຸ່ງບຸນຍວງ ມາຮັບໜ້າທີ່ຢູ່ຫວຽດນາມ ຢ່າງສຸດໃຈ; ປາດຖະໜາຢາກໄດ້ຮັບການຮ່ວມມືຢ່າງແໜ້ນແຟ້ນຂອງທ່ານ ເພື່ອແນໃສ່ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານຫວຽດນາມ-ລາວ ກໍ່ຄືຊຸກຍູ້ການຮ່ວມມືລະຫວ່າງສອງກະຊວງການຕ່າງປະເທດ.
|
|
ທ່ານ ຫງວຽນກ໊ວກຢຸງ ຮອງລັດຖະມົນຕີກະຊວງການຕ່າງປະເທດຫວຽດນາມ ຂ່ຳນັບຮັບຕ້ອນທ່ານແສງເພັດ ຮຸ່ງບຸນຍວງ ເອກອັກຄະລັດຖະທູດລາວ ມາຮັບໜ້າທີ່ຢູ່ຫວຽດນາມ. ພາບ: baoquocte.vn. |
ເພື່ອສືບຕໍ່ຊຸກຍູ້ການພົວພັນສອງປະເທດ ແລະສອງກະຊວງການຕ່າງປະເທດໃນໄລຍະຈະມາເຖິງ, ທ່ານ ຫງວຽນກ໊ວກຢຸງ ສະເໜີໃຫ້ທ່ານ ແສງເພັດ ຮຸ່ງບຸນຍວງ ສົມທົບກັນປະຕິບັດບັນດາການຢ້ຽມຢາມຂອງການນໍາຂັ້ນສູງເປັນຢ່າງດີ; ກະກຽມເນື້ອໃນການພົບປະປະຈໍາປີຂອງກົມການເມືອງສອງປະເທດ ແລະກອງປະຊຸມຄະນະກຳມະການລະຫວ່າງລັດຖະບານ ຄັ້ງທີ 42 ຢູ່ລາວ ເປັນຢ່າງດີ.
ຫວຽດນາມ ປາດຖະໜາວ່າ ລາວ ຈະສືບຕໍ່ໃຫ້ການຮ່ວມມື, ສົມທົບກັນຢ່າງແໜ້ນແຟ້ນແນໃສ່ສືບຕໍ່ປະກອບສ່ວນຢ່າງຕັ້ງໜ້າໃຫ້ແກ່ການພັດທະນາຂອງປະຊາຄົມອາຊຽນ, ຮັກສາຄວາມສາມັກຄີ ກໍ່ຄືບົດບາດເປັນໃຈກາງຂອງອາຊຽນ ໃນການແກ້ໄຂບັນດາສິ່ງທ້າທາຍຕ່າງໆຂອງພາກພື້ນ, ໃນນັ້ນມີທະເລຕາເວັນອອກ ແລະການຮ່ວມມືນໍາໃຊ້ແຫຼ່ງນໍ້າແມ່ນໍ້າຂອງແບບຍືນຍົງ ແລະປະສິດທິຜົນ.
|
|
ບັນຍາກາດທີ່ການຕ້ອນຮັບ. ພາບ: baoquocte.vn. |
ສ່ວນທ່ານ ແສງເພັດ ຮຸ່ງບຸນຍວງ ເນັ້ນໜັກວ່າ, ທ່ານຈະມານະພະຍາຍາມເຮັດຈົນສຸດຄວາມສາມາດຂອງຕົນ, ແນໃສ່ຊຸກຍູ້ບັນດາການເຄື່ອນໄຫວຮ່ວມມືຢ່າງແທດຈິງ, ນໍາສອງປະເທດນັບມື້ນັບກ້າວເຂົ້າສູ່ລວງເລິກ; ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານຫວຽດນາມ-ລາວ ກໍ່ຄືຊຸກຍູ້ການຮ່ວມມືລະຫວ່າງກະຊວງການຕ່າງປະເທດຂອງສອງປະເທດ.
ໂດຍ: ກວຽດເຕິມ