ກະຊວງອຸດສາຫະກໍາ ແລະການຄ້າລາວ ໂຄສະນາກ່ຽວກັບຄວາມສໍາຄັນຂອງໄຊຊະນະດ້ຽນບຽນຝູ
ກປ.ອອນໄລ - ວັນທີ 16 ພຶດສະພາ, ຢູ່ນະຄອນຫຼວງວຽງຈັນ, ກະຊວງອຸດສາຫະກໍາ ແລະການຄ້າລາວ ໄດ້ຈັດຕັ້ງກອງປະຊຸມໂຄສະນາກ່ຽວກັບບັນດາວັນບຸນປະຫວັດສາດສໍາຄັນໃຫ້ແກ່ພະນັກງານ, ພາລະກອນຂອງກະຊວງອຸດສາຫະກໍາ ແລະການຄ້າລາວ ເນື່ອງໃນໂອກາດສະເຫຼີມສະຫຼອງ 65 ປີແຫ່ງວັນໄຊຊະນະດ້ຽນບຽນຝູ.
ເຂົ້າຮ່ວມ ແລະໂອ້ລົມທີ່ກອງປະຊຸມມີທ່ານພັນເອກພິເສດ ຕ່າວວັນທ໊າຍ, ທີ່ປຶກສາທູດປ້ອງກັນຊາດຫວຽດນາມ ປະຈໍາລາວ, ທ່ານ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະການຄ້າລາວ ພ້ອມດ້ວຍພະນັກງານ, ພາລະກອນຂອງກະຊວງອຸດສາຫະກໍາ ແລະການຄ້າລາວ ກວ່າ 200 ຄົນ.
ເມື່ອໂອ້ລົມທີ່ກອງປະຊຸມ, ທ່ານພັນເອກພິເສດ ຕ່າວວັນທ໊າຍ ເນັ້ນໜັກວ່າ ໄຊຊະນະດ້ຽນບຽນຝູ ແມ່ນໜຶ່ງໃນບັນດາຈຸດສູງທີ່ຮຸ່ງເຮືອງເຫຼືອງເຫຼື້ອມ, ແມ່ນຄວາມສໍາເລັດມະຫັດສະຈັນທີ່ສະຫງ່າລາສີ “ດັງກ້ອງກັງວານ, ສັ່ນສະເທືອນໄປທົ່ວໂລກ”, ຢຸດຕິແອກປົກຄອງຂອງພວກລ່າເມືອງຂຶ້ນຝະລັ່ງ ຢູ່ປະເທດຫວຽດນາມ ແລະປະເທດຕ່າງໆຢູ່ແຫຼມອິນດູຈີນ ຢ່າງສົມບູນ, ສ້າງສັນຕິພາບຄືນໃໝ່ຢູ່ອິນດູຈີນ; ຢັ້ງຢືນວ່າ ໄຊຊະນະດ້ຽນບຽນຝູ ແມ່ນໄຊຊະນະລວມຂອງບັນດາຊົນຊາດ ທີ່ຖືກກົດຂີ່ຂູດຮີດ ແລະປະຊາທິປະໄຕ, ຄວາມກ້າວໜ້າໃນໂລກ, ແມ່ນໄຊຊະນະລວມຂອງປະຊາຊົນສາມປະເທດອິນດູຈີນ ແມ່ນ ຫວຽດນາມ-ລາວ-ກໍາປູເຈຍ.
|
|
ບັນຍາກາດທີ່ກອງປະຊຸມໂຄສະນາ. ພາບ: ສໍານັກຂ່າວສານຫວຽດນາມ. |
ທ່ານ ເຂັມມະນີ ພົນເສນາ ຂອບໃຈທ່ານພັນເອກພິເສດ ຕ່າວວັນທ໊າຍ ໄດ້ໂອ້ລົມກ່ຽວກັບມູນເຊື້ອ, ຄວາມໝາຍປະຫວັດສາດຂອງໄຊຊະນະດ້ຽນບຽນຝູ. ຜ່ານນັ້ນ, ຊ່ວຍໃຫ້ພະນັກງານ, ພາລະກອນກະຊວງອຸດສາຫະກໍາ ແລະການຄ້າລາວ ໄດ້ຮູ້ ແລະເຂົ້າໃຈກ່ຽວກັບປະຫວັດສາດ, ຄວາມໝາຍຂອງໄຊຊະນະດ້ຽນບຽນຝູ, ກ່ຽວກັບມູນເຊື້ອພິລະອາດຫານຂອງກອງທັບປະຊາຊົນຫວຽດນາມ; ມູນເຊື້ອ ສາມັກຄີແບບພິເສດ-ການຮ່ວມສໍາພັນສູ້ຮົບທີ່ສັດຊື່ບໍລິສຸດ, ສະໜິດສະໜົມ ລາວ-ຫວຽດນາມ ຢ່າງເລິກເຊິ່ງກວ່າອີກ; ພ້ອມທັງຢືນຢັນວ່າ, ກະຊວງອຸດສາຫະກໍາລາວ ຈະສືບຕໍ່ປະກອບສ່ວນຕັ້ງໜ້າ, ຊ່ວຍເພີ່ມທະວີ ແລະພັດທະນາສາຍພົວພັນແບບພິເສດ ລາວ-ຫວຽດນາມ ໃຫ້ໝັ້ນຄົງ, ຍືນຍົງຕະຫຼອດໄປ ແລະນັບມື້ນັບເກີດດອກອອກຜົນ.
ໂດຍ: ທູຈາງ