ທີ່ການພົບປະ, ທ່ານພົນເອກ ຟານວັນຢາງ ຢັ້ງຢືນວ່າ ການຢ້ຽມຢາມຂອງທ່ານ ໂຕເລິມ ເລຂາທິການໃຫຍ່ ແມ່ນການຢ້ຽມຢາມຄັ້ງທໍາອິດຂອງການນໍາຂັ້ນສູງຫວຽດນາມ ໄປຍັງ ແຟງລັງ ນັບຕັ້ງແຕ່ສອງປະເທດສ້າງຕັ້ງການພົວພັນທາງການທູດປີ 1973. ເລື່ອງສອງຝ່າຍອອກຖະແຫຼງການຮ່ວມກ່ຽວກັບການສ້າງຕັ້ງຂອບການພົວພັນຄູ່ຮ່ວມມືຍຸດທະສາດ ເນື່ອງໃນໂອກາດການຢ້ຽມຢາມ ແຟງລັງ ຢ່າງເປັນທາງການຂອງທ່ານ ໂຕເລິມ ເລຂາທິການໃຫຍ່ ສະແດງຄໍາໝັ້ນສັນຍາຊຸກຍູ້ການຮ່ວມມື, ພັດທະນາຮອບດ້ານ, ເລິກເຊິ່ງ, ກວ້າງຂວາງ, ສອດຄ່ອງກັບຜົນປະໂຫຍດ, ທ່າແຮງຂອງສອງຝ່າຍ.

ທ່ານພົນເອກ ຟານວັນຢາງ ເນັ້ນໜັກວ່າ ຫວຽດນາມ ຢືດໝັ້ນນະໂຍບາຍປ້ອງກັນຊາດ “4 ບໍ່”. ຫວຽດນາມ ປາດຖະໜາຢາກເປີດກວ້າງການຮ່ວມມືດ້ານປ້ອງກັນຊາດສອງຝ່າຍ ແລະຫຼາຍຝ່າຍ, ບົນພື້ນຖານຄວາມສະເໝີພາບ, ເຄົາລົບເຊິ່ງກັນ ແລະກັນເພື່ອຜົນປະໂຫຍດລວມ, ປະກອບສ່ວນຮັກສາສັນຕິພາບ, ສະຖຽນລະພາບ, ການຮ່ວມມື, ພັດທະນາຢູ່ພາກພື້ນ ແລະໃນໂລກ.

leftcenterrightdel
ທ່ານພົນເອກ ຟານວັນຢາງ ແລະທ່ານ Antti Hakkanen ລັດຖະມົນຕີກະຊວງປ້ອງກັນປະເທດແຟງລັງ. ພາບ: ທູຈາງ

ທ່ານພົນເອກ ຟານວັນຢາງ ຫວັງວ່າ ແຟງລັງ ຈະສະໜັບສະໜູນຫຼັກການເຫັນດີເຫັນພ້ອມຂອງອາຊຽນ. ກ່ຽວກັບບັນຫາທະເລຕາເວັນອອກ, ຫວຽດນາມ ຫວັງວ່າ ແຟງລັງ ຈະສະໜັບສະໜູນຫຼັກການແກ້ໄຂການແກ່ງແຍ້ງໂດຍສັນຕິວິທີ, ບົນພື້ນຖານເຄົາລົບເອກະລາດ, ອະທິປະໄຕ ແລະຜົນປະໂຫຍດອັນຊອບທໍາຂອງບັນດາປະເທດ; ເຄົາລົບກົດໝາຍສາກົນ, ພິເສດແມ່ນສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລ (UNCLOS) ປີ 1982.

ທ່ານພົນເອກ ຟານວັນຢາງ ຢືນຢັນວ່າ ຫວຽດນາມ ພ້ອມທີ່ຈະບໍາລຸງສ້າງພາສາຫວຽດ ໃຫ້ນາຍທະຫານກອງທັບແຟງລັງ, ພ້ອມທັງເຊີນເຈົ້າໜ້າທີ່ອາວຸໂສກະຊວງປ້ອງກັນປະເທດແຟງລັງ ເຂົ້າຮ່ວມຊຸດບໍາລຸງສ້າງເຈົ້າໜ້າທີ່ອາວຸໂສປ້ອງກັນຊາດ ຢູ່ຫວຽດນາມ.

ໃນຂົງເຂດອຸດສາຫະກໍາປ້ອງກັນຊາດ, ຫວຽດນາມ ຫວັງວ່າ ສອງຝ່າຍຈະຮ່ວມມືໃນພື້ນຖານທີ່ມີຜົນປະໂຫຍດໃຫ້ແກ່ສອງຝ່າຍ. ຂອບໃຈແຟງລັງ ໄດ້ຈັດສົ່ງວິສາຫະກິດເຂົ້າຮ່ວມວາງສະແດງຜະລິດຕະພັນຢູ່ງານວາງສະແດງປ້ອງກັນຊາດສາກົນ ຫວຽດນາມ 2024...

ທ່ານລັດຖະມົນຕີ Antti Hakkanen ຕີລາຄາສູງບົດບາດ, ທີ່ຕັ້ງ ແລະບັນດາຜົນງານ ເຊິ່ງຫວຽດນາມ ບັນລຸໄດ້ໃນການພັດທະນາເສດຖະກິດ-ສັງຄົມ. ເນັ້ນໜັກເຖິງຄວາມສຳຄັນພິເສດຂອງການຢ້ຽມຢາມ ແຟງລັງ ຂອງທ່ານ ໂຕເລິມ ເລຂາທິການໃຫຍ່, ທ່ານລັດຖະມົນຕີ Antti Hakkanen ເຊື່ອໝັ້ນວ່າ ດ້ວຍການພັດທະນາອັນດີງາມ ແລະການພົວພັນມິດຕະພາບທີ່ເປັນມູນເຊື້ອລະຫວ່າງສອງປະເທດນັບມື້ນັບພັດທະນາ, ການຮ່ວມມືດ້ານປ້ອງກັນຊາດສອງຝ່າຍຈະສືບຕໍ່ພັດທະນາ.

ໃນໄລຍະຈະມາເຖິງ, ເພື່ອສອດຄ່ອງກັບການພົວພັນມິດຕະພາບທີ່ເປັນມູນເຊື້ອ ແລະຄູ່ຮ່ວມມືຍຸດທະສາດລະຫວ່າງສອງປະເທດ, ສອງຝ່າຍເຫັນດີເປັນເອກະພາບຄົ້ນຄວ້າ ແລະສົມທົບກັນຈັດຕັ້ງປະຕິບັດບັນດາເນື້ອໃນການຮ່ວມມື ຄື: ແລກປ່ຽນຄະນະຜູ້ແທນທຸກຂັ້ນ, ໂດຍສະເພາະແມ່ນຂັ້ນສູງ; ອຸດສາຫະກໍາປ້ອງກັນຊາດ, ຮັກສາສັນຕິພາບ ສປຊ, ບໍາລຸງສ້າງ; ຄົ້ນຄວ້າສ້າງຕັ້ງກົນໄກທາບທາມ, ການພົບປະເຈລະຈາ; ແກ້ໄຂຜົນຮ້າຍຢ້ອນຫຼັງຈາກສົງຄາມ; ສະໜັບສະໜູນ, ສົມທົບກັນໃນຂອບເຂດການຮ່ວມມືລະຫວ່າງຫວຽດນາມ ແລະອີຢູ.

ເນື່ອງໃນໂອກາດນີ້, ທ່ານພົນເອກ ຟານວັນຢາງ ໄດ້ເຊື້ອເຊີນທ່ານ Antti Hakkanen ລັດຖະມົນຕີກະຊວງປ້ອງກັນປະເທດແຟງລັງ ໄປຢ້ຽມຢາມຫວຽດນາມ ຢ່າງເປັນທາງການ ໃນເວລາທີ່ເໝາະສົມ.

ໂດຍ: ໄຊນີດາ