ທ່ານພົນເອກ ຫງວຽນເຕິນເກືອງ ເປັນປະທານການພົບປະສະເຫຼີມສະຫຼອງ 80 ປີແຫ່ງວັນມູນເຊື້ອກົມໃຫຍ່ເສນາທິການ
ກປ.ອອນໄລ - ຕອນເຊົ້າວັນທີ 23 ສິງຫາ, ຢູ່ນະຄອນໂຮ່ຈີມິນ, ກົມໃຫຍ່ເສນາທິການກອງທັບປະຊາຊົນຫວຽດນາມ ໄດ້ຈັດຕັ້ງການພົບປະກັບຜູ້ຕາງໜ້າພະນັກງານຮຸ່ນຕ່າງໆ ເນື່ອງໃນໂອກາດສະເຫຼີມສະຫຼອງ 80 ປີແຫ່ງວັນມູນເຊື້ອກົມໃຫຍ່ເສນາທິການ (7 ກັນຍາ 1945 / 7 ກັນຍາ 2025) ແລະໄດ້ຮັບນາມມະຍົດວິລະຊົນກໍາລັງປະກອບອາວຸດປະຊາຊົນ. ທ່ານພົນເອກ ຫງວຽນເຕິນເກືອງ, ກໍາມະການສູນກາງພັກ, ຄະນະປະຈໍາຄະນະພັກການທະຫານສູນກາງ, ຫົວໜ້າກົມໃຫຍ່ເສນາທິການກອງທັບປະຊາຊົນຫວຽດນາມ, ຮອງລັດຖະມົນຕີກະຊວງປ້ອງກັນປະເທດ ເປັນປະທານການພົບປະ.
    |
 |
|
ຜູ້ແທນເຂົ້າຮ່ວມການພົບປະ. ພາບ: ຊວນເກື່ອງ. |
ທີ່ການພົບປະ, ທ່ານພົນເອກ ຫງວຽນເຕິນເກືອງ ໄດ້ແຈ້ງໃຫ້ບັນດາຜູ້ແທນຮັບຊາບ ກ່ຽວກັບສະພາບການໂລກ, ພາກພື້ນ ແລະພາຍໃນປະເທດ ແລະໝາກຜົນພົ້ນເດັ່ນໃນວຽກງານການທະຫານ, ການປ້ອງກັນຊາດ, ໝາກຜົນຂອງການຈັດຕັ້ງກອງປະຊຸມໃຫຍ່ທຸກຂັ້ນ ມຸ່ງໄປເຖິງກອງປະຊຸມໃຫຍ່ຄັ້ງທີ XIV ຂອງພັກ, ບັນດາການເຄື່ອນໄຫວສະເຫຼີມສະຫຼອງ 80 ປີແຫ່ງວັນມູນເຊື້ອກົມໃຫຍ່ເສນາທິການ ແລະບາງໜ້າທີ່ຈຸດສຸມຂອງກົມໃຫຍ່ເສນາທິການ ໃນໄລຍະຈະມາເຖິງ.
|
|
 |
|
ທ່ານພົນເອກ ຫງວຽນເຕິນເກືອງ ກ່າວຄໍາເຫັນທີ່ການພົບປະ. ພາບ: ຊວນເກື່ອງ. |
ຕາງໜ້າການນຳກົມໃຫຍ່ເສນາທິການ, ທ່ານພົນເອກ ຫງວຽນເຕິນເກືອງ ສະແດງຄວາມຂອບອົກຂອບໃຈ ແລະຮູ້ບຸນຄຸນອັນເລິກເຊິ່ງມາຍັງພະນັກງານ, ນັກຮົບກົມໃຫຍ່ເສນາທິການ ຜ່ານບັນດາໄລຍະທີ່ໄດ້ປະກອບເຫື່ອແຮງ, ເສຍສະຫຼະເລືອດເນື້ອ ແລະອຸທິດສ່ວນໃຫ້ແກ່ພາລະກິດຕໍ່ສູ້ຍາດເອົາເອກະລາດແຫ່ງຊາດ, ທ້ອນໂຮມປະເທດຊາດເປັນເອກະພາບ, ກໍ່ຄືໃນພາລະກິດກໍ່ສ້າງພື້ນຖານປ້ອງກັນຊາດທົ່ວປວງຊົນ, ພາລະກິດກໍ່ສ້າງກອງທັບປະຊາຊົນຫວຽດນາມ , ກໍ່ສ້າງກົມໃຫຍ່ເສນາທິການ ໃຫ້ເຂັ້ມແຂງ ແລະເຕີບໃຫຍ່ຂະຫຍາຍຕົວ, ປະກອບສ່ວນສ້າງສາ ແລະປົກປັກຮັກສາປະເທດຊາດຫວຽດນາມ ສັງຄົມນິຍົມໄວ້ຢ່າງໝັ້ນຄົງ.
|
|
 |
|
ບັນຍາກາດທີ່ການພົບປະ. ພາບ: ຊວນເກື່ອງ. |
ທ່ານພົນເອກ ຫງວຽນເຕິນເກືອງ ຫວັງວ່າ ບັນດາສະຫາຍນາຍພົນ, ພະນັກງານຂັ້ນສູງຂອງກົມໃຫຍ່ເສນາທິການ ຜ່ານບັນດາໄລຍະ, ດ້ວຍຄວາມຮູ້, ບົດຮຽນປະສົບການຂອງຕົນໃນການກໍ່ສ້າງກອງທັບ, ປັບປຸງການປ້ອງກັນຊາດ ແລະກໍ່ສ້າງກົມໃຫຍ່ເສນາທິການ ໃນໄລຍະຜ່ານມາ, ຈະສືບຕໍ່ເສີມຂະຫຍາຍມູນເຊື້ອປະຕິວັດ; ເອົາໃຈໃສ່, ຕິດຕາມ, ປະກອບເຫື່ອແຮງ, ສະຕິປັນຍາ ເພື່ອກໍ່ສ້າງກົມໃຫຍ່ເສນາທິການ ໃຫ້ນັບມື້ນັບໝັ້ນຄົງເຂັ້ມແຂງ, ປະຕິບັດສຳເລັດທຸກໜ້າທີ່ທີ່ໄດ້ຮັບມອບໝາຍ, ສົມກັບຄວາມໄວ້ເນື້ອເຊື່ອໃຈຂອງພັກ, ລັດ, ກອງທັບ ແລະປະຊາຊົນ, ປະກອບສ່ວນເຂົ້າໃນພາລະກິດສ້າງສາ ແລະປົກປັກຮັກສາປະເທດຊາດ...
ໂດຍ: ໄຊຊະນະ