ຜັນຂະຫຍາຍວຽກງານຊອກຫາຜູ້ປະສົບເຄາະຮ້າຍຢູ່ນະຄອນຫຼວງ Naypyidaw ໃນທັນທີ

ຢູ່ທີ່ນີ້, ຜ່ານການແລກປ່ຽນກັບຝ່າຍມຽນມາ, ສອງຝ່າຍໄດ້ເຫັນດີເປັນເອກະພາບວ່າ ກໍາລັງຂອງຫວຽດນາມ ຈະຈັດຕັ້ງການຊອກຫາຜູ້ປະສົບເຄາະຮ້າຍທີ່ຍັງຕິດຄ້າງຢູ່ໃນເຮືອນຖືກພັງລົງຈາກເຫດແຜ່ນດິນໄຫວຢູ່ເຂດ Bala Tidi, ຂຶ້ນກັບເມືອງ Zabu Thiri, ນະຄອນຫຼວງ Naypyidaw. ຕໍ່ຈາກນັ້ນ, ກໍາລັງກູ້ໄພຂອງກອງທັບປະຊາຊົນຫວຽດນາມ ແລະກຳລັງກະຊວງຕຳຫຼວດ ໄດ້ດຳເນີນການສຳຫຼວດພື້ນທີ່ຕົວຈິງຢ່າງວ່ອງໄວ, ປະເມີນສະພາບເກີດເຫດ ແລະຈັດຕັ້ງການຊອກຫາ.

ຜູ້ຕາງໜ້າຝ່າຍມຽນມາ ແຈ້ງໃຫ້ຊາບກ່ຽວກັບສະພາບການຢູ່ເຂດທີ່ຖືກຜົນສະທ້ອນຈາກເຫດແຜ່ນດິນໄຫວຢູ່ນະຄອນຫຼວງ Naypyidaw ກັບຝ່າຍຫວຽດນາມ. ພາບ: qdnd.vn

ຂະບວນລົດນໍາກໍາລັງກູ້ໄພກູ້ຊີບຂອງຫວຽດນາມ ໄປສໍາຫຼວດພື້ນທີ່ຕົວຈິງ, ປະເມີນສະພາບຕົວຈິງ. ພາບ: qdnd.vn

ຄະນະປະຕິບັດງານຂອງກອງທັບ ຍັງຈັດສົ່ງພະນັກງານ 30 ຄົນ ຂຶ້ນກັບກຳລັງແພດທະຫານສ້າງຕັ້ງໜ່ວຍຮັບເອົາ ແລະປິ່ນປົວຂະໜາດນ້ອຍ, ພ້ອມແລ້ວມີວິທີການປະຖົມພະຍາບານໃຫ້ຜູ້ປະສົບເຄາະຮ້າຍ ແລະປະຊາຊົນໃນບໍລິເວນ. ຜ່ານວິວັດການຊອກຫາ, ກໍາລັງກູ້ໄພກູ້ຊີບ ໄດ້ກໍານົດສະຖານທີ່ສົງໄສມີຜູ້ເຄາະຮ້າຍທີ່ຍັງຕິດຄ້າງຢູ່ໃນເຮືອນຖືກພັງລົງມາ 2 ຫຼັງ. ວຽກງານກູ້ຊ່ວຍຜູ້ປະສົບເຄາະຮ້າຍໄດ້ດຳເນີນໄປຢ່າງຮີບດ່ວນ, ແຕ່ວ່າປະສົບກັບຄວາມຫຍຸ້ງຍາກຫຼາຍຢ່າງຍ້ອນຄວາມມືດ ແລະທ້ອງຖິ່ນຍັງບໍ່ທັນໄດ້ລະດົມພາຫະນະເຊັ່ນ: ລົດຈົກ, ລົດເຄນ...

* ຕອນບ່າຍວັນທີ 31 ມີນາ, ທ່ານພົນຈັດຕະວາ ຟ້າມວັນຕິ, ຮອງຫົວໜ້າກົມກູ້ໄພ-ກູ້ຊີບ (ກົມໃຫຍ່ເສນາທິການ ກອງທັບປະຊາຊົນຫວຽດນາມ), ຫົວໜ້າຄະນະປະຕິບັດງານ ກອງທັບປະຊາຊົນຫວຽດນາມ ເຂົ້າຮ່ວມການໜູນຊ່ວຍແກ້ໄຂຜົນຮ້າຍຢ້ອນຫຼັງຈາກເຫດແຜ່ນດິນໄຫວຢູ່ມຽນມາ ໄດ້ມອບອາຫານແຫ້ງ 40 ໂຕນ ໃຫ້ແກ່ຝ່າຍມຽນມາ ເພື່ອໜູນຊ່ວຍບັນດາຄອບຄົວທີ່ປະສົບໄພຈາກເຫດແຜ່ນດິນໄຫວ.

ເຮືອນ 3 ຊັ້ນ ຖືກພັງລົງ, ເບື້ອງຕົ້ນກໍານົດມີຜູ້ປະສົບເຄາະຮ້າຍ 2 ຄົນ ຍັງຕິດຄ້າງຢູ່ໃນເຮືອນ. ພາບ: qdnd.vn

ທ່ານພົນຈັດຕະວາ ຟ້າມວັນຕິ ຫົວໜ້າຄະນະກູ້ໄພ ຂອງກອງທັບປະຊາຊົນຫວຽດນາມ ແລກປ່ຽນກັບກໍາລັງກູ້ໄພຂອງມຽນມາ ເພື່ອປະເມີນສະພາບການ ແລະກໍານົດວິທີການຊອກຫາຜູ້ປະສົບ ເຄາະຮ້າຍ. ພາບ: qdnd.vn

ພັນເອກພິເສດ ດ່າວວັນຢຸຍ ທີ່ປຶກສາທູດປ້ອງກັນຊາດຫວຽດນາມ ປະຈໍາ ມຽນມາ ລະດົມກໍາລັງໃຈ ແມ່ຂອງຜູ້ປະສົບເຄາະຮ້າຍ ທີ່ຫາຍສາບສູນຈາກເຫດແຜ່ນດິນໄຫວ. ພາບ: qdnd.vn

ໃນການແລກປ່ຽນກັບທ່ານພົນຈັດຕະວາ ຟ້າມວັນຕິ, ທ່ານ HE U Kyaw Soe Win, ລັດຖະມົນຕີກະຊວງທ່ອງທ່ຽວ ແລະໂຮງແຮມມຽນມາ ໃຫ້ຮູ້ວ່າ ທ່ານຮູ້ສຶກຕື້ນຕັນໃຈຕໍ່ໜ້າການລະດົມກໍາລັງໃຈ, ຄວາມເອົາໃຈໃສ່ຂອງລັດຖະບານ ແລະປະຊາຊົນຫວຽດນາມ, ພິເສດແມ່ນເລື່ອງຫວຽດນາມ ຈັດສົ່ງກຳລັງກູ້ໄພກູ້ຊີບ, ນຳເອົາອຸປະກອນ, ສິ່ງຂອງມາຊ່ວຍເຫຼືອມຽນມາ ແກ້ໄຂຜົນຮ້າຍຢ້ອນຫຼັງຈາກເຫດແຜ່ນດິນໄຫວ.

ສ່ວນທ່ານພົນຈັດຕະວາ ຟ້າມວັນຕິ ຢັ້ງຢືນວ່າ ກໍາລັງກູ້ໄພກູ້ຊີບຂອງຫວຽດນາມ ມາຮອດມຽນມາ ດ້ວຍອາລົມຈິດສະຫງວນໃຫ້ປະເທດ ແລະປະຊາຊົນມຽນມາ ແລະຄວາມຮັບຜິດຊອບຂອງປະເທດໜຶ່ງໃນປະຊາຄົມອາຊຽນ; ສະນັ້ນ, ໃນຄວາມສາມາດທີ່ເປັນໄປໄດ້ຈະມານະພະຍາຍາມຜັນຂະຫຍາຍວຽກງານຊອກຫາຢ່າງວ່ອງໄວ ເພື່ອຊ່ວຍເຫຼືອມຽນມາ ໃນການຫຼຸດຜ່ອນຄວາມເສຍຫາຍທີ່ເກີດຈາກເຫດແຜ່ນດິນໄຫວ.

ໂດຍ: ທູຈາງ