ສ້າງແຫຼ່ງກໍາລັງເພື່ອໃຫ້ ເກາະ ຮ່ອນຄວາຍ ນັບມື້ນັບພັດທະນາ, ໝັ້ນຄົງເຂັ້ມແຂງ

ທ່ານພົນເອກ ຟານວັນຢາງ ຮັບຟັງການນໍາແຂວງກ່າເມົາ ແນະນໍາໂດຍສັງເຂບກ່ຽວກັບເກາະຮ່ອນຄວາຍ. ພາບ: ວັນຈ້ຽນ.

ທ່ານພົນເອກ ຟານວັນຢາງ ຊີ້ນໍາ, ດັບປັບບາງເນື້ອໃນແຜນການກໍ່ສ້າງໂຄງການ ໃນເກາະຮ່ອນຄວາຍ. ພາບ: ວັນຈ້ຽນ.

ທີ່ຜ່ານມາ, ນາຍົກລັດຖະມົນຕີ ໄດ້ມອບໃຫ້ກະຊວງປ້ອງກັນປະເທດ  ຜັນຂະຫຍາຍການກໍ່ສ້າງໂຄງການຮັບໃຊ້ໜ້າທີ່ພັດທະນາເສດຖະກິດ-ສັງຄົມ ຕິດພັນກັບການຮັບປະກັນການປ້ອງກັນຊາດ, ປ້ອງກັນຄວາມສະຫງົບ ຢູ່ເກາະຮ່ອນຄວາຍ. ປະຕິບັດໜ້າທີ່ ທີ່ນາຍົກລັດຖະມົນຕີ ມອບໃຫ້, ການນໍາກະຊວງປ້ອງກັນປະເທດ ໄດ້ຊີ້ນໍາບັນດາອົງການທີ່ກ່ຽວຂ້ອງລົງສໍາຫຼວດ, ຄົ້ນຄວ້າ, ສະເໜີແຜນການກໍ່ສ້າງໂຄງການເພື່ອປະຕິບັດໜ້າທີ່ພັດທະນາເສດຖະກິດ-ສັງຄົມ ຕິດພັນກັບການຮັບປະກັນການປ້ອງກັນຊາດ, ປ້ອງກັນຄວາມສະຫງົບ ໃນເກາະ.

ທ່ານພົນເອກ ຟານວັນຢາງ ກ່າວຄໍາເຫັນໃຫ້ທິດຊີ້ນໍາຫຼາຍເນື້ອໃນສໍາຄັນທີ່ການເຮັດວຽກ. ພາບ: ວັນຈ້ຽນ.

ບັນດາຜູ້ແທນເຂົ້າຮ່ວມການເຮັດວຽກ. ພາບ: ວັນຈ້ຽນ.

ທີ່ເກາະ ຮ່ອນຄວາຍ, ທ່ານພົນເອກ ຟານວັນຢາງ ແລະຄະນະປະຕິບັດງານ ໄດ້ລົງກວດກາສະຖານທີ່ ຄາດວ່າຈະກໍ່ສ້າງໂຄງການ, ສໍາຫຼວດພູມີປະເທດ, ພ້ອມທັງຮັບຟັງກົມແຜນການ ແລະການລົງທຶນ ກໍຄື ອົງການ, ກົມກອງທີ່ກ່ຽວຂ້ອງລາຍງານແຜນການກໍ່ສ້າງໂຄງການ, ຍົກໃຫ້ເຫັນຄວາມຫຍຸ້ງຍາກ, ຂໍ້ຕິດຂັດໃນການຜັນຂະຫຍາຍປະຕິບັດ. ທ່ານພົນເອກ ຟານວັນຢາງ ຮຽກຮ້ອງໃຫ້ອົງການທີ່ກ່ຽວຂ້ອງຂອງກະຊວງປ້ອງກັນປະເທດ ກວດກາຄືນ, ດຸ່ນດ່ຽງງົບປະມານ, ໃຫ້ບຸລິມະສິດຈັດແບ່ງງົບປະມານນໍາໃຊ້ໃຫ້ແກ່ໂຄງການກໍ່ສ້າງບັນດາກິດຈະການຮັບໃຊ້ໜ້າທີ່ພັດທະນາເສດຖະກິດ-ສັງຄົມ ຕິດພັນກັບການປ້ອງກັນຊາດ, ປ້ອງກັນຄວາມສະຫງົບ ໃນບໍລິເວນທະຫານ ເຂດ 9 ເວົ້າລວມ, ເວົ້າສະເພາະແມ່ນຢູ່ເກາະ ຮ່ອນຄວາຍ.

ທ່ານພົນເອກ ຟານວັນຢາງ ແລະການນໍາແຂວງກ່າເມົາ ມອບຂອງຂວັນປີໃໝ່ຂອງຄະນະພັກການທະຫານສູນກາງ, ກະຊວງປ້ອງກັນປະເທດ ໃຫ້ບັນດາກົມກອງໃນເກາະ ຮ່ອນຄວາຍ. ພາບ: ວັນຈ້ຽນ.

ທ່ານພົນເອກ ຟານວັນຢາງ ຮຽກຮ້ອງໃຫ້ບັນດາກົມກອງຂອງກະຊວງປ້ອງກັນປະເທດ ເມື່ອໄດ້ຮັບໜ້າທີ່ກໍ່ສ້າງໂຄງການຕ້ອງລະດົມທຸກແຫຼ່ງກໍາລັງຢ່າງສຸດຂີດ, ເສີມຂະຫຍາຍຄວາມຮັບຜິດຊອບສູງສຸດ, ຮັບປະກັນການກໍ່ສ້າງໃຫ້ໄວທີ່ສຸດ, ມີຄຸນນະພາບ, ງາມຕາ. ສໍາລັບກົມກອງກອງທັບ ທີ່ຕັ້ງທັບໃນເກາະ ຕ້ອງສົມທົບກັນປະຕິບັດວຽກງານກະກຽມສະຖານທີ່ກໍ່ສ້າງໃຫ້ເປັນຢ່າງດີ, ບໍ່ໃຫ້ສົ່ງຜົນສະທ້ອນເຖິງຄວາມຄືບໜ້າກໍ່ສ້າງໂຄງ ການ.

ທ່ານພົນເອກ ຟານວັນຢາງ ພ້ອມດ້ວຍບັນດາຜູ້ແທນ ແລະພະນັກງານ, ນັກຮົບໃນເກາະຮ່ອນຄວາຍ. ພາບ: ວັນຈ້ຽນ.

ທີ່ການເຮັດວຽກ, ທ່ານພົນເອກ ຟານວັນຢາງ ກໍສະເໜີການນໍາແຂວງກ່າເມົາ ຕັ້ງໜ້າໜູນຊ່ວຍ, ສ້າງເງື່ອນໄຂເພື່ອໃຫ້ບັນດາອົງການ, ກົມກອງຂອງກະຊວງປ້ອງກັນປະເທດ ປະຕິບັດໜ້າທີ່ໄດ້ວ່ອງໄວ, ສະດວກ.

ເນື່ອງໃນໂອກາດນີ້, ຕາງໜ້າຄະນະປະຕິບັດງານ, ທ່ານພົນເອກ ຟານວັນຢາງ ໄດ້ມອບຂອງຂວັນປີໃໝ່ຂອງຄະນະພັກການທະຫານສູນກາງ, ກະຊວງປ້ອງກັນປະເທດ ໃຫ້ບັນດາກົມກອງ ທີ່ຕັ້ງທັບໃນເກາະ. ໃນບັນຍາກາດຂອງຊຸມວັນຕົ້ນປີ 2025, ສະຫາຍລັດຖະມົນຕີກະຊວງປ້ອງກັນປະເທດ ໄດ້ອວຍພອນປີໃໝ່ມາຍັງພະນັກງານ, ພາລະກອນ, ນັກຮົບ, ຜູ້ອອກແຮງງານ ໃນເກາະ ຮ່ອນຄວາຍ ພ້ອມດ້ວຍຄອບຄົວ ທຸກຖ້ວນໜ້າ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ, ປະສົບຜົນສໍາເລັດຢ່າງຈົບງາມ.

ໂດຍ: ໄຊຊະນະ