ທ່ານພົນເອກ ຟານວັນຢາງ ເປັນປະທານພິທີຕ້ອນຮັບລັດຖະມົນຕີກະຊວງປ້ອງກັນປະເທດລາວ

ທ່ານພົນເອກ ຟານວັນຢາງ ເປັນປະທານພິທີຕ້ອນຮັບທ່ານພົນໂທ ຄໍາລຽງ ອຸທະໄກສອນ. ພາບ: qdnd.vn

ທ່ານພົນເອກ ຟານວັນຢາງ ແລະທ່ານພົນໂທ ຄໍາລຽງ ອຸທະໄກສອນ ກວດແຖວກຽດຕິຍົດກອງທັບປະຊາຊົນຫວຽດນາມ. ພາບ: qdnd.vn

ສອງຝ່າຍຖ່າຍຮູບເປັນທີ່ລະນຶກ. ພາບ: qdnd.vn

ພາຍຫຼັງພິທີຕ້ອນຮັບ, ສອງຝ່າຍໄດ້ດໍາເນີນການພົບປະສອງຝ່າຍ. ທ່ານພົນເອກ ຟານວັນຢາງ ຊົມເຊີຍທ່ານພົນໂທ ຄຳລຽງ ອຸທະໄກສອນ ໄດ້ຮັບການແຕ່ງຕັ້ງເປັນລັດຖະມົນຕີກະຊວງປ້ອງກັນປະເທດລາວ; ສະແດງຄວາມເຊື່ອໝັ້ນວ່າ ໃນຖານະຕຳແໜ່ງຂອງຕົນ ທ່ານພົນໂທ ຄຳລຽງ ອຸທະໄກສອນ ຈະຊີ້ນຳນໍາພາການກໍ່ສ້າງກອງທັບປະຊາຊົນລາວ ໃຫ້ນັບມື້ນັບພັດທະນາ, ຊຸກຍູ້ການພົວພັນຮ່ວມມືລະຫວ່າງກອງທັບຫວຽດນາມ - ລາວ ນັບມື້ນັບແໜ້ນແຟ້ນຂຶ້ນຕື່ມ.

ທ່ານພົນເອກ ຟານວັນຢາງ ທີ່ການພົບປະສອງຝ່າຍ. ພາບ: qdnd.vn

ທ່ານພົນໂທ ຄໍາລຽງ ອຸທະໄກສອນ  ກ່າວຄໍາເຫັນທີ່ການພົບປະສອງຝ່າຍ. ພາບ: qdnd.vn

ສ່ວນທ່ານພົນໂທ ຄໍາລຽງ ອຸທະໄກສອນ ສະແດງຄວາມຊົມເຊີຍກອງທັບປະຊາຊົນຫວຽດນາມ ເນື່ອງໃນໂອກາດສະເຫຼີມສະຫຼອງ 80 ປີແຫ່ງວັນສ້າງຕັ້ງ; ເນັ້ນໜັກວ່າ ໃນໄລຍະ 80 ປີຜ່ານມາ, ກອງທັບປະຊາຊົນຫວຽດນາມ ໄດ້ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ; ສະແດງຄວາມເຊື່ອໝັ້ນວ່າ ກອງທັບປະຊາຊົນຫວຽດນາມ ຈະສືບຕໍ່ມີການພັດທະນາຢ່າງແຂງແຮງກວ່າອີກ. ທ່ານພົນເອກ ຟານວັນຢາງ ແລະທ່ານພົນໂທ ຄໍາລຽງ ອຸທະໄກສອນ ຕີລາຄາວ່າ ການຮ່ວມມືດ້ານປ້ອງກັນຊາດລະຫວ່າງຫວຽດນາມ-ລາວ ໃນໄລຍະມໍ່ໆມານີ້ບັນລຸໄດ້ໝາກຜົນອັນໃຫຍ່ຫຼວງ ແລະແທດຈິງ, ແມ່ນໜຶ່ງໃນບັນດາເສົາຄ້ຳສຳຄັນຂອງການພົວພັນສອງຝ່າຍຫວຽດນາມ-ລາວ. ພາຍຫຼັງ 5 ປີແຫ່ງການຜັນຂະຫຍາຍອະນຸສັນຍາການຮ່ວມມືດ້ານປ້ອງກັນຊາດ ໄລຍະ 2020-2024, ສອງຝ່າຍບັນລຸໄດ້ໝາກຜົນສຳຄັນຫຼາຍຢ່າງ. ພົ້ນເດັ່ນແມ່ນຄວາມໄວ້ເນື້ອເຊື່ອໃຈດ້ານການເມືອງສູງກວ່າ, ສາຍພົວພັນສາມັກຄີ, ຄວາມສະໜິດຕິດພັນລະຫວ່າງກອງທັບສອງປະເທດນັບມື້ນັບໄດ້ຮັບການປັປປຸງຂຶ້ນຕື່ມ; ບັນດາຮູບການ ແລະກົນໄກຮ່ວມມືນັບມື້ນັບອຸດົມສົມບູນ ແລະແຜ່ຂະຫຍາຍຢ່າງເລິກເຊິ່ງກວ້າງຂວາງກວ່າ; ຄວາມໝັ້ນຄົງ, ຄວາມເປັນລະບຽບຮຽບຮ້ອຍຢູ່ເຂດຊາຍແດນຂອງສອງປະເທດ ນັບມື້ນັບໄດ້ຮັບການປັບປຸງຢ່າງໜັກແໜ້ນ; ການຮ່ວມມືໃນການບຳລຸງກໍ່ສ້າງຊັບພະຍາກອນມະນຸດນັບມື້ນັບໄດ້ຮັບການຖືເປັນສໍາຄັນດ້ວຍການເພີ່ມຂຶ້ນທັງດ້ານຄຸນນະພາບ ແລະປະລິມານ; ການຮ່ວມມືໃນການສ້າງກໍາລັງຄວາມສາມາດດ້ານປ້ອງກັນຊາດ, ອຸດສາຫະກໍາປ້ອງກັນຊາດນັບມື້ນັບມີຄວາມຈຸດສຸມ ແລະມີປະສິດທິຜົນ.

ບັນຍາກາດທີ່ການພົບປະສອງຝ່າຍ. ພາບ: qdnd.vn

ລັດຖະມົນຕີສອງທ່ານເຫັນດີເປັນເອກະພາບວ່າ ໃນໄລຍະຈະມາເຖິງຈະສຸມໃສ່ປະຕິບັດອະນຸສັນຍາກ່ຽວກັບການຮ່ວມມືດ້ານປ້ອງກັນຊາດ ໄລຍະ 2025-2029 ແລະແຜນການຮ່ວມມື 2025 ຢ່າງມີປະສິດທິຜົນ ແລະຮອບດ້ານ. ໃນນັ້ນຜັນຂະຫຍາຍເນື້ອໃນ, ຄື: ການແລກປ່ຽນຄະນະຜູ້ແທນທຸກຂັ້ນ, ກົນໄກຮ່ວມມື, ເປັນຕົ້ນແມ່ນກົນໄກເຈລະຈານະໂຍບາຍປ້ອງກັນຊາດ; ເພີ່ມທະວີການຮ່ວມມືໃນວຽກງານພັກ ແລະວຽກງານການເມືອງ ໂດຍສຸມໃສ່ໂຄສະນາເຜີຍແຜ່, ສຶກສາອົບຮົມກ່ຽວກັບປະຫວັດສາດ, ຄວາມໝາຍ ແລະຄວາມສຳຄັນຂອງສາຍພົວພັນສາມັກຄີແບບພິເສດ ຫວຽດນາມ-ລາວ; ເພີ່ມທະວີການຮ່ວມມືຫຼາຍຝ່າຍ; ຮັກສາກົນໄກພົບປະປະຈຳປີລະຫວ່າງລັດຖະມົນຕີກະຊວງປ້ອງກັນປະເທດຫວຽດນາມ-ລາວ-ກຳປູເຈຍ; ຍົກສູງຄຸນນະພາບການຮ່ວມມືບໍາລຸງກໍ່ສ້າງ ແລະພັດທະນາແຫຼ່ງຊັບພະຍາກອນມະນຸດ; ເພີ່ມທະວີການຮ່ວມມືດ້ານການຄຸ້ມຄອງ ແລະປົກປັກຮັກສາຊາຍແດນ...

ທ່ານພົນເອກ ຟານວັນຢາງ ແລະທ່ານພົນໂທ ຄໍາລຽງ ອຸທະໄກສອນ ລົງນາມໃນບົດບັນທຶກຊ່ວຍຈໍາກ່ຽວກັບການຮ່ວມມືໃນຂົງເຂດກົດໝາຍວ່າດ້ວຍການທະຫານ, ການປ້ອງກັນຊາດ. ພາບ: qdnd.vn

ສິ້ນສຸດການພົບປະສອງຝ່າຍ, ທ່ານພົນເອກ ຟານວັນຢາງ ແລະທ່ານພົນໂທ ຄໍາລຽງ ອຸທະໄກສອນ ໄດ້ລົງນາມໃນບົດບັນທຶກຊ່ວຍຈໍາ ກ່ຽວກັບການຮ່ວມມືໃນຂົງເຂດກົດໝາຍວ່າດ້ວຍການທະຫານ, ການປ້ອງກັນຊາດ

ໂດຍ: ທູຈາງ