ໜັງສືພິມກອງທັບປະຊາຊົນ ຍາມໃດກໍປະຈັນບານ, ນໍາໜ້າໃນການປະຕິບັດໜ້າທີ່ໂຄສະນາ

ທ່ານພົນໂທ ໂດ໊ກັນ ກ່າວຄໍາເຫັນທີ່ການເຮັດວຽກ. ພາບ: ຫວຽດຈູງ.

ທ່ານພົນໂທ ໂດ໊ກັນ ຊົມເຊີຍ ແລະຕີລາຄາສູງບັນດາຜົນງານ, ໝາກຜົນ ເຊິ່ງ ໜັງສືພິມກອງທັບປະຊາຊົນ ບັນລຸໄດ້ໃນຊຸມປີຜ່ານມາ. ໜັງສືພິມກອງທັບປະຊາຊົນ ໄດ້ສະແດງໃຫ້ເຫັນບົດບາດປະຈັນບານ, ພິເສດແມ່ນໃນຂົງເຂດຕໍ່ສູ້, ຕ້ານ “ການຫັນປ່ຽນໂດຍສັນຕິ”, “ການປ່ຽນແປງດ້ວຍຕົນເອງ”, “ການຫັນປ່ຽນດ້ວຍຕົນເອງ”, ປົກປ້ອງພື້ນຖານແນວຄິດຂອງພັກ. ຄະນະການນໍາ, ພະນັກງານ, ນັກຂ່າວ, ນັກບັນນາທິການ, ຜູ້ເຮັດວຽກງານການຂ່າວຂອງໜັງສືພິມກອງທັບປະຊາຊົນ ໄດ້ມີການປ່ຽນແປງໃໝ່, ມີຫົວຄິດປະດິດສ້າງ, ຄຸນນະພາບສື່ສິ່ງພິມຕ່າງໆຂອງໜັງສືພິມ ນັບມື້ນັບສູງຂຶ້ນ.

ທ່ານພົນຈັດຕະວາ ດວ່ານຊວນໂບະ, ຫົວໜ້າບັນນາທິການໜັງສືພິມກອງທັບປະຊາຊົນ ກ່່າວຄໍາເຫັນທີ່ການເຮັດວຽກ. ພາບ: ຫວຽດຈູງ.

ທ່ານພົນໂທ ໂດ໊ກັນ ໄດ້ຮຽກຮ້ອງໃຫ້ໜັງສືພິມກອງທັບປະຊາຊົນ ສືບຕໍ່ຊາບຊຶມ, ປະຕິບັດໜ້າທີ່ໂຄສະນາໃຫ້ເປັນຢ່າງດີ, ຖືກຕາມຄະຕິທໍາ, ຖືກຕາມຈຸດປະສົງ; ໂຄສະນາກ່ຽວກັບບັນຫາທີ່ສັງຄົມໃຫ້ຄວາມສົນໃຈໃນປະຈຸບັນຢ່າງເລິກເຊິ່ງກວ້າງຂວາງ; ຕັ້ງໜ້າ, ເອົາໃຈໃສ່ປ່ຽນແປງໃໝ່ດ້ານເນື້ອໃນ, ຮູບການກວ່າອີກ, ພັດທະນາອົງການສື່ມວນຊົນຫຼາຍປະເພດ... ສ້າງຄວາມດຶງດູດຕໍ່ກັບເພື່ອນຜູ້ອ່ານຢູ່ພາຍໃນ ແລະນອກກອງທັບ.

ບັນຍາກາດທີ່ການເຮັດວຽກ. ພາບ: ຫວຽດຈູງ.

ທ່ານຮອງຫົວໜ້າກົມໃຫຍ່ການເມືອງ ຍັງໃສ່ໃຈວ່າ, ພ້ອມກັບການປະຕິບັດໜ້າທີ່ການເມືອງແລ້ວ, ໜັງສືພິມກອງທັບປະຊາຊົນ ຕ້ອງເອົາໃຈໃສ່ກໍ່ສ້າງຖັນແຖວຜູ້ທີ່ເຮັດວຽກງານການຂ່າວໃຫ້ມີແນວຄິດອຸ່ນອ່ຽນທຸ່ນທ່ຽງ, ລົງເລິກດ້ານວິຊາສະເພາະ, ປະກອບສະຕິປັນຍາ, ອຸທິດໃຫ້ແກ່ພື້ນຖານສື່ມວນຊົນປະຕິວັດຫວຽດນາມ ແລະກໍ່ສ້າງກອງທັບປະຊາຊົນຫວຽດນາມ. 

ທ່ານພົນໂທ ໂດ໊ກັນ ພ້ອມດ້ວຍຄະນະປະຕິບັດງານ ມອບດອກໄມ້ອວຍພອນໜັງສືພິມກອງທັບປະຊາຊົນ. ພາບ: ຫວຽດຈູງ.

ຂອບໃຈທ່ານພົນໂທ ໂດ໊ກັນ ພ້ອມດ້ວຍຄະນະປະຕິບັດງານຂອງກົມໃຫຍ່ການເມືອງ ທີ່ມາຢ້ຽມຢາມ ແລະອວຍພອນໜັງສືພິມກອງທັບປະຊາຊົນ ເນື່ອງໃນໂອກາດສະເຫຼີມສະຫຼອງ 96 ປີແຫ່ງວັນສື່ມວນຊົນປະຕິວັດຫວຽດນາມ, ທ່ານພົນຈັດຕະວາ ດວ່ານຊວນໂບະ, ຫົວໜ້າບັນນາທິການໜັງສືພິມກອງທັບປະຊາຊົນ ຢັ້ງຢືນວ່າ, ຄະນະພັກ, ຄະນະບັນນາທິການ, ຖັນແຖວພະນັກງານ, ນັກຂ່າວ, ນັກບັນນາທິການ, ຜູ້ອອກແຮງງານທີ່ກໍາລັງເຮັດວຽກຢູ່ໜັງສືພິມກອງທັບປະຊາຊົນ ຈະຮັບເອົາຄໍາຕັກເຕືອນຂອງການນໍາກົມໃຫຍ່ການເມືອງ; ສາມັກຄີເປັນຈິດໜຶ່ງໃຈດຽວກັນ, ສືບຕໍ່ເສີມຂະຫຍາຍກໍາລັງແຮງສັງລວມ, ກໍ່ສ້າງໜັງສືພິມກອງທັບປະຊາຊົນຫວຽດນາມ ໃຫ້ມີຖານະບົດບາດ, ທີ່ຕັ້ງ ແລະມີອິດທິພົນຊື່ສຽງ, ປະຕິບັດໃຫ້ຖືກຕາມຄະຕິທໍາ ແລະຖືກຕາມຈຸດປະສົງ.

ໂດຍ: ໄຊຊະນະ