ນໍາການພົວພັນຮ່ວມມືລະຫວ່າງສາມອົງການນິຕິບັນຍັດເລິກເຊິ່ງກວ່າອີກ
ນັກຂ່າວ: ຂໍຮຽນທ່ານນາງຮອງຫົວໜ້າກໍາມາທິການການຕ່າງປະເທດ, ທ່ານ ເຈິ່ນແທງເໝິນ ປະທານສະພາແຫ່ງຊາດ ນຳໜ້າຄະນະຜູ້ແທນຂັ້ນສູງສະພາແຫ່ງຊາດຫວຽດນາມ ແລະພັນລະຍາ ໄປຢ້ຽມຢາມສິງກະໂປ ແລະຍີ່ປຸ່ນ ຢ່າງເປັນທາງການໃນລະຫວ່າງວັນທີ 1 – 7 ທັນວາ. ທ່ານນາງສາມາດແບ່ງປັນກ່ຽວກັບຄວາມສໍາຄັນຂອງການຢ້ຽມຢາມຄັ້ງນີ້ໄດ້ບໍ?
ທ່ານນາງ ເລທິທູຮ່າ: ສິງກະໂປ ແມ່ນຄູ່ຮ່ວມມືສຳຄັນແຖວໜ້າຂອງຫວຽດນາມ ໃນພາກພື້ນ. ພາຍຫຼັງກວ່າ 50 ປີແຫ່ງວັນສ້າງຕັ້ງການພົວພັນທາງການທູດ ແລະ 10 ປີແຫ່ງວັນສ້າງຕັ້ງການພົວພັນຄູ່ຮ່ວມມືຍຸດທະສາດ, ການພົວພັນຫວຽດນາມ-ສິງກະໂປ ພວມພັດທະນາຢ່າງບໍ່ຢຸດຢັ້ງ, ບັນລຸໄດ້ບັນດາບາດກ້າວສຳຄັນໃນທຸກຂົງເຂດ, ທາງພັກ, ສະພາແຫ່ງຊາດ, ລັດຖະບານ ແລະການພົບປະແລກປ່ຽນປະຊາຊົນ. ສອງຝ່າຍໄດ້ເຫັນດີເປັນເອກະພາບຕໍ່ແຜນນະໂຍບາຍຍົກລະດັບການພົວພັນເປັນຄູ່ຮ່ວມມືຍຸດທະສາດຮອບດ້ານໂດຍໄວ.
    |
 |
|
ທ່ານ ເຈິ່ນແທງເໝິນ ປະທານສະພາແຫ່ງຊາດ ພ້ອມດ້ວຍພັນລະຍາໄປຢ້ຽມຢາມສາທາລະນະລັດ ສິງກະໂປ ແລະຍີ່ປຸ່ນ ຢ່າງເປັນທາງການແຕ່ວັນທີ 1-7 ທັນວາ. ພາບ: ຟ້າມຖັງ |
ໃນຂະນະນັ້ນ, ການພົວພັນຫວຽດນາມ-ຍີ່ປຸ່ນ ໄດ້ຮັບຖືວ່າແມ່ນຄູ່ພົວພັນປະສົບຜົນສໍາເລັດໃນການຮ່ວມມືສອງຝ່າຍຂອງຫວຽດນາມ ກັບບັນດາຄູ່ຮ່ວມມື. ຍີ່ປຸ່ນ ແມ່ນຄູ່ຮ່ວມມືເສດຖະກິດສຳຄັນແຖວໜ້າຂອງຫວຽດນາມ, ຄູ່ຮ່ວມມືຊ່ວຍເຫຼືອ ODA ໃຫຍ່ທີ່ສຸດ, ຄູ່ຮ່ວມມືດ້ານແຮງງານໃຫຍ່ອັນດັບ 2, ດ້ານການລົງທຶນ ແລະການທ່ອງທ່ຽວໃຫຍ່ອັນດັບ 3 ແລະດ້ານການຄ້າໃຫຍ່ອັນດັບ 4. ໃນໄລຍະຜ່ານມາ ການພົວພັນລະຫວ່າງສອງປະເທດໄດ້ມີການພັດທະນາດ້ານຄຸນນະພາບ ແລະພວມຢູ່ໃນໄລຍະດີທີ່ສຸດດ້ວຍຄວາມໄວ້ເນື້ອເຊື່ອໃຈດ້ານການເມືອງສູງ. ການແລກປ່ຽນຄະນະຜູ້ແທນທຸກຂັ້ນ, ພິເສດແມ່ນຂັ້ນສູງໄດ້ດຳເນີນໄປເປັນປະຈຳ ແລະສະໜິດສະໜົມໃນທຸກດ້ານພັກ, ລັດ ແລະສະພາແຫ່ງຊາດ.
ໃນສະພາບການນັ້ນ, ການຢ້ຽມຢາມສິງກະໂປ ແລະຍີ່ປຸ່ນ ຂອງທ່ານປະທານສະພາແຫ່ງຊາດ ເຈິ່ນແທງເໝິນ ມີຄວາມໝາຍສຳຄັນພິເສດເພື່ອແນໃສ່ຫັນແນວທາງນະໂຍບາຍການພົວພັນຕ່າງປະເທດຂອງຫວຽດນາມ ປະກົດຜົນເປັນຈິງ, ຊຸກຍູ້ການພົວພັນຮ່ວມມືດ້ານລັດຖະສະພາລະຫວ່າງສະພາແຫ່ງຊາດຫວຽດນາມ ແລະສະພາແຫ່ງຊາດສິງກະໂປ, ລັດຖະສະພາຍີ່ປຸ່ນ ໃຫ້ມີເນື້ອແທ້ ແລະຍືນຍົງ, ຜ່ານນັ້ນປະກອບສ່ວນຊຸກຍູ້ການພົວພັນຄູ່ຮ່ວມມືຍຸດທະສາດລະຫວ່າງຫວຽດນາມ-ສິງກະໂປ, ຫັນເນື້ອໃນຂອງການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ-ຍີ່ປຸ່ນ ເປັນລະອຽດ, ປັບປຸງການພົວພັນມິດຕະພາບ, ການຮ່ວມມືຢ່າງມີປະສິດທິຜົນ, ແທດຈິງລະຫວ່າງຫວຽດນາມ ແລະສິງກະໂປ, ຍີ່ປຸ່ນ ໃນທຸກຂົງເຂດ.
ນັກຂ່າວ: ທ່ານນາງສາມາດໃຫ້ຮູ້ກ່ຽວກັບການເຄື່ອນໄຫວຕົ້ນຕໍຂອງປະທານສະພາແຫ່ງຊາດໃນການຢ້ຽມຢາມສິງກະໂປ ແລະຍີ່ປຸ່ນ ຢ່າງເປັນທາງການຄັ້ງນີ້ໄດ້ບໍ?
ທ່ານນາງ ເລທິທູຮ່າ: ໃນຂອບເຂດການຢ້ຽມຢາມສິງກະໂປ, ທ່ານປະທານສະພາແຫ່ງຊາດຈະມີການພົບປະເຈລະຈາ, ພົບປະກັບການນຳຂັ້ນສູງສຸດຂອງສິງກະໂປ, ຄື: ທ່ານ Lawrence Wong ນາຍົກລັດຖະມົນຕີ, ທ່ານ Tharman Shanmugaratnam ປະທານາທິບໍດີ; ທ່ານ Seah Kian Peng ປະທານສະພາແຫ່ງຊາດ, ໃຫ້ການຕ້ອນຮັບບັນດາກຸ່ມບໍລິສັດແຖວໜ້າຂອງສິງກະໂປ ທີ່ພວມລົງທຶນດຳເນີນທຸລະກິດຢູ່ຫວຽດນາມ; ພົບປະກັບປະຊາຄົມຊາວຫວຽດນາມ; ຢ້ຽມຢາມຖາມຂ່າວ ແລະໂອ້ລົມກັບພະນັກງານ, ພາລະກອນຂອງສະຖານທູດຫວຽດນາມ ປະຈຳ ສິງກະໂປ.
ຢູ່ຍີ່ປຸ່ນ, ປະທານສະພາແຫ່ງຊາດ ຈະເຂົ້າຢ້ຽມຂໍ່ານັບພະເຈົ້າຈັກກະພັດ Naruhito ແລະພະລາຊີນີ Masako; ພົບປະກັບທ່ານ Ishiba Shigeru ນາຍົກລັດຖະມົນຕີ; ມີການພົບປະເຈລະຈາກັບທ່ານ Sekiguchi Masakazu ປະທານສະພາສູງ ແລະທ່ານ Nukaga Fukushiro ປະທານສະພາຕ່ຳ.
ພິເສດແມ່ນໃນການຢ້ຽມຢາມຄັ້ງນີ້, ທ່ານປະທານສະພາແຫ່ງຊາດ ເຈິ່ນແທງເໝິນ ແລະທ່ານປະທານສະພາສູງ Sekiguchi Masakazu ຈະລົງນາມໃນສັນຍາຮ່ວມມືລະຫວ່າງສະພາແຫ່ງຊາດຫວຽດນາມ ແລະສະພາສູງຍີ່ປຸ່ນ, ຕາມຂ້າພະເຈົ້າແລ້ວ, ນີ້ແມ່ນປະຖົມປັດໃຈສຳຄັນທີ່ສຸດ ເພື່ອຊຸກຍູ້ການພົວພັນລະຫວ່າງສອງອົງການນິຕິບັນຍັດໃຫ້ຂຶ້ນສູ່ລະດັບສູງໃໝ່ໃນຊຸມປີຕໍ່ໜ້າ.
ອາດເວົ້າໄດ້ວ່າ ການຢ້ຽມຢາມຂອງທ່ານປະທານສະພາແຫ່ງຊາດແມ່ນໄດ້ຮັບຖືເປັນສໍາຄັນພິເສດ ແລະຕີລາຄາສູງຈາກການນຳຂອງສອງປະເທດ, ຊີ້ນຳບັນດາອົງການຂອງສອງຝ່າຍສົມທົບກັນຢ່າງຕັ້ງໜ້າ ແລະກະກຽມບັນດາລາຍການ, ເນື້ອໃນຢ່າງລະອຽດ, ສະນັ້ນ ຂ້າພະເຈົ້າເຊື່ອໝັ້ນວ່າ ການຢ້ຽມຢາມຂອງທ່ານປະທານສະພາແຫ່ງຊາດຫວຽດນາມ ເຈິ່ນແທງເໝິນ ຈະປະສົບຜົນສຳເລັດຢ່າງຈົບງາມ, ສ້າງກໍາລັງໜູນໃໝ່ໃຫ້ທ່າພັດທະນາຢ່າງແຮງລະຫວ່າງຫວຽດນາມ ກັບສິງກະໂປ ແລະຍີ່ປຸ່ນ.
ນຳມາເຊິ່ງຜົນປະໂຫຍດລະອຽດໃຫ້ປະຊາຊົນ ແລະປະຊາຄົມວິສາຫະກິດຂອງສາມປະເທດ
ນັກຂ່າວ: ຜ່ານການຢ້ຽມຢາມຂອງທ່ານປະທານສະພາແຫ່ງຊາດ ເຈິ່ນແທງເໝິນ ແລະຄະນະຜູ້ແທນຂັ້ນສູງສະພາແຫ່ງຊາດຫວຽດນາມ ໃນຄັ້ງນີ້, ການຮ່ວມມືລັດຖະສະພາລະຫວ່າງ ຫວຽດນາມ ແລະສິງກະໂປ, ຍີ່ປຸ່ນ ຈະໄດ້ຮັບການຊຸກຍູ້ຄືແນວໃດ?
ທ່ານນາງ ເລທິທູຮ່າ: ການຮ່ວມມືລັດຖະສະພາແມ່ນການຮ່ວມມືສຳຄັນໃນການພົວພັນຄູ່ຮ່ວມມື, ການຮ່ວມມືອັນດີງາມລະຫວ່າງຫວຽດນາມ ກັບສິງກະໂປ ແລະຍີ່ປຸ່ນ. ໃນໄລຍະຜ່ານມາ, ການຮ່ວມມືລະຫວ່າງສະພາແຫ່ງຊາດຫວຽດນາມ, ສະພາແຫ່ງຊາດສິງກະໂປ ແລະສະພາສູງຍີ່ປຸ່ນ ໄດ້ພັດທະນາຢ່າງດີງາມໃນຂອບເຂດສອງຝ່າຍ ແລະຫຼາຍຝ່າຍ.
|
|
 |
|
ທ່ານນາງ ເລທິທູຮ່າ ຮອງປະທານກໍາມາທິການການຕ່າງປະເທດສະພາແຫ່ງຊາດ. ພາບ: ກົງກວກ. |
ຂ້າພະເຈົ້າເຊື່ອໝັ້ນວ່າ ດ້ວຍລາຍການພົບປະ ແລະບັນດາຄາດໝາຍທີ່ໄດ້ວາງອອກ, ການຢ້ຽມຢາມຂອງປະທານສະພາແຫ່ງຊາດ ຈະປະກອບສ່ວນຊຸກຍູ້ ແລະເຮັດໃຫ້ການພົວພັນຮ່ວມມືລະຫວ່າງ 3 ອົງການນິຕິບັນຍັດເລິກເຊິ່ງກວ່າອີກ, ຜ່ານການຍູ້ແຮງການແລກປ່ຽນຄະນະຜູ້ແທນ, ການຜັນຂະຫຍາຍບັນດາການເຄື່ອນໄຫວຮ່ວມມືລະຫວ່າງບັນດາກໍາມາທິການ, ອົງການຂອງສະພາແຫ່ງຊາດ, ລະຫວ່າງບັນດາສະມາຊິກສະພາແຫ່ງຊາດຫວຽດນາມ ກັບບັນດາສະມາຊິກລັດຖະສະພາສິງກະໂປ ແລະຍີ່ປຸ່ນ, ສະມາຊິກລັດຖະສະພາໜຸ່ມ, ສະມາຊິກລັດຖະສະພາຍິງ; ການເສີມຂະຫຍາຍບົດບາດຂົວເຊື່ອມຕໍ່ທີ່ສຳຄັນຂອງພັນທະມິດສະມາຊິກລັດຖະສະພາມິດຕະພາບ ແລະບັນດາກຸ່ມສະມາຊິກລັດຖະສະພາມິດຕະພາບໃນການຊຸກຍູ້ການພົບປະແລກປ່ຽນປະຊາຊົນ, ການຮ່ວມມືວິສາຫະກິດ ແລະການຮ່ວມມືລະຫວ່າງບັນດາທ້ອງຖິ່ນ; ການເສີມຂະຫຍາຍບົດບາດສຳຄັນຂອງສາມອົງການນິຕິບັນຍັດໃນການຊຸກຍູ້ການຕິດຕາມກວດກາການຜັນຂະຫຍາຍສົນທິສັນຍາ, ສັນຍາ, ຂໍ້ຕົກລົງທີ່ໄດ້ລົງນາມຢ່າງມີປະສິດທິຜົນ...
ພິເສດ, ດ້ວຍຂໍ້ຕົກລົງຮ່ວມມືລະຫວ່າງສະພາແຫ່ງຊາດຫວຽດນາມ ແລະສະພາສູງຍີ່ປຸ່ນ ທີ່ຈະລົງນາມເນື່ອງໃນໂອກາດການຢ້ຽມຢາມຄັ້ງນີ້ຈະປະກອບສ່ວນເພີ່ມທະວີປະສິດທິຜົນການຮ່ວມມືລະຫວ່າງບັນດາອົງການນິຕິບັນຍັດຂອງສອງປະເທດ, ສ້າງເງື່ອນໄຂສະດວກເພື່ອໃຫ້ສອງຝ່າຍຜັນຂະຫຍາຍບັນດາການເຄື່ອນໄຫວຮ່ວມມືສອງຝ່າຍ ກໍ່ຄືຢູ່ບັນດາເວທີປາໄສຫຼາຍຝ່າຍ, ປະກອບສ່ວນຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານເພື່ອສັນຕິພາບ ແລະຄວາມຈະເລີນຮຸ່ງເຮືອງຢູ່ອາຊີ ແລະໃນໂລກ, ສອດຄ່ອງກັບຜົນປະໂຫຍດຂອງປະຊາຊົນສອງປະເທດ.
ນັກຂ່າວ: ການຮ່ວມມືລະຫວ່າງທ້ອງຖິ່ນແມ່ນໜຶ່ງໃນບັນດາຈຸດພົ້ນເດັ່ນໃນການພົວພັນລະຫວ່າງສອງປະເທດ ຫວຽດນາມ - ສິງກະໂປ ແລະ ຫວຽດນາມ - ຍີ່ປຸ່ນ. ຜ່ານການຢ້ຽມຢາມຄັ້ງນີ້, ການພົວພັນຮ່ວມມືລະຫວ່າງບັນດາທ້ອງຖິ່ນຂອງຫວຽດນາມ ກັບສິງກະໂປ ແລະຍີ່ປຸ່ນ ຈະມີບາດກ້າວພັດທະນາຄືແນວໃດ?
ທ່ານນາງ ເລທິທູຮ່າ: ໃນການຢ້ຽມຢາມຄັ້ງນີ້ມີການເຂົ້າຮ່ວມຂອງການນຳບາງທ້ອງຖິ່ນທີ່ຕາງໜ້າໃຫ້ພາກເໜືອ, ພາກກາງ ແລະພາກໃຕ້ຫວຽດນາມ. ດ້ວຍບັນດາການເຮັດວຽກ, ການແລກປ່ຽນທີ່ແທດຈິງ, ແລະການເຂົ້າຮ່ວມຢ່າງຕັ້ງໜ້າຂອງການນຳບັນດາທ້ອງຖິ່ນຂອງຫວຽດນາມ, ສິງກະໂປ ແລະ ຍີ່ປຸ່ນ, ຂ້າພະເຈົ້າເຊື່ອໝັ້ນວ່າ ການຢ້ຽມຢາມຂອງທ່ານປະທານສະພາແຫ່ງຊາດ ເຈິ່ນແທງເໝິນ ບໍ່ພຽງແຕ່ປະກອບສ່ວນຊຸກຍູ້ການພົວພັນທາງການທູດສອງຝ່າຍລະຫວ່າງຫວຽດນາມ ກັບສິງກະໂປ ແລະຍີ່ປຸ່ນ ເທົ່ານັ້ນ, ຫາກຍັງເພີ່ມທະວີການເຊື່ອມຕໍ່, ຊຸກຍູ້ການຮ່ວມມືທີ່ແທດຈິງລະຫວ່າງບັນດາທ້ອງຖິ່ນຂອງຫວຽດນາມ ກັບບັນດາທ້ອງຖິ່ນຂອງສິງກະໂປ ແລະຍີ່ປຸ່ນ, ນຳມາເຊິ່ງຜົນປະໂຫຍດທີ່ລະອຽດໃຫ້ແກ່ປະຊາຊົນ ແລະປະຊາຄົມວິສາຫະກິດຂອງສາມປະເທດອີກດ້ວຍ.
ນັກຂ່າວ: ຂໍຂອບໃຈທ່ານນາງ.
ໂດຍ: ຈາງຫງວຽນ