ນັກຂ່າວ: ຫວຽດນາມ ແລະ ສ. ເກົາຫຼີ ຮັກສາການພົວພັນຮ່ວມມືຢ່າງແໜ້ນແຟ້ນໃນກວ່າ 30 ປີ. ໃນເດືອນທັນວາ 2022, ສອງປະເທດໄດ້ຍົກລະດັບການພົວພັນຂຶ້ນເປັນຄູ່ຮ່ວມມືຍຸດທະສາດຮອບດ້ານ. ຂໍໃຫ້ທ່ານຕີລາບາດກ້າວບຸກທະລຸທີ່ສອງປະເທດບັນລຸໄດ້ໃນຂອບເຂດຄູ່ຮ່ວມມືຍຸດທະສາດຮອບດ້ານ ຫວຽດນາມ - ສ. ເກົາຫຼີ? ແລະການພົວພັນນີ້ຈະພັດທະນາຄືແນວໃດໃນຊຸມປີຕໍ່ໜ້າ?
ທ່ານ ຫງວຽນມິງຫວູ: ພາຍຫຼັງກວ່າ 30 ປີແຫ່ງການສ້າງຕັ້ງການພົວພັນທາງການທູດ, ການພົວພັນ ຫວຽດນາມ - ສ. ເກົາຫຼີ ພວມຢູ່ໃນໄລຍະພັດທະນາຢ່າງດີງາມທີ່ສຸດ. ເລື່ອງການນຳສອງຝ່າຍໄດ້ຍົກລະດັບການພົວພັນຂຶ້ນເປັນຄູ່ຮ່ວມມືຍຸດທະສາດຮອບດ້ານແມ່ນການພັດທະນາທີ່ຈຳເປັນຢ່າງເດັດຂາດ, ບໍ່ພຽງແຕ່ໄດ້ສະແດງໃຫ້ເຫັນຄວາມຕັດສິນໃຈດ້ານການເມືອງຂອງການນຳສອງປະເທດໃນການຊຸກຍູ້ການພົວພັນໃຫ້ຂຶ້ນສູ່ລະດັບສູງໃໝ່ເທົ່ານັ້ນ, ຫາກຍັງແມ່ນການພັດທະນາທີ່ດີກວ່າເກົ່າຂອງການພົວພັນນີ້.
ຄວາມໄວ້ເນື້ອເຊື່ອໃຈທາງດ້ານການເມືອງໄດ້ຮັບການປັບປຸງ, ການພົບປະແລກປ່ຽນ, ການພົບປະຂັ້ນສູງ, ທຸກຂັ້ນໄດ້ຮັບການຊຸກຍູ້ຢ່າງເປັນປະຈຳ. ສອງຝ່າຍໄດ້ຜັນຂະຫຍາຍຫຼາຍກົນໄກການຮ່ວມມືດ້ານການເມືອງ, ການທູດ, ຄວາມໝັ້ນຄົງ, ປ້ອງກັນຊາດ ແລະເສດຖະກິດຢ່າງມີປະສິດທິຜົນນັບແຕ່ຂັ້ນຮອງລັດຖະມົນຕີເຖິງຂັ້ນຮອງນາຍົກລັດຖະມົນຕີ.
    |
 |
|
ທ່ານ ຫງວຽນມິງຫວູ ຮອງລັດຖະມົນຕີຜູ້ປະຈໍາກະຊວງການຕ່າງປະເທດຫວຽດນາມ. ພາບ: ຕວນແອງ. |
ບົນພື້ນຖານການຮ່ວມມືທີ່ໝັ້ນຄົງນັ້ນ, ການຫັນປ່ຽນທາງດ້ານພູມສາດເສດຖະກິດ, ພູມສາດການເມືອງ ແລະເຕັກໂນໂລຢີທີ່ສຳຄັນໃນປະຈຸບັນ ແລະພິເສດແມ່ນຄວາມສາມາດບົ່ມຊ້ອນພັດທະນາອັນໃຫຍ່ຫຼວງຂອງສອງປະເທດ, ໃນ 20 ຫຼື 30 ປີຈະມາເຖິງ, ການພົວພັນ ຫວຽດນາມ - ສ. ເກົາຫຼີ ຈະສືບຕໍ່ພັດທະນາຢ່າງຮອບດ້ານ, ແທດຈິງ ແລະມີປະສິດທິຜົນ, ສອດຄ່ອງກັບຂອບເຂດການພົວພັນຄູ່ຮ່ວມມືຍຸດທະສາດຮອບດ້ານໃນປະຈຸບັນ.
ນັ້ນແມ່ນສານ ແລະເປົ້າໝາຍຕົ້ນຕໍຂອງການຢ້ຽມຢາມ ສ. ເກົາຫຼີ ຄັ້ງນີ້ຢ່າງເປັນທາງການຂອງທ່ານນາຍົກລັດຖະມົນຕີຫວຽດນາມ. ການຢ້ຽມຢາມຈະປະກອບສ່ວນນຳເອົາຜົນປະໂຫຍດຕົວຈິງມາໃຫ້ປະຊາຊົນ ຫວຽດນາມ ແລະ ສ. ເກົາຫຼີ, ຜ່ານນັ້ນໄດ້ປະກອບສ່ວນຢ່າງຕັ້ງໜ້າເຂົ້າໃນສັນຕິພາບ, ສະຖຽນລະພາບ, ການຮ່ວມມື ແລະພັດທະນາຢູ່ພາກພື້ນ ແລະໃນໂລກ.
ນັກຂ່າວ: ທ່ານຕີລາຄາການຮ່ວມມືດ້ານເສດຖະກິດ ຫວຽດນາມ - ສ. ເກົາຫຼີ ຄືແນວໃດ? ຫວ່າງມໍ່ໆມານີ້, ສື່ມວນຊົນຫວຽດນາມ ໄດ້ລາຍງານວ່າ ສອງປະເທດໄດ້ວາງເປົ້າໝາຍເພີ່ມວົງເງິນການຄ້າສອງຝ່າຍໃຫ້ຂຶ້ນເຖິງ 150 ຕື້ໂດລາສະຫະລັດ ໃນປີ 2030, ຂໍໃຫ້ຮູ້ວ່າ ສອງປະເທດຈະປະຕິບັດເປົ້າໝາຍດັ່ງກ່າວນັ້ນໄດ້ແນວໃດ? ກ່ຽວກັບການລົງທຶນ, ລັດຖະບານຫວຽດນາມ ໄດ້, ພວມ ຫຼື ຈະມີບັນດານະໂຍບາຍບຸລິມະສິດອັນໃດໃຫ້ບັນດາວິສາຫະກິດຕ່າງປະເທດເວົ້າລວມ ແລະບັນດາວິສາຫະກິດ ສ. ເກົາຫຼີ ເວົ້າສະເພາະ?
ທ່ານ ຫງວຽນມິງຫວູ: ການຮ່ວມມືດ້ານເສດຖະກິດຍາມໃດກໍ່ແມ່ນເສົາຄ້ຳຕົ້ນຕໍ ແລະກຳລັງໜູນຕົ້ນຕໍຂອງການຮ່ວມມືລະຫວ່າງສອງປະເທດ. ເລື່ອງວາງເປົ້າໝາຍຂອງສອງປະເທດບັນລຸວົງເງິນການຄ້າສອງສົ້ນໃຫ້ຂຶ້ນເຖິງ 150 ຕື້ໂດລາສະຫະລັດ ໃນປີ 2030 ແມ່ນຄວາມຮຽກຮ້ອງຕ້ອງການພັດທະນາຂອງບັນດາວິສາຫະກິດ ແລະລັດຖະບານຂອງສອງປະເທດ. ເປົ້າໝາຍນີ້ແມ່ນມີພື້ນຖານຢ່າງສົມບູນ.
ກ່ອນອື່ນໝົດ, ສອງປະເທດໄດ້ລົງນາມໃນສັນຍາການຄ້າເສລີ ຫວຽດນາມ - ສ. ເກົາຫຼີ ແລະແມ່ນສະມາຊິກຂອງສັນຍາການຄ້າເສລີຫຼາຍຝ່າຍ ຫຼາຍສະບັບ, ຄື: ສັນຍາແມ່ກ່ຽວກັບການຮ່ວມມືດ້ານເສດຖະກິດຮອບດ້ານ ອາຊຽນ - ສ. ເກົາຫຼີ, ສັນຍາຄູ່ຮ່ວມມືເສດຖະກິດຮອບດ້ານພາກພື້ນ (RCEP).
ທີສອງ, ສອງປະເທດມີໂຄງປະກອບດ້ານເສດຖະກິດເພີ່ມເຕີມເຊິ່ງກັນ ແລະກັນຢ່າງຈະແຈ້ງ. ທີສາມ, ການພັດທະນາວົງເງິນການຄ້າສອງສົ້ນເພື່ອແນໃສ່ຕອບສະໜອງຄວາມຕ້ອງການໃຫ້ບັນດາໂຄງການລົງທຶນຂອງ ສ. ເກົາຫຼີ ທີ່ພວມ ແລະຈະສືບຕໍ່ເພີ່ມຂຶ້ນຢູ່ຫວຽດນາມ.
ເພື່ອບັນລຸເປົ້າໝາຍທີ່ໄດ້ວາງອອກ, ຂ້າພະເຈົ້າຖືວ່າ ສອງຝ່າຍຕ້ອງສຸມໃສ່ບັນດາການກໍານົດທິດດັ່ງນີ້:
ທີໜຶ່ງ, ຕ້ອງສືບຕໍ່ຊຸກຍູ້ບັນດາໂຄງການຮ່ວມມືລົງທຶນໃໝ່, ຫັນບັນດາປະເພດສິນຄ້ານຳເຂົ້າ ແລະສົ່ງອອກໃຫ້ມີຄວາມຫຼາກຫຼາຍ, ພິເສດແມ່ນບັນດາຂະແໜງອຸດສາຫະກຳເຕັກໂນໂລຢີສູງ.
ທີສອງ, ສອງຝ່າຍຕ້ອງສົມທົບກັນຜັນຂະຫຍາຍບັນດາສັນຍາການຄ້າເສລີໃນພາກພື້ນ ແລະທົ່ວໂລກ (ເຊັ່ນ RCEP, CPTPP), ບັນດາຂອບເຂດການຮ່ວມມືດ້ານເສດຖະກິດໃໝ່ຄື IPEF, ຍູ້ແຮງການຮ່ວມມືໃນຫຼາຍຂົງເຂດໃໝ່ຄື: ຂຸດຄົ້ນບັນດາຕະຫຼາດໃໝ່, ເຂົ້າຮ່ວມໃນການສ້າງຕ່ອງໂສ້ການສະໜອງໃໝ່.
ທີສາມ, ສ. ເກົາຫຼີ ແມ່ນຕະຫຼາດສົ່ງອອກທີ່ສຳຄັນຂອງຜະລິດຕະພັນກະເສດປະເພດຕ່າງໆຂອງຫວຽດນາມ. ບັນດາຜະລິດຕະພັນກະເສດຕົ້ນຕໍຂອງຫວຽດນາມ ເຊັ່ນ: ໝາກໄມ້, ກາເຟ, ໝາກພິກໄທ, ຜັກ ແລະໝາກໄມ້ທຸກປະເພດ ໂດຍພື້ນຖານແລ້ວແມ່ນຖືກກັບລົດຊາດຂອງຜູ້ບໍລິໂພກ ສ. ເກົາຫຼີ ແລະຄ່ອຍໆຄອບຄອງເອົາພາກສ່ວນໃຫຍ່ຕະຫຼາດ ສ. ເກົາຫຼີ.
ໃນຂົງເຂດການລົງທຶນ, ລັດຖະບານຫວຽດນາມ ຍາມໃດກໍ່ເປັນເຈົ້າການສຳພັດ, ຮັບຟັງ, ກຳໄດ້ສິ່ງທີ່ກີດຂວາງເພື່ອສ້າງເງື່ອນໄຂໃຫ້ວິສາຫະກິດ ສ.ເກົາຫຼີ ເຄື່ອນໄຫວຜະລິດ, ດຳເນີນທຸລະກິດຢູ່ປະເທດຫວຽດນາມ ຢ່າງໝັ້ນຄົງ ແລະສະດວກ.
ລັດຖະບານຫວຽດນາມ ໄດ້, ພວມ ແລະຈະສືບຕໍ່ວາງບັນດານະໂຍບາຍບຸລິມະສິດພື້ນຖານ, ໃນນັ້ນແມ່ນບຸລິມະສິດການເງິນກ່ຽວກັບອາກອນລາຍຮັບວິສາຫະກິດ, ອາກອນນຳເຂົ້າ-ສົ່ງອອກ, ອາກອນມູນຄ່າເພີ່ມ... ແລະບັນດານະໂຍບາຍບຸລິມະສິດທີ່ບໍ່ແມ່ນດ້ານການເງິນ ຄື: ການໜູນຊ່ວຍພື້ນຖານໂຄງລ່າງດ້ານເຕັກນິກ, ລະບຽບການບໍລິຫານ ແລະນະໂຍບາຍການພັດທະນາຊັບພະຍາກອນມະນຸດ.
ໃນໄລຍະຈະມາເຖິງ, ຫວຽດນາມ ປາດຖະໜາຢາກເພີ່ມທະວີການຮ່ວມມືດ້ານການລົງທຶນກັບ ສ. ເກົາຫຼີ ໃນບັນດາຂົງເຂດຍຸດທະສາດໃໝ່ຄື: ເຄິ່ງຊັກນຳໄຟຟ້າ, ປັນຍາປະດິດ, ເຕັກໂນໂລຊີຊີວະວິທະຍາ, ພະລັງງານສະອາດ, ພະລັງງານທົດແທນ... ນີ້ແມ່ນບັນດາຂົງເຂດທີ່ມີທ່າແຮງຂອງ ສ. ເກົາຫຼີ ແລະຫວຽດນາມ ກໍ່ພວມສ້າງບັນດານະໂຍບາຍບຸລິມະສິດທີ່ເໝາະສົມໃຫ້ການລົງທຶນໃນຂົງເຂດນີ້.
ນັກຂ່າວ: ສ. ເກົາຫຼີ ຖືວ່າ ຫວຽດນາມ ແມ່ນໜຶ່ງໃນບັນດາຄູ່ຮ່ວມມືຫຼັກແຫຼ່ງໃນຍຸດທະສາດ ມະຫາສະມຸດອິນເດຍ - ປາຊີຟິກ ແລະຂໍ້ລິເລີ່ມສາມັກຄີ ອາຊຽນ - ສ. ເກົາຫຼີ. ນີ້ແມ່ນຂໍ້ລິເລີ່ມທີ່ ສ. ເກົາຫຼີ ປະກາດໃນກອງປະຊຸມສຸດຍອດອາຊຽນ ປີ 2022 ເຊິ່ງເປັນສ່ວນໜຶ່ງຂອງຍຸດທະສາດ ມະຫາສະມຸດອິນເດຍ - ປາຊີຟິກ. ຂໍທ່ານໃຫ້ຮູ້ວ່າ ຫວຽດນາມ ແລະ ສ. ເກົາຫຼີ ສາມາດຊຸກຍູ້ຂໍ້ລິເລີ່ມນີ້ໃນອະນາຄົດຄືແນວໃດ?
ທ່ານ ຫງວຽນມິງຫວູ: ຫວຽດນາມ ແລະບັນດາປະເທດອາຊຽນ ຍາມໃດກໍ່ຕີລາຄາສູງການພົວພັນຄູ່ຮ່ວມມືຍຸດທະສາດກັບ ສ. ເກົາຫຼີ. ນັບແຕ່ໄດ້ຮັບການສ້າງຕັ້ງໃນປີ 1989, ການພົວພັນອາຊຽນ - ສ. ເກົາຫຼີ ໄດ້ພັດທະນາຢ່າງຂະຫຍັນຂັນແຂງ, ຕັ້ງໜ້າ ແລະເລິກເຊິ່ງກວ້າງຂວາງໃນທຸກຂົງເຂດ, ກາຍເປັນໜຶ່ງໃນບັນດາການພົວພັນຄູ່ເຈລະຈາທີ່ສຳຄັນທີ່ສຸດໃນການພົວພັນຕ່າງປະເທດຂອງອາຊຽນ.
ຂ້າພະເຈົ້າ ສະແດງຄວາມຊົມເຊີຍຕໍ່ເລື່ອງ ສ. ເກົາຫຼີ ປະກາດຂໍ້ລິເລີ່ມສາມັກຄີ ອາຊຽນ - ສ. ເກົາຫຼີ (KASI) ໃນຂອບເຂດຍຸດທະສາດມະຫາສະມຸດອິນເດຍ - ປາຊີຟິກ ຂອງ ສ. ເກົາຫຼີ, ໄດ້ສະແດງໃຫ້ເຫັນຄຳໝັ້ນສັນຍາຢ່າງແຂງແຮງຂອງທ່ານ Yoon Suk-seol ປະທານາທິບໍດີ ເພື່ອແນໃສ່ຊຸກຍູ້ການພົວພັນ ອາຊຽນ - ສ. ເກົາຫຼີ ໃຫ້ພັດທະນາຕາມທິດສົມດຸນກວ່າ, ຮອບດ້ານກວ່າ ແລະຂຶ້ນສູ່ລະດັບສູງໃໝ່.
ດ້ວຍແຫຼ່ງຊັບພະຍາກອນອັນໃຫຍ່ຫຼວງ, ຂໍ້ລິເລີ່ມ KASI ຈະປະກອບສ່ວນເພີ່ມທະວີການຮ່ວມມືລະຫວ່າງ ອາຊຽນ ແລະ ສ. ເກົາຫຼີ ໃນບັນດາກົນໄກທີ່ອາຊຽນ ນຳພາເພື່ອແນໃສ່ພ້ອມກັນແກ້ໄຂບັນດາສິ່ງທ້າທາຍດ້ານຄວາມໝັ້ນຄົງທີ່ກ່ຽວຂ້ອງກັບການທະຫານ ແລະບໍ່ແມ່ນການທະຫານຢ່າງມີປະສິດທິຜົນ, ຊຸກຍູ້ການເຕີບໂຕລວມມຸ່ງໄປເຖິງອະນາຄົດແຫ່ງການພັດທະນາແບບຍືນຍົງ, ປະກອບສ່ວນຢ່າງຕັ້ງໜ້າເຂົ້າໃນທ່າອ່ຽງສັນຕິພາບ, ການພັດທະນາ ແລະຄວາມວັດທະນາຖາວອນຢູ່ພາກພື້ນ ແລະໃນໂລກ.
ສ. ເກົາຫຼີ ກໍ່ສະໜັບສະໜູນຄວາມມານະພະຍາຍາມຂອງບັນດາປະເທດອາຊຽນ ໃນການພັດທະນາອະນຸພາກພື້ນແມ່ນ້ຳຂອງ, ການຫັນເປັນດີຈີຕອນ, ການຫັນເປັນສີຂຽວ ເພື່ອອະນາຄົດທີ່ຍືນຍົງຂອງປະຊາຊົນ ແລະບັນດາປະເທດອາຊຽນ ແລະ ສ. ເກົາຫຼີ.
ຂ້າພະເຈົ້າເຊື່ອໝັ້ນວ່າ ການປະຕິບັດຂໍ້ລິເລີ່ມ KASI ຈະປະກອບສ່ວນຢ່າງມີປະສິດທິຜົນເຂົ້າໃນການເພີ່ມທະວີບົດບາດຂອງ ສ. ເກົາຫຼີ ຢູ່ພາກພື້ນ, ນໍາການພົວພັນ ອາຊຽນ - ສ. ເກົາຫຼີ ກາຍເປັນປັດໄຈຕັ້ງໜ້າສໍາລັບສັນຕິພາບ, ສະຖຽນລະພາບ, ການຮ່ວມມື ແລະພັດທະນາໃນພາກພື້ນ ແລະໃນໂລກ, ຍົກລະດັບການພົວພັນ ອາຊຽນ - ສ. ເກົາຫຼີ ມຸ່ງໄປເຖິງການສ້າງຕັ້ງການພົວພັນຄູ່ຮ່ວມມືຍຸດທະສາດຮອບດ້ານ ເນື່ອງໃນໂອກາດສະເຫຼີມສະຫຼອງ 35 ປີແຫ່ງວັນສ້າງຕັ້ງການພົວພັນສອງຝ່າຍໃນປີ 2024 ນີ້.
ໂດຍ: ຈາງຫງວຽນ