ຫວຽດນາມ ແລະອີຢູ ໂອ້ລົມສົນທະນາ ແລະຮ່ວມມືກ່ຽວກັບບັນຫາມະນຸດສະທຳ ບົນຈິດໃຈສ້າງສັນ ແລະເປີດອົກເປີດໃຈ
ກປ.ອອນໄລ - ຫວຽດນາມ ແລະສະຫະພາບເອີລົບ (ອີຢູ) ໄດ້ຢັ້ງຢືນຄືນໃໝ່ຄຳໝັ້ນສັນຍາປົກປ້ອງສິດທິມະນຸດ ຕາມບັນດາເອກະສານສິດທິມະນຸດສາກົນ ເຊິ່ງສອງຝ່າຍລ້ວນແຕ່ເປັນສະມາຊິກ; ພ້ອມກັນນັ້ນ, ເນັ້ນໜັກເຖິງຄວາມສົນໃຈລວມໃນເລື່ອງສືບຕໍ່ໂອ້ລົມສົນທະນາ ແລະ ຮ່ວມມືກ່ຽວກັບບັນຫາສິດທິມະນຸດບົນຈິດໃຈສ້າງສັນ ແລະເປີດອົກເປີດໃຈ, ອີງໃສ່ຄວາມເຄົາລົບ ແລະຄວາມເຂົ້າໃຈລວມ.
ນີ້ແມ່ນບັນດາຄວາມເຫັນດີເຫັນພ້ອມທີ່ຫວຽດນາມ ແລະອີຢູ ບັນລຸໄດ້ໃນການໂອ້ລົມສົນທະນາມະນຸດສະທຳປະຈຳປີ ທີ່ຈັດຂຶ້ນຢູ່ຮ່າໂນ້ຍ, ໃນວັນທີ 21 ກໍລະກົດ 2025. ວາລະໂອ້ລົມສົນທະນາຈັດຂຶ້ນພາຍໃຕ້ການເປັນປະທານຂອງທ່ານ ຟ້າມຫາຍແອັງ, ຫົວໜ້າກົມບັນດາອົງການຈັດຕັ້ງສາກົນ, ກະຊວງການຕ່າງປະເທດຫວຽດນາມ ແລະທ່ານນາງ Paola Pampaloni, ຮອງຫົວໜ້າຝ່າຍບໍລິຫານ, ອົງການກະທຳການຕ່າງປະເທດເອີລົບ ຮັບຜິດຊອບພາກພື້ນ ອາຊີ-ປາຊີຟິກ.
ທີ່ການໂອ້ລົມສົນທະນາ, 4 ເນື້ອໃນຕົ້ນຕໍຄື: ສິດເສດຖະກິດ, ສັງຄົມ ແລະວັດທະນະທຳ; ສິດພົນລະເຮືອນ ແລະການເມືອງ; ອຳນາດນິຕິບັນຍັດ ແລະການປະຕິຮູບກົດໝາຍ; ແລະການຮ່ວມມືທີ່ເວທີປາໄສສິດທິມະນຸດຫຼາຍຝ່າຍ.
ກ່ຽວຂ້ອງເຖິງສົນທິສັນຍາສາກົນ ກ່ຽວກັບບັນດາສິດພົນລະເຮືອນ ແລະການເມືອງ (ICCPR), ຝ່າຍ ຫວຽດນາມ ໄດ້ແບ່ງປັນຄວາມຄືບໜ້າໃນການຊຸກຍູ້ບັນດາສິດພົນລະເຮືອນ ແລະການເມືອງ; ບັນດາຄວາມຄືບໜ້າໃນການເພີ່ມທະວີອຳນາດນິຕິບັນຍັດ ແລະຄວາມມານະພະຍາຍາມໃນການສ້າງໂຄງປະກອບລະບົບບໍລິຫານຄືນໃໝ່, ສັບຊ້ອນກົງຈັກການຈັດຕັ້ງຂອງລັດໃຫ້ກະທັດຮັດເພື່ອຍົກສູງປະສິດທິຜົນ, ຮັບໃຊ້ປະຊາຊົນເປັນຢ່າງດີກວ່າ ແລະຊຸກຍູ້ການຊົມໃຊ້ບັນດາສິດໃນສັງກາດໃໝ່ຂອງການພັດທະນາປະເທດຊາດ.
ຝ່າຍອີຢູ ໄດ້ຊົມເຊີຍບັນດາຄວາມຄືບໜ້າຂອງຫວຽດນາມ ໃນຂົງເຂດສ້າງກົດໝາຍ, ພ້ອມກັນນັ້ນ, ສົ່ງເສີມຫວຽດນາມ ເພີ່ມທະວີການເຂົ້າຮ່ວມບັນດາກົນໄກຂອງສະຫະປະຊາຊາດ, ພິເສດແມ່ນໃນຖານະເປັນສະມາຊິກຂອງສະພາສິດທິມະນຸດ.
ໂດຍ: ທູຈາງ