ນາຍົກລັດຖະມົນຕີຫວຽດນາມ ເຈລະຈາກັບປະທານາທິບໍດີ UAE, ຍົກລະດັບການພົວພັນສອງປະເທດຂຶ້ນເປັນການພົວພັນຄູ່ຮ່ວມມືຮອບດ້ານ

ທ່ານ ຟ້າມມິງຈິງ ນາຍົກລັດຖະມົນຕີຫວຽດນາມ ແລະທ່ານ Sheikh Mohammed bin Zayed Al Nahyan ປະທານາທິບໍດີ UAE. ພາບ: vov.vn

ທ່ານນາຍົກລັດຖະມົນຕີ ຟ້າມມິງຈິງ ແລະປະທານາທິບໍດີ UAE ໄດ້ເຫັນດີກ່ຽວກັບ 6 ຈຸດສຸມບຸລິມະສິດໃນການຮ່ວມມືໃນໄລຍະຈະມາເຖິງ, ໃນນັ້ນມີເລັ່ງລັດສ້າງບັນດາໂຄງການດຳເນີນງານເພື່ອຜັນຂະຫຍາຍບັນດາຂອບການຮ່ວມມືຮອບດ້ານ; ຊຸກຍູ້ການຮ່ວມມືດ້ານນະວັດຕະກຳ, ການຫັນເປັນສີຂຽວ, ການຫັນປ່ຽນດີຈີຕອນ ແລະເສດຖະກິດໝູນວຽນ; ສ້າງບາດກ້າວບຸກທະລຸໃນການຮ່ວມມືດ້ານເສດຖະກິດ, ການຄ້າ ແລະການລົງທຶນສອງຝ່າຍ; ຮ່ວມມືພັດທະນາອຸດສາຫະກຳ Halal ແລະເປີດຕະຫລາດຜະລິດຕະພັນ Halal ຂອງຫວຽດນາມ; ເພີ່ມທະວີການຮ່ວມມືດ້ານແຮງງານ, ວັດທະນະທຳ, ການທ່ອງທ່ຽວ, ກິລາ, ການພົວພັນແລກປ່ຽນປະຊາຊົນ ແລະ ສົມທົບກັນຢ່າງແໜ້ນແຟ້ນ, ປຶກສາຫາລື ແລະສະໜັບສະໜູນເຊິ່ງກັນ ແລະກັນໃນບັນດາບັນຫາພາກພື້ນ ແລະໂລກຢູ່ເວທີປາໄສຫຼາຍຝ່າຍ. ທ່ານນາຍົກລັດຖະມົນຕີ ຟ້າມມິງຈິງ ກໍ່ສະເໜີບັນດາອົງການທີ່ມີໜ້າທີ່ຮັບຜິດຊອບຂອງ UAE ສ້າງເງື່ອນໄຂສະດວກໃຫ້ປະຊາຄົມຊາວຫວຽດນາມ ອາໄສ ແລະເຮັດວຽກຢູ່ UAE.

ສ່ວນທ່ານປະທານາທິບໍດີ UAE ຢືນຢັນຈະຕັ້ງໜ້າຊີ້ນຳບັນດາອົງການທີ່ກ່ຽວຂ້ອງຂອງ UAE ສົມທົບກັບຝ່າຍຫວຽດນາມ ປະຕິບັດບັນດາໝາກຜົນທີ່ບັນລຸໄດ້ໃນການຢ້ຽມຢາມ. ທ່ານປະທານາທິບໍດີ UAE ໄດ້ສະແດງຄວາມປິຕິຊົມຊື່ນກ່ຽວກັບຈຳນວນຄົນງານຫວຽດນາມ ມາເຮັດວຽກຢູ່ UAE ເພີ່ມຂຶ້ນ ແລະຢືນຢັນຈະສ້າງເງື່ອນໄຂໃຫ້ຊາວຫວຽດນາມດຳລົງຊີວິດເປັນປົກກະຕິຢູ່ UAE, ສະໜັບໜູນການສ້າງຕັ້ງສູນວັດທະນະທຳຫວຽດນາມ ຢູ່ UAE. ທ່ານປະທານາທິບໍດີ ຢືນຢັນຈະຊີ້ນຳໂດຍກົງ ເພື່ອປະຕິບັດບາງໂຄງການສະເພາະ, ຄື: ໜູນຊ່ວຍໂຮງຮຽນກິລາບານເຕະຊາວໜຸ່ມຢູ່ທ້ອງຖິ່ນຫວຽດນາມ ແລະກໍ່ສ້າງສູນການເງິນຢູ່ນະຄອນໂຮ່ຈີມິນ.

ໂດຍ:​ ກວຽດເຕິມ