ເພີ່ມທະວີການພົວພັນລະຫວ່າງພັກກອມມູນິດຫວຽດນາມ ແລະພັກກອມມູນິດຝຣັ່ງ ກວ່າອີກ
ກປ.ອອນໄລ - ຕອນບ່າຍວັນທີ 28 ຕຸລາ, ຢູ່ສຳນັກງານສູນກາງພັກ, ທ່ານ ໂຕເລິມ ເລຂາທິການໃຫຍ່ພັກກອມມູນິດຫວຽດນາມ ໄດ້ໃຫ້ການຕ້ອນຮັບຄະນະຜູ້ແທນຂັ້ນສູງພັກກອມມູນິດຝຣັ່ງ ນໍາໂດຍທ່ານ Fabien Roussel ເລຂາທິການທົ່ວປະເທດພັກກອມມູນິດຝຣັ່ງ ເນື່ອງໃນໂອກາດມາຢ້ຽມຢາມ, ເຮັດວຽກຢູ່ ຫວຽດນາມ ແລະເຂົ້າຮ່ວມກອງປະຊຸມສຳມະນາທິດສະດີ ຄັ້ງທີ 4 ລະຫວ່າງພັກກອມມູນິດຫວຽດນາມ ແລະພັກກອມມູນິດຝຣັ່ງ.
    |
 |
|
ທ່ານ ໂຕເລິມ ເລຂາທິການໃຫຍ່ພັກກອມມູນິດຫວຽດນາມ ຕ້ອນຮັບທ່ານ Fabien Roussel ເລຂາທິການທົ່ວປະເທດພັກກອມມູນິດຝຣັ່ງ. ພາບ: ຟູເຊີນ |
ທີ່ການຕ້ອນຮັບ, ທ່ານເລຂາທິການໃຫຍ່ ໂຕເລິມ ສະແດງຄວາມເຄົາລົບນັບຖືຕໍ່ນໍ້າໃຈສາມັກຄີ ແລະການສະໜັບສະໜູນເຊິ່ງພັກກອມມູນິດ ແລະປະຊາຊົນຝຣັ່ງ ສະຫງວນໃຫ້ພັກກອມມູນິດ ແລະປະຊາຊົນຫວຽດນາມ ໃນສະພາບການໂລກມີການຜັນປ່ຽນຢ່າງບໍ່ຢຸດຢັ້ງ. ພ້ອມທັງຕີລາຄາສູງຄວາມມານະພະຍາຍາມຂອງພັກກອມມູນິດຝຣັ່ງ ແນໃສ່ຍົກສູງທີ່ຕັ້ງບົດບາດຂອງພັກ, ປະກອບສ່ວນເຂົ້າໃນການຕໍ່ສູ້ເພື່ອສັນຕິພາບ, ເອກະລາດ, ປະຊາທິປະໄຕ ແລະຄວາມກ້າວໜ້າສັງຄົມຢູ່ຝຣັ່ງ, ເອີລົບ ແລະໃນໂລກ.
ໃນໄລຍະຈະມາເຖິງ, ທ່ານເລຂາທິການໃຫຍ່ ໂຕເລິມ ສະເໜີໃຫ້ສອງພັກສືບຕໍ່ເພີ່ມທະວີບັນດາຂົງເຂດຮ່ວມມືທີ່ມີຢູ່ແລ້ວ, ໃນນັ້ນມີກົນໄກກອງປະຊຸມສໍາມະນາທິດສະດີເພື່ອແບ່ງປັນບັນຫາທິດສະດີ ແລະປະສົບການຕົວຈິງຊ່ວຍຍົກສູງກຳລັງຄວາມສາມາດໃນການເຄື່ອນໄຫວຂອງແຕ່ລະພັກຢູ່ແຕ່ລະປະເທດ.
|
|
 |
|
ທ່ານ ໂຕເລິມ ເລຂາທິການໃຫຍ່ພັກກອມມູນິດຫວຽດນາມ ແລະທ່ານ Fabien Roussel ເລຂາທິການທົ່ວປະເທດພັກກອມມູນິດຝຣັ່ງ. ພາບ: ຟູເຊີນ |
ສ່ວນທ່ານ Fabien Roussel ເນັ້ນໜັກວ່າ ພັກກອມມູນິດຝຣັ່ງ ຍາມໃດກໍ່ຖືເປັນສຳຄັນ ແລະບຸລິມະສິດຊຸກຍູ້ ແລະເພີ່ມທະວີການພົວພັນຮ່ວມມືກັບພັກກອມມູນິດຫວຽດນາມ, ປາດຖະໜາຢາກຮັກສາ ແລະເສີມຂະຫຍາຍການຮ່ວມມືທຸກດ້ານລະຫວ່າງສອງພັກ, ພົ້ນເດັ່ນແມ່ນກົນໄກກອງປະຊຸມສໍາມະນາທິດສະດີ; ຢືນຢັນວ່າ ພັກກອມມູນິດຝຣັ່ງ ຍາມໃດກໍ່ມານະພະຍາຍາມ ແລະພ້ອມແລ້ວທີ່ຈະປະກອບສ່ວນຢ່າງແທດຈິງ ແລະມີປະສິດທິຜົນເຂົ້າໃນການຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງ ຝະຣັ່ງ-ຫວຽດນາມ, ໃນນັ້ນມີການຮ່ວມມືດ້ານເສດຖະກິດ-ການຄ້າ, ຄົມມະນາຄົມທາງລົດໄຟ, ທາງນໍ້າ, ການຮ່ວມມືທ້ອງຖິ່ນ, ການຮ່ວມມືທາງລັດຖະສະພາລະຫວ່າງສອງປະເທດ, ກໍ່ຄືການຮ່ວມມືໃນຂອບເຂດຂອງອົງການຝຣັ່ງໂກໂຟນີສາກົນ.
ໂດຍ: ເຈິ່ນຮວ່ຽນ