ແລກປ່ຽນນະໂຍບາຍຂັ້ນຮອງລັດຖະມົນຕີການຕ່າງປະເທດ ຫວຽດນາມ - ສປປ ເກົາຫຼີ ຄັ້ງທີ 5

ທ່ານ ຫງວຽນມິງຫວູ ຮອງລັດຖະມົນຕີຜູ້ປະຈໍາການກະຊວງການຕ່າງປະເທດຫວຽດນາມ ແລະທ່ານ Pak Sang Gil ຮອງລັດຖະມົນຕີການຕ່າງປະເທດ ສປປ ເກົາຫຼີ ໄດ້ແລກປ່ຽນກ່ຽວກັບສະພາບການຂອງແຕ່ລະປະເທດ ແລະສະແດງຄວາມປິຕິຊົມຊື່ນຕໍ່ບາດກ້າວພັດທະນາຂອງການພົວພັນສອງປະເທດ ໃນໄລຍະຜ່ານມາໃນທຸກຂົງເຂດການເມືອງ, ການທູດ, ການປ້ອງກັນຊາດ, ປ້ອງກັນຄວາມສະຫງົບ, ວັດທະນະທໍາ, ກິລາ.

ບັນຍາກາດການແລກປ່ຽນນະໂຍບາຍຂັ້ນຮອງລັດຖະມົນຕີການຕ່າງປະເທດ ຫວຽດນາມ - ສປປ ເກົາຫຼີ ຄັ້ງທີ 5. ພາບ: ກະຊວງການຕ່າງປະເທດຫວຽດນາມ.

ທ່ານ ຫງວຽນມິງຫວູ ຢັ້ງຢືນຫຼັກໝັ້ນສະເໝີຕົ້ນສະເໝີປາຍຂອງຫວຽດນາມ ແມ່ນຍາມໃດກໍຖືເປັນສໍາຄັນ ແລະປາດຖະໜາຢາກຊຸກຍູ້ການພົວພັນຮ່ວມມືກັບ ສປປ ເກົາຫຼີ ໃຫ້ພັດທະນາຢ່າງແຂງແຮງ ແລະແທດຈິງກວ່າໃນທຸກຂົງເຂດບົນພື້ນຖານເຄົາລົບກົດໝາຍສາກົນ, ສອດຄ່ອງກັບຄວາມມຸ່ງມາດປາດຖະໜາຂອງປະຊາຊົນສອງປະເທດ, ປະກອບສ່ວນຮັກສາສັນຕິພາບ, ສະຖຽນລະພາບ, ຮ່ວມມື ແລະພັດທະນາຢູ່ພາກພື້ນ ແລະໃນໂລກ.

ກ່ຽວກັບການພົວພັນດ້ານການເມືອງ, ສອງຝ່າຍໄດ້ເຫັນດີສືບຕໍ່ຊຸກຍູ້ການແລກປ່ຽນຄະນະຜູ້ແທນ, ຜ່ານນັ້ນປັບປຸງຄວາມໄວ້ເນື້ອເຊື່ອໃຈດ້ານການເມືອງຢ່າງບໍ່ຢຸດຢັ້ງ ແລະເປີດກວ້າງການຮ່ວມມືທີ່ແທດຈິງລະຫວ່າງສອງປະເທດ; ສົມທົບກັນກະກຽມບັນດາການເຄື່ອນໄຫວສະເຫຼີມສະຫຼອງ 75 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ-ສປປ ເກົາຫຼີ ໃນປີ 2025.

ທ່ານ ຫງວຽນມິງຫວູ ຮອງລັດຖະມົນຕີຜູ້ປະຈໍາການກະຊວງການຕ່າງປະເທດຫວຽດນາມ ແລະທ່ານນາງ Choe Son Hui ລັດຖະມົນຕີການຕ່າງປະເທດ ສປປ ເກົາຫຼີ. ພາບ: ກະຊວງການຕ່າງປະເທດຫວຽດນາມ.

ໃນຂອບເຂດກອງປະຊຸມ, ສອງຝ່າຍຍັງໄດ້ແລກປ່ຽນກ່ຽວກັບສະພາບການພາກພື້ນ ແລະສາກົນທີ່ຕ່າງຝ່າຍຕ່າງມີຄວາມສົນໃຈ, ໃນນັ້ນມີການຮັກສາສັນຕິພາບ, ສະຖຽນລະພາບໃນແຫຼມເກົາຫຼີ ແລະຢູ່ທະເລຕາເວັນອອກ; ເຫັນດີສືບຕໍ່ສົມທົບກັນຢ່າງແໜ້ນແຟ້ນ ແລະສະໜັບສະໜູນເຊິ່ງກັນແລະກັນ ທີ່ເວທີປາໄສສາກົນ ແລະພາກພື້ນ, ຄື: ສປຊ, ຂະບວນການບໍ່ຮ່ວມກຸ່ມ, ເວທີປາໄສພາກພື້ນອາຊຽນ (ARF). ສອງຝ່າຍ ໄດ້ເຫັນດີຈັດຕັ້ງການແລກປ່ຽນນະໂຍບາຍຂັ້ນຮອງລັດຖະມົນຕີການຕ່າງປະເທດ ຫວຽດນາມ-ສປປ ເກົາຫຼີ ຄັ້ງທີ 6 ຢູ່ຫວຽດນາມ ໃນໄລຍະຈະມາເຖິງ.

ໃນເວລາຢ້ຽມຢາມຢູ່ ສປປ ເກົາຫຼີ, ທ່ານ ຫງວຽນມິງຫວູ ໄດ້ເຂົ້າຢ້ຽມຂໍ່ານັບທ່ານນາງ Choe Son Hui ລັດຖະມົນຕີການຕ່າງປະເທດ ສປປ ເກົາຫຼີ; ເຮັດວຽກກັບຮອງຫົວໜ້າຄະນະສາກົນພັກແຮງງານ ສປປ ເກົາຫຼີ ແລະຮອງລັດຖະມົນຕີກະຊວງເສດຖະກິດການພົວພັນຕ່າງປະເທດ ສປປ ເກົາຫຼີ; ເຂົ້າຮ່ວມພິທີເປີດງານວາງສະແດງຮູບພາບກ່ຽວກັບການພົວພັນ ຫວຽດນາມ-ສປປ ເກົາຫຼີ ເນື່ອງໃນໂອກາດປະທານ ກິມ ອິນ ຊຸງ ຢ້ຽມຢາມຫວຽດນາມ ຄັ້ງທີສອງຄົບຮອບ 60 ປີ. 

ໂດຍ: ໄຊຊະນະ