ຫວຽດນາມ-ຈີນ ຊຸກຍູ້ການຮ່ວມມືດ້ານປ້ອງກັນຊາດໃຫ້ນັບມື້ນັບແທດຈິງ, ມີປະສິດທິຜົນ

ຕອນບ່າຍວັນທີ 27 ຕຸລາ, ທ່ານພົນໂທ ຮວ່າງຊວນຈ໊ຽນ ແລະຄະນະໄດ້ມີການພົບປະກັບທ່ານພົນຈັດຕະວາ Zhuang ge ຜູ້ບັນຊາການທະຫານເຂດກວາງຊີ (ຈີນ).

ທ່ານພົນໂທ ຮວ່າງຊວນຈ໊ຽນ ເນັ້ນໜັກວ່າ ຫວຽດນາມ ຍາມໃດກໍ່ຖືການພົວພັນກັບຈີນ ແມ່ນບຸລິມະສິດແຖວໜ້າໃນນະໂຍບາຍການທູດຢ່າງສະເໝີຕົ້ນສະເໝີປາຍ; ປາດຖະໜາຢາກຊຸກຍູ້ການຮ່ວມມືດ້ານປ້ອງກັນຊາດສອງຝ່າຍໃຫ້ນັບມື້ນັບເຂົ້າສູ່ລວງເລິກ, ແທດຈິງ, ມີປະສິດທິຜົນ, ສົມກັບແມ່ນເສົາຄໍ້າໃນການພົວພັນສອງປະເທດ. ຫວຽດນາມ ຍາມໃດກໍ່ເຄົາລົບ, ຈົດຈໍາການຊ່ວຍເຫຼືອຂອງພັກ, ລັດ, ກອງທັບ ແລະປະຊາຊົນຈີນ ໃນຊຸມເດືອນປີແຫ່ງການຕໍ່ສູ້ຍາດເອົາເອກະລາດແຫ່ງຊາດໃນເມື່ອກ່ອນ ກໍ່ຄືໃນກິດຈະການສ້າງສາ, ພັດທະນາປະເທດຊາດໃນປະຈຸບັນ. ການປະຕິບັດງານຂອງຄະນະຜູ້ແທນຂັ້ນສູງກະຊວງປ້ອງກັນປະເທດຫວຽດນາມ ກໍ່ແມ່ນໂອກາດເພື່ອພ້ອມກັບຝ່າຍຈີນ ຕີລາຄາໝາກຜົນການຮ່ວມມືດ້ານປ້ອງກັນຊາດສອງຝ່າຍໃນໄລຍະຜ່ານມາ; ແລກປ່ຽນທິດທາງ ແລະມາດຕະການຊຸກຍູ້, ເພີ່ມທະວີການພົວພັນລະຫວ່າງສອງກອງທັບໃນໄລຍະຈະມາເຖິງ.

ທ່ານພົນໂທ ຮວ່າງຊວນຈ໊ຽນ ພົບປະກັບທ່ານພົນຈັດຕະວາ Zhuang ge ຜູ້ບັນຊາການທະຫານເຂດກວາງຊີ (ຈີນ). ພາບ: ຊວນຮວ່າ

ສ່ວນທ່ານພົນຈັດຕະວາ Zhuang ge ແບ່ງປັນວ່າ ແຂວງກວາງຊີ ແມ່ນທ້ອງຖິ່ນທີ່ມີເສັ້ນຊາຍແດນຕິດກັບຫຼາຍແຂວງຂອງຫວຽດນາມ. ໃນໄລຍະຜ່ານມາ, ແຂວງກວາງຊີ ຍາມໃດກໍ່ຕັ້ງໜ້າເຂົ້າຮ່ວມບັນດາການເຄື່ອນໄຫວລວມກັບກອງທັບປະຊາຊົນຫວຽດນາມ ແລະບັນດາທ້ອງຖິ່ນທີ່ຕິດກັບແຂວງກວາງຊີ; ຕັ້ງໜ້າເຂົ້າຮ່ວມບັນດາການເຄື່ອນໄຫວພົບປະແລກປ່ຽນມິດຕະພາບປ້ອງກັນຊາດເຂດຊາຍແດນຫວຽດນາມ-ຈີນ.

ເນື່ອງໃນໂອກາດນີ້, ທ່ານພົນໂທ ຮວ່າງຊວນຈ໊ຽນ ໄດ້ແຈ້ງໃຫ້ການນໍາທະຫານເຂດກວາງຊີ ຮັບຊາບໝາກຜົນອັນດີງາມຂອງການຢ້ຽມຢາມຫວຽດນາມ ຢ່າງເປັນທາງການຂອງທ່ານພົນໂທ Zhang Youxia ກໍາມະການກົມການເມືອງ, ຮອງປະທານຄະນະພັກການທະຫານສູນກາງຈີນ, ໃນລະຫວ່າງວັນທີ 24 ຮອດວັນທີ 26 ຕຸລາ ຜ່ານມາ.

ທ່ານພົນໂທ ຮວ່າງຊວນຈ໊ຽນ ແລະຄະນະຜູ້ແທນຂັ້ນສູງກະຊວງປ້ອງກັນປະເທດຫວຽດນາມ ຮັບຟັງແນະນຳກ່ຽວກັບວັດຖຸພັນຢູ່ຫໍວາງສະແດງໂຮ່ຈີມິນ ທີ່ເມືອງ Longzhou, ນະຄອນ Chongzuo, (ກວາງຊີ, ຈີນ). ພາບ: ຊວນຮວ່າ

ກ່ອນໜ້ານັ້ນ, ຄະນະໄດ້ໄປຢ້ຽມຢາມຫໍວາງສະແດງໂຮ່ຈີມິນ ຢູ່ເມືອງ Longzhou, ນະຄອນ Chongzuo. ພາຍຫຼັງຮັບຟັງການແນະນໍາກ່ຽວກັບຮູບພາບ, ວັດຖຸພັນຫຼາຍຮ້ອຍຢ່າງທີ່ວາງສະແດງຢູ່ທີ່ນີ້, ທ່ານພົນໂທ ຮວ່າງຊວນຈ໊ຽນ ໄດ້ສະແດງຄວາມສະເທືອນໃຈຕໍ່ເລື່ອງຝ່າຍຈີນ ໄດ້ເກັບກຳ, ຮັກສາຮູບພາບ, ວັດຖຸພັນທີ່ກ່ຽວຂ້ອງເຖິງການເຄື່ອນໄຫວຂອງປະທານໂຮ່ຈີມິນ ທີ່ແຂວງກວາງຊີ ເປັນຢ່າງດີ; ເນັ້ນໜັກວ່າບັນດາປູຊະນີຍະສະຖານຕິດພັນກັບປະທານໂຮ່ຈີມິນ ແລະການປະຕິວັດຫວຽດນາມ ກາຍເປັນຊັບສົມບັດອັນລ້ໍາຄ່າຂອງນໍ້າໃຈມິດຕະພາບຫວຽດນາມ-ຈີນ.

ໂດຍ: ໄຊນີດາ