ທີ່ກອງປະຊຸມ, ບັນດາຜູ້ແທນໄດ້ຮັບຟັງບົດລາຍງານກ່ຽວກັບການສ້າງແຜນຮ່າງສູນການເງິນພາກພື້ນ ແລະສາກົນຢູ່ຫວຽດນາມ; ປຶກສາຫາລືກ່ຽວກັບສະພາບການສາກົນ ແລະພາຍໃນປະເທດຢ່າງຟົດຟື້ນ; ຄວາມຕ້ອງການ, ຄວາມສາມາດບົ່ມຊ້ອນ, ຄວາມຮຽກຮ້ອງຕ້ອງການ ແລະໜ້າທີ່ທີ່ວາງອອກຂອງການສ້າງສູນການເງິນ.
    |
 |
|
ບັນຍາກາດທີ່ກອງປະຊຸມ. ພາບ: ສໍານັກຂ່າວສານຫວຽດນາມ |
ສະຫຼຸບກອງປະຊຸມ, ທ່ານ ຟ້າມມິງຈິ໊ງ ຮຽກຮ້ອງໃຫ້ຄະນະຊີ້ນຳ, ບັນດາກະຊວງ, ອົງການທີ່ກ່ຽວຂ້ອງ, ນະຄອນໂຮ່ຈີມິນ ແລະນະຄອນດ່ານັ້ງ ຮັບເອົາຄຳເຫັນປະກອບຂອງຜູ້ແທນ. ພ້ອມກັນນັ້ນ, ບັນດາພາກສ່ວນທີ່ກ່ຽວຂ້ອງສືບຕໍ່ປຶກສາຫາລື ແລະແລກປ່ຽນກັບບັນດາສຳນັກງານ, ອົງການຈັດຕັ້ງ, ທາບທາມຮູບແບບສາກົນ ເພື່ອສ້າງສູນການເງິນໃຫ້ສອດຄ່ອງກັບລະບອບການເມືອງ, ປະຫວັດສາດ, ວັດທະນະທຳ, ເງື່ອນໄຂດ້ານເສດຖະກິດ-ສັງຄົມຂອງຫວຽດນາມ ໃນປະຈຸບັນ ແລະອະນາຄົດຢ່າງບໍ່ຟ້າວຟັ່ງ. ທ່ານນາຍົກລັດຖະມົນຕີ ຊີ້ແຈ້ງວ່າ ຈຸດໝາຍຂອງການສ້າງສູນການເງິນແມ່ນສ້າງຕັ້ງຕະຫຼາດການເງິນ, ພັດທະນາການບໍລິການດ້ານການເງິນ ແລະບັນດາບໍລິການທີ່ກ່ຽວຂ້ອງ ເພື່ອລະດົມແຫຼ່ງກໍາລັງດ້ານການເງິນໃຫ້ແກ່ການພັດທະນານະຄອນໂຮ່ຈີມິນ, ນະຄອນດ່ານັ້ງ ເວົ້າສະເພາະ, ການພັດທະນາປະເທດຊາດເວົ້າລວມ.
ທ່ານນາຍົກລັດຖະມົນຕີ ຮຽກຮ້ອງໃຫ້ກຳນົດຂອບເຂດ, ເປົ້າໝາຍ, ຮູບແບບການເຄື່ອນໄຫວຂອງສູນການເງິນ; ເງື່ອນໄຂກ່ຽວກັບພື້ນຖານໂຄງລ່າງ, ຊັບພະຍາກອນມະນຸດ, ການເງິນ, ທີ່ດິນ, ລະບົບນິເວດຢ່າງຈະແຈ້ງ; ສະເໜີພາລະບົດບາດ, ໜ້າທີ່, ສິດອຳນາດ, ກົນໄກການເຄື່ອນໄຫວຂອງສູນການເງິນພາກພື້ນ ແລະສາກົນ. ພ້ອມກັນນັ້ນ, ສະເໜີກອບນິຕິກໍາ, ກົນໄກ ແລະນະໂຍບາຍສະເພາະ, ລວມທັງນະໂຍບາຍວີຊາ, ແຮງງານ, ພາສີ, ເພື່ອດຶງດູດແຫຼ່ງການເງິນ, ໂດຍສະເພາະແມ່ນການເງິນສີຂຽວ ແລະການເງິນດີຈີຕອນ, ເພື່ອສ້າງຕະຫຼາດການເງິນໃຫ້ດຳເນີນໄປຢ່າງປອດໃສ, ປອດໄພ ແລະເຊື່ອມໂຍງ ເພື່ອຂຸດຄົ້ນທ່າແຮງບົ່ມຊ້ອນ ແລະທ່າໄດ້ປຽບຂອງຫວຽດນາມ ໃຫ້ໄດ້ຢ່າງສຸດຂີດ, ໃນນັ້ນ ມີນະຄອນໂຮ່ຈີມິນ ແລະນະຄອນດ່ານັ້ງ. ທ່ານນາຍົກລັດຖະມົນຕີ ຮຽກຮ້ອງໃຫ້ບັນດາກະຊວງ, ຂະແໜງການເຊີດຊູຄວາມຮັບຜິດຊອບ, ຟ້າວສ້າງແຜນຮ່າງສູນການເງິນໃຫ້ສຳເລັດ ເພື່ອຮັບປະກັນຄວາມເປັນໄປໄດ້, ປະສິດທິຜົນ, ແທດເໝາະກັບສະພາບການຕົວຈິງ; ແລ້ວຍື່ນສະເໜີຕໍ່ກົມການເມືອງ ແລະສະພາແຫ່ງຊາດ ພິຈາລະນາ.
ໂດຍ: ທະນາພອນ