ຫວຽດນາມ ປະຕິເສດການຕັດສິນຝ່າຍດຽວຂອງຈີນກ່ຽວກັບການຫ້າມຫາປາຢູ່ທະເລຕາເວັນອອກ
ກປ.ອອນໄລ - ວັນທີ 29 ເມສາ, ທີ່ກອງປະຊຸມຂ່າວປະຈໍາເດືອນຂອງກະຊວງການຕ່າງປະເທດຫວຽດນາມ, ໂດຍຕອບຄໍາຖາມຂອງນັກຂ່າວທີ່ສະເໜີໃຫ້ຮູ້ກ່ຽວກັບຄວາມຄິດເຫັນຂອງຫວຽດນາມ ຕໍ່ຂ່າວທີ່ວ່າຕໍາຫຼວດທະເລຈີນ ໄດ້ຖະແຫຼງການຮັບປະກັນໃນການປະຕິບັດຄໍາສັ່ງຫ້າມຫາປາເຊິ່ງຈະມີຜົນສັກສິດນັບແຕ່ວັນທີ 1 ພຶດສະພາ 2021 ຢູ່ເຂດທະເລ ລວມແຕ່ມີສ່ວນໜຶ່ງຂອງອ່າວພາກເໜືອ ແລະໝູ່ເກາະຮວ່າງຊາຂອງຫວຽດນາມ. ທ່ານ ດວ່ານຄັ໊ກຫວຽດ ຮອງໂຄສົກກະຊວງການຕ່າງປະເທດຫວຽດນາມ ຊີ້ແຈ້ງວ່າ:
“ຫວຽດນາມ ມີພະຍານຫຼັກຖານດ້ານນິຕິກໍາ ແລະຫຼັກຖານປະຫວັດສາດຢັ້ງຢືນອະທິປະໄຕສໍາລັບໝູ່ເກາະຮວ່າງຊາ ແລະເຈື່ອງຊາ ກໍ່ຄືບັນດາສິດທີ່ຖືກຕ້ອງຕາມກົດໝາຍສໍາລັບເຂດທະເລຕ່າງໆຂອງຫວຽດນາມ ທີ່ໄດ້ກໍານົດສອດຄ່ອງກັບສົນທິສັນຍາຂອງ ສປຊ ກ່ຽວກັບກົດໝາຍວ່າດ້ວຍທະເລ ປີ 1982 (UNCLOS 1982).
    |
 |
|
ທ່ານ ດວ່ານຄັ໊ກຫວຽດ ຮອງໂຄສົກກະຊວງການຕ່າງປະເທດຫວຽດນາມ. ພາບ: ເຢີດຮະ. |
ຫວຽດນາມ ຖືວ່າ ເລື່ອງດໍາເນີນບັນດາມາດຕະການອະນຸລັກຮັກສາຊັບພະຍາກອນຊີວະນາໆພັນຕ້ອງໄດ້ດໍາເນີນຢ່າງສອດຄ່ອງກັບບັນດາລະບຽບການທີ່ກ່ຽວຂ້ອງຂອງ UNCLOS 1982 ແລະບໍ່ໄດ້ລະເມີດອະທິປະໄຕ ແລະອຳນາດສານຢູ່ທະເລຂອງບັນດາປະເທດທີ່ກ່ຽວຂ້ອງ.
ຫວຽດນາມ ຄັດຄ້ານ ແລະປະຕິເສດຢ່າງເດັດດ່ຽວກ່ຽວກັບການຕິດສິນໃຈຝ່າຍດຽວນີ້ຂອງຈີນ. ລະບຽບຫຼັກການນີ້ໄດ້ລະເມີດອະທິປະໄຕຂອງຫວຽດນາມ ສໍາລັບໝູ່ເກາະຮວ່າງຊາ, ລະເມີດກົດໝາຍສາກົນ, ໃນນັ້ນມີ UNCLOS 1982, ຝືນກັບເນື້ອໃນຈິດໃຈ ແລະຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC), ຝືນກັບຂໍ້ຕົກລົງວ່າດ້ວຍຫຼັກການພື້ນຖານໃນການຊີ້ນໍາແກ້ໄຂບັນຫາຢູ່ທະເລລະຫວ່າງຫວຽດນາມ-ຈີນ”.
ໂດຍ: ເກື່ອງດັ້ງ