ຫວຽດນາມ ສືບຕໍ່ຕັ້ງໜ້າຊຸກຍູ້ການຮ່ວມສຳພັນເສດຖະກິດໃນພາກພື້ນ
ກປ.ອອນໄລ - ໃນລະຫວ່າງວັນທີ 19 - 20 ມັງກອນ, ຢູ່ນະຄອນຫຼວງໂຕກຽວ, ປະເທດ ຍີ່ປຸ່ນ, ທ່ານ ບຸ່ຍແທງເຊີນ ຮອງລັດຖະມົນຕີຜູ້ປະຈຳການກະຊວງການຕ່າງປະເທດຫວຽດນາມ ໄດ້ນໍາໜ້າຄະນະຜູ້ແທນຫວຽດນາມ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສ ຄັ້ງທີ 1 ຂອງກຸ່ມ 20 ພື້ນຖານເສດຖະກິດແຖວໜ້າໃນໂລກ (G20).
ກ່າວຄໍາເຫັນທີ່ກອງປະຊຸມ, ທ່ານ ບຸ່ຍແທງເຊີນ ຢືນຢັນວ່າ ຫວຽດນາມສືບຕໍ່ເປັນເຈົ້າການ, ຕັ້ງໜ້າເຂົ້າຮ່ວມ ແລະຊຸກຍູ້ການຮ່ວມສຳພັນເສດຖະກິດໃນພາກພື້ນ ແລະໂລກ; ພ້ອມກັບບັນດາປະເທດສະມາຊິກສັນຍາຄູ່ຮ່ວມມືຮອບດ້ານ ແລະກ້າວໜ້າຂ້າມປາຊີຟິກ (CPTPP) ຊຸກຍູ້ການຜັນຂະຫຍາຍສັນຍາສໍາຄັນນີ້ຢ່າງມີປະສິດທິຜົນ; ສົມທົບຢ່າງແໜ້ນແຟ້ນກັບອີຢູ ຊຸກຍູ້ການລົງນາມ ແລະໃຫ້ສັດຕະຍາບັນສັນຍາການຄ້າເສລີ ຫວຽດນາມ-ອີຢູ (EVFTA)ໂດຍໄວ..
|
|
ບັນຍາກາດທີ່ກອງປະຊຸມ. ພາບ: baoquocte.vn. |
ຄຽງຂ້າງນັ້ນ, ທ່ານ ບຸ່ຍແທງເຊີນ ກໍ່ຢືນຢັນຄໍາໝັ້ນສັນຍາຂອງຫວຽດນາມ ສໍາລັບສັນຍາ ປາຣີ ກ່ຽວກັບການປ່ຽນແປງຂອງດິນຟ້າອາກາດ; ເນັ້ນໜັກວ່າ G20 ຄວນເພີ່ມທະວີການຮ່ວມມືໃນການໜູນຊ່ວຍບັນດາປະເທດພວມພັດທະນາການຫັນປ່ຽນໄປສູ່ພື້ນຖານເສດຖະກິດກາກບອນຕໍ່າ; ຊົມເຊີຍ G20 ນໍາເນື້ອໃນສະກັດກັ້ນຂີ້ເຫຍື້ອ ແລະສິ່ງເສດເຫຼືອຢາງປຣາດສະຕິກຢູ່ມະຫາສະໝຸດເຂົ້າໃນໂຄງການດໍາເນີນງານ, ສະເໜີ G20 ສະໜັບສະໜູນຂໍ້ລິເລີ່ມຂອງຫວຽດນາມທີ່ກອງປະຊຸມ G7 ເປີດກວ້າງ 2018 ກ່ຽວກັບການສ້າງກົນໄກທົ່ວໂລກໃນການສະກັດກັ້ນຂີ້ເຫຍື້ອ ແລະສິ່ງເສດເຫຼືອຢາງປຣາດສະຕິກຢູ່ມະຫາສະໝຸດ.
ໂດຍ: ເຈິ່ນຮວ່ຽນ