ມາເລເຊຍ ກຽມສົ່ງຂີ້ເຫຍື້ອປະເພດຢາງກັບຄືນປະເທດຕົ້ນທາງ
ຕາມແຫລ່ງຂ່າວມາເລເຊຍ, ເມື່ອບໍ່ດົນມານີ້ , ທ່ານນາງ ເຫຍາ ບີຫຍິນ ລັດຖະມົນຕີກະຊວງພະລັງງານ ແລະສິ່ງແວດລ້ອມ ຂອງມາເລເຊຍ ກ່າວວ່າກອງປະຊຸມຄະນະລັດຖະມົນຕີ ເຫັນດີໃຫ້ກຽມຂົນສົ່ງຂີ້ເຫຍື້ອປະເພດຢາງ ທ່ີບໍ່ສາມາດນຳໃຊ້ຄືນໄດ້ ແລະເປັນພິດໄປຍັງປະເທດຕົ້ນທາງ ຊື່ງສ່ວນໃຫຍ່ເປັນປະເທດພັດທະນາແລ້ວ.
ທັງນີ້ ມາເລເຊຍ ກາຍເປັນໜຶ່ງໃນຈຸດໝາຍທາງເລືອກພາຍຫລັງຈີນ ປະກາດເມື່ອປີກາຍນີ້ຍົກເລີກນະໂຍບາຍຮັບຊື້ຂີ້ເຫຍື້ອ ປະເພດເສດໂລຫະ ແລະພາກສ່ວນອຸປະກອນເອເລັກໂຕນິກ ລວມທັງຫລຸດຜ່ອນການນຳເຂົ້າຂີ້ເຫຍື້ອທ່ີເຫລືອໃຊ້ປະເພດອື່ນເປັນຕົ້ນປະເພດຢາງ, ເປັນສ່ວນໜຶ່ງຂອງນະໂຍບາຍຕໍ່ຕ້ານຂີ້ເຫຍື້ອຕ່າງປະເທດ ເພື່ອປະຕິຮູບສິ່ງແວດລ້ອມພາຍໃນປະເທດ ແລະຍົກລະດັບຄຸນນະພາບຊີວິດການເປັນຢູ່ຂອງປະຊາຊົນຈີນອີກດ້ວຍ.
ປັດຈຸບັນ, ມາເລເຊຍ ກາຍເປັນໜຶ່ງໃນປະເທດປາຍທາງແຫ່ງໃໝ່ຂອງການຮັບຊື້ຂີ້ເຫຍື້ອປະເພດຢາງ ສົ່ງຜົນໃຫ້ເກີດທຸລະກິດຮັບຊື້ຂີ້ເຫຍື້ອຜິດກົດໝາຍ ແລະການລັກລອບນຳໃຊ້ຂີ້ເຫຍື້ອປະເພດຢາງຄືນ (ຄຸນນະພາບຕ່ຳ ແລະຂີ້ເຫຍື້ອເປັນພິດອີກ ຫລາຍຊະນິດກາຍເປັນບັນຫາສັງຄົມ ແລະບັນຫາສິ່ງແວດລ້ອມໃໝ່ທ່ີທຸກພາກສ່ວນໃນມາເລເຊຍ ພວມເລັ່ງຊອກຫາວິທີທາງ ແກ້ໄຂ. ນອກນັ້ນ, ທ່ານນາງ ເຫຍາ ບີຫຍິນ ຍັງກ່າວວ່າບັນດາປະເທດພັດທະນາແລ້ວຕ້ອງຮັບຜິດຊອບ ຕໍ່ຂິ້ເຫຍື້ອຂອງຕົນເອງ ແລະຕຳນິບາງປະເທດລະເມີດສົນທິສັນຍາບາເຊວວ່າດ້ວຍການລັກລອບສົ່ງຂິ້ເຫຍື້ອເປັນພິດມາດ້ວຍ.
ຂ່າວ: ຂປລ