ການນຳເຂົ້າ ແລະສົ່ງອອກແມ່ນໜຶ່ງໃນບັນດາຈຸດພົ້ນເດັ່ນຂອງພື້ນຖານເສດຖະກິດໃນປີ 2024 ເມື່ອບັນລຸເກືອບ 800 ຕື້ໂດລາສະຫະລັດ. ປະກອບສ່ວນສຳຄັນເຂົ້າໃນໝາກຜົນລວມນັ້ນແມ່ນຍ້ອນການຍູ້ແຮງວຽກງານເຊື່ອມໂຍງເຂົ້າກັບເສດຖະກິດສາກົນເປີດກວ້າງຕະຫຼາດ, ຊ່ວຍວິສາຫະກິດເຊື່ອມຕໍ່ກັບຫຼາຍຄູ່ຮ່ວມມືສາກົນ.
ເພື່ອເຂົ້າໃຈແຈ້ງໝາກຜົນດັ່ງກ່າວ, ທ່ານ ເລືອງຮ່ວາງໄທ, ຫົວໜ້າກົມນະໂຍບາຍການຄ້າຫຼາຍຝ່າຍ (ກະຊວງອຸດສາຫະກຳ ແລະການຄ້າຫວຽດນາມ) ໄດ້ໃຫ້ສຳພາດຕໍ່ນັກຂ່າວ.
ມີລະດັບສູງກວ່າໃນຕ່ອງໂສ້ການສະໜອງ
ນັກຂ່າວ: ຈາກໝາກຜົນພົ້ນເດັ່ນຂອງການເຄື່ອນໄຫວເສດຖະກິດ, ການຄ້າ, ຕາມທ່ານແລ້ວຂີດໝາຍພົ້ນເດັ່ນເປັນໜ້າຈົດຈຳໃນວຽກງານເຊື່ອມໂຍງເສດຖະກິດສາກົນຂອງຫວຽດນາມ ໃນປີ 2024 ແມ່ນຫຍັງແດ່?
ທ່ານ ເລືອງຮ່ວາງໄທ: ປີ 2024 ເປັນປີທີ່ຫຍຸ້ງຍາກສຳລັບການເຊື່ອມໂຍງເສດຖະກິດສາກົນໃນຂອບເຂດທົ່ວໂລກ. ຕາມອົງການການຄ້າໂລກ (WTO) ແລະກອງທຶນເງິນຕາສາກົນ (IMF) ແລ້ວ, ຄາດວ່າການເຕີບໂຕໃນທົ່ວໂລກບໍ່ບັນລຸລະດັບທີ່ໄດ້ຄາດຄະເນໄວ້ກ່ອນ ແລະບໍ່ຮັບຖືວ່າເປັນກຳລັງໜູນໃຫ້ການເຕີບໂຕເສດຖະກິດໂລກຄືໃນໄລຍະກ່ອນ.
ເຖິງຢ່າງໃດກໍຕາມ, ຖ້າຫາກໝູນໃຊ້ຕ່ອງໂສ້ການສະໜອງ ແລະພື້ນຖານເສດຖະກິດໃໝ່ແມ່ນສາມາດຜ່ານຜ່າຄວາມຫຍຸ້ງຍາກ ເຊິ່ງພື້ນຖານເສດຖະກິດທົ່ວໂລກໄດ້ວາງອອກ. ໃນສະພາບການນັ້ນ, ຫວຽດນາມ ໄດ້ຮັບຖືວ່າແມ່ນໜຶ່ງໃນບັນດາຈຸດພົ້ນເດັ່ນຂອງໂລກໃນການຍາດແຍ່ງກາລະໂອກາດເຂົ້າຮ່ວມຕ່ອງໂສ້ການສະໜອງທີ່ຫາກໍ່ສ້າງຕັ້ງ, ຜ່ານນັ້ນສ້າງກຳລັງໜູນການເຕີບໂຕໃໝ່ໃຫ້ພື້ນຖານເສດຖະກິດ.
    |
 |
|
ການນຳເຂົ້າ ແລະສົ່ງອອກສິນຄ້າຫວຽດນາມ ຢູ່ທ່າກຳປັ່ນ ຫາຍຟ່ອງ. ພາບ: Vietnam+ |
ກ່ຽວກັບວຽກງານເຊື່ອມໂຍງ, ໃນປີ 2024 ໄດ້ສຸມໃສ່ 2 ການກໍານົດທິດ, ຄື: ຊອກຫາຕ່ອງໂສ້ການສະໜອງໃໝ່ໃຫ້ແກ່ການພັດທະນາ, ສ້າງຄວາມສາມາດບົ່ມຊ້ອນໃໝ່ໃຫ້ແກ່ການເຕີບໂຕໃນອະນາຄົດ ແລະສິ່ງນີ້ໄດ້ຮັບຜົນສຳເລັດ. ລະອຽດແມ່ນ ຫວຽດນາມ ໄດ້ປະຕິບັດສັນຍາການຄ້າເສລີຫວຽດນາມ - ອິດສະຣາແອນ ກໍ່ຄືລົງນາມໃນສັນຍາການຄ້າເສລີ ຫວຽດນາມ - UAE, ນີ້ແມ່ນສັນຍາການຄ້າເສລີໃນພາກພື້ນເຊິ່ງກ່ອນນີ້ ຫວຽດນາມ ບໍ່ທັນມີການພົວພັນການຄ້າເສລີ. ເປັນທີ່ຈະແຈ້ງແລ້ວວ່າ, ກ່ຽວກັບຄວາມສາມາດບົ່ມຊ້ອນ, ບັນດາຕະຫຼາດຢູ່ຕາເວັນອອກກາງ, ອາເມລິກາໃຕ້, ຊ້ຳບໍ່ໜຳນັບທັງຫຼາຍປະເທດໃນອາຟຣິກາ ຍັງມີຄວາມສາມາດບົ່ມຊ້ອນຫຼາຍເພື່ອສາມາດພັດທະນາໃນໄລຍະຈະມາເຖິງ.
ແນ່ນອນວ່າ, ປີ 2024 ແມ່ນປີພິເສດເພາະວ່າ ຫວຽດນາມ ບໍ່ເກີດການຂັດແຍ້ງກັນດ້ານການຄ້າກັບບັນດາຄູ່ຮ່ວມມື ແລະຫວຽດນາມ ໄດ້ຮັກສາສະພາບແວດລ້ອມແຫ່ງການດຳເນີນທຸລະກິດນຳເຂົ້າ-ສົ່ງອອກເປັນປົກກະຕິພໍສົມຄວນ, ຜ່ານນັ້ນສ້າງປະຖົມປັດໃຈໃຫ້ຫວຽດນາມ ບັນລຸລະດັບເຕີບໂຕດ້ານວົງເງິນນຳເຂົ້າ-ສົ່ງອອກ ເວົ້າລວມ, ກໍ່ຄືການເຕີບໂຕເສດຖະກິດໃນປີຜ່ານມາ.
ນັກຂ່າວ: ບົດລາຍງານຂອງກະຊວງອຸດສາຫະກຳ ແລະການຄ້າ ສະແດງໃຫ້ເຫັນວ່າ ການສົ່ງອອກຂອງຫວຽດນາມ ຍັງຂຶ້ນກັບຕະຫຼາດໃຫຍ່ຈຳນວນໜຶ່ງ, ຕົ້ນຕໍແມ່ນກັບປະເທດອາຊີຕາເວັນອອກສ່ຽງເໜືອ, ສະຫະລັດອາເມລິກາ, ອາຊຽນ, ອີຢູ (ວົງເງິນສົ່ງອອກໄປຍັງຕະຫຼາດເຫຼົ່ານັ້ນກວມເກືອບ 80% ລວມຍອດວົງເງິນສົ່ງອອກຂອງທົ່ວປະເທດ). ສະນັ້ນ, ສັນຍາຄູ່ຮ່ວມມືເສດຖະກິດຮອບດ້ານ ຫວຽດນາມ-UAE (ສັນຍາ CEPA) ຈະສ້າງກາລະໂອກາດຄືແນວໃດໃຫ້ແກ່ການເຄື່ອນໄຫວນຳເຂົ້າ ແລະສົ່ງອອກຂອງຫວຽດນາມ ຢູ່ຕະຫຼາດຕາເວັນອອກກາງ ແລະອາຟຣິກາ ໃນໄລຍະຈະມາເຖິງ?
ທ່ານ ເລືອງຮ່ວາງໄທ: ໜຶ່ງໃນບັນດາບັນຫາວາງອອກນັ້ນແມ່ນ ຫວຽດນາມ ໄດ້ຂຸດຄົ້ນຕະຫຼາດທີ່ມີຢູ່ແລ້ວດີສົມຄວນ, ແຕ່ກໍ່ມີຄວາມສ່ຽງເມື່ອຕະຫຼາດເຫຼົ່ານັ້ນບໍ່ກ້າວເຂົ້າສູ່ໄລຍະພັດທະນາສູງແຕ່ຂຶ້ນກັບຕະຫຼາດນັ້ນຫຼາຍ, ສະນັ້ນໜຶ່ງໃນບັນດາໜ້າທີ່ສຳຄັນແມ່ນຕ້ອງຂຸດຄົ້ນ ແລະເປີດຕະຫຼາດໃໝ່, ພິເສດແມ່ນຢູ່ບັນດາແຫ່ງທີ່ມີຄວາມສາມາດບົ່ມຊ້ອນພັດທະນາ.
ໃນປີ 2024, ຈະມີສັນຍາການຄ້າເສລີ (FTA) ໃໝ່ 2 ສະບັບຢູ່ຕາເວັນອອກກາງ, ລວມມີ: ສັນຍາຫວຽດນາມ ກັບ UAE, ນີ້ແມ່ນປະເທດໃຈກາງຂອງພາກພື້ນ ແລະມີຄວາມສາມາດບົ່ມຊ້ອນດ້ານທຶນຮອນ ແລະການບໍລິການ logistics ແລະແມ່ນທ່າຂົນສົ່ງທີ່ໃຫຍ່ຫຼວງ, ບໍ່ພຽງແຕ່ຢູ່ໃນຕາເວັນອອກກາງເທົ່ານັ້ນ, ຫາກຍັງກັບອາຟຣິກາເໜືອ, ຊ້ຳບໍ່ໜຳແມ່ນເຊື່ອມຕໍ່ກັບອິນເດຍ ແລະຫຼາຍບ່ອນ, ດັ່ງນັ້ນນີ້ແມ່ນ "ປະຕູ" ທີ່ພວກເຮົາຕັດສິນໃຈຂຸດຄົ້ນ ເພື່ອຍາດແຍ່ງຄວາມສາມາດບົ່ມຊ້ອນເຊື່ອມຕໍ່ລະຫວ່າງສອງພື້ນຖານເສດຖະກິດ.
|
|
 |
|
ທ່ານ ຟ້າມມິງຈິ໊ງ ນາຍົກລັດຖະມົນຕີ ແລະທ່ານ Sheikh Mohammed bin Rashid Al Maktoum ຮອງປະທານາທິບໍດີ, ນາຍົກລັດຖະມົນຕີ UAE ໄດ້ເປັນສັກຂີພິຍານການລົງນາມໃນສັນຍາຄູ່ຮ່ວມມືເສດຖະກິດຮອບດ້ານ (CEPA) ລະຫວ່າງຫວຽດນາມ ແລະ UAE. ພາບ: ສໍານັກຂ່າວສານຫວຽດນາມ. |
ຖັດຈາກນັ້ນແມ່ນ FTA ກັບ ອິດສະຣາແອນ ໄດ້ຮັບການປະຕິບັດພາຍຫຼັງການເຈລະຈາ ແລະການກະກຽມທີ່ພວກເຮົາໄດ້ຮູ້ແລ້ວວ່າ ວິທະຍາສາດເຕັກໂນໂລຊີເປັນໜຶ່ງໃນບັນດາກຳລັງໜູນທີ່ສໍາຄັນເພື່ອບັນລຸລະດັບເຕີບໂຕສູງທາງດ້ານເສດຖະກິດໃນໄລຍະຍາວ ແລະອິດສະຣາແອນ ໄດ້ຮັບຖືວ່າເປັນປະເທດປະສົບຜົນສຳເລັດໃນການເລີ່ມທຸລະກິດ, ປ່ຽນແປງໃໝ່ປະດິດຄິດສ້າງ, ແຫ່ງທີ່ມີເຕັກໂນໂລຢີທັກສະຫຼາຍ, ເພື່ອໃຫ້ ຫວຽດນາມ ສາມາດຮ່ຳຮຽນ, ສະນັ້ນ, ເຖິງວ່ານີ້ແມ່ນຕະຫຼາດສົ່ງອອກທີ່ມີຂະໜາດນ້ອຍກໍ່ຕາມ, ແຕ່ຍັງແມ່ນຕະຫຼາດດີທີ່ສຸດຖ້າເຊື່ອມຕໍ່ກັບພື້ນຖານເສດຖະກິດນີ້.
ກໍາແໜ້ນທ່າອຽງໃໝ່ຈາກການຫັນເປັນສີຂຽວ
ນັກຂ່າວ: ທ່ານຕີລາຄາຄືແນວໃດຕໍ່ສິ່ງທ້າທາຍທີ່ໃຫຍ່ທີ່ສຸດໃນການເຊື່ອມໂຍງເສດຖະກິດ ແລະການຄ້າສາກົນໃນປີ 2025 ແລະຕ້ອງມີມາດຕະການໃດແດ່ເພື່ອຍົກສູງກໍາລັງແກ່ງແຍ້ງຂອງພື້ນຖານເສດຖະກິດຕິດພັນກັບການເສີມຂະຫຍາຍກໍາລັງໜູນພັດທະນາໃໝ່?
ທ່ານ ເລືອງຮ່ວາງໄທ: ໃນໄລຍະມໍ່ໆມານີ້, ການເຕີບໂຕດ້ານການຄ້າໃນທົ່ວໂລກແມ່ນຕໍ່າກວ່າລະດັບເຕີບໂຕ GDP ທົ່ວໂລກ, ພິເສດແມ່ນໃນໄລຍະຈະມາເຖິງ, ມີທ່າອ່ຽງອັນໃຫຍ່ຫຼວງທີ່ສຸດທີ່ສາມາດປ່ຽນແປງວິທີພົວພັນດ້ານການຄ້າລະຫວ່າງບັນດາປະເທດ.
ທ່າອ່ຽງທຳອິດແມ່ນບາງພື້ນຖານເສດຖະກິດໃຫຍ່ທີ່ມີລັກສະນະພາຍໃນຫຼາຍກວ່າ, ຊ້ຳບໍ່ໜຳບາງບ່ອນແມ່ນລັກສະນະປົກປ້ອງການຄ້າ, ສົງຄາມການຄ້າໄດ້ເກີດຂຶ້ນຢູ່ບ່ອນໃດບ່ອນໜຶ່ງໃນໂລກ.
ທ່າອ່ຽງທີສອງ, ເຖິງວ່າພື້ນຖານເສດຖະກິດຂອງພວກເຂົາສືບຕໍ່ວິວັດການເປີດປະຕູ, ແຕ່ມີມາດຕະການໃໝ່ເພື່ອປະຕິບັດທ່າອ່ຽງຂອງທົ່ວໂລກ, ເຊັ່ນ: ການຫັນປ່ຽນສີຂຽວ, ພ້ອມກັບມາດຕະການຄຸ້ມຄອງຢ່າງແໜ້ນແຟ້ນກວ່າກ່ຽວກັບລະບົບຕ່ອງໂສ້ການສະໜອງເພື່ອຮັບປະກັນຕອບສະໜອງຄວາມຮຽກຮ້ອງຕ້ອງການຂອງຜູ້ບໍລິໂພກ, ວິສາຫະກິດອາດຖືວ່ານີ້ແມ່ນສິ່ງກີດຂວາງທີ່ຕ້ອງຜ່ານຜ່າ, ຈະສ້າງຄ່າໃຊ້ຈ່າຍໃໝ່ທີ່ບັງຄັບໃຫ້ວິສາຫະກິດຕ້ອງປະຕິບັດຈຶ່ງສາມາດຄ້າຂາຍ ແລະສົ່ງອອກໄປສູ່ຕະຫຼາດທີ່ນໍາໃຊ້ມາດຕະການເຫຼົ່ານີ້.
ນອກນີ້, ໂລກມີທ່າອ່ຽງໃນການຄຸ້ມຄອງຕ່ອງໂສ້ການສະໜອງຢ່າງເຄັ່ງຄັດ, ດັ່ງນັ້ນບັນດາມາດຕະການທີ່ພວກເຮົາໄດ້ປະຕິບັດມາຮອດປະຈຸບັນຜ່ານກົດລະບຽບຂອງ WTO ເບິ່ງຄືວ່າບໍ່ພຽງພໍເພື່ອຕອບສະໜອງທ່າອຽງໃໝ່, ນີ້ແມ່ນສິ່ງທ້າທາຍໃຫຍ່ສຳລັບຫວຽດນາມ.
ເຖິງຢ່າງໃດກໍຕາມ, ຫວຽດນາມ ກໍ່ແມ່ນໜຶ່ງໃນບັນດາປະເທດໄດ້ຮັບຜົນປະໂຫຍດຫຼາຍທີ່ສຸດຈາກທ່າອ່ຽງເຊື່ອມໂຍງເຂົ້າກັບທົ່ວໂລກ, ພິເສດແມ່ນໃນໄລຍະຜ່ານມາເມື່ອລະບົບຕ່ອງໂສ້ການສະໜອງໂລກປ່ຽນແປງ, ນີ້ແມ່ນກາລະໂອກາດ. ເພາະຢາກຂ້າມຜ່ານບາງໄລຍະພັດທະນາ ເພື່ອພັດທະນາໃໝ່, ການກຳແໜ້ນບັນດາທ່າອ່ຽງ, ຄື: ການຫັນເປັນດີຈີຕອນ, ການຫັນເປັນສີຂຽວ... ສາມາດບັນລຸລະດັບສູງກວ່າອີກ.
ນັກຂ່າວ: ສານທີ່ທ່ານຢາກສົ່ງເຖິງພາກສ່ວນທີ່ກ່ຽວຂ້ອງແມ່ນຫຍັງໃດ ເພື່ອໃຫ້ວຽກງານເຊື່ອມໂຍງເສດຖະກິດສາກົນເຂົ້າສູ່ລວງເລິກ ແລະນໍາມາເຊິ່ງໝາກຜົນທີ່ຕັ້ງໜ້າຄືດັ່ງພວກເຮົາປາດຖະໜາ?
ທ່ານ ເລືອງຮ່ວາງໄທ: ຕາມບັນດານັກຊ່ຽວຊານຄາດຄະເນວ່າ ປີ 2025 ຈະເປັນປີທີ່ຫຍຸ້ງຍາກຫຼາຍໃນການເຊື່ອມໂຍງເສດຖະກິດສາກົນ, ແຕ່ກໍ່ຍັງມີກາລະໂອກາດອັນໃຫຍ່ຫຼວງ, ເພາະວ່າພາຍຫຼັງໄລຍະຫຼາຍປີ, ໂລກພວມເຂົ້າສູ່ໄລຍະການປ່ຽນແປງຄຸນນະພາບຂອງຕ່ອງໂສ້ການສະໜອງ, ສະນັ້ນເມື່ອຕ່ອງໂສ້ການສະໜອງປ່ຽນແປງ, ບັນດາປະເທດຫາກໍ່ເຊື່ອມໂຍງຄື ຫວຽດນາມ ຈະສາມາດກ້າວຂຶ້ນໄລຍະໃໝ່.
ດ້ວຍການປ່ຽນແປງເຫຼົ່ານັ້ນ, ພວກເຮົາຍາມໃດກໍ່ຕ້ອງອຸ່ນອ່ຽນໃຈ ແລະກຳແໜ້ນທ່າອ່ຽງໃນໄລຍະຈະມາເຖິງ, ສິ່ງສຳຄັນກວ່ານັ້ນ ແມ່ນຊອກຫາສິ່ງທີ່ສາມາດຈັບຈຸດທີ່ຕັ້ງໄດ້ໃນການປ່ຽນແປງນັ້ນເພື່ອບັນລຸໝາກຜົນດີກວ່າເມື່ອທຽບໃສ່ໄລຍະຜ່ານມາ.
ນັກຂ່າວ: ຂໍຂອບໃຈທ່ານ.
ໂດຍ: ຈາງຫງວຽນ