GDP ສະເລ່ຍຕໍ່ຫົວຄົນເພີ່ມຂຶ້ນ 377 ໂດລາສະຫະລັດ
ປີ 2024, ເສດຖະກິດຫວຽດນາມ ປະສົບກັບຄວາມຫຍຸ້ງຍາກ ແລະສິ່ງທ້າທາຍຫຼາຍຢ່າງທັງພາຍໃນ ແລະຕ່າງປະເທດ. ພື້ນຖານເສດຖະກິດສາກົນໄດ້ຜ່ານຜ່າຫຼາຍການຜັນແປທີ່ບໍ່ສາມາດຄາດຄະເນໄດ້. ພາຍໃນປະເທດ, ຄວາມຫຍຸ້ງຍາກ, ສິ່ງທ້າທາຍທຳອິດທີ່ຕ້ອງໄດ້ແກ້ໄຂນັ້ນແມ່ນຂໍ້ຕິດຄັດ, ຂໍ້ບົກຜ່ອງພາຍໃນພື້ນຖານເສດຖະກິດທີ່ສະສົມມາໃນຫຼາຍປີ; ພ້ອມດຽວກັນນັ້ນກໍຕ້ອງໄດ້ຮັບມືກັບບັນຫາທີ່ບໍ່ຄາດຄິດທີ່ອາດຈະເກີດຂຶ້ນ, ພິເສດແມ່ນຜົນສະທ້ອນຈາກພາຍຸ ຫົວທີ 3 (Yagi).
ເຖິງຢ່າງໃດກໍຕາມ, ຫວຽດນາມ ໄດ້ມານະພະຍາຍາມຜ່ານຜ່າຄວາມຫຍຸ້ງຍາກເພື່ອສູ້ຊົນນໍາພື້ນຖານເສດຖະກິດຟື້ນຟູ ແລະເຕີບໂຕ. ການຟື້ນຕົວຂອງພື້ນຖານເສດຖະກິດແມ່ນເຫັນໄດ້ຢ່າງຊັດເຈນເມື່ອຍອດຜະລິດຕະພັນພາຍໃນປະເທດ (GDP) ໃນໄຕມາດທີ IV ປີ 2024 ຄາດວ່າຈະເພີ່ມຂຶ້ນ 7,55% ເມື່ອທຽບໃສ່ໄລຍະດຽວກັນຂອງປີກາຍ, ພຽງແຕ່ຕ່ໍາກວ່າໄຕມາດທີ IV ຂອງປີ 2017, 2018 ໃນໄລຍະ 2011-2024, ທ່າອ່ຽງຂອງແຕ່ລະໄຕມາດໄດ້ຮັກສາໄວ້ສູງກວ່າໄຕມາດກ່ອນ (ໄຕມາດທີ I ເພີ່ມຂຶ້ນ 5,98%, ໄຕມາດທີ II ເພີ່ມຂຶ້ນ 7,25%, ໄຕມາດທີ III ເພີ່ມຂຶ້ນ 7,43%).
    |
 |
|
ສາງ LNG ທິຫວາຍ, ແຂວງ ບ່າເຣ້ຍ-ຫວູ້ງເຕົ່າ. ພາບ: ອານເຊີນ. |
ໝາກຜົນສຳຄັນໃນປີ 2024 ແມ່ນ ຫວຽດນາມ ສືບຕໍ່ໄດ້ຮັບການຕີລາຄາວ່າແມ່ນສະຖານທີ່ລົງທຶນທີ່ດຶງດູດໃຈ. ມີຍອດຈຳນວນເງິນລົງທຶນຈາກຕ່າງປະເທດເກືອບ 40 ຕື້ໂດລາສະຫະລັດ ໄດ້ຈົດທະບຽນລົງທຶນເຂົ້າຫວຽດນາມ; ໃນນັ້ນມີບັນດາວິສາຫະກິດເຕັກໂນໂລຊີແຖວໜ້າ, ຄື NVIDIA ກໍ່ໄດ້ລົງທຶນ, ສ້າງຂີດໝາຍປະຫວັດສາດ, ຫຼື Google ຍັງມີແຜນການລົງທຶນຢູ່ຫວຽດນາມ... ພິເສດ ໃນປີ 2024 ການລົງທຶນໂດຍກົງຈາກຕ່າງປະເທດ (FDI) ບັນລຸ 25,35 ຕື້ໂດລາສະຫະລັດ, ເພີ່ມຂຶ້ນ 9,4% ເມື່ອທຽບໃສ່ປີກ່ອນ, ສະແດງໃຫ້ເຫັນຄວາມໄວ້ເນື້ອເຊື່ອໃຈຂອງນັກລົງທຶນຕ່າງປະເທດໃນສະພາບແວດລ້ອມແຫ່ງການລົງທຶນດຳເນີນທຸລະກິດຂອງຫວຽດນາມ, ພ້ອມທັງພິສູດໃຫ້ເຫັນວ່າຂົງເຂດ FDI ນັບມື້ນັບມີການປະກອບສ່ວນໂດຍກົງທີ່ສຳຄັນທີ່ສຸດໃຫ້ແກ່ການເຕີບໂຕເສດຖະກິດ.
ທ່ານນາງ ຫງວຽນທິເຮືອງ, ຫົວໜ້າກົມໃຫຍ່ສະຖິຕິ ຕີລາຄາວ່າ ອັດຕາການເຕີບໂຕໃນປີ 2024 ແມ່ນມີຄວາມຕັ້ງໜ້າໃນສະພາບທີ່ໂລກມີການຜັນແປຍາກທີ່ຈະຄາດຄະເນໄດ້, ພາຍໃນປະເທດພວມໄດ້ຮັບຜົນກະທົບຈາກໄພທຳມະຊາດ. ນີ້ແມ່ນປະຖົມປັດໄຈສຳຄັນເພື່ອກ້າວເຂົ້າສູ່ປີ 2025 ພື້ນຖານເສດຖະກິດຈະເລັ່ງຄວາມໄວ, ເຖິງຈຸດໝາຍ, ສຳເລັດເປົ້າໝາຍສູງທີ່ສຸດໃນແຜນພັດທະນາເສດຖະກິດ-ສັງຄົມ 5 ປີ ໄລຍະ 2021-2025.
ສ້າງແຜນການ, ຫັນເປົ້າໝາຍການເຕີບໂຕໃຫ້ສູງກວ່າ 8% ເປັນລະອຽດ
ປີ 2025, ສະພາແຫ່ງຊາດ ໄດ້ມອບໝາຍໃຫ້ລັດຖະບານ ວາງເປົ້າໝາຍເຕີບໂຕດ້ານເສດຖະກິດຢູ່ລະດັບ 6,5-7%, ສູ້ຊົນໃຫ້ບັນລຸ 7-7,5%. ທ່ານນາຍົກລັດຖະມົນຕີ ໄດ້ອອກຖະແຫຼງການສະບັບເລກທີ 137/CD-TTg ຢ່າງເປັນທາງການ ໂດຍມີເປົ້າໝາຍເລັ່ງຄວາມໄວ ແລະບຸກທະລຸມຸ່ງໄປສູ່ລະດັບເຕີບໂຕສູງກວ່າ 8% ແລະຄາດວ່າຈະບັນລຸການເຕີບໂຕສອງຕົວເລກໃນໄລຍະຈະມາເຖິງ. ນີ້ແມ່ນເປົ້າໝາຍທີ່ຮຽກຮ້ອງໃຫ້ມີຄວາມພະຍາຍາມອັນໃຫຍ່ຫຼວງຈາກລະບົບການເມືອງທັງໝົດ, ເພາະວ່າເພື່ອບັນລຸເປົ້າໝາຍການເຕີບໂຕສອງຕົວເລກ, ພວກເຮົາຕ້ອງມີມາດຕະການໃໝ່ເພື່ອຊຸກຍູ້ການເຕີບໂຕແບບດັ້ງເດີມໄປພ້ອມກັບມາດຕະການຊຸກຍູ້ບັນດາກໍາລັງໜູນເຕີບໂຕໃໝ່.
ຄາດຄະເນຈາກບັນດາອົງການຈັດຕັ້ງສາກົນທີ່ມີຊື່ສຽງ, ຄື: ທະນາຄານໂລກ, ກອງທຶນເງິນຕາສາກົນ ແລະທະນາຄານພັດທະນາອາຊີ ສະແດງໃຫ້ເຫັນຄວາມເຫັນດີເຫັນພ້ອມກ່ຽວກັບຄວາມສາມາດບົ່ມຊ້ອນພັດທະນາຂອງຫວຽດນາມ, ດ້ວຍລະດັບເຕີບໂຕ GDP ປະມານ 6,5-6,6% ຍ້ອນການຟື້ນຕົວຢ່າງແຂງແຮງດ້ານການຜະລິດ, ການຄ້າ ແລະມາດຕະການສະໜັບສະໜູນທາງການເງິນ.
ຕາມບັນດານັກຊ່ຽວຊານແລ້ວ, ເຖິງວ່າຈະປະສົບກັບຄວາມຫຍຸ້ງຍາກຫຼາຍຢ່າງກໍ່ຕາມ, ແຕ່ບັນດາກຳລັງໜູນສຳຄັນຄືການລົງທຶນພາກລັດ, ການລົງທຶນພາກເອກະຊົນ ແລະບັນດາການເຄື່ອນໄຫວສົ່ງອອກ, ນໍາເຂົ້າຄາດວ່າຈະສືບຕໍ່ຮັກສາຈັງຫວະການເຕີບໂຕຂອງຫວຽດນາມ ໃນປີ 2025. ຄຽງຂ້າງນັ້ນ, ທ່າອ່ຽງຫັນປ່ຽນຕ່ອງໂສ້ການສະໜອງສາກົນໃນໄລຍະມໍ່ໆມານີ້ໄດ້ສ້າງກາລະໂອກາດໃຫຍ່ໃຫ້ຫວຽດນາມ. ຖ້າຫວຽດນາມ ຍາດແຍ່ງທ່າໄດ້ປຽບດັ່ງກ່າວ, ພ້ອມທັງ ມີການຫັນເປັນດີຈີຕອນ, ຫັນເປັນສີຂຽວໄວກວ່າ, ຕອບສະໜອງການຫັນປ່ຽນຂອງຕ່ອງໂສ້ການສະໜອງ, ຮັບປະກັນຄວາມຮຽກຮ້ອງຕ້ອງການຂອງຕະຫຼາດສາກົນຢ່າງເຂັ້ມງວດ, ຈະສາມາດສ້າງບາດກ້າວບຸກທະລຸຂອງການເຕີບໂຕອຸດສາຫະກຳໃນປີ 2025. ພິເສດ, ຍູ້ແຮງການປະຕິຮູບດ້ານບໍລິຫານ, ປັບປຸງກົນໄກບໍລິຫານຂອງລັດ, ຍົກສູງປະສິດທິຜົນການຄຸ້ມຄອງລັດ ກໍ່ຈະສ້າງກຳລັງໜູນໃໝ່ໃຫ້ແກ່ພື້ນຖານເສດຖະກິດ. ຮັບຮູ້ບັນຫານີ້, ທ່ານ ປອ ຫງວຽນກວກຫວຽດ, ຮອງຫົວໜ້າສະຖາບັນຄົ້ນຄວ້າເສດຖະກິດ ແລະນະໂຍບາຍຫວຽດນາມ (VEPR) ຂຶ້ນກັບມະຫາວິທະຍາໄລເສດຖະກິດ, ມະຫາວິທະຍາໄລແຫ່ງຊາດຮ່າໂນ້ຍ, ໃຫ້ຮູ້ວ່າ: ປີ 2025, ຈະມີຄວາມສ່ຽງຫຼາຍດ້ານຕໍ່ການເຕີບໂຕ, ນັ້ນແມ່ນການປະທະກັນທາງດ້ານພູມສາດການເມືອງ, ສົງຄາມການຄ້າ, ສົງຄາມເຕັກໂນໂລຊີໄດ້ທຳລາຍເສດຖະກິດໂລກ... ເຖິງຢ່າງໃດກໍຕາມ, ຫວຽດນາມ ຍັງສາມາດຊອກຫາກາລະໂອກາດໃນບັນດາສິ່ງທ້າທາຍ, ເປັນເຈົ້າການປັບຕົວກັບສະພາບການສາກົນທີ່ມີການປ່ຽນແປງ, ສ້າງກາລະໂອກາດດ້ານການຕະຫຼາດໃຫ້ຫຼາຍທີ່ສຸດ, ຈາກນັ້ນຍົກສູງກໍາລັງຄວາມສາມາດແກ່ງແຍ້ງ ແລະຍູ້ແຮງການເຊື່ອມໂຍງເຂົ້າກັບເສດຖະກິດສາກົນ.
ກ່ຽວກັບເປົ້າໝາຍການເຕີບໂຕເສດຖະກິດ ໃຫ້ໄດ້ກວ່າ 8% ໃນປີ 2025, ທ່ານ ເຈິ່ນກວກເຟືອງ ຮອງລັດຖະມົນຕີກະຊວງແຜນການ ແລະການລົງທຶນຫວຽດນາມ ໃຫ້ຮູ້ວ່າ: ພວກເຮົາມີພື້ນຖານເພື່ອເວົ້າເຖິງເປົ້າໝາຍນີ້, ຍ້ອນມີການສືບຕໍ່ທ່າເຕີບໂຕແຕ່ປີ 2024. ພ້ອມທັງມີຫຼາຍປັດໄຈໃໝ່ທີ່ມີການປ່ຽນແປງໂດຍພື້ນຖານ, ພິເສດແມ່ນການປ່ຽນແປງກ່ຽວກັບລະບອບລະບຽບການ ດ້ວຍເລື່ອງສະພາແຫ່ງຊາດ ໄດ້ຮັບຮອງເອົາກົດໝາຍຫຼາຍສະບັບ. ການປ່ຽນແປງອັນໃຫຍ່ຫຼວງຂອງກົດໝາຍເຫຼົ່ານີ້ແມ່ນຈິນຕະນາການທີ່ບຸກທະລຸ, ແກ້ໄຂຄວາມຫຍຸ້ງຍາກ, ເຮັດໃຫ້ລະບຽບການບໍລິຫານງ່າຍຂຶ້ນ. ແນວຄວາມຄິດອັນໃຫຍ່ຫຼວງຂອງກົດໝາຍແມ່ນແກ້ໄຂຂໍ້ບົກຜ່ອງ, ອຸປະສັກຕ່າງໆ, ກະຕຸ້ນການເຕີບໂຕດ້ວຍການປົດປ່ອຍແຫຼ່ງກຳລັງທີ່ຖືກອຸດຕັນມາດົນ.
ໂດຍ: ຈາງຫງວຽນ