ຊ່ວຍປະຊາຊົນຫຼຸດຜ່ອນຄວາມທຸກຍາກເທື່ອລະກ້າວ
5 ປີກ່ອນໜ້ານີ້, ຄອບຄົວຂອງອ້າຍ ໂຮ່ວັນມາ ຢູ່ບ້ານເຈງເວງ, ຕາແສງເຮື໊ອງຟຸ່ງ (ເຮື໊ອງຮ໊ວາ, ກວາງຈິ) ຕ້ອງທຳມາຫາກິນອີງໃສ່ປ່າ. ທຸກມື້, ອ້າຍ ມາ ຕ້ອງໄດ້ເຂົ້າປ່າເພື່ອຫາອາຫານມາໃຫ້ຄອບຄົວ. ເມື່ອມີຝົນຕົກ ແລະນ້ຳຖ້ວມ, ອ້າຍ ມາ ບໍ່ສາມາດເຂົ້າປ່າໄດ້, ຂາດແຄນທຸກຢ່າງ. ລູກ 3 ຄົນຂອງອ້າຍມາ ມີສຸຂະພາບອ່ອນເພຍ. ຄະນະເສດຖະກິດ-ປ້ອງກັນຊາດ 337 (ທະຫານເຂດ 4) ໄດ້ໜູນຊ່ວຍໂຕແບ້ 2 ໂຕໃຫ້ແກ່ຄອບຄົວອ້າຍ ມາ ແລະແນະນຳວິທີການລ້ຽງ, ເບິ່ງແຍງດູແລ. ຈາກສັດລ້ຽງ ທີ່ໄດ້ໜູນຊ່ວຍທຳອິດ, ຄອບຄົວຂອງອ້າຍ ໂຮ່ວັນມາ ລ້ຽງແບ້ ຈົນຂະຫຍາຍອອກເປັນຝຸງ 35 ໂຕ, ສົມທົບໃສ່ກັບການປູກພືດຈຶ່ງຫຼຸດຜ່ອນຄວາມທຸກຍາກ. ລູກ 3 ຄົນຂອງອ້າຍມາ ໄດ້ກິນອີ່ມ, ນຸ່ງອຸ່ນ, ໄດ້ໄປໂຣງຮຽນ; ຜົວເມຍອ້າຍ ກໍ່ສ້ອມແປງເຮືອນຖາວອນ. ຄອບຄົວຂອງອ້າຍມາ ພຽງແຕ່ແມ່ນໜຶ່ງໃນຫຼາຍຄອບຄົວຢູ່ບ້ານ ເຈງເວງ ທີ່ທະຫານໄດ້ຊ່ວຍເຫຼືອພັດທະນາເສດຖະກິດ. ເຫັນວ່າການລ້ຽງແບ້ ມີປະສິດທິຜົນ, ພໍ່ແມ່ປະຊາຊົນຢູ່ໃນບ້ານເຈງເວງ ກໍບອກກັນເຮັດຕາມ. ຊີວິດການເປັນຢູ່ຂອງບ້ານເຈງເວງ ກໍ່ຄືປະຊາຊົນຢູ່ເຂດເສດຖະກິດ-ປ້ອງກັນຊາດ ໄດ້ຫຼຸດຜ່ອນຄວາມທຸກຍາກ. ບ້ານທຸກຍາກທີ່ຕັ້ງຢູ່ເປີ້ນພູ, ປະຈຸບັນໄດ້ປົກຄຸ້ມໄປດ້ວຍສີຂຽວຂອງຕົ້ນກາເຟ, ຕົ້ນພິກໄທ... ກາຍເປັນບ່ອນດຶງດູດແຂກທ່ອງທ່ຽວມາທ່ຽວ.
    |
 |
|
ພະນັກງານ, ພາລະກອນ, ນັກປັນຍາຊົນໜູ່ມອາສາສະໝັກຄະນະເສດຖະກິດ- ປ້ອງກັນຊາດ 337 (ທະຫານເຂດ 4) ຊ່ວຍປະຊາຊົນທ້ອງຖິ່ນກໍ່ສ້າງທາງຄົມມະນາຄົມ. ພາບ: ຢຸຍດົງ. |
ກອງຜະລິດເລກ 9 ສັງກັດກອງພັນໃຫຍ່ 52, ຄະນະເສດຖະກິດ-ປ້ອງກັນຊາດ 337 ຕັ້ງທັບຢູ່ໃນບໍລິເວນ, ມີໜ້າທີ່ສົມທົບກັບທ້ອງຖິ່ນໃນການປະຕິບັດໜ້າທີ່ຢູ່ບັນດາໂຄງການເສດຖະກິດ-ປ້ອງກັນຊາດ. ພະນັກງານ, ພາລະກອນ, ນັກປັນຍາຊົນໜຸ່ມອາສາສະໝັກໄດ້ເຮັດວຽກຢ່າງສຸດອົກສຸດໃຈໃນການໂຄສະນາ, ຂົນຂວາຍປະຊາຊົນ; ແນະນຳເຕັກນິກເຮັດຄອກ, ແນະນຳວິທີເບິ່ງແຍງດູແລ, ປ້ອງກັນ ແລະຕ້ານພະຍາດ. ກອງຜະລິດເລກ 9 ໄດ້ຜັນຂະຫບາຍບັນດາຮູບແບບເສດຖະກິດຊ່ວຍເຫຼືອພໍ່ແມ່ປະຊາຊົນພັດທະນາວິທີຫາເງິນລ້ຽງຊີບແບບຍືນຍົງ, ພົ້ນເດັ່ນ, ຄື: ຮູບແບບສວນ-ໜອງ-ຄອກ ສົມທົບກັບການປູກຕົ້ນໄມ້ໃຫ້ໝາກ, ລ້ຽງສັດ ເພື່ອສ້າງຕ່ອງໂສ້ອາຫານສະອາດ, ຕອບສະໜອງຄວາມຮຽກຮ້ອງຕ້ອງການດ້ານອາຫານຮັບໃຊ້ການທ່ອງທ່ຽວຂອງທ້ອງຖິ່ນ; ຮູບແບບລ້ຽງແບ້ ແລະໝູ; ຮູບແບບລ້ຽງງົວ 3B ເອົາຊີ້ນ ແລະງົວແມ່ພັນ Sind...
ທ່ານພົນຈັດຕະວາ ຫງວຽນງອກຮ່າ, ຮອງຜູ້ບັນຊາການທະຫານເຂດ 4 ໃຫ້ຮູ້ວ່າ: “ບັນດາຄະນະເສດຖະກິດ-ປ້ອງກັນຊາດຂອງທະຫານເຂດ 4 ໄດ້ປະສານສົມທົບກັບອຳນາດການປົກຄອງທ້ອງຖິ່ນຮັບປະກັນຊິີວິດການເປັນຢູ່ເປັນປົກກະຕິໃຫ້ແກ່ຫຼາຍພັນຄອບຄົວ, ສ້າງເຂດຊຸມຊົນລວມສູນ, ສ້າງ “ເຂດປ້ອງກັນ” ປົກປັກຮັກສາຊາຍແດນ; ບັນດາກົມກອງໄດ້ສ້າງຫຼາຍຮູບແບບຜະລິດ, ລ້ຽງສັດເໝາະສົມກັບເງື່ອນໄຂຄຸນນະພາບຂອງດິນ, ດິນຟ້າອາກາດຂອງແຕ່ລະທ້ອງຖິ່ນຕັ້ງທັບ.
ຕິດແທດກັບຊາຍແດນເພື່ອປົກປັກຮັກສາຜືນແຜ່ນດິນຂອງປະເທດຊາດ
ພົນລະພາກຫຼວງ 15 ໄດ້ປະຕິບັດໜ້າທີ່ຢູ່ບໍລິເວນ 271 ບ້ານສັງກັດ 41 ຕາແສງ, 9 ເມືອງ, ນະຄອນຂອງ 4 ແຂວງ ຢາລາຍ, ກອນຕູມ, ກວາງບິ່ງ, ບິ່ງດິ້ງ; ບໍລິເວນຢູ່ແຫ່ງນີ້ສ່ວນຫຼາຍຢູ່ເຂດຫ່າງໄກສອກຫຼີກ, ຊາຍແດນ, ເຂດຊົນເຜົ່າສ່ວນໜ້ອຍ... ດ້ວຍທິດນຳພັດທະນາການຜະລິດໄປຮອດໃສຈະສ້າງເຂດຊຸມຊົນຢູ່ຫັ້ນເລີຍ, ພ້ອມດ້ວຍຕົ້ນໄມ້ຫຼັກແຫຼ່ງ 2 ຊະນິດຕົ້ນຕໍແມ່ນຕົ້ນຢາງພະລາ ແລະຕົ້ນກາເຟ, ພົນລະພາກຫຼວງໄດ້ເປີດກວ້າງບັນດາຂະແໜງອາຊີບ, ການບໍລິການ, ຮັບໃຊ້ການຜະລິດ ແລະຊີວິດການເປັນຢູ່, ສອນອາຊີບ, ສ້າງວຽກເຮັດງານທຳດ້ວຍລາຍຮັບປົກກະຕິໃຫ້ແກ່ຜູ້ອອກແຮງງານຈຳນວນ 150.000 ຄົນ, ໃນນັ້ນ, ຜູ້ອອກແຮງງານແມ່ນຊົນເຜົ່າສ່ວນໜ້ອຍກວມເອົາເກືອບ 60%. ພົນລະພາກຫຼວງທັງພັດທະນາການຜະລິດ, ສະໜອງຜະລິດຕະພັນທີ່ມີມູນຄ່າເສດຖະກິດສູງໃຫ້ແກ່ສັງຄົມ, ທັງລົງທຶນສ້າງເງື່ອນໄຂພັດທະນາ, ຈັດສັນເຂດຊຸມຊົນຄືນໃໝ່, ສ້າງເຂດປ້ອງກັນຊາດຢູ່ບັນດາບໍລິເວນຍຸດທະສາດ, ເຂດຫ່າງໄກສອກຫຼີກຢູ່ບໍລິເວນຍຸດທະສາດໄຕງວຽນ. ທ່ານພົນຈັດຕະວາ ຮວ່າງວັນສີ, ຜູ້ບັນຊາການພົນລະພາກຫຼວງ 15 ແບ່ງປັນວ່າ: “ພົນລະພາກຫຼວງ ໄດ້ກໍ່ສ້າງ 266 ກຸ່ມຊຸມຊົນ, ລົບລ້າງປະກົດການຫຍໍ້ທໍ້ຢູ່ຕາມເສັ້ນຊາຍແດນ. ຄຽງຂ້າງກັນນັ້ນຍັງສ້າງວຽກເຮັດງານທຳ, ສ້າງຊີວິດການເປັນຢູ່ເປັນປົກກະຕິໃຫ່ແກ່ປະຊາຊົນກຳປູເຈຍ ຈຳນວນ 1.000 ຄົນ ແລະຊາວເຜົ່າລາວ ຈຳນວນ 500 ຄົນ ດ້ວຍລາຍຮັບສະເລ່ຍ 6 ລ້ານດົ່ງ/ເດືອນ”.
ຄະນະເສດຖະກິດ-ປ້ອງກັນຊາດ 915 (ທະຫານເຂດ 9) ກໍ່ເສີມຂະຫຍາຍບົດບາດຫຼັກແຫຼ່ງໃນການກໍ່ສ້າງ, ພັດທະນາເຂດເສດຖະກິດ-ປ້ອງກັນຊາດ ສີ່ລ່ຽມລອງຊວຽນ ແລະເຕີນຮົ່ງ (ດົ່ງທາບ), ນຳເອົາປະສິດທິຜົນແທດຈິງມາໃຫ້, ປະກອບສ່ວນສົບທົບການພັດທະນາເສດຖະກິດກັບການປັບປຸງການປ້ອງກັນຊາດ, ປ້ອງກັນຄວາມສະຫງົບ. ທ່ານພົນເອກ ດັ້ງວັນເຢືອງ, ຫົວໜ້າຄະນະເສດຖະກິດ-ປ້ອງກັນຊາດ 915 ແບ່ງປັນວ່າ: “ຄະນະເພີ່ມທະວີການໜູນຊ່ວຍການຜະລິດໃຫ້ແກ່ຄອບຄົວທຸກຍາກ, ໃກ້ທຸກຍາກ, ບັນດາຄອບຄົວເຂດຊົນເຜົ່າສ່ວນໜ້ອຍຢູ່ຕາມເສັ້ນຊາຍແດນ, ສ້າງວຽກເຮັດງານທຳເປັນປົກກະຕິ ເພື່ອໃຫ້ປະຊາຊົນອຸ່ນອ່ຽນໃຈດຳລົງຊີວິດຢູ່ເຂດຊາຍແດນ, ປົກປັກຮັກສາທີ່ດິນ. ໄລຍະ 2020-2024, ຄະນະເສດຖະກິດ-ປ້ອງກັນຊາດ 915 ໄດ້ໜູນຊ່ວຍເງິນຈຳນວນ 15 ຕື້ດົ່ງ ເພື່ອສ້າງວຽກເຮັດງານທຳ, ເພີ່ມລາຍຮັບໃຫ້ແກ່ປະຊາຊົນ; ມີປະມານ 30% ຄອບຄົວເຂົ້າຮ່ວມຮູບແບບຫຼຸດຜ່ອນຄວາມທຸກຍາກແບບຍືນຍົງ”.
ໂດຍ: ແສງເດືອນ