ຍູ້ແຮງການໝູນໃຊ້, ຖ່າຍທອດຜົນການຄົ້ນຄວ້າວິທະຍາສາດ

ທ່ານພົນຈັດຕະວາ ດັ້ງຮົ່ງຈ໊ຽນ, ຫົວໜ້າສູນເຂດຮ້ອນຫວຽດນາມ-ລັດເຊຍ ເປັນປະທານກອງປະຊຸມ. ພາບ: qdnd.vn

ກອງປະຊຸມໄດ້ຕີລາຄາວ່າ ປີ 2024, ສູນເຂດຮ້ອນຫວຽດນາມ-ລັດເຊຍ ໄດ້ຕັ້ງໜ້າ, ເປັນເຈົ້າການຜັນຂະຫຍາຍການປະຕິບັດໜ້າທີ່ດ້ວຍວຽກງານທຸກດ້ານຢ່າງຫຼວງຫຼາຍ. ທາງສູນ ໄດ້ຜັນຂະຫຍາຍປະຕິບັດ 46 ຫົວຂໍ້ ແລະໜ້າທີ່ຂຶ້ນກັບແຜນການຄົ້ນຄ້ວາວິທະຍາສາດ ແລະເຕັກໂນໂລຢີປະສົມຫວຽດນາມ - ລັດເຊຍ; 110 ຫົວຂໍ້, ໜ້າທີ່ວິທະຍາສາດເຕັກໂນໂລຢີສະເພາະຝ່າຍຫວຽດນາມ. ການເຄື່ອນໄຫວຜະລິດ, ສະໜອງຜະລິດຕະພັນໃຫ້ແກ່ເຫຼົ່າທັບ, ເຫຼົ່າຮົບມີການເຕີບໂຕ; ການຮ່ວມມືດ້ານວິທະຍາສາດ-ເຕັກໂນໂລຢີໄດ້ຮັບການເປີດກວ້າງ; ການປະກາດພາຍໃນ ແລະຕ່າງປະເທດສືບຕໍ່ຮັກສາຄຸນນະພາບ ແລະປະລິມານ; ການເຄື່ອນໄຫວວຽກງານພັກ, ວຽກງານການເມືອງໄດ້ຜັນຂະຫຍາຍຢ່າງຄົບຊຸດ; ການປະຕິຮູບດ້ານບໍລິຫານ, ການຫັນເປັນດີຈີຕອນ, ການບໍາລຸງກໍ່ສ້າງພາສາລັດເຊຍໄດ້ຮັບການຍູ້ແຮງ...

ບັນຍາກາດທີ່ກອງປະຊຸມ. ພາບ: qdnd.vn

ກອງປະຊຸມໄດ້ກຳນົດວ່າ, ໃນປີ 2025, ທາງສູນຈະສຸມໃສ່ປະຕິບັດແຜນການຄົ້ນຄວ້າວິທະຍາສາດທີ່ໄດ້ຮັບການອະນຸມັດເປັນຢ່າງດີ; ຍູ້ແຮງການເຄື່ອນໄຫວໝູນໃຊ້, ຖ່າຍທອດຜົນການຄົ້ນຄ້ວາວິທະຍາສາດເຂົ້າໃນສະພາບຕົວຈິງ ເພື່ອຮັບໃຊ້ໜ້າທີ່ການທະຫານ-ການປ້ອງກັນຊາດ ແລະ ປະກອບສ່ວນພັດທະນາເສດຖະກິດ - ສັງຄົມ; ຈັດຕັ້ງກອງປະຊຸມໃຫຍ່ຂອງພັກທຸກຂັ້ນ, ມຸ່ງໄປເຖິງກອງປະຊຸມໃຫຍ່ຜູ້ແທນອົງຄະນະພັກ ຄັ້ງທີ 8 ຂອງສູນເຂດຮ້ອນຫວຽດນາມ - ລັດເຊຍ ໄລຍະ 2025-2030.

ທ່ານພົນຈັດຕະວາ ດັ້ງຮົ່ງຈ໊ຽນ, ຫົວໜ້າສູນເຂດຮ້ອນຫວຽດນາມ-ລັດເຊຍ ມອບລາງວັນໃຫ້ບັນດາໝູ່ຄະນະ ແລະ ບຸກຄົນທີ່ບັນລຸໄດ້ຜົນງານດີເດັ່ນໃນການປະຕິບັດໜ້າທີ່ປີ 2024. ພາບ: qdnd.vn

ທີ່ກອງປະຊຸມ, ໂດຍໄດ້ຮັບການມອບສິດຈາກລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ການເມືອງກອງທັບປະຊາຊົນຫວຽດນາມ ແລະຫົວໜ້າອົງການປະກັນສັງຄົມຫວຽດນາມ, ການນຳສູນເຂດຮ້ອນຫວຽດນາມ-ລັດເຊຍ ໄດ້ມອບລາງວັນໃຫ້ບັນດາໝູ່ຄະນະ ແລະ ບຸກຄົນທີ່ບັນລຸໄດ້ຜົນງານດີເດັ່ນໃນການປະຕິບັດໜ້າທີ່ປີ 2024.

ໂດຍ: ທູຈາງ