ລະອຽດ, ທ່ານພົນຈັດຕະວາ ຕາວດຶກຖັ໊ງ, ປະທານ ທັງເປັນຜູ້ອໍານວຍການໃຫຍ່ກຸ່ມບໍລິສັດ Viettel ສະເໜີຜັນຂະຫຍາຍກົນໄກທົດລອງນະໂຍບາຍຍົກເວັ້ນ ເພື່ອໃຫ້ວິສາຫະກິດທົດລອງເຕັກໂນໂລຢີໃໝ່, ຮູບແບບດໍາເນີນທຸລະກິດໃໝ່.

ນີ້ແມ່ນແຜນນະໂຍບາຍບຸກທະລຸທີ່ອະນຸຍາດໃຫ້ລັດວິສາຫະກິດ ຄື Viettel ມີຄວາມກ້າຫານຄົ້ນຄວ້າທົດລອງ, ເປັນເຈົ້າການ ແລະນຳໃຊ້ເຕັກໂນໂລຢີໃໝ່, ຮູບແບບການດຳເນີນທຸລະກິດໃໝ່ ໂດຍມີຄວາມສ່ຽງເສຍຫາຍດ້ານເສດຖະກິດ ຍ້ອນສາຍເຫດພາວະວິໄສ.

ທ່ານປະທານກຸ່ມບໍລິສັດ Viettel ໃຫ້ຮູ້ວ່າ: ລັກສະນະຂອງໂຄງການລົງທຶນແມ່ນມີຄວາມສ່ຽງສູງ, ອັດຕາປະສົບຜົນສຳເລັດຕ່ຳ, ແຕ່ຖ້າປະສົບຜົນສຳເລັດຈະມີກຳໄລຫຼາຍ, ສາມາດທົດແທນທຶນໄດ້, ຊຸກຍູ້ການພັດທະນາເຕັກໂນໂລຢີໃໝ່, ຮູບແບບດໍາເນີນທຸລະກິດໃໝ່.

leftcenterrightdel
ທ່ານພົນຈັດຕະວາ ຕາວດຶກຖັ໊ງ, ປະທານ ທັງເປັນຜູ້ອໍານວຍການໃຫຍ່ກຸ່ມບໍລິສັດ Viettel ກ່າວຄໍາເຫັນທີ່ກອງປະຊຸມ. ພາບ: qdnd.vn

ການນຳກຸ່ມບໍລິສັດ Viettel ຍັງສະເໜີວ່າ ຕ້ອງສຸມແຫຼ່ງກຳລັງໃຫ້ແກ່ໂຄງການຄົ້ນຄວ້າເຕັກໂນໂລຢີທີ່ສວມບົດບາດພື້ນຖານ ແລະກວມລວມ ຄື: ເຕັກໂນໂລຢີເຄິ່ງຊັກນໍາໄຟຟ້າ, ດາວທຽມລະດັບຕ່ຳ, ອຸດສາຫະກຳປ້ອງກັນຊາດນຳໃຊ້ໄດ້ສອງໜ້າທີ່. ປະສົບການຂອງ Viettel ສະແດງໃຫ້ເຫັນວ່າ ຕ້ອງສຸມໃສ່ໂຄງການທີີ່ມີຂະໜາດໃຫຍ່, ບໍ່ກະແຈກກະຈາຍ.

ສະເໜີຜັນຂະຫຍາຍກົນໄກພິເສດໃນການຄົ້ນຄວ້າ, ເຂົ້າເຖິງ ແລະ ຊື້ຂາຍເຕັກໂນໂລຢີທີ່ກ້າວໜ້າ

ກຸ່ມບໍລິສັດ Viettel ຍັງສະເໜີຜັນຂະຫຍາຍກົນໄກພິເສດໃນການຄົ້ນຄວ້າ, ເຂົ້າເຖິງ, ຊື້ຂາຍເຕັກໂນໂລຢີທີ່ກ້າວໜ້າຂອງຕ່າງປະເທດ. ຕາມປະສົບການຂອງ Viettel ແລ້ວ, ສິ່ງຍາກທີ່ສຸດໃນປະຈຸບັນແມ່ນການຕີລາຄາ ແລະກຳນົດຄຸນຄ່າຂອງບັນດາເຕັກໂນໂລຢີ, ເພາະວ່ານີ້ແມ່ນເຕັກໂນໂລຢີທີ່ພິເສດສະເພາະ.

ສະນັ້ນ, Viettel ຈຶ່ງສະເໜີໃຫ້ລັດຖະບານ, ບັນດາກະຊວງ, ຂະແໜງການ ແນະນໍາຫຼັກການຕີລາຄາ, ກຳນົດຄຸນຄ່າຂອງເຕັກໂນໂລຢີໃນວິວັດການຖ່າຍທອດເຕັກໂນໂລຢີທີ່ກ້າວໜ້າຂອງຕ່າງປະເທດ.

ທ່ານພົນຈັດຕະວາ ຕາວດຶກຖັ໊ງ ຍັງສະເໜີໃຫ້ລັດຖະບານ, ບັນດາກະຊວງ, ຂະແໜງການ ມີຄຳແນະນຳການນໍາໃຊ້ແຫຼ່ງເງິນລົງທຶນພັດທະນາອຸດສາຫະກຳໂດຍໄວ ເພື່ອຜັນຂະຫຍາຍໜ້າທີ່ຈຸດສຸມທີ່ໄດ້ວາງອອກໃນຍຸດທະສາດພັດທະນາແຫ່ງຊາດຢ່າງທັນການ.

ຫວຽດນາມ ຕ້ອງການຮ່ວມມືກັບບັນດາວິສາຫະກິດໃຫຍ່, ແຖວໜ້າໃນໂລກ

ກ່ຽວຂ້ອງເຖິງມາດຕະການແກ້ໄຂການຮ່ວມມືສາກົນ ໃນການພັດທະນາວິທະຍາສາດເຕັກໂນໂລຢີ, ນະວັດຕະກຳ ແລະ ການຫັນເປັນດີຈີຕອນ ເພື່ອຊຸກຍູ້ການພັດທະນາວິທະຍາສາດເຕັກໂນໂລຢີ, ທ່ານພົນຈັດຕະວາ ຕາວດຶກຖັ໊ງ ຖືວ່າ: ບັນດາວິສາຫະກິດຫວຽດນາມ ຕ້ອງການຮ່ວມມືກັບບັນດາວິສາຫະກິດໃຫຍ່ ແລະແຖວໜ້າໃນໂລກ.

ຜ່ານພຶດຕິກໍາຕົວຈິງແຫ່ງການຜັນຂະຫຍາຍການຮ່ວມມືກັບວິສາຫະກິດເຕັກໂນໂລຢີຂະໜາດໃຫຍ່, ຄູ່ຮ່ວມມືສະເໜີນະໂຍບາຍບຸລິມະສິດທີ່ບໍ່ເຄີຍມີມາກ່ອນຢູ່ຫວຽດນາມ ເຊັ່ນ: ໜູນຊ່ວຍສ່ວນໃດສ່ວນໜຶ່ງເພື່ອກໍ່ສ້າງໂຮງງານຂອງເຂົາເຈົ້າຢູ່ຫວຽດນາມ. ເພື່ອໃຫ້ວິສາຫະກິດຫວຽດນາມ ສາມາດຮ່ວມມືກັບວິສາຫະກິດເຕັກໂນໂລຢີແຖວໜ້າຂອງຫວຽດນາມ, ພວກເຮົາຕ້ອງມີນະໂຍບາຍຄືດັ່ງກ່າວ.

ຕາມການນຳຂອງ Viettel ແລ້ວ, ດ້ວຍການຊີ້ນໍາຢ່າງຂ້ຽວຂາດຂອງລັດຖະບານ, ເຊິ່ງໂດຍກົງແມ່ນນາຍົກລັດຖະມົນຕີ - ປະທານຄະນະກຳມະການແຫ່ງຊາດກ່ຽວກັບການຫັນເປັນດີຈີຕອນ, ພ້ອມກັບການບໍລິຫານຢ່າງໃກ້ຊິດຕິດແທດຂອງກະຊວງຖະແຫຼງຂ່າວ ແລະສື່ສານ, ບັນດາມະຕິ, ຍຸດທະສາດທີ່ວາງອອກຮອດປີ 2025 ໄດ້ບັນລຸຜົນສຳເລັດພົ້ນເດັ່ນຫຼາຍຢ່າງ, ສະແດງໃຫ້ເຫັນຜ່ານໝາກຜົນ, ຄື: ລະບຽບການບໍລິຫານ 70% ໄດ້ສະໜອງທາງອອນລາຍຜ່ານປະຕູບໍລິການສາທາລະນະແຫ່ງຊາດ; ອັດຕາສ່ວນເສດຖະກິດດີຈີຕອນຂອງ GDP ປີ 2024 ຄາດວ່າຈະບັນລຸເກືອບ 19%; ອັດຕາຜູ້ນໍາໃຊ້ສະມາດໂຟນໃນທົ່ວປະເທດບັນລຸເກືອບ 90%; ອັດຕາຄອບຄົວທີ່ມີອິນເຕີແນັດຄວາມຖີ່ກວ້າງ ບັນລຸລະດັບ 83%...

ໂຄງການຫັນເປັນດີຈີຕອນແຫ່ງຊາດຮອດປີ 2025, ກໍານົດທິດຮອດປີ 2030 ໂດຍລັດຖະບານປະກາດໃຊ້, ຍັງໄດ້ກຳນົດບົດບາດຂອງພື້ນຖານໂຄງລ່າງດີຈີຕອນເປັນໂຄງລ່າງຂອງພື້ນຖານເສດຖະກິດ, ເປັນພື້ນຖານເພື່ອພັດທະນາລັດຖະບານດີຈີຕອນ, ເສດຖະກິດດີຈີຕອນ, ສັງຄົມດີຈີຕອນ.

ດ້ວຍເປົ້າໝາຍສືບຕໍ່ປັບປຸງການຈັດອັນດັບໃນການພັດທະນາ ພື້ນຖານໂຄງລ່າງດີຈີຕອນຂອງຫວຽດນາມ, ຮັບປະກັນໃຫ້ພື້ນຖານໂຄງລ່າງດີຈີຕອນຢູ່ ຫວຽດນາມ ມີຄວາມກ້າວໜ້າ, ທັນສະໄໝ, ຄົບຊຸດ, ມີຄວາມສະຫງົບປອດໄພ ແລະຍືນຍົງ ເທົ່າທຽມກັບບັນດາປະເທດພັດທະນາ.

leftcenterrightdel
ບັນຍາກາດທີ່ກອງປະຊຸມສະຫຼຸບວຽກງານ ປີ 2024 ແລະຜັນຂະຫຍາຍໜ້າທີ່ປີ 2025 ຂອງກະຊວງຖະແຫຼງຂ່າວ ແລະສື່ສານຫວຽດນາມ. ພາບ: qdnd.vn

ດ້ວຍບົດບາດເປັນວິສາຫະກິດນໍາໜ້າຂອງຂະແໜງ, ປະຕິບັດເປົ້າໝາຍຍຸດທະສາດແຫ່ງຊາດ, Viettel ກຳນົດບາງໜ້າທີ່ຈຸດສຸມໄລຍະ 2025-2030 ຄືດັ່ງນີ້:

ກ່ຽວກັບພື້ນຖານໂຄງລ່າງການເຊື່ອມຕໍ່, ຮອດປີ 2025, ປະຕິບັດສຳເລັດການປິດເຄືອຂ່າຍມືຖື 2G ແລະ 3G ໂດຍພື້ນຖານ; ກະຈາຍຄື້ນ 5G ໃຫ້ພົນລະເມືອງຫວຽດນາມ ໃຫ້ໄດ້ 50%, ຮອດປີ 2028, ເຄືອຂ່າຍ 5G Viettel ຈະກະຈາຍຄື້ນໄປທົ່ວປະເທດ. ພັດທະນາພື້ນຖານໂຄງລ່າງອິນເຕີແນັດສາຍກາບໃຍແສງໃຫ້ແກ່ຄອບຄົວຢ່າງແຂງແຮງ, ເປົ້າໝາຍແມ່ນຮອດປີ 2030 ພ້ອມແລ້ວທີ່ຈະສະໜອງການບໍລິການອິນເຕີແນັດຄວາມຖີ່ກວ້າງດ້ວຍລະດັບຄວາມໄວ Gb/s ໃຫ້ທຸກຄອບຄົວຢູ່ຫວຽດນາມ. ຜັນຂະຫຍາຍ ແລະນຳເຂົ້າໃຊ້ງານ 4 ສາຍກາບໃຍແສງໃຕ້ທ້ອງທະເລ, ໃນນັ້ນມີ 1 ສາຍກາບໂດຍ Viettel ເປັນເຈົ້າຂອງ.

ກ່ຽວກັບພື້ນຖານໂຄງລ່າງສູນຂໍ້ມູນ, ໃນໄລຍະ 2025-2030, Viettel ຈະຜັນຂະຫຍາຍສູນຂໍ້ມູນຂະໜາດໃຫຍ່ 11 ແຫ່ງ ດ້ວຍກຳລັງການຜະລິດ ຄາດຄະເນກວ່າ 350 MW, ກວມເອົາກວ່າ 40% ຍອດກໍາລັງແຮງຂອງສູນຂໍ້ມູນທັງໝົດຢູ່ ຫວຽດນາມ.

ກ່ຽວກັບການພັດທະນາວິທະຍາສາດ ແລະເຕັກໂນໂລຢີ, ຕາມການກໍານົດທິດຂອງຍຸດທະສາດພັດທະນາອຸດສາຫະກຳເຄິ່ງຊັກນໍາໄຟຟ້າ ຢູ່ ຫວຽດນາມ, Viettel ຕັ້ງເປົ້າ ຮອດປີ 2030 ຈະເປັນເຈົ້າຂອງ  100% ການອອກແບບ ແລະຜະລິດບັນດາຜະລິດຕະພັນ chip ເພື່ອຮັບໃຊ້ການປ້ອງກັນຊາດ-ປ້ອງກັນຄວາມສະຫງົບ ແລະຜະລິດຕະພັນ chip ບາງຊະນິດ. ພ້ອມທັງ ນໍາເຂົ້າໃຊ້ງານໂຮງງານຜະລິດ chip ເຄິ່ງຊັກນໍາໄຟຟ້າ ທີ່ມີຂະໜາດນ້ອຍດ້ວຍເຕັກໂນໂລຢີສູງ.

ໂດຍ: ທູຈາງ