ດ້ວຍນະໂຍບາຍທີ່ຖືກຕ້ອງ, ການເຄື່ອນໄຫວຢ່າງມີປະສິດທິຜົນ, ຄະນະກຳມະການບັນລຸໄດ້ບັນດາຜົນງານທີ່ສຳຄັນ, ປະກອບສ່ວນສ້າງຮູບພາບປະເທດຫວຽດນາມ ເປັນມິດ, ສັນຕິພາບ ແລະຮ່ວມມືຂອງຫວຽດນາມ, ພ້ອມທັງຢືນຢັນບົດບາດຂອງປະເທດໃນການເບິ່ງແຍງດູແລ, ປົກປັກຮັກສາສິດຜົນປະໂຫຍດ ແລະເສີມຂະຫຍາຍແຫຼ່ງກຳລັງຂອງປະຊາຄົມຊາວຫວຽດນາມ ຢູ່ຕ່າງປະເທດ.

ໜຶ່ງໃນບັນດາຄິດໝາຍສຳຄັນທີ່ສຸດຂອງຄະນະກຳມະການແຫ່ງລັດກ່ຽວກັບຊາວຫວຽດນາມ ອາໄສຢູ່ຕ່າງປະເທດແມ່ນເປັນເສນາທິການໃນການກໍ່ສ້າງມະຕິເລກທີ 36-NQ/TW ລົງວັນທີ 26 ມີນາ 2004 ຂອງກົມການເມືອງ - ເອກະສານທີ່ເປັນບາດລ້ຽວໃນວຽກງານຊາວຫວຽດນາມ ຢູ່ຕ່າງປະເທດ. ພາຍຫຼັງ 20 ປີແຫ່ງການປະຕິບັດ, ມະຕິໄດ້ສະແດງໃຫ້ເຫັນຄຸນຄ່າຕົວຈິງຢ່າງເລິກເຊິ່ງ, ພິເສດແມ່ນໃນສະພາບການເຊື່ອມໂຍງເຂົ້າກັບສາກົນນັບມື້ນັບເລິກເຊິ່ງກວ້າງຂວາງ. ທ່ານນາງ ເລທິທູຮັ່ງ ຮອງລັດຖະມົນຕີກະຊວງການຕ່າງປະເທດ  ໃຫ້ຂໍ້ສັງເກດວ່າ: “ມະຕິເລກທີ 36 ໄດ້ກາຍເປັນທິດທາງ, ຂີດໝາຍບາດລ້ຽວສຳຄັນໃນວຽກງານຊາວຫວຽດນາມ ອາໄສຢູ່ຕ່າງປະເທດ, ພິເສດແມ່ນໃນການປັບປຸງກຸ່ມມະຫາສາມັກຄີທົ່ວປວງຊົນທັງຊາດ”.

leftcenterrightdel
ບັນດາຜູ້ແທນເຂົ້າຮ່ວມກອງປະຊຸມສໍາມະນາ “65 ປີແຫ່ງການເຊື່ອມຕໍ່ຊາວຫວຽດນາມ ອາໄສຢູ່ຕ່າງປະເທດກັບປະເທດ ແລະ 20 ປີແຫ່ງການປະຕິບັດມະຕິເລກທີ 36-NQ/TW ຂອງກົມການເມືອງ”. ພາບ: vovworld.vn

ສຳລັບປະຊາຄົມຊາວຫວຽດນາມ ຢູ່ຕ່າງປະເທດ, ມະຕິເລກທີ 36 ໄດ້ຮັບຄວາມເຫັນອົກເຫັນໃຈ ແລະການສະໜັບສະໜູນຢ່າງກວ້າງຂວາງ. ເອກະສານສະບັບນີ້ບໍ່ພຽງແຕ່ສ້າງຄວາມເຊື່ອໝັ້ນ, ຄວາມພາກພູມໃຈໃຫ້ຊາວຫວຽດນາມ ອາໄສຢູ່ຕ່າງປະເທດເທົ່ານັ້ນ, ຫາກຍັງເພີ່ມຄວາມສະໜິດຕິດພັນລະຫວ່າງຍາດຕິພິ່ນ້ອງກັບບ້ານເກີດເມືອງນອນອີກດ້ວຍ. ບັນດານະໂຍບາຍທີ່ໄດ້ວາງອອກໄດ້ກ້າວເຂົ້າຊີວິດຊ່ວຍໃຫ້ປະຊາຄົມຊາວຫວຽດນາມ ຢູ່ຕ່າງປະເທດນັບມື້ນັບພັດທະນາຢ່າງໝັ້ນຄົງເຂັ້ມແຂງ. ທ່ານ ຫງວຽນຢີນຽນ, ອະດີດລັດຖະມົນຕີກະຊວງການຕ່າງປະເທດ ໄດ້ແບ່ງປັນວ່າ: “ໃນໄລຍະປະຈຸບັນ, ຕ້ອງສືບຕໍ່ຄົ້ນຄິດເພື່ອເຮັດໃຫ້ມະຕິເລກທີ 36 ມີພະລັງຊີວິດກວ່າ, ເພາະສະພາບການໃໝ່ພວມຮຽກຮ້ອງສູງກວ່າຕໍ່ທົ່ວປະເທດ ແລະປະຊາຄົມຊາວຫວຽດນາມ ຢູ່ຕ່າງປະເທດ”.

ໃນອະນາຄົດ, ຄະນະກຳມະການແຫ່ງລັດກ່ຽວກັບຊາວຫວຽດນາມ ອາໄສຢູ່ຕ່າງປະເທດວາງອອກຫຼາຍໜ້າທີ່ຈຸດສຸມ. ຕາມທ່ານ ບຸ່ຍແທງເຊີນ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດແລ້ວ, ວຽກງານຊາວຫວຽດນາມ ຢູ່ຕ່າງປະເທດຕ້ອງໄດ້ຮັບການຍູ້ແຮງຢ່າງຮອບດ້ານ, ຈາກການຍົກສູງຄວາມຮັບຮູ້ໃນລະບົບການເມືອງເຖິງການຫັນນະໂຍບາຍເປັນການກະທໍາທີ່ແທດຈິງ. ພິເສດ, ຄະນະກໍາມະການ ຈະສຸມໃສ່ປັບປຸງກົງຈັກໃຫ້ສົມບູນແບບຕາມທິດ “ກະທັດເຂັ້ມແຂງ, ມີປະສິດທິພາບ, ຜົນສັກສິດ ແລະປະສິດທິຜົນ” ພ້ອມກັບການກໍ່ສ້າງຖັນແຖວພະນັກງານ “ກ້ານໍາໜ້າບຸກທະລຸ, ກ້າປ່ຽນແປງໃໝ່ປະດິດຄິດສ້າງ”: “ດ້ວຍຄວາມສາມັກຄີ, ຮ່ວມແຮງຮ່ວມໃຈຂອງຍາດຕິພີ່ນ້ອງຮ່ວມຊາດຢູ່ຕ່າງປະເທດ 6 ລ້ານກວ່າຄົນ ແລະຄວາມມານະພະຍາຍາມຢ່າງບໍ່ຢຸດຢັ້ງຂອງບັນດາອົງການພາຍໃນປະເທດ, ວຽກງານຊາວຫວຽດນາມ ຢູ່ຕ່າງປະເທດ ຈະສືບຕໍ່ບັນລຸໄດ້ບັນດາຜົນງານໃຫຍ່ຫຼວງກວ່າອີກ”.

ໃນຊຸມປີມໍ່ໆມານີ້, ປະຊາຄົມຊາວຫວຽດນາມ ອາໄສຢູ່ຕ່າງປະເທດໄດ້ສະແດງໃຫ້ເຫັນຄວາມເຫັນດີເຫັນພ້ອມ ແລະສະໜັບສະໜູນຢ່າງແຮງຕໍ່ບັນດານະໂຍບາຍຂອງພັກ ແລະລັດ. ສິ່ງດັ່ງກ່າວໄດ້ສະແດງໃຫ້ເຫັນຜ່ານຄຳເຫັນຂອງຊາວຫວຽດນາມ ຢູ່ຕ່າງປະເທດຫຼາຍຄົນໃນກອງປະຊຸມທີ່ສຳຄັນ. ເຂົາເຈົ້າປາດຖະໜາຢາກມີສອງສັນຊາດເພື່ອອຳນວຍຄວາມສະດວກໃຫ້ແກ່ການເຮັດວຽກ ແລະດຳລົງຊີວິດຢູ່ປະເທດປະຈໍາຖິ່ນ, ເພື່ອສ້າງເງື່ອນໄຂໃນການລົງທຶນໃນປະເທດ, ກໍ່ຄືສະເໜີສ້າງຕັ້ງທະນາຄານຫວຽດນາມ ຢູ່ຕ່າງປະເທດ ແລະສູນຝຶກອົບຮົມຖ່າຍທອດເຕັກໂນໂລຊີ. ທ່ານນາຍົກລັດຖະມົນຕີ ໄດ້ຮັບຄວາມເອົາໃຈໃສ່ຊີ້ນຳບັນດາກະຊວງ, ຂະແໜງການຄົ້ນຄວ້າ ແລະຜັນຂະຫຍາຍຂໍ້ສະເໜີດັ່ງກ່າວ.

ທ່ານ ສຈ, ດຣ ວິທະຍາສາດ ຫງວຽນຫງອກເຈິນ, ອະດີດປະທານຄະນະກຳມະການແຫ່ງລັດກ່ຽວກັບຊາວຫວຽດນາມ ຢູ່ຕ່າງປະເທດ ໃຫ້ຮູ້ວ່າ: “ບັນດາກົມໃນຄະນະກຳມະການໄດ້ຮັບໜ້າທີ່ຊອກຮູ້ນະໂຍບາຍຂົນຂວາຍຊາວຫວຽດນາມ ຢູ່ຕ່າງປະເທດຄື ຈີນ, ອິດສະຣາແອນ, ລັດເຊຍ ແລະອື່ນໆ ເພື່ອກໍ່ສ້າງນະໂຍບາຍໃຫ້ຕົນ. ພິເສດແມ່ນການຄົ້ນຄວ້າກ່ຽວກັບບັນຫາສັນຊາດ. ຫວ່າງມໍ່ໆມານີ້, ສະພາແຫ່ງຊາດຫວຽດນາມ ໄດ້ຮັບຮອງເອົາກົດໝາຍວ່າດ້ວຍທີ່ດິນ (ສະບັບປັບປຸງ). ໃນນັ້ນ ອະນຸຍາດຊາວຫວຽດນາມ ອາໄສຢູ່ຕ່າງປະເທດ ມີສິດຄືກັບຊາວຫວຽດນາມຢູ່ພາຍໃນປະເທດກ່ຽວກັບບັນຫາທີ່ດິນ. ສິ່ງນີ້ໄດ້ຮັບຄວາມຊົມເຊີຍຈາກປະຊາຄົມຊາວຫວຽດນາມ ຢູ່ຕ່າງປະເທດ ເມື່ອການນຳຂັ້ນສູງຂອງພວກເຮົາພົບປະກັບເຂົາເຈົ້າ”.

ຜ່ານ 65 ປີແຫ່ງຄວາມມານະພະຍາຍາມຢ່າງບໍ່ຢຸດຢັ້ງ, ຄະນະກຳມະການແຫ່ງລັດກ່ຽວກັບຊາວຫວຽດນາມ ອາໄສຢູ່ຕ່າງປະເທດນັບມື້ນັບເຕີບໃຫຍ່ເຂັ້ມແຂງ. ຖັນແຖວພະນັກງານຂອງຄະນະກໍາມະການນັບມື້ນັບເຕີບໃຫຍ່, ຝຶກຝົນຫຼໍ່ຫຼອມຢ່າງບໍ່ຢຸດຢັ້ງ, ຍົກສູງລະດັບວິຊາສະເພາະ, ຄຸນນະພາບດ້ານການເມືອງ, ຈັນຍາບັນປະຕິວັດ. ຄະນະກຳມະການໄດ້ກາຍເປັນສະຖານທີ່ໜ້າໄວ້ເນື້ອເຊື່ອໃຈຂອງຊາວຫວຽດນາມ ຢູ່ຕ່າງປະເທດເມື່ອປະສົບກັບຄວາມຫຍຸ້ງຍາກ, ເປັນບ້ານທີ່ອົບອຸ່ນຕ້ອນຮັບເມື່ອເຂົາເຈົ້າມີໂອກາດກັບເມືອບ້ານ. ທ່ານນາງຮອງລັດຖະມົນຕີ ເລທິທູຮັ່ງ ຢືນຢັນວ່າ: “ວຽກງານຊາວຫວຽດນາມ ອາໄສຢູ່ຕ່າງປະເທດໄດ້ຮັບການຜັນຂະຫຍາຍຢ່າງຮອບດ້ານໃນທຸກດ້ານນັບແຕ່ການເປັນເສນາທິການ, ສ້າງນະໂຍບາຍ, ມະຫາສາມັກຄີ, ເບິ່ງແຍງດູແລ, ໜູນຊ່ວຍປະຊາຄົມ, ເສີມຂະຫຍາຍບັນດາແຫຼ່ງກຳລັງເຖິງວຽກງານຮັກສາພາສາຫວຽດນາມ, ເສີມຂະຫຍາຍມູນເຊື້ອວັດທະນະທຳຂອງຊາດ ແລະໂຄສະນາສື່ສານເຖິງຊາວຫວຽດນາມ ຢູ່ຕ່າງປະເທດ”.

65 ປີຜ່ານມາ, ຄະນະກຳມະການແຫ່ງລັດກ່ຽວກັບຊາວຫວຽດນາມ ອາໄສຢູ່ຕ່າງປະເທດ ໄດ້ກາຍເປັນບ້ານທີ່ໄວ້ເນື້ອເຊື່ອໃຈຂອງຊາວຫວຽດນາມ ຢູ່ຕ່າງປະເທດຢ່າງແທ້ຈິງ. ດ້ວຍທິດພັດທະນາໃໝ່, ໃນອະນາຄົດ, ພ້ອມກັບການຮ່ວມເດີນທາງຂອງພັກ, ລັດ ແລະການສະໜັບສະໜູນຂອງປະຊາຄົມຊາວຫວຽດນາມ ອາໄສຢູ່ຕ່າງປະເທດ, ຄະນະກຳມະການແຫ່ງລັດກ່ຽວກັບຊາວຫວຽດນາມ ອາໄສຢູ່ຕ່າງປະເທດສືບຕໍ່ປ່ຽນແປງໃໝ່ປະດິດຄິດສ້າງ, ຍົກສູງປະສິດທິຜົນວຽກງານ, ປະກອບສ່ວນກໍ່ສ້າງປະຊາຄົມຊາວຫວຽດນາມ ຢູ່ຕ່າງປະເທດໃຫ້ມີຄວາມສາມັກຄີ, ໝັ້ນຄົງເຂັ້ມແຂງ, ມຸ່ງຫາປະເທດຊາດ.

ໂດຍ: ຈາງຫງວຽນ