ບຸລິມະສິດໃນການຍົກລະດັບພື້ນຖານໂຄງລ່າງການເຊື່ອມຕໍ່
ເດືອນພະຈິກ ຜ່ານມາ, ທ່າກຳປັ່ນສາກົນ Gemalink (ບ່າເຣ້ຍ-ຫວູງເຕົ່າ) ໄດ້ສ້າງສະຖິຕິໃໝ່ໃນຂະແໜງຂຸດຄົ້ນທ່າກຳປັ່ນຫວຽດນາມ ເມື່ອດຳເນີນການເຄື່ອນໄຫວຍັງບໍ່ຮອດ 3 ປີ ເຕັມ, ຮັບໄດ້ TEU ທີ 4,5 ລ້ານ. ນີ້ແມ່ນຂີດໝາຍສໍາຄັນຢັ້ງຢືນຖານະບົດບາດຂອງທ່າກຳປັ່ນສາກົນ Gemalink ໃນຂົງເຂດທ່າກໍາປັ່ນ, ປະກອບສ່ວນບໍ່ໜ້ອຍເຂົ້າໃນການພັດທະນາເສດຖະກິດ-ສັງຄົມຂອງແຂວງບ່າເຣ້ຍ-ຫວູງເຕົ່າ, ກາຍເປັນຫົວໜ່ວຍສ້າງສະຖິຕິທຳອິດໃນການຂົນຖ່າຍສິນຄ້າກຳປັ່ນຂະໜາດໃຫຍ່ 2 ລຳ - ປະລິມານການຂົນຖ່າຍສິນຄ້າສູງກວ່າໝູ່ຢູ່ຫວຽດນາມ.
ເດືອນທັນວາ 2024, ທ່າກຳປັ່ນເຕີນກາງ-ກ໊າຍແມບທິ້ຫວາຍ ຢັ້ງຢືນວ່າ ໄດ້ຮັບ TEU ທີ 1 ລ້ານ ຜ່ານທ່າກໍາປັ່ນໃນປີ 2024. ເຫດການນີ້ພິສູດໃຫ້ເຫັນບົດບາດສຳຄັນຂອງທ່າກຳປັ່ນ ເຕີນກາງ-ກ໊າຍແມບທິຫວາຍ ໃນການສ້າງກຸ່ມກຳປັ່ນ ກ໊າຍແມບ-ທິຫວາຍ ກາຍເປັນທ່າກຳປັ່ນສົ່ງຕໍ່ສິນຄ້າແຖວໜ້າຢູ່ພາກພື້ນ.
    |
 |
|
ການເຄື່ອນໄຫວຂົນຖ່າຍສິນຄ້າຢູ່ທ່າກຳປັ່ນສາກົນ ເຕີນກາງ-ກ໊າຍແມບ (ແຂວງບ່າເຣ້ຍ-ຫວູງເຕົ່າ). ພາບ: ແທັງຮວ່ຽນ |
ຕາມທ່ານ ເລງອກລິງ, ຫົວໜ້າພະແນກແຜນການ ແລະການລົງທຶນແຂວງບ່າເຣ້ຍ-ຫວູງເຕົ່າ, ປີ 2024, ຍອດຜະລິດຕະພັນພາຍໃນຢູ່ໃນບໍລິເວນແຂວງ (GRDP) ຂອງ ບ່າເຣ້ຍ-ຫວູງເຕົ່າ ເພີ່ມຂຶ້ນ 11,72 %, ສູງທີ່ສຸດໃນ 10 ປີມໍ່ໆມານີ້. ແຂວງມີຈໍານວນ 36 ໃນຍອດຈຳນວນ 37 ຄາດໝາຍເສດຖະກິດ-ສັງຄົມ ທີ່ບັນລຸໄດ້ ແລະລື່ນແຜນການວາງອອກ; ອັດຕາສ່ວນປ່ອຍເງິນລົງທຶນພາກລັດປີ 2024 ບັນລຸກວ່າ 95,9%, ສູງສຸດໃນໄລຍະ 2021-2024. ໝາກຜົນດັ່ງກ່າວມີການປະກອບສ່ວນອັນໃຫຍ່ຫຼວງຈາກການເຄື່ອນໄຫວຂອງທ່າກຳປັ່ນທະເລດ້ວຍການສ້າງສະຖິຕິຫຼາຍຢ່າງ ແລະຕົວເລກທີ່ເປັນໜ້າປະທັບໃຈ.
ເພື່ອບັນລຸໄດ້ຜົນສຳເລັດພົ້ນເດັ່ນດັ່ງກ່າວ, ແຂວງບ່າເຣ້ຍ-ຫວູງເຕົ່າ ໄດ້ເປັນເຈົ້າການລົງທຶນໃສ່ພື້ນຖານໂຄງລ່າງ, ຍົກສູງກໍາລັງຄວາມສາມາດການຂົນສົ່ງ; ເສີມຂະຫຍາຍທ່າແຮງ, ມຸ່ງໄປເຖິງອະນາຄົດທີ່ຍືນຍົງ ແລະສືບຕໍ່ແມ່ນຂົວຕໍ່ສຳຄັນໃນເຄືອຂ່າຍ logistics ສາກົນ.
ທ່ານ ຫງວຽນກົງວິງ, ຮອງປະທານຄະນະກຳມະການປະຊາຊົນແຂວງ ບ່າເຣ້ຍ-ຫວູງເຕົ່າ ຢັ້ງຢືນວ່າ ພື້ນຖານໂຄງລ່າງຄົມມະນາຄົມສະດວກ, ແລວທະເລບັນລຸມາດຕະຖານ, ເວລາທຽບທ່າສັ້ນລົງ... ແມ່ນບັນດາປັດໄຈສຳຄັນ ເພື່ອເຊື່ອມຕໍ່, ຮຽກເຊີນບັນດາບໍລິສັດກຳປັ່ນ. ແຂວງ ຈະສືບຕໍ່ໃຫ້ບຸລິມະສິດ ແລະມານະພະຍາຍາມລົງທຶນພັດທະນາພື້ນຖານໂຄງລ່າງຢ່າງຄົບຊຸດ, ປັບປຸງການເຊື່ອມຕໍ່ ເພື່ອສ້າງເງື່ອນໄຂພັດທະນາທ່າກຳປັ່ນ, ເສດຖະກິດທະເລໃນໄລຍະຈະມາເຖິງ.
ໝູນໃຊ້ເຕັກໂນໂລຢີ, ດຶງດູດການລົງທຶນ
ຕາມການວາງແຜນສັງລວມກ່ຽວກັບການພັດທະນາລະບົບທ່າກຳປັ່ນທະເລຫວຽດນາມ ໄລຍະ 2021-2030, ວິໄສທັດຮອດປີ 2050, ທ່າກໍາປັ່ນທະເລແຂວງບ່າເຣ້ຍ-ຫວູງເຕົ່າ ໄດ້ຈັດເປັນປະເພດທ່າກຳປັ່ນພິເສດ ແລະແມ່ນລະບົບທ່າກຳປັ່ນທີ່ເປັນປະຕູເຂົ້າອອກ, ເປັນທ່າກຳປັ່ນສົ່ງຕໍ່ສິນຄ້າສາກົນທີ່ມີຂະໜາດໃຫຍ່ກວ່າໝູ່ຢູ່ຫວຽດນາມ. ດ້ວຍການວາງແຜນກຳນົດ ແລະວິໄສທັດຍຸດທະສາດ, ແຂວງບ່າເຣ້ຍ-ຫວູງເຕົ່າ ກຳນົດວ່າ ຈະສຸມທຸກແຫຼ່ງກຳລັງລົງທຶນ, ພັດທະນາລະບົບທ່າກຳປັ່ນທະເລບຸກທະລຸ, ການບໍລິການ logistics.
ປະຈຸບັນ, ຂະແໜງ logistics ໄດ້ກໍານົດວ່າແມ່ນໜຶ່ງໃນ 4 ເສົາຄໍ້າເສດຖະກິດຂອງແຂວງ ບ່າເຣ້ຍ-ຫວູງເຕົ່າ. ເປົ້າໝາຍເຖິງປີ 2025, ແຂວງນີ້ກາຍເປັນໃຈກາງເສດຖະກິດທະເລແຫ່ງຊາດ; ໃຈກາງການບໍລິການເດີນທະເລພາກພື້ນອາຊີຕາເວັນອອກສ່ຽງໃຕ້; ໃຈກາງການທ່ອງທ່ຽວທີ່ມີຄຸນນະພາບສູງລະດັບສາກົນ; ໜຶ່ງໃນບັນດາໃຈກາງ logistics ຂະໜາດໃຫຍ່. ສະນັ້ນ, ເພື່ອຫັນເປົ້າໝາຍນີ້ໃຫ້ປະກົດຜົນເປັນຈິງ, ແຂວງບ່າເຣ້ຍ-ຫວູງເຕົ່າ ບໍ່ພຽງແຕ່ຍູ້ແຮງການຍົກລະດັບພື້ນຖານໂຄງລ່າງເຊື່ອມຕໍ່ການຄົມມະນາຄົມເທົ່ານັ້ນ ຫາກຍັງພັດທະນາຊັບພະຍາກອນມະນຸດທີ່ມີຄຸນນະພາບສູງ ແລະເພີ່ມທະວີການຮ່ວມມືກັບຄູ່ຮ່ວມມືສາກົນ ເພື່ອດຶງດູດແຫຼ່ງທຶນ, ເຕັກໂນໂລຢີ ແລະບົດຮຽນໃນການພັດທະນາທ່າກຳປັ່ນ, ການບໍລິການ logistics ອີກດ້ວຍ. ຕາມທ່ານພັນເອກພິເສດ ບຸ່ຍວັນກຸ່ຍ, ຮອງຜູ້ອໍານວຍການໃຫຍ່, ບໍລິສັດໃຫຍ່ເຕິນກາງໄຊງ່ອນ, ປະທານສະຫະພັນທ່າກຳປັ່ນທະເລອາຊີຕາເວັນອອກສ່ຽງໃຕ້ ໃຫ້ຮູ້ວ່າ ທ່າກຳປັ່ນທະເລ ຍາມໃດກໍ່ຕ້ອງຕິດພັນກັບການບໍລິການ logistics, ເພາະສະນັ້ນການກໍານົດການບຸກທະລຸພັດທະນາການບໍລິການ logistics ແມ່ນທິດເດີນທີ່ຖືກຕ້ອງຂອງແຂວງບ່າເຣ້ຍ-ຫວູງເຕົ່າ ໂດຍອີງໃສ່ເງື່ອນໄຂຕົວຈິງ. ເຖິງຢ່າງໃດກໍ່ຕາມ, ຕ້ອງຍູ້ແຮງການນໍາໃຊ້ເຕັກໂນໂລຢີເຂົ້າໃນຂົງເຂດ logistics, ລວມມີການບໍລິການຂົນສົ່ງ, ເດີ່ນ ແລະສາງ... ຈະຊ່ວຍຍົກສູງປະສິດທິຜົນການເຄື່ອນໄຫວ ແລະຫຼຸດລາຍຈ່າຍໃຫ້ແກ່ວິສາຫະກິດ.
|
|
 |
|
ທ່າກຳປັ່ນ ເຕີນກາງ-ກ໊າຍແມບທິຫວາຍ ຕ້ອນຮັບ TEU ທີ 1 ລ້ານໃນເດືອນທັນວາ 2024. ພາບ: ແທັງຮວ່ຽນ |
ດ້ວຍຄວາມສາມາດບົ່ມຊ້ອນທີ່ມີຢູ່, ແຂວງບ່າເຣ້ຍ-ຫວູງເຕົ່າ ສາມາດມຸ່ງໄປເຖິງເປົ້າໝາຍກາຍເປັນໃຈກາງ logistics ແຖວໜ້າຂອງພາກພື້ນ ແລະທົ່ວປະເທດ. ນັກຊ່ຽວຊານດ້ານເສດຖະກິດຫຼາຍຄົນ ຖືວ່າ ບັນຫາວາງອອກແມ່ນ ແຂວງ ຕ້ອງຮຽກຮ້ອງແຫຼ່ງກຳລັງລົງທຶນ ແລະປະສານສົມທົບກັບບັນດາກົມກອງເພື່ອດຳເນີນການບຳລຸງສ້າງ, ຍົກສູງຄຸນນະພາບຊັບພະຍາກອນມະນຸດເພື່ອຕອບສະໜອງຄວາມຮຽກຮ້ອງຕ້ອງການຢ່າງສູງຂອງຂົງເຂດທ່າກຳປັ່ນທະເລ, logistics; ເປັນເຈົ້າການໝູນໃຊ້ວິທະຍາສາດ-ເຕັກໂນໂລຢີ ແລະສົ່ງເສີມການສ້າງເຂດການຄ້າເສລີຕິດພັນກັບທ່າກຳປັ່ນທະເລຢູ່ເຂດ ກ໊າຍແມບຮ້າ. ທ່ານ ຫງວຽນວັນທໍ້, ປະທານຄະນະກຳມະການປະຊາຊົນແຂວງ ບ່າເຣ້ຍ-ຫວູງເຕົ່າ ເນັ້ນໜັກວ່າ ແຂວງວາງເປົ້າໝາຍສ້າງຕັ້ງເຂດການຄ້າກ໊າຍແມບຮ້າ ເຊື່ອມຕໍ່ກັບທ່າອາກາດສະຍານສາກົນລອງແທັ່ງ, ທ່າກຳປັ່ນນ້ຳເລິກ ກ໊າຍແມບ-ທິຫວາຍ ຮັບປະກັນຄວາມຄົບຊຸດ, ສ້າງກຳລັງໜູນໃໝ່ໃນການດຶງດູດການລົງທຶນພັດທະນາບັນດາຂະແໜງເສດຖະກິດເສົາຄ້ຳ, ໂດຍສະເພາະແມ່ນການບໍລິການ logistics, ທ່າກໍາປັ່ນທະເລ. ແຂວງ ຫວັງວ່າ ຈະສ້າງຄວາມບຸກທະລຸໃຫ້ແກ່ພື້ນຖານເສດຖະກິດພັດທະນາແບບຍືນຍົງໃນອະນາຄົດໃກ້ໆນີ້.
ໂດຍ: ແສງເດືອນ