ເນື່ອງໃນໂອກາດນີ້, ທ່ານ ບຸ່ຍແທງເຊີນ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ໃຫ້ສຳພາດຕໍ່ນັກຂ່າວ.
ນັກຂ່າວ: ທ່ານຮອງນາຍົກລັດຖະມົນຕີຫວຽດນາມ ຕີລາຄາຄືແນວໃດຕໍ່ເລື່ອງສະຫະປະຊາຊາດຮັບຮອງເອົາສົນທິສັນຍາສະຫະປະຊາຊາດກ່ຽວກັບການຕ້ານອາດຊະຍາກໍາທາງອິນເຕີເນັດ?
ທ່ານ ບຸ່ຍແທງເຊີນ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມ: ອາດເວົ້າໄດ້ວ່າ ນີ້ແມ່ນບັນດາຜົນງານທີ່ສົມຄວນພາຍຫຼັງເກືອບ 5 ປີທີ່ຫວຽດນາມ ພ້ອມກັບບັນດາປະເທດສະມາຊິກສະຫະປະຊາຊາດ ມານະພະຍາຍາມເຈລະຈາຢ່າງບໍ່ຮູ້ອິດຮູ້ເມື່ອຍ. ດ້ວຍຖານະທີ່ເປັນເອກະສານສະບັບທຳອິດກ່ຽວກັບອາດຊະຍາກຳຂ້າມຊາດທີ່ໄດ້ຮັບການຮັບຮອງເອົາໃນຂອບເຂດຂອງສະຫະປະຊາຊາດໃນຮອບ 20 ປີ, ສົນທິສັນຍາສະບັບນີ້ໄດ້ເປີດໜ້າປະຫວັດສາດໃໝ່ໃນການຮ່ວມມືລະຫວ່າງບັນດາປະເທດດ້ວຍຄວາມໝາຍສຳຄັນຫຼາຍຢ່າງ.
ທີໜຶ່ງ, ສົນທິສັນຍາສະບັບດັ່ງກ່າວໄດ້ສ້າງກອບນິຕິກໍາທຳອິດໃນທົ່ວໂລກ ໃຫ້ເຄືອຂ່າຍອິນເຕີເນັດ, ຢືນຢັນຄວາມຮຽກຮ້ອງຕ້ອງມີການເຂົ້າຮ່ວມຂອງທຸກປະເທດໃນການປ້ອງກັນ, ຕ້ານອາດຊະຍາກຳທາງອິນເຕີແນັດ, ປະກອບສ່ວນຮັດແຄບຄວາມແຕກຕ່າງລະຫວ່າງກົດໝາຍຂອງບັນດາປະເທດ, ສ້າງກົນໄກຮ່ວມມືສະເພາະກິດ 24/7, ຜ່ານນັ້ນຊຸກຍູ້ການຮ່ວມມືດ້ານປ້ອງກັນອາດຊະຍາກຳຂ້າມຊາຍແດນຢ່າງມີປະສິດທິຜົນ, ພ້ອມທັງສ້າງຄວາມສະດວກໃຫ້ແກ່ຄວາມມານະພະຍາຍາມຫັນເປັນດີຈີຕອນຂອງປະເທດຊາດ.
ທີສອງ, ຜ່ານຂະບວນການເຈລະຈາຢ່າງມີປະຊາທິປະໄຕ ແລະກວມລວມ, ສົນທິສັນຍາບໍ່ພຽງແຕ່ສະແດງໃຫ້ເຫັນທັດສະນະ, ຜົນປະໂຫຍດຂອງບັນດາປະເທດພັດທະນາເທົ່ານັ້ນ, ຫາກຍັງສ່ອງແສງໃຫ້ເຫັນທັດສະນະ, ຜົນປະໂຫຍດຂອງບັນດາປະເທດພວມພັດທະນາຄືພວກເຮົາອີກດ້ວຍ. ສົນທິສັນຍາສະບັບດັ່ງກ່າວຍັງຮັບປະກັນຄວາມດຸ່ນດ່ຽງລະຫວ່າງສິດ ແລະພັນທະຂອງບັນດາປະເທດທັງໝົດ, ຊຸກຍູ້ການໜູນຊ່ວຍດ້ານເຕັກນິກ ແລະຍົກສູງກໍາລັງຄວາມສາມາດເພື່ອຜົນປະໂຫຍດລວມຂອງປະຊາຄົມສາກົນ.
ທີສາມ, ສົນທິສັນຍາ ໄດ້ຢືນຢັນບົດບາດໃຈກາງຂອງອົງການສະຫະປະຊາຊາດໃນການປະສານສົມທົບຄວາມມານະພະຍາຍາມລວມຂອງປະຊາຄົມສາກົນເພື່ອຮັບມືກັບອາດຊະຍາກຳທາງອິນເຕີແນັດ, ເປັນບັນຫາອັນຮີບດ່ວນໃນປະຈຸບັນ. ໃນສະພາບການພັດທະນາຂອງໂລກທີ່ສັບສົນ, ການແຂ່ງຂັນດ້ານຍຸດທະສາດຢ່າງເລິກເຊິ່ງ, ທັດສະນະ ແລະວິທີການເຂົ້າເຖິງກ່ຽວກັບບັນຫາອາດຊະຍາກຳທາງອິນເຕີແນັດ, ການຮັບຮອງເອົາສົນທິສັນຍາດ້ວຍຄວາມເຫັນດີເຫັນພ້ອມໃຫ້ປັບປຸງຄວາມໄວ້ເນື້ອເຊື່ອໃຈກ່ຽວກັບບົດບາດຂອງສະຫະປະຊາຊາດ ແລະບັນດາວິທີເຂົ້າເຖິງຫຼາຍຝ່າຍ ກໍ່ຄືສະແດງໃຫ້ເຫັນເຈດຕະນາດີ ແລະຄວາມປາດຖະໜາຢາກຊຸກຍູ້ການຮ່ວມມື, ການເຈລະຈາລະຫວ່າງບັນດາປະເທດຕໍ່ກັບບັນຫາສາກົນ. ການກຳເນີດຂອງສົນທິສັນຍາອາດຈະເປັນຕົວແບບໃຫ້ແກ່ຂອບເຂດສາກົນໃນອະນາຄົດກ່ຽວກັບເຕັກໂນໂລຢີດີຈີຕອນເຊັ່ນ ການຄຸ້ມຄອງປັນຍາທຽມ (AI).
ນັກຂ່າວ: ສະຫະປະຊາຊາດໄດ້ເລືອກເອົາປະເທດຫວຽດນາມ ເປັນເຈົ້າພາບຈັດພິທີລົງນາມໃນສົນທິສັນຍາສະຫະປະຊາຊາດກ່ຽວກັບການຕ້ານອາດຊະຍາກຳທາງອິນເຕີແນັດ. ທ່ານຕີລາຄາຄືແນວໃດກ່ຽວກັບເຫດການນີ້?
ທ່ານ ບຸ່ຍແທງເຊີນ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມ: ນັບແຕ່ທຳອິດ, ຫວຽດນາມ ໄດ້ເອົາໃຈໃສ່ ແລະສະໜັບສະໜູນການເລີ່ມເຈລະຈາກ່ຽວກັບສົນທິສັນຍາສະບັບນີ້ ແລະສືບຕໍ່ຢຶດໝັ້ນທັດສະນະຊຸກຍູ້ການສ້າງກອບນິຕິກໍາສາກົນກ່ຽວກັບເຄືອຂ່າຍອິນເຕີເນັດບົນພື້ນຖານຫຼັກການພື້ນຖານກົດໝາຍສາກົນ. ຕະຫຼອດ 8 ກອງປະຊຸມຂອງຄະນະກໍາມະການສະເພາະກິດ, ຫວຽດນາມ ຍາມໃດກໍ່ເຂົ້າຮ່ວມຢ່າງຕັ້ງໜ້າ, ເປັນເຈົ້າການ ແລະມີການປະກອບສ່ວນຢ່າງແທດຈິງເຂົ້າໃນເນື້ອໃນຂອງສົນທິສັນຍາ.
ອາດເວົ້າໄດ້ວ່າ ດ້ວຍຈິດໃຈທີ່ມີເຈດຕະນາດີ, ມີລັກສະນະສ້າງສັນ, ພ້ອມແລ້ວທີ່ຈະຮັບຟັງ ແລະແບ່ງປັນທັດສະນະ, ຫວຽດນາມ ໄດ້ຮັບຄວາມໄວ້ເນື້ອເຊື່ອໃຈ ແລະຕີລາຄາສູງຈາກ ສປຊ ແລະບັນດາປະເທດຄູ່ຮ່ວມມືໃນຂະບວນການທັງໝົດ. ສະນັ້ນ, ເມື່ອສະເໜີເຂົ້າເປັນປະເທດເຈົ້າພາບຈັດຕັ້ງພິທີລົງນາມສົນທິສັນຍາຄັ້ງປະຫວັດສາດປີ 2025 ນີ້, ພວກເຮົາໄດ້ຮັບການສະໜັບສະໜູນຢ່າງຕັ້ງໜ້າ, ກວ້າງຂວາງຈາກເພື່ອນມິດສາກົນ. ປະຈຸບັນ, ກະຊວງການຕ່າງປະເທດ ພວມສົມທົບກັບກະຊວງຕຳຫຼວດ, ອົງການເປັນເຈົ້າພາບຈັດຕັ້ງພິທີລົງນາມສົນທິສັນຍາ ຕັ້ງໜ້າສົມທົບກັບອົງການສະຫະປະຊາຊາດ ເພື່ອຈັດຕັ້ງເຫດການສຳຄັນນີ້.
ນີ້ຈະແມ່ນຄັ້ງທຳອິດທີ່ ຫວຽດນາມ ເປັນເຈົ້າພາບຈັດຕັ້ງພິທີລົງນາມສົນທິສັນຍາຂອງສະຫະປະຊາຊາດ, ແມ່ນຂີດໝາຍໃໝ່ໃນການເຊື່ອມໂຍງດ້ານນິຕິກໍາສາກົນເວົ້າສະເພາະ ແລະການພົວພັນຕ່າງປະເທດຫຼາຍຝ່າຍຂອງຫວຽດນາມ ເວົ້າລວມ. ເຫດການທີ່ສໍາຄັນນີ້ສາມາດຕີລາຄາຈາກສາມແງ່ມູມ.
ທີໜຶ່ງ, ເລື່ອງຫວຽດນາມ ເປັນເຈົ້າການສະເໜີເປັນເຈົ້າພາບຈັດຕັ້ງພິທີລົງນາມອີກເທື່ອໜຶ່ງ ໄດ້ຢັ້ງຢືນຄຳໝັ້ນສັນຍາອັນແຂງແຮງຂອງພັກ ແລະລັດ ໃນການຮ່ວມມືສາກົນປ້ອງກັນ, ຕ້ານອາດຊະຍາກຳຂ້າມຊາດ, ຍົກສູງສະຕິຄວາມຮັບຮູ້ ແລະກໍາລັງຄວາມສາມາດຕ້ານອາດຊະຍາກຳທາງອິນເຕີເນັດຂອງປະຊາຊົນ, ປະກອບສ່ວນຮັບປະກັນຄວາມເປັນລະບຽບຮຽບຮ້ອຍ, ຄວາມປອດໄພຂອງສັງຄົມ, ສ້າງສະພາບແວດລ້ອມແຫ່ງການດຳເນີນທຸລະກິດທີ່ໝັ້ນຄົງ, ປອດໄພ, ຊຸກຍູ້ການພັດທະນາເສດຖະກິດ, ສັງຄົມ.
ທີສອງ, ວຽກນີ້ກໍ່ຢືນຢັນຫຼັກໝັ້ນທີ່ສະເໝີຕົ້ນສະເໝີປາຍຂອງຫວຽດນາມ ໃນການຍົກສູງກົດໝາຍສາກົນ, ແຜນນະໂຍບາຍເປັນເຈົ້າການເຂົ້າຮ່ວມ, ປະກອບສ່ວນຢ່າງຕັ້ງໜ້າເຂົ້າໃນວຽກງານລວມຂອງສະຫະປະຊາຊາດ ເພື່ອແກ້ໄຂບັນດາບັນຫາທີ່ມີລັກສະນະທົ່ວໂລກ, ໃນນັ້ນ ອາດຊະຍາກຳຍາມໃດກໍ່ແມ່ນໄພຂົ່ມຂູ່ຕໍ່ຄວາມໝັ້ນຄົງ, ເສດຖະກິດ ແລະສະຖຽນລະພາບສັງຄົມຂອງບັນດາປະເທດໃນໂລກ, ໂດຍສະເພາະແມ່ນໃນພາກພື້ນອາຊີ - ປາຊີຟິກ.
ສຸດທ້າຍ, ດ້ວຍເລື່ອງບັນດາສະມາຊິກສະຫະປະຊາຊາດໄດ້ເຫັນດີເປັນເອກະພາບເລືອກເອົາ ຮ່າໂນ້ຍ ເປັນສະຖານທີ່ຈັດຕັ້ງພິທີລົງນາມສົນທິສັນຍາ, ນັບແຕ່ນີ້ໄປຮ່າໂນ້ຍ ຈະຕິດພັນກັບເອກະສານນິຕິກຳສາກົນທີ່ສຳຄັນນີ້ໄປຕະຫຼອດເພື່ອແກ້ໄຂໜຶ່ງໃນບັນດາສິ່ງທ້າທາຍໃນສະຕະວັດທີ 21. ນີ້ແມ່ນພື້ນຖານເພື່ອໃຫ້ຫວຽດນາມ ສືບຕໍ່ປະກອບສ່ວນຢ່າງຕັ້ງໜ້າເຂົ້າໃນການປະຕິບັດສົນທິສັນຍາ, ປະກອບສ່ວນສ້າງກອບການຄຸ້ມຄອງເຄືອຂ່າຍອິນເຕີແນັດທົ່ວໂລກເພື່ອອະນາຄົດແຫ່ງດີຈີຕອນທີ່ປອດໄພ, ຮ່ວມມື ແລະກວມລວມໃນໄລຍະຈະມາເຖິງ. ສິ່ງນີ້ມີຄວາມໝາຍສຳຄັນທີ່ສຸດເມື່ອຫຼາຍປະເທດ, ໃນນັ້ນມີຫວຽດນາມ ພວມຊຸກຍູ້ການຫັນເປັນດີຈີຕອນຕິດພັນກັບການຮັບປະກັນຄວາມໝັ້ນຄົງ, ປອດໄພເພື່ອບຸກທະລຸໃນສັງກາດໃໝ່.
ນັກຂ່າວ: ຂໍຂອບໃຈທ່ານຮອງນາຍົກລັດຖະມົນຕີ, ລັດຖະມົນຕີ ກະຊວງການຕ່າງປະເທດຫວຽດນາມ.
ໂດຍ: ຈາງຫງວຽນ