ຫວຽດນາມ - ລາວ ຊຸກຍູ້ການຮ່ວມມືດ້ານການຄ້າ, ອຸດສາຫະກຳ ແລະພະລັງງານ

ທີ່ການເຮັດວຽກ, ທ່ານ ຫງວຽນຮົ່ງຢຽນ ຢືນຢັນວ່າ ສະຖານທູດລາວ ປະຈຳ ຫວຽດນາມ ໄດ້ ແລະພວມສວມບົດບາດສຳຄັນ, ເປັນຂົວເຊື່ອມຕໍ່ພື້ນຖານເສດຖະກິດຂອງສອງປະເທດຫວຽດນາມ-ລາວ; ປະກອບສ່ວນຢ່າງຕັ້ງໜ້າເຂົ້າໃນສາຍພົວພັນສະໜິດຕິດແໜ້ນລະຫວ່າງສອງປະເທດ.

ທ່ານ ຫງວຽນຮົ່ງຢຽນ ຕີລາຄາສູງໝາກຜົນອັນພົ້ນເດັ່ນໃນການພົວພັນດ້ານການຄ້າຫວຽດນາມ - ລາວ ໃນປີ 2024 ດ້ວຍວົງເງິນການຄ້າສອງຝ່າຍຄາດຄະເນບັນລຸ 2,2 ຕື້ USD, ເພີ່ມຂຶ້ນປະມານ 34% ເມື່ອທຽບໃສ່ປີກາຍ. ພິເສດ, ນີ້ແມ່ນຄັ້ງທຳອິດທີ່ວົງເງິນການຄ້າລະຫວ່າງສອງປະເທດບັນລຸກວ່າ 2 ຕື້ USD, ລື່ນກາຍຄາດໝາຍທີ່ລັດຖະບານສອງປະເທດໄດ້ວາງອອກ ແລະເປັນພະຍານຫຼັກຖານຢ່າງຈະແຈ້ງສະແດງໃຫ້ເຫັນຜົນແຫ່ງຄວາມມານະພະຍາຍາມຢ່າງບໍ່ຢຸດຢັ້ງຂອງລັດຖະບານ, ບັນດາອົງການທີ່ກ່ຽວຂ້ອງ ແລະວິສາຫະກິດຂອງສອງປະເທດ.

ບັນຍາກາດທີ່ການເຮັດວຽກ. ພາບ: congthuong.vn

ທ່ານ ຫງວຽນຮົ່ງຢຽນ ເນັ້ນໜັກວ່າ ກະຊວງອຸດສາຫະກຳ ແລະການຄ້າຫວຽດນາມ ແລະກະຊວງອຸດສາຫະກຳ ແລະການຄ້າລາວ ໄດ້ສຳເລັດລະບຽບການເພື່ອລາຍງານຕໍ່ລັດຖະບານ ອະນຸມັດຜ່ານສັນຍາການຄ້າຫວຽດນາມ-ລາວ ສະບັບໃໝ່ (ລົງໃນວັນທີ 8 ເມສາ ປີ 2024) ແລະພ້ອມແລ້ວທີ່ຈະປະຕິບັດ.

ທ່ານ ຫງວຽນຮົ່ງຢຽນ   ສະເໜີໃຫ້ທ່ານນາງ ຄໍາເພົາ ເອີນທະວັນ ຊ່ວຍແລກປ່ຽນກັບບັນດາອົງການກ່ຽວຂ້ອງຂອງລາວ ເພື່ອປະຕິບັດສໍາເລັດລະບຽບການພາຍໃນທີ່ຈຳເປັນໂດຍໄວ; ພ້ອມທັງແຈ້ງຂ່າວ ແລະຢັ້ງຢືນກັບຝ່າຍຫວຽດນາມ ກ່ຽວກັບວັນທີ່ມີຜົນສັກສິດຢ່າງເປັນທາງການໂດຍໄວ ເພື່ອປະຕິບັດສັນຍາ, ບູລິມະສິດຕາມມາດຕາທີ່ໄດ້ກຳນົດໂດຍໄວ.

ທ່ານ ຫງວຽນຮົ່ງຢຽນ ລັດຖະມົນຕີກະຊວງອຸດສາຫະກໍາ ແລະການຄ້າຫວຽດນາມ ແລະທ່ານນາງ ຄໍາເພົາ ເອີນທະວັນ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ຫວຽດນາມ. ພາບ: congthuong.vn

ກ່ຽວກັບການຮ່ວມມືໃນຂົງເຂດພະລັງງານ ແລະແຮ່ທາດ, ຕາມທ່ານ ຫງວຽນຮົ່ງຢຽນ ແລ້ວ, ບົດບາດຫຼັກແຫຼ່ງຂອງສອງເສົາຄ້ຳດັ່ງກ່າວ ໃນການພົວພັນດ້ານເສດຖະກິດ ຫວຽດນາມ - ລາວ. ການຮ່ວມມືດ້ານການຄ້າຖ່ານຫີນ ແລະໄຟຟ້າລະຫວ່າງຫວຽດນາມ-ລາວ ໃນປີ 2024 ບັນລຸໄດ້ໝາກຜົນດີທີ່ສຸດ. ການນຳເຂົ້າໄຟຟ້າ ແລະຖ່ານຫີນຈາກລາວ ບໍ່ພຽງແຕ່ແນໃສ່ຕອບສະໜອງຄວາມຕ້ອງການພັດທະນາເສດຖະກິດ-ສັງຄົມຂອງ ຫວຽດນາມ ເທົ່ານັ້ນ ຫາກຍັງຊ່ວຍຂຸດຄົ້ນຄວາມສາມາດສະໜອງຂອງລາວ, ຜ່ານນັ້ນປະກອບສ່ວນຊຸກຍູ້ການພັດທະນາເສດຖະກິດ-ສັງຄົມ ຂອງປະເທດເພື່ອນລາວ.

ທີ່ການເຮັດວຽກ, ທ່ານນາງ ຄໍາເພົາ ເອີນທະວັນ ໄດ້ສະແດງຄວາມເຫັນດີເປັນເອກະພາບຕໍ່ຄໍາເຫັນຂອງທ່ານ ຫງວຽນຮົ່ງຢຽນ ກ່ຽວກັບບັນດາຜົນງານທີ່ໜ້າປະທັບໃຈ ເຊິ່ງສອງປະເທດບັນລຸໄດ້ໃນໄລຍະຜ່ານມາ. ສະຖານທູດລາວ ປະຈຳຫວຽດນາມ ແລະກະຊວງອຸດສາຫະກຳ ແລະການຄ້າຫວຽດນາມ ໄດ້ສົມທົບກັນຢ່າງແໜ້ນແຟ້ນ,  ຕັ້ງໜ້າເຂົ້າຮ່ວມຜັນຂະຫຍາຍການເຄື່ອນໄຫວຮ່ວມມືສອງຝ່າຍຂອງພັກ, ລັດ ແລະ ລັດຖະບານສອງປະເທດ. ບັນດາຄວາມມານະພະຍາຍາມດັ່ງກ່າວ ໄດ້ປະກອບສ່ວນສຳຄັນເຂົ້າໃນການປັບປຸງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານຫວຽດນາມ - ລາວ.

ໂດຍ: ທູຈາງ