ປະກອບສ່ວນປັບປຸງການພົວພັນມິດຕະພາບ, ຄວາມສາມັກຄີພິເສດ ຫວຽດນາມ-ລາວ
ກປ.ອອນໄລ - ໃນຂອບເຂດການຢ້ຽມຢາມ ແລະເຮັດວຽກຢູ່ ລາວ ແຕ່ວັນທີ 23 ຫາວັນທີ 24 ທັນວາ ຂອງຄະນະຜູ້ແທນສະຫະພັນບັນດາອົງການຈັດຕັ້ງມິດຕະພາບຫວຽດນາມ ນໍາໂດຍ ສະຫາຍ ຟານແອັງເຊີນ ປະທານສະຫະພັນບັນດາອົງການຈັດຕັ້ງມິດຕະພາບຫວຽດນາມ, ຕອນບ່າຍວັນທີ 24 ທັນວາ ຢູ່ນະຄອນຫຼວງວຽງຈັນ, ສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກປະຊາຊົນປະຕິວັດ ລາວ, ຮອງປະທານປະເທດ ລາວ ແລະສະຫາຍ ບຸນເຫຼືອ ພັນດານຸວົງ ຮັກສາການຫົວໜ້າຄະນະພົວພັນຕ່າງປະເທດສູນກາງພັກປະຊາຊົນ ປະຕິວັດ ລາວ ໄດ້ຕ້ອນຮັບຄະນະ ຕາມລໍາດັບ.
ທີ່ບັນດາການຕ້ອນຮັບ, ສະຫາຍ ບຸນທອງ ຈິດມະນີ ແລະສະຫາຍ ບຸນເຫຼືອ ພັນດານຸວົງ ຊົມເຊີຍ ແລະຕີລາຄາສູງການຢ້ຽມຢາມ ແລະເຮັດວຽກຂອງຄະນະໃນຄັ້ງນີ້; ຢັ້ງຢືນວ່າ ການຢ້ຽມຢາມຈະປະກອບສ່ວນຮັດແໜ້ນກວ່າອີກການພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດ ແລະປະຊາຊົນສອງປະເທດ ລາວ-ຫວຽດນາມ.
    |
 |
|
ສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກປະຊາຊົນປະຕິວັດ ລາວ, ຮອງປະທານປະເທດ ລາວ ຕ້ອນຮັບຄະນະຜູ້ແທນສະຫະພັນບັນດາອົງການຈັດຕັ້ງມິດຕະພາບຫວຽດນາມ. ພາບ: ສໍານັກຂ່າວສານຫວຽດນາມ. |
ນອກຈາກນີ້, ບັນດາສະຫາຍການນໍາ ລາວ ກໍຕີລາຄາສູງບົດບາດຂອງສະຫະພັນບັນດາອົງການຈັດຕັ້ງມິດຕະພາບຫວຽດນາມ ໃນການສ້າງຕັ້ງການພົວພັນ, ເຊື່ອມຕໍ່ຄູ່ຮ່ວມມືພາຍໃນ ແລະຕ່າງປະເທດ, ທຸກພາກສ່ວນສັງຄົມ ເພື່ອແນໃສ່ລະດົມທຸກແຫຼ່ງກໍາລັງຮັບໃຊ້ການພັດທະນາເສດຖະກິດ-ສັງຄົມຂອງຫວຽດນາມ ຢ່າງມີປະສິດທິຜົນ.
ສະຫາຍ ຟານແອັງເຊີນ ຂອບໃຈບັນດາສະຫາຍການນໍາ ລາວ ໄດ້ສະຫຼະເວລາຕ້ອນຮັບຄະນະ; ພ້ອມທັງໃຫ້ຮູ້ວ່າ ຈຸດປະສົງການຢ້ຽມຢາມ ແລະເຮັດວຽກຂອງຄະນະໃນຄັ້ງນີ້ແມ່ນເພື່ອແລກປ່ຽນ, ແບ່ງປັນຂໍ້ມູນຂ່າວສານກ່ຽວກັບການປະກອບສ່ວນກໍ່ສ້າງພື້ນຖານສັງຄົມທີ່ຕັ້ງໜ້າ, ສະດວກ; ຊຸກຍູ້ສັນຕິພາບ ແລະພັດທະນາແບບຍືນຍົງຂອງຫວຽດນາມ ແລະໃນໂລກ ຜ່ານການເຄື່ອນໄຫວພົບປະແລກປ່ຽນມິດຕະພາບ, ການຮ່ວມມືປະຊາຊົນ ແລະວຽກງານທີ່ບໍ່ຂຶ້ນກັບລັດຖະບານຕ່າງປະເທດ; ພ້ອມທັງລາຍງານບາງເນື້ອໃນທີ່ການພົບປະໂອ້ລົມກ່ຽວກັບນະໂຍບາຍການຕ່າງປະເທດ, ການທູດຕົ້ນໄມ້ໄຜ່ຫວຽດນາມ ຈາກແງ່ມຸມການທູດປະຊາຊົນກັບພະນັກງານບັນດາອົງການຫຼັກແຫຼ່ງຂອງລາວ.
|
|
 |
|
ສະຫາຍ ບຸນເຫຼືອ ພັນດານຸວົງ ຮັກສາການຫົວໜ້າຄະນະພົວພັນຕ່າງປະເທດສູນກາງພັກປະຊາຊົນປະຕິວັດລາວ ຕ້ອນຮັບຄະນະຜູ້ແທນສະຫະພັນບັນດາອົງການຈັດຕັ້ງມິດຕະພາບຫວຽດນາມ. ພາບ: ສໍານັກຂ່າວສານຫວຽດນາມ. |
ກ່ອນໜ້ານັ້ນ, ທີ່ສໍານັກງານຄະນະໂຄສະນາອົບຮົມສູນກາງພັກປະຊາຊົນ ປະຕິວັດ ລາວ, ຄະນະຜູ້ແທນສະຫະພັນບັນດາອົງການຈັດຕັ້ງມິດຕະພາບຫວຽດນາມ ໄດ້ມີການແບ່ງປັນບົດຮຽນກັບພະນັກງານຫຼັກແຫຼ່ງຂອງລາວ ກ່ຽວກັບນະໂຍບາຍຕ່າງປະເທດ, ການທູດຕົ້ນໄມ້ໄຜ່ຫວຽດນາມ ໃນແງ່ມຸມການທູດປະຊາຊົນ.
ກ່ອນໜ້ານັ້ນ, ຕອນບ່າຍວັນທີ 23 ທັນວາ, ຄະນະຜູ້ແທນສະຫະພັນບັນດາອົງການຈັດຕັ້ງມິດຕະພາບຫວຽດນາມ ນໍາໂດຍ ສະຫາຍ ຟານແອັງເຊີນ ໄດ້ພົບປະ ແລະແລກປ່ຽນກັບສະຫາຍ ສົມມາດ ພົນເສນາ ຮອງປະທານສະພາແຫ່ງຊາດ, ປະທານຄະນະສັນຕິພາບ ແລະສາມັກຄີ ລາວ.
ທີ່ການພົບປະ, ສອງຝ່າຍ ໄດ້ພ້ອມກັນແລກປ່ຽນບົດຮຽນ ກ່ຽວກັບການເຄື່ອນໄຫວການທູດປະຊາຊົນ; ພ້ອມທັງຕີລາຄາສູງການທູດປະຊາຊົນມີບົດບາດສໍາຄັນໃນປັດຈຸບັນ. ນອກຈາກນີ້, ສອງຝ່າຍ ຍັງໄດ້ແລກປ່ຽນບົດຮຽນໃນການຄຸ້ມຄອງບັນດາອົງການຈັດຕັ້ງສາກົນທີ່ບໍ່ຂຶ້ນກັບລັດຖະບານ ແລະບັນດາອົງການຈັດຕັ້ງສັງຄົມ, ຕີລາຄາສູງການປະກອບສ່ວນຂອງບັນດາອົງການຈັດຕັ້ງນີ້ໃນຖານະເປັນຄູ່ຮ່ວມມື ເພື່ອພັດທະນາຢູ່ ລາວ.
ໂດຍ: ກວຽດເຕິມ