ວິສາຫະກິດນະຄອນໂຮ່ຈີມິນ ເອົາໃຈໃສ່ຕະຫຼາດລາວ

ບັນຍາກາດທີ່ເວທີປາໄສ. ພາບ: ດິ່ງຢື

ຈຸດປະສົງໃນການຈັດເວທີປາໄສຄັ້ງນີ້ແມ່ນແນໃສ່ແນະນຳຄວາມສາມາດບົ່ມຊ້ອນ, ທ່າໄດ້ປຽບ, ສະພາບແວດລ້ອມແຫ່ງການລົງທຶນ, ນະໂຍບາຍດຶງດູດການລົງທຶນລະຫວ່າງບັນດາທ້ອງຖິ່ນຂອງລາວ ກັບນະຄອນໂຮ່ຈີມິນ ກໍ່ຄືກົງກັນຂ້າມ, ພ້ອມທັງເພີ່ມທະວີການເຊື່ອມຕໍ່ແລກປ່ຽນການຄ້າລະຫວ່າງວິສາຫະກິດຫວຽດນາມ ແລະລາວ ໃຫ້ນັບມື້ນັບແທດຈິງ ແລະເຂົ້າສູ່ລວງເລິກ.

ທ່ານ ຫວໍວັນຮວານ ຮອງປະທານຄະນະກຳມະການປະຊາຊົນນະຄອນໂຮ່ຈີມິນ ກ່າວຄຳເຫັນ. ພາບ: ດິ່ງຢື

ກ່າວຄຳເຫັນທີ່ເວທີປາໄສ, ທ່ານ ຫວໍວັນຮວານ ຮອງປະທານຄະນະກຳມະການປະຊາຊົນນະຄອນໂຮ່ຈີມິນ ຢືນຢັນວ່າ ນະຄອນໂຮ່ຈີມິນ ຍາມໃດກໍ່ໃຫ້ບຸລິມະສິດຮັດແໜ້ນການພົວພັນກັບບັນດາທ້ອງຖິ່ນຂອງລາວ ແລະໃນສະພາບການຕົວຈິງນະຄອນໂຮ່ຈີມິນ ກໍ່ໄດ້ມີການພົວພັນມິດຕະພາບ, ຮ່ວມມືກ່ຽວກັບການພັດທະນາເສດຖະກິດ-ສັງຄົມກັບຫຼາຍທ້ອງຖິ່ນຂອງລາວ.

ເວທີປາໄສຄັ້ງນີ້ແມ່ນພະຍານຫຼັກຖານທີ່ຈະແຈ້ງໃຫ້ແກ່ຄວາມມານະພະຍາຍາມຊຸກຍູ້ການພົວພັນດ້ານເສດຖະກິດ ແລະການຄ້າລະຫວ່າງຫວຽດນາມ-ລາວ ເວົ້າລວມ ກໍ່ຄືລະຫວ່າງນະຄອນໂຮ່ຈີມິນ ກັບບັນດາທ້ອງຖິ່ນຂອງລາວ ເວົ້າສະເພາະ. ທ່ານ ຫວໍວັນຮວານ ເຊື່ອໝັ້ນວ່າ: “ເວທີປາໄສຈະປະກອບສ່ວນນຳເອົາຫຼາຍກາລະໂອກາດຮ່ວມມືໃໝ່ມາໃຫ້ ແລະຊ່ວຍບັນດາວິສາຫະກິດຫວຽດນາມ ແລະລາວ, ໃນນັ້ນມີວິສາຫະກິດນະຄອນໂຮ່ຈີມິນ ຂຸດຄົ້ນຄວາມສາມາດບົ່ມຊ້ອນຢ່າງສຸດຂີດ ກໍ່ຄືເພີ່ມທະວີການລົງທຶນ, ພົບປະແລກປ່ຽນດ້ານເສດຖະກິດ, ວັດທະນະທຳ ແລະວິທະຍາສາດເຕັກໂນໂລຢີກັບວິສາຫະກິດລາວ”.

ທ່ານ ວັນສີ ກົວມົວ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວລາວ ກ່າວຄຳເຫັນ. ພາບ: ດິ່ງຢື

ທີ່ເວທີປາໄສ, ທ່ານ ວັນສີ ກົວມົວ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວລາວ ແບ່ງປັນວ່າ: “ຂ້າພະເຈົ້າ ຖືວ່າ ເວທີປາໄສຄັ້ງນີ້ແມ່ນໂອກາດອັນລໍ້າຄ່າ ເພື່ອໃຫ້ບັນດາວິສາຫະກິດ, ນັກລົງທຶນລາວ ແລະຫວຽດນາມ ໄດ້ພົບປະ, ແລກປ່ຽນການຄ້າ ແລະການລົງທຶນນັບມື້ນັບແທດຈິງ ແລະມີປະສິດທິຜົນໃນໄລຍະຈະມາເຖິງ”.

ໃນໄລຍະຈະມາເຖິງ, ສອງຝ່າຍຈະສືບຕໍ່ຜັນຂະຫຍາຍບົດບັນທຶກຊ່ວຍຈໍາຮ່ວມມືລະຫວ່າງນະຄອນໂຮ່ຈີມິນ ແລະທ້ອງຖິ່ນຂອງລາວ ໄລຍະ 2022-2025 ຢ່າງຮອບດ້ານໃນທຸກຂົງເຂດ ແນໃສ່ເສີມຂະຫຍາຍທ່າແຮງຂອງກັນ.

ໂດຍ: ເຈິ່ນຮວ່ຽນ