ຫວຽດນາມ ປະດັບຫຼຽນໄຊ, ຫຼຽນກາໃຫ້ແກ່ໝູ່ຄະນະ, ບຸກຄົນຂອງຫ້ອງວ່າການປະທານປະເທດລາວ

ນີ້ແມ່ນລາງວັນອັນສູງສົ່ງຂອງພັກ, ລັດຫວຽດນາມ ທີ່ມອບໃຫ້ແກ່ໝູ່ຄະນະ, ບຸກຄົນສັງກັດຫ້ອງວ່າການປະທານປະເທດລາວ ທີ່ມີຫຼາຍຜົນງານດີເລີດໃນການປັບປຸງ, ເພີ່ມທະວີການພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານຫວຽດນາມ-ລາວ.

ທ່ານນາງ ເຂັມມະນີ ພົນເສນາ ຫົວໜ້າຫ້ອງວ່າການປະທານປະເທດລາວ ຮັບຫຼຽນໄຊເອກະລາດ ຊັ້ນ 1 ຂອງພັກ, ລັດຫວຽດນາມ. ພາບ: ສໍານັກຂ່າວຫວຽດນາມ

ໂດຍໄດ້ຮັບການມອບສິດຈາກປະທານປະເທດແຫ່ງ ສສ ຫວຽດນາມ ແລະຫົວໜ້າຫ້ອງວ່າການປະທານປະເທດຫວຽດນາມ, ທ່ານ ຫງວຽນມິງເຕິມ ເອກອັກຄະລັດຖະທູດຫວຽດນາມ ປະຈໍາ ລາວ ໄດ້ປະດັບຫຼຽນໄຊເອກະລາດ ຊັ້ນ 1 ໃຫ້ແກ່ໝູ່ຄະນະຫ້ອງວ່າການປະທານປະເທດລາວ; ຫຼຽນໄຊເອກະລາດ ຊັ້ນ 2 ໃຫ້ແກ່ບັນດາສະຫາຍອະດີດຫົວໜ້າຫ້ອງວ່າການປະທານປະເທດລາວ; ຫຼຽນໄຊເອກະລາດ ຊັ້ນ 3 ໃຫ້ບັນດາສະຫາຍຮອງຫົວໜ້າ ແລະອະດີດຮອງຫົວໜ້າຫ້ອງວ່າການປະທານປະເທດລາວ; ຫຼຽນໄຊ ແລະຫຼຽນກາມິດຕະພາບໃຫ້ແກ່ບັນດາສະຫາຍການນໍາຂັ້ນກົມຂອງຫ້ອງວ່າການປະທານປະເທດລາວ.

ກ່າວຄໍາເຫັນທີ່ພິທີ, ທ່ານ ຫງວຽນມິງເຕິມ ຊົມເຊີຍບັນດາໝູ່ຄະນະ, ບຸກຄົນຂອງຫ້ອງວ່າການປະທານປະເທດລາວ ທີ່ໄດ້ຮັບຫຼຽນໄຊ, ຫຼຽນກາຂອງປະທານປະເທດຫວຽດນາມ; ເນັ້ນໜັກວ່າມູນເຊື້ອຄວາມສາມັກຄີແບບພິເສດຫວຽດນາມ-ລາວ ໂດຍປະທານໂຮ່ຈີມິນ ຜູ້ຍິ່ງໃຫຍ່, ປະທານ ໄກສອນ ພົມວິຫານ ແລະປະທານ ສຸພານຸວົງ ທີ່ແສນເຄົາລົບຮັກໄດ້ກໍ່ຕັ້ງ, ສ້າງພື້ນຖານ, ບັນດາລຸ້ນການນໍາສອງພັກ, ສອງລັດ ແລະປະຊາຊົນສອງປະເທດໄດ້ເພີ່ມພູນຄູນສ້າງ.

ທ່ານ ຫງວຽນມິງເຕິມ ເອກອັກຄະລັດຖະທູດຫວຽດນາມ ປະຈໍາ ລາວ ມອບຫຼຽນເອກະລາດ ຊັ້ນ 1 ໃຫ້ແກ່ໝູ່ຄະນະຫ້ອງວ່າການປະທານປະເທດລາວ.

ຕາງໜ້າຄະນະພັກ, ການນໍາ, ພະນັກງານຂອງຫ້ອງວ່າການປະທານປະເທດ ລາວ ທີ່ໄດ້ຮັບຫຼຽນໄຊ, ຫຼຽນກາຢູ່ພິທີ, ທ່ານນາງ ເຂັມມະນີ ພົນເສນາ ກໍາມະການສູນກາງພັກ, ຫົວໜ້າຫ້ອງວ່າການປະທານປະເທດລາວ ສະແດງຄວາມຮູ້ບຸນຄຸນຢ່າງເລິກເຊິ່ງມາຍັງການນໍາພັກ, ລັດຫວຽດນາມ ອ້າຍນ້ອງ ເວົ້າລວມ ແລະຫ້ອງວ່າການປະທານປະເທດຫວຽດນາມ ເວົ້າສະເພາະ, ຖືເປັນສໍາຄັນ ແລະເປັນເຈົ້າການສະເໜີ, ຊຸກຍູ້ການປະດັບຫຼຽນໄຊເອກະລາດ ແລະຫຼຽນໄຊ, ຫຼຽນກາມິດຕະພາບຂອງປະທານປະເທດຫວຽດນາມ ໃຫ້ແກ່ໝູ່ຄະນະ, ບຸກຄົນຂອງຫ້ອງວ່າການປະທານປະເທດລາວ.

ທ່ານນາງ ເຂັມມະນີ ພົນເສນາ ຢືນຢັນວ່າ ຫ້ອງວ່າການປະທານປະເທດລາວ ຈະປະຕິບັດຂໍ້ຕົກລົງຮ່ວມມືທີ່ໄດ້ລົງນາມເມື່ອປີ 2020 ຢ່າງມີປະສິດທິຜົນ; ສະແດງຄວາມຂອບໃຈທີ່ຈິງໃຈມາຍັງທ່ານ ຫງວຽນມິງເຕິມ ເອກອັກຄະລັດຖະທູດ ພ້ອມດ້ວຍການນໍາ, ພະນັກງານ, ພາລະກອນສະຖານທູດຫວຽດນາມ ປະຈໍາ ລາວ ທີ່ໄດ້ຈັດຕັ້ງພິທີປະດັບຫຼຽນໄຊ, ຫຼຽນກາຢ່າງສົມກຽດ, ອົບອຸ່ນ, ສະແດງໃຫ້ເຫັນນ້ຳໃຈສາມັກຄີ, ສະໜິດຕິດພັນລະຫວ່າງຫ້ອງວ່າການປະທານປະເທດລາວ ແລະສະຖານທູດຫວຽດນາມ ປະຈໍາລາວ.

ໂດຍ: ໄຊນີດາ