ການນຳແຂວງແຄ໊ງຮ່ວາ ເຮັດວຽກກັບການນຳແຂວງອັດຕະປື, ແຂວງຈຳປາສັກ ແລະນະຄອນຫຼວງວຽງຈັນ

ທີ່ການເຮັດວຽກ, ສະຫາຍ ເລຮື້ວຮ່ວາງ  ຢືນຢັນວ່າ ໃນໄລຍະຜ່ານມາ, ການພົວພັນມິດຕະພາບ, ການຮ່ວມມືລະຫວ່າງແຂວງແຄ໊ງຮ່ວາ ແລະບັນດາທ້ອງຖິ່ນຂອງລາວ ຍາມໃດກໍ່ໄດ້ຮັບການຮັກສາ, ເພີ່ມພູນຄູນສ້າງ, ເສີມຂະຫຍາຍຢ່າງດີງາມ ແລະນັບມື້ນັບໄດ້ຮັບການເປີດກວ້າງໃນຫຼາຍຂົງເຂດ, ນຳມາເຊິ່ງປະສິດທິຜົນຢ່າງແທດຈິງ.

ສະຫາຍ ເລຮື້ວຮ່ວາງ  (ເຄິ່ງກາງ) ຖ່າຍຮູບເປັນທີ່ລະນຶກກັບການນຳແຂວງອັດຕະປື, ແຂວງຈຳປາສັກ, ນະຄອນຫຼວງວຽງຈັນ. ພາບ: baokhanhhoa.vn

ເນື່ອງໃນໂອກາດນີ້, ສະຫາຍ ເລຮື້ວຮ່ວາງ  ກໍ່ປາດຖະໜາວ່າ ໃນໄລຍະຈະມາເຖິງ, ແຂວງແຄ໊ງຮ່ວາ ແລະແຂວງອັດຕະປື, ແຂວງຈຳປາສັກ, ນະຄອນຫຼວງວຽງຈັນ ຈະສືບຕໍ່ຮັກສາບັນດາການເຄື່ອນໄຫວພົບປະແລກປ່ຽນວັດທະນະທຳ, ພົບປະແລກປ່ຽນປະຊາຊົນ, ພິເສດແມ່ນບັນດາການເຄື່ອນໄຫວຂອງຊາວໜຸ່ມຢູ່ທ້ອງຖິ່ນຕ່າງໆ; ຊຸກຍູ້ການຮ່ວມມືດ້ານເສດຖະກິດລະຫວ່າງແຂວງແຄ໊ງຮ່ວາ ແລະລາວ. ສະນັ້ນ, ການນຳແຂວງ ຫວັງວ່າ ບັນດາຄະນະຈະໜູນຊ່ວຍ, ສ້າງເງື່ອນໄຂສະດວກເພື່ອໃຫ້ບັນດາສ່ວນບຸກຄົນ, ອົງການຈັດຕັ້ງ, ວິສາຫະກິດຂອງແຂວງແຄ໊ງຮ່ວາ ໄດ້ກວດກາຄືນ, ຊອກຫາກາລະໂອກາດຮ່ວມມື ກໍ່ຄືເປີດກວ້າງການເຄື່ອນໄຫວຢູ່ລາວ, ນຳເອົາຜົນປະໂຫຍດທີ່ແທດຈິງມາໃຫ້ປະຊາຊົນສອງຝ່າຍ.

ການນຳ 3 ທ້ອງຖິ່ນຂອງລາວ ກໍ່ສະແດງຄວາມປິຕິຊົມຊື່ນທີ່ໄດ້ເຂົ້າຮ່ວມງານບຸນທະເລ ຍາຈາງ - ແຄ໊ງຮ່ວາ 2023. ຄຽງຂ້າງນັ້ນ, ກໍ່ປາດຖະໜາຢາກສືບຕໍ່ເພີ່ມທະວີການພົວພັນຮ່ວມມືມິດຕະພາບລະຫວ່າງບັນດາທ້ອງຖິ່ນກັບແຂວງແຄ໊ງຮ່ວາ. ໃນນັ້ນ, ແມ່ນສຸມໃສ່ບັນດາຂົງເຂດຄື: ພັດທະນາກະສິກຳເຕັກໂນໂລຊີສູງ; ຖ່າຍທອດເຕັກໂນໂລຊີເຕັກນິກການລ້ຽງຮັງນົກແອ່ນຢູ່ໃນເຮືອນ; ບຳລຸງກໍ່ສ້າງນັກກິລາປະເພດຕ່າງໆຢູ່ແຂວງແຄ໊ງຮ່ວາ ມີທ່າແຮງ; ສົ່ງເສີມການລົງນາມໃນບົດບັນທຶກຂໍ້ຕົກລົງວ່າດ້ວຍການຮ່ວມມືລະຫວ່າງແຂວງແຄ໊ງຮ່ວາ ແລະນະຄອນຫຼວງວຽງຈັນ ໃນປີ 2023…

ໂດຍ: ຈາງຫງວຽນ