ຝຶກອົບຮົມວຽກງານບໍາບັດການຕິດຢາເສບຕິດໃຫ້ກໍາລັງເຈົ້າໜ້າທີ່ ລາວ

ກ່າວຄໍາເຫັນທີ່ພິທີເປີດ, ທ່ານພັນເອກ ຮວ່າງເຕິມຮ໊ຽວ, ຮອງຫົວໜ້າກົມ CO4 ໃຫ້ຮູ້ວ່າ ຊຸດຝຶກອົບຮົມຄັ້ງນີ້ແມ່ນໜຶ່ງໃນບັນດາການເຄື່ອນໄຫວຮ່ວມມືປະຈໍາປີທີ່ແທດຈິງ, ນອນໃນຂອບເຂດຂອງສັນຍາ ແລະບົດບັນທຶກຊ່ວຍຈໍາລະຫວ່າງສອງລັດຖະບານ ແລະກະຊວງຕໍາຫຼວດຫວຽດນາມ ແລະກະຊວງປ້ອງກັນຄວາມສະຫງົບ ລາວ.

ທ່ານພັນເອກ ຮວ່າງເຕິມຮ໊ຽວ ຮອງຫົວໜ້າກົມຕໍາຫຼວດສືບສວນອາດຊະຍາກໍາຢາເສບຕິດ ກ່າວຄໍາເຫັນເປີດພິທີ. ພາບ: nhandan.vn

ຊຸດຝຶກອົບຮົມກໍ່ແມ່ນໂອກາດເພື່ອໃຫ້ເພື່ອນຮ່ວມອາຊີບຂອງສອງປະເທດ ໄດ້ແບ່ງປັນບົດຮຽນເພື່ອຍົກປະສິດທິຜົນວຽກງານບໍາບັດການຕິດຢາເສບຕິດ ແລະຟື້ນຟູໃຫ້ສູງກວ່າອີກ; ປະກອບສ່ວນເຮັດໃຫ້ຄວາມຕ້ອງການຊື້ຢາເສບຕິດຢູ່ແຕ່ລະປະເທດຫຼຸດລົງ.

ທ່ານພັນເອກ ວົງໄຊ ພັນທະວົງ ຮອງເລຂາທິການໃຫຍ່ຄະນະກຳມະການແຫ່ງຊາດ ເພື່ອກວດກາ ແລະຄວບຄຸມຢາເສບຕິດ ແຫ່ງ ສປປ ລາວ ກ່າວຄໍາເຫັນທີ່ພິທີ. ພາບ: nhandan.vn

ທ່ານພັນເອກ ວົງໄຊ ພັນທະວົງ ຮອງເລຂາທິການໃຫຍ່ຄະນະກຳມະການແຫ່ງຊາດ ເພື່ອກວດກາ ແລະຄວບຄຸມຢາເສບຕິດ ແຫ່ງ ສປປ ລາວ ໃຫ້ຮູ້ວ່າ ບັນຫາຢາເສບຕິດແມ່ນບັນຫາລວມຂອງບັນດາປະເທດໃນພາກພື້ນ ແລະສາກົນ, ເປັນໄພອັນຕະລາຍຢ່າງຮ້າຍແຮງ, ເປັນສາຍເຫດທີ່ພາໃຫ້້ເກີດອາດຊະຍາກໍາປະເພດຕ່າງໆ, ທໍາລາຍຊີວິດ, ຊັບສິນ, ສົ່ງຜົນສະທ້ອນເຖິງສຸຂະພາບ, ກໍ່ຄວາມບໍ່ສະຫງົບໃຫ້ແກ່ຄອບຄົວ ແລະສັງຄົມ, ກໍ່ຄວາມວຸ້ນວາຍ, ຄວາມບໍ່ເປັນລະບຽບຮຽບຮ້ອຍ, ສົ່ງຜົນສະທ້ອນເຖິງການພັດທະນາເສດຖະກິດ, ສັງຄົມ.

ບັນດາຜູ້ແທນ ເຂົ້າຮ່ວມຊຸດຝຶກອົບຮົມ. ພາບ: nhandan.vn

ທ່ານພັນເອກ ວົງໄຊ ພັນທະວົງ ສະແດງຄວາມຂອບໃຈມາຍັງລັດຖະບານ ແລະປະຊາຊົນຫວຽດນາມ, ກົມ C04 ກະຊວງຕໍາຫຼວດຫວຽດນາມ ທີ່ໄດ້ຈັດຊຸດຝຶກອົບຮົມ ເພື່ອກໍ່ສ້າງກໍາລັງແຮງ ແລະຍົກລະດັບຄວາມຮັບຮູ້ໃຫ້ແກ່ພະນັກງານປ້ອງກັນຄວາມສະຫງົບ ລາວ, ເປັນຕົ້ນແມ່ນໃນຂົງເຂດບໍາບັດການຕິດຢາເສບຕິດ ແລະຕິດຕາມ, ຄຸ້ມຄອງຜູ້ຕິດຢາເສບຕິດຫຼັງການບໍາບັດ. 

ດ້ວຍຄວາມຮູ້ ແລະບົດຮຽນທີ່ແລກປ່ຽນຜ່ານຊຸດຝຶກອົບຮົມໃນຄັ້ງນີ້, ກໍາລັງຕ້ານ ແລະສະກັດກັ້ນຢາເສບຕິດ ແຫ່ງ ສປປ ລາວ ຈະສືບຕໍ່ໝູນໃຊ້ເຂົ້າໃນວຽກງານຂອງຕົນຢ່າງມີຫົວຄິດປະດິດສ້າງ, ປະກອບສ່ວນຍົກສູງປະສິດທິຜົນໃນການຕໍ່ສູ້, ຕ້ານ ແລະສະກັດກັ້ນຢາເສບຕິດລະຫວ່າງສອງປະເທດ ຫວຽດນາມ-ລາວ.

ຊຸດຝຶກອົບຮົມ ດໍາເນີນແຕ່ວັນທີ 28 ພຶດສະພາ ຫາວັນທີ 2 ມິຖຸນາ 2023.

ໂດຍ: ໄຊຊະນະ