ໜ້າທີ່ການເມືອງຈຸດສຸມຂອງທະຫານເຮືອເຂດ 4 ແມ່ນຫັດແອບ, ກຽມພ້ອມສູ້ຮົບປົກປັກຮັກສາເຂດທະເລ, ໝູ່ເກາະກວ້າງກວ່າ 360.000km2 ນັບແຕ່ກູ່ລາວແຊງ (ບິ່ງດິ້ງ) ຈົນຮອດ ໝູຍບາກ້ຽມ (ບິ່ງທ້ວນ), ໃນນັ້ນມີໝູ່ເກາະເຈື່ອງຊາ. ນີ້ແມ່ນເຂດທະເລ, ໝູ່ເກາະມີທີ່ຕັ້ງຍຸດທະສາດສຳຄັນທັງດ້ານເສດຖະກິດ, ການເມືອງ ແລະການປ້ອງກັນຊາດ, ປ້ອງກັນຄວາມສະຫງົບຂອງປະເທດ. ໂດຍຮັບຮູ້ຄວາມຮັບຜິດຊອບຕໍ່ພັກ, ປະເທດຊາດ ແລະປະຊາຊົນ, ຜ່ານໄລຍະເກືອບ 50 ປີແຫ່ງການສ້າງສາ, ຕໍ່ສູ້ ແລະເຕີບໃຫຍ່ຂະຫຍາຍຕົວ, ພະນັກງານ, ນັກຮົບຮຸ່ນຕ່າງໆຂອງທະຫານເຮືອເຂດ 4 ໄດ້ຜ່ານຜ່າຄວາມຫຍຸ້ງຍາກ, ລຳບາກກາກກຳ, ອັນຕະລາຍ, ກຽມພ້ອມສູ້ຮົບ ແລະຕໍ່ສູ້ຍາດເອົາໄຊຊະນະ, ສ້າງວິລະກຳ, ຜົນງານດີເດັ່ນ ແລະດີເລີດ, ປະກອບສ່ວນປົກປັກຮັກສາອະທິປະໄຕທະເລ, ໝູ່ເກາະສັກກະລະບູຊາຂອງປະເທດຊາດ, ເສີມສ້າງມູນເຊື້ອຂອງກົມກອງ: “ຕໍ່ສູ້ຢ່າງພິລະອາດຫານ, ແກ້ໄຂຄວາມຫຍຸ້ງຍາກ, ສາມັກຄີປະສານສົມທົບກັນ, ເປັນເຈົ້າຂອງເຂດທະເລ”.
ຕາມນັ້ນແລ້ວ, ໃນຊຸມປີຜ່ານມາ, ທະຫານເຮືອເຂດ 4 ໄດ້ຊາບຊຶມມະຕິ, ຄຳສັ່ງ, ທິດນຳ, ແຜນນະໂຍບາຍຂອງພັກ, ລັດ ແລະການຊີ້ນຳຂອງຄະນະພັກການທະຫານສູນກາງ, ກະຊວງປ້ອງກັນປະເທດ ໃນການປະຕິບັດໜ້າທີ່ປົກປັກຮັກສາອະທິປະໄຕທະເລ, ໝູ່ເກາະ; ສຸມໃສ່ຮັກສາແບບແຜນ, ລະບອບ, ກຳລັງ, ພາຫະນະກຽມພ້ອມສູ້ຮົບ; ເຂົ້າຮ່ວມໂດຍກົງ ແລະປະສານສົມທົບກັນຢ່າງແໜ້ນແຟ້ນກັບບັນດາກຳລັງເພື່ອແກ້ໄຂທຸກກໍລະນີ, ບໍ່ປະໃຫ້ຕົກຢູ່ໃນທ່າຮັບ, ໂດຍບັງເອີນ; ປົກປັກຮັກສາອະທິປະໄຕ ແລະສະພາບແວດລ້ອມແຫ່ງສັນຕິພາບ, ສະຖຽນລະພາບຢູ່ທະເລເພື່ອພັດທະນາປະເທດ.
    |
 |
|
ກຳປັ່ນສູ້ຮົບຂອງກອງພົນນ້ອຍ 162, ທະຫານເຮືອເຂດ 4 ຝຶກຊ້ອມຍິງລູກສອນໄຟ. ພາບ: ແທັ່ງງວຽນ. |
ຕໍ່ໜ້າຄວາມຮຽກຮ້ອງກໍ່ສ້າງເຫຼົ່າທັບທະຫານເຮືອປະຕິວັດ, ກຳລັງຫຼວງ, ຍອດຢ້ຽມ, ກ້າວຂຶ້ນທັນສະໄໝ, ທະຫານເຮືອເຂດ 4 ໄດ້ເອົາໃຈໃສ່ເບິ່ງແຍງດູແລ, ກໍ່ສ້າງຖັນແຖວພະນັກງານໃຫ້ມີຄຸນທາດ, ຄວາມສາມາດ; ຕັ້ງໜ້າປ່ຽນແປງໃໝ່ຢ່າງຮອບດ້ານ, ສຳເລັດໜ້າທີ່ຫັດແອບ, ຝຶກຊ້ອມຕາມທິດ “ພື້ນຖານ, ແທດຈິງ, ໝັ້ນຄົງ”, “ຖືເປົ້າໝາຍປົກປັກຮັກສາອະທິປະໄຕທະເລ, ໝູ່ເກາະຂອງປະເທດຊາດເປັນເປົ້າໝາຍການຫັດແອບ”, ເອົາໃຈໃສ່ ແລະຍາມໃດກໍ່ສຳເລັດເນື້ອໃນຫັດແອບໃໝ່, ຍາກ... ປະກອບສ່ວນຍົກສູງກຳລັງແຮງສັງລວມ, ລະດັບຄວາມຮູ້, ຄວາມສາມາດກຽມພ້ອມສູ້ຮົບ.
ຄຸນທາດ, ປັນຍາ, ເຈດຈຳນົງຕັດສິນໃຈຂອງພະນັກງານ, ນັກຮົບທະຫານເຮືອເຂດ 4 ຍັງສະແດງອອກໃນວຽກງານພົວພັນຕ່າງປະເທດດ້ານປ້ອງກັນຊາດ, ກາຍເປັນຈຸດພົ້ນເດັ່ນຂອງເຫຼົ່າທັບທະຫານເຮືອ ແລະທົ່ວກອງທັບ, ດ້ວຍຫຼາຍກິດຈະກຳທີ່ມີຄວາມໝາຍ, ພົ້ນເດັ່ນແມ່ນຈັດສົ່ງກຳປັ່ນເຂົ້າຮ່ວມບັນດາເຫດການ ແລະການເຄື່ອນໄຫວພົວພັນຕ່າງປະເທດດ້ານປ້ອງກັນຊາດຢູ່ຫຼາຍປະເທດ; ພົບປະແລກປ່ຽນການທະຫານ, ຝຶກຊ້ອມ, ເດີນສວນສະໜາມກຳປັ່ນທະຫານເຮືອກັບທະຫານເຮືອບັນດາປະເທດໃນພາກພື້ນ ແລະໃນໂລກ... ພ້ອມກັນນັ້ນ, ໃນເວລາ 10 ປີມໍ່ໆມານີ້, ທະຫານເຮືອເຂດ 4 ໄດ້ຈັດຕັ້ງການຕ້ອນຮັບຫຼາຍຄະນະແຂກສາກົນມາຢ້ຽມຢາມ ແລະເຮັດວຽກຢູ່ກົມກອງ, ປະກອບສ່ວນເພີ່ມທະວີນ້ຳໃຈສາມັກຄີ, ມິດຕະພາບກັບກອງທັບ ແລະທະຫານເຮືອບັນດາປະເທດ, ຍົກສູງຖານະບົດບາດ, ອິດທິພົນຊື່ສຽງຂອງທະຫານເຮືອປະຊາຊົນຫວຽດນາມ, ປົກປັກຮັກສາອະທິປະໄຕທະເລ, ໝູ່ເກາະຂອງປະເທດຊາດແຕ່ຫົວທີ່, ແຕ່ໄກ.
ພ້ອມກັບການປະຕິບັດໜ້າທີ່ຫັດແອບ, ກຽມພ້ອມສູ້ຮົບ, ພະນັກງານ, ນັກຮົບທະຫານເຮືອເຂດ 4 ຍັງຜັນຂະຫຍາຍລາຍການ “ທະຫານເຮືອຫວຽດນາມ ເປັນບ່ອນອີງໃຫ້ຊາວປະມົງໄປຫາປາຢູ່ທະເລ” ແລະບັນດາການເຄື່ອນໄຫວຂົນຂວາຍປະຊາຊົນຢູ່ບໍລິເວນຕັ້ງທັບ, ໜ້າທີ່ກູ້ໄພກູ້ຊີບ. ໄລ່ສະເພາະ 10 ປີມໍ່ມານີ້, ກົມກອງໄດ້ປະຕິບັດການຊອກຫາກວ່າ 650 ຄັ້ງ, ກູ້ໄພກູ້ຊີບຊາວປະມົງກວ່າ 6.000 ຄົນ, ຊ່ວຍເຫຼືອປະຊາຊົນບັນດາທ້ອງຖິ່ນປ້ອງກັນ, ຕ້ານ ແລະແກ້ໄຂຜົນຮ້າຍຢ້ອນຫຼັງຈາກໄພທຳມະຊາດ, ໄພໄໝ້...
ດ້ວຍບັນດາຜົນງານ, ວິລະກຳດີເດັ່ນ, ທະຫານເຮືອເຂດ 4 ມີຄວາມເປັນກຽດທີ່ໄດ້ຮັບລາງວັນອັນສູງສົ່ງຫຼາຍລາງວັນຈາກພັກ, ລັດ, ກະຊວງປ້ອງກັນປະເທດ, ພິເສດ, ວັນທີ 10 ຕຸລາ 2024, ທ່ານປະທານປະເທດ ໄດ້ເຊັນຂໍ້ຕົກລົງມອບນາມມະຍົດວິລະຊົນກຳລັງປະກອບອາວຸດປະຊາຊົນໄລຍະປ່ຽນແປງໃໝ່. ໄດ້ຮັບຜົນງານອັນສະຫງ່າລາສີນັ້ນ, ກ່ອນອື່ນໝົດແມ່ນຍ້ອນມີຄວາມເອົາໃຈໃສ່ຊີ້ນຳນຳພາຂອງພັກ, ລັດ, ຄະນະພັກການທະຫານສູນກາງ, ກະຊວງປ້ອງກັນປະເທດ; ຄະນະພັກ, ກອງບັນຊາການເຫຼົ່າທັບທະຫານເຮືອ ພ້ອມກັບການປະສານສົມທົບກັນຕໍ່ສູ້ ແລະວຽກງານຂອງບັນດາກົມກອງເພື່ອນມິດ; ການສະໜັບສະໜູນ, ການຊ່ວຍເຫຼືອຂອງທຸກຂັ້ນ, ທຸກຂະແໜງການ, ອົງຄະນະພັກ, ອຳນາດການປົກຄອງບັນດາທ້ອງຖິ່ນ, ປະຊາຊົນທົ່້ວປະເທດ ແລະຊາວຫວຽດນາມ ອາໄສຢູ່ຕ່າງປະເທດ; ຄວາມມານະພະຍາຍາມຂອງຄະນະພັກ, ການນຳ ແລະພະນັກງານ, ນັກຮົບບັນດາອົງການ, ກົມກອງຜ່ານໄລຍະຕ່າງໆ.
ໄລຍະຈະມາເຖິງ, ຄາດວ່າສະຖານະການໂລກ, ພາກພື້ນຈະສືບຕໍ່ມືການຜັນແປຢ່າງສັບສົນ, ຄຍາກທີ່ຈະຄາດຄະເນລ່ວງໜ້າໄດ້, ໜ້າທີ່ປົກປັກຮັກສາອະທິປະໄຕທະເລ, ໝູ່ເກາະຂອງປະເທດຊາດສືບຕໍ່ວາງອອກຄວາມຮຽກຮ້ອງນັບມື້ນັບສູງ. ເສີມຂະຫຍາຍມູນເຊື້ອກົມກອງວິລະຊົນກຳລັງປະກອບອາວຸດປະຊາຊົນ, ພະນັກງານ, ນັກຮົບທະຫານເຮືອເຂດ 4 ຈະສາມັກຄີເປັນຈິດໜຶ່ງໃຈດຽວ, ເຊີດຊູຈິດໃຈກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ, ມານະພະຍາຍາມສູ້ຊົນ, ແກ້ໄຂທຸກຄວາມຫຍຸ້ງຍາກ, ລຳບາກກາກກຳເພື່ອຫັດແອບເປັນຢ່າງດີ, ກຽມພ້ອມສູ້ຮົບສູງ, ກໍ່ສ້າງກົມກອງໃຫ້ນັບມື້ນັບໝັ້ນຄົງເຂັ້ມແຂງປົກປັກຮັກສາອະທິປະໄຕທະເລ, ໝູ່ເກາະ, ໄຫຼ່ທະວີບອັນສັກສິດຂອງປະເທດຊາດໄວ້ຢ່າງໝັ້ນຄົງ.
ໂດຍ: ແສງເດືອນ