ກອງປະຊຸມສະຫຼຸບການພົບປະແລກປ່ຽນ “ຕໍາຫຼວດທະເລຫວຽດນາມ ແລະເພື່ອນມິດ” ຄັ້ງທີ 2

ຜູ້ແທນເຂົ້າຮ່ວມກອງປະຊຸມສະຫຼຸບ. ພາບ: ດຶ໊ກຕີ໊ງ

ໂດຍດຳເນີນແຕ່ວັນທີ 17-21 ທັນວາ 2024, ຢູ່ຮ່າໂນ້ຍ, ລາຍການພົບປະແລກປ່ຽນ “ຕໍາຫຼວດທະເລຫວຽດນາມ ແລະເພື່ອນມິດ” ຄັ້ງທີ 2 ໄດ້ປະກອບສ່ວນເພີ່ມທະວີຄວາມເຂົ້າໃຈ, ຄວາມໄວ້ເນື້ອເຊື່ອໃຈເຊິ່ງກັນ ແລະກັນລະຫວ່າງຕຳຫຼວດທະເລຫວຽດນາມ ກັບກຳລັງປະຕິບັດກົດໝາຍທາງທະເລຂອງບັນດາປະເທດໃນພາກພື້ນ. ພ້ອມທັງ, ລາຍການກໍ່ໄດ້ສ້າງເວທີປາໄສເພື່ອໃຫ້ບັນດາກຳລັງສະແດງຄວາມເຫັນດີເຫັນພ້ອມ ແລະຄວາມຕັດສິນໃຈສູງໃນການຊຸກຍູ້ຍົກສູງປະສິດທິຜົນການຮ່ວມມືໃນຂົງເຂດຕ່າງໆແນໃສ່ສ້າງເຂດທະເລແຫ່ງສັນຕິພາບ, ປອດໄພ, ສາມັກຄີ, ມິດຕະພາບ.

ທ່ານພົນຕີ ເລກວາງດ້າວ ຜູ້ບັນຊາການຕຳຫຼວດທະເລຫວຽດນາມ ກ່າວຄໍາເຫັນທີ່ກອງປະຊຸມ. ພາບ: ດຶ໊ກຕີ໊ງ

ກ່າວຄຳເຫັນທີ່ກອງປະຊຸມ, ທ່ານພົນຕີ ເລກວາງດ້າວ ໄດ້ຂອບອົກຂອບໃຈອົງການ, ກົມກອງທີ່ກ່ຽວຂ້ອງທີ່ໄດ້ປະສານສົມທົບຢ່າງແຫນ້ນແຟ້ນ, ຮັບປະກັນໃຫ້ລາຍການພົບປະແລກປ່ຽນຄັ້ງທີ 2 ປະສົບຜົນສຳເລັດຢ່າງຮອບດ້ານ ແລະມີຄວາມໝາຍຢ່າງແທດຈິງ ແລະສ້າງການແຜ່ຂະຫຍາຍຢ່າງກວ້າງຂວາງ. ເພື່ອຍົກສູງການເຄື່ອນໄຫວພົບປະແລກປ່ຽນ, ຮ່ວມມືກັບສາກົນ, ໃນໄລຍະຈະມາເຖິງ, ຕໍາຫຼວດທະເລຫວຽດນາມ ຈະຄົ້ນຄວ້າ, ສະເໜີເພີ່ມຈຳນວນປະເທດເຂົ້າຮ່ວມລາຍການພົບປະແລກປ່ຽນ “ຕໍາຫຼວດທະເລຫວຽດນາມ ແລະເພື່ອນມິດ” ຄັ້ງທີ 3, ພ້ອມທັງເພີ່ມເຕີມການເຄື່ອນໄຫວພົບປະແລກປ່ຽນຕື່ມອີກ, ເພື່ອໃຫ້ລາຍການພົບປະມີຄວາມອຸດົມສົມບູນຂຶ້ນຕື່ມ.

ທີ່ກອງປະຊຸມ, ໂດຍໄດ້ຮັບການມອບສິດຈາກຫົວໜ້າກະຊວງປ້ອງກັນປະເທດ, ການນຳກອງບັນຊາການຕຳຫຼວດທະເລຫວຽດນາມ ໄດ້ມອບໃບຍ້ອງຍໍຂອງທ່ານລັດຖະມົນຕີກະຊວງປ້ອງກັນປະເທດ ແລະໃບຍ້ອງຍໍຂອງຫົວໜ້າການເມືອງຕຳຫຼວດທະເລຫວຽດນາມ ໃຫ້ໝູ່ຄະນະ, ບຸກຄົນທີ່ມີຜົນງານດີເລີດໃນການເຂົ້າຮ່ວມລາຍການພົບປະແລກປ່ຽນ.

ໂດຍ: ເຈິ່ນຮວ່ຽນ