ທະຫານຊາຍແດນແຂວງດ້ຽນບຽນ ສົມທົບກັນລາດຕະເວນສອງຝ່າຍກັບທະຫານຊາຍແດນລາວ

ທ່ານຮ້ອຍເອກພິເສດ ເລຕ໊ຽນກວາງ, ຮອງຫົວໜ້າຄ້າຍທະຫານຊາຍແດນແທັງລວງ ແລະທ່ານພັນຕີ ຄຳສອນ ອິນສົມໝັ້ນ, ຫົວໜ້າກອງຮ້ອຍທະຫານຊາຍແດນ 116 ຮັບຜິດຊອບການລາດຕະເວນ.

ສອງຝ່າຍປະຕິບັດການລາດຕະເວນ. ພາບ: ຮ່າແຄ໊ງ

ເນື້ອໃນການລາດຕະເວນ: ກວດກາລະບົບເສັ້ນຊາຍແດນ, ຫຼັກໝາຍຊາຍແດນແຫ່ງຊາດຢູ່ເຂດຊາຍແດນລວມ ຈາກຫຼັກໝາຍຊາຍແດນແຫ່ງຊາດ ທີ 103 ຫາຫຼັກໝາຍທີ 104. ໃນການລາດຕະເວນ, ສອງຝ່າຍໄດ້ດໍາເນີນບັນດາຂັ້ນຕອນ, ເນື້ອໃນຖືກຕ້ອງຕາມຂໍ້ກຳນົດວຽກງານການພົວພັນຕ່າງປະເທດ, ຮັບປະກັນຕາມແຜນການທີ່ສອງຝ່າຍໄດ້ຕົກລົງ. ສອງຝ່າຍກໍ່ດໍາເນີນການກວດກາແຕ່ລະຕອນຊາຍແດນ, ທໍລະນີສາດ ໃນຂົງເຂດຫຼັກໝາຍຊາຍແດນແຫ່ງຊາດ, ຮັບປະກັນໃຫ້ຢູ່ໃນສະພາບເດີມ, ຕາມອະນຸສັນຍາວ່າດ້ວຍຫຼັກໝາຍຊາຍແດນແຫ່ງຊາດ ແລະເສັ້ນຊາຍແດນທີ່ສອງປະເທດໄດ້ລົງນາມ, ບໍ່ມີຄວາມສ່ຽງທີ່ຈະເກີດດິນເຈື່ອນ ແລະການບຸກລຸກ.

ຄຽງຂ້າງນັ້ນ, ສອງຝ່າຍກໍ່ສົມທົບກັນໂຄສະນາ, ເຜີຍແຜ່ກົດໝາຍ, ຍົກສູງຄວາມຮັບຮູ້ໃຫ້ປະຊາຊົນສອງປະເທດປະຕິບັດຂໍ້ກໍານົດກ່ຽວກັບການຄຸ້ມຄອງ, ປົກປັກຮັກສາຊາຍແດນ, ເປັນຕົ້ນແມ່ນການລ້ຽງສັດ, ປ່ອຍສັດໃຫຍ່, ສັດປີກຂ້າມຊາຍແດນ, ສະກັດກັ້ນ, ຕ້ານອາດຊະຍາກຳຕ່າງໆ, ການເຂົ້າ-ອອກເມືອງຜິດກົດໝາຍ, ຍົກຍ້າຍຕັ້ງຖິ່ນຖານພູມລຳເນົາຕາມລຳພັງໃຈ.

ປະຕິບັດພິທີກວດກາຫຼັກໝາຍຊາຍແດນແຫ່ງຊາດ. ພາບ: ຮ່າແຄ໊ງ

ສອງຝ່າຍກໍ່ເຫັນດີສືບຕໍ່ເພີ່ມທະວີວຽກງານລາດຕະເວນສອງຝ່າຍ ແລະຝ່າຍດຽວຢູ່ເຂດຫຼັກໝາຍຊາຍແດນແຫ່ງຊາດ, ແນໃສ່ສະກັດກັ້ນການເຄື່ອນໄຫວເຂົ້າ-ອອກເມືອງຜິດກົດໝາຍ, ການລ່າສັດປ່າ ແລະຕໍ່ສູ້ຕ້ານ, ສະກັດກັ້ນຕ້ານອາດຊະຍາກຳ.

ໃນຂອບເຂດການລາດຕະເວນ, ສອງກົມກອງໄດ້ຈັດຕັ້ງການພົບປະແລກປ່ຽນວັດທະນະທຳ ແລະແຂ່ງຂັນຕີບານສົ່ງ. ຄ້າຍທະຫານຊາຍແດນແທັງລວງ ໄດ້ມອບເຄື່ອງຄອມພິວເຕີໃຫ້ກອງຮ້ອຍທະຫານຊາຍແດນ 116 ຊຸດໜຶ່ງ ເປັນມູນຄ່າ 10 ລ້ານດົ່ງ. ນີ້ແມ່ນການເຄື່ອນໄຫວລາດຕະເວນສອງຝ່າຍຕາມບົດບັນທຶກຊ່ວຍຈໍາການພົບປະ ຄັ້ງທີ XVI ລະຫວ່າງກອງບັນຊາການທະຫານຊາຍແດນແຂວງດ້ຽນບຽນ, ເຊີນລາ (ຫວຽດນາມ) ແລະກອງບັນຊາການທະຫານແຂວງຜົ້ງສາລີ (ລາວ) ທີ່ລົງນາມໃນວັນທີ 26 ທັນວາ 2024 ຢູ່ແຂວງເຊີນລາ.

ໂດຍ: ເຈິ່ນຮວ່ຽນ