ກອງປະຊຸມພົບປະແລກປ່ຽນວຽກງານປ້ອງກັນຊາຍແດນລະຫວ່າງທະຫານຊາຍແດນແຂວງ ເງະອານ ກັບກອງບັນຊາການທະຫານ 3 ແຂວງຂອງລາວ

ທີ່ກອງປະຊຸມ, ສອງຝ່າຍໄດ້ແລກປ່ຽນກ່ຽວກັບສະພາບການຊາຍແດນໃນໄລຍະຜ່ານມາ ແລະ ໝາກຜົນແຫ່ງການສົມທົບກັນໃນການຄຸ້ມຄອງ, ປົກປັກຮັກສາອະທິປະໄຕ, ຄວາມໝັ້ນຄົງຢູ່ເຂດຊາຍແດນແຫ່ງຊາດລະຫວ່າງແຂວງເງະອານ ກັບແຂວງຫົວພັນ, ຊຽງຂວາງ ແລະບໍລິຄຳໄຊ; ບັນດາກຳລັງກ່ຽວຂ້ອງຂອງສອງຝ່າຍໄດ້ສົມທົບກັນແກ້ໄຂບັນຫາທີ່ເກີດຂຶ້ນຢ່າງທັນການ, ເຮັດໃຫ້ເສັ້ນຊາຍແດນລະຫວ່າງແຂວງເງະອານ ແລະບັນດາແຂວງຕິດກັບຊາຍແດນຂອງລາວ ກາຍເປັນເສັ້ນຊາຍແດນແຫ່ງສັນຕິພາບ, ມິດຕະພາບ, ການຮ່ວມມື ແລະພ້ອມກັນພັດທະນາ.

ຫົວໜ້າບັນດາຄະນະລົງນາມໃນບົດບັນທຶກຊ່ວຍຈໍາ. ພາບ: truyenhinhnghean.vn

ທ່ານພັນເອກພິເສດ ເຢືອງຮົ່ງຫາຍ ມອບຂອງຂວັນໃຫ້ກອງບັນຊາການທະຫານແຂວງຫົວພັນ. ພາບ: truyenhinhnghean.vn

ໃນໄລຍະຜ່ານມາ, ກໍາລັງທະຫານຊາຍແດນແຂວງເງະອານ ແລະກອງບັນຊາການທະຫານ 3 ແຂວງຂອງລາວ ໄດ້ເພີ່ມທະວີການສົມທົບກັນລາດຕະເວນ ແລະປ້ອງກັນຊາຍແດນ, ສະກັດກັ້ນການເຄື່ອນໄຫວລະເມີດສັນຍາກ່ຽວກັບກົດລະບຽບຊາຍແດນແຫ່ງຊາດ ຫວຽດນາມ - ລາວ; ແຈ້ງຂ່າວ ແລະແລກປ່ຽນສະພາບການທີ່ກ່ຽວຂ້ອງເຖິງການເຄື່ອນໄຫວຂອງສັດຕູ ແລະອາດຊະຍາກຳປະເພດຕ່າງໆຢ່າງເປັນປະຈຳ, ພິເສດແມ່ນອາດຊະຍາກຳຄ້າຂາຍ, ຂົນສົ່ງຢາເສບຕິດ ແລະ ຄ້າຂາຍ, ຂົນສົ່ງສັດປ່າຂ້າມຊາຍແດນ, ບັນດາເປົ້າໝາຍຂ້າມຊາຍແດນຂຸດຄົ້ນໄມ້ຢ່າງຜິດກົດໝາຍ...; ຮັກສາການແລກປ່ຽນວຽກງານເປັນຢ່າງດີ ເພື່ອແລກປ່ຽນສະພາບການທີ່ກ່ຽວຂ້ອງເຖິງສອງຟາກຊາຍແດນຂອງແຕ່ລະແຂວງ.

ຄະນະຜູ້ແທນກອງບັນຊາການທະຫານຊາຍແດນແຂວງເງະອານ ມອບຂອງຂວັນໃຫ້ກອງບັນຊາການປ້ອງກັນຄວາມສະຫງົບແຂວງຫົວພັນ. ພາບ: truyenhinhnghean.vn

ບັນດາຜູ້ແທນຖ່າຍຮູບເປັນທີ່ລະນຶກ. ພາບ: truyenhinhnghean.vn

ໃນປີ 2024, ເປັນຄັ້ງທຳອິດກອງບັນຊາການທະຫານຊາຍແດນແຂວງເງະອານ ຈັດຕັ້ງການລາດຕະເວນຮ່ວມຂັ້ນແຂວງລະຫວ່າງກອງບັນຊາການທະຫານຊາຍແດນແຂວງເງະອານ ກັບກອງບັນຊາການທະຫານແຂວງຊຽງຂວາງ, ປະເທດລາວ. ທີ່ກອງປະຊຸມພົບປະແລກປ່ຽນ, ສອງຝ່າຍຍັງໄດ້ຊີ້ອອກຂໍ້ຈຳກັດຕ້ອງໄດ້ຮັບການແກ້ໄຂ; ລົງນາມໃນບົດບັນທຶກຊ່ວຍຈໍາກ່ຽວກັບການປະຕິບັດໜ້າທີ່ກໍ່ສ້າງ, ຄຸ້ມຄອງ ແລະປົກປັກຮັກສາຊາຍແດນໃນໄລຍະຈະມາເຖິງ.

ໂດຍ: ທູຈາງ