ຈຸດພົ້ນເດັ່ນການຮ່ວມມືປະຕິບັດກົດໝາຍຢູ່ທະເລ

ຕອນເຊົ້າວັນທີ 27 ສິງຫາ, ທ່ານພົນຕີ ບຸ່ຍກວກອວາຍ ຫົວໜ້າການເມືອງກອງບັນຊາການຕໍາຫຼວດທະເລຫວຽດນາມ ແລະທ່ານພົນຈັດຕະວາ Liu Houjie ຮອງຫົວໜ້າການເມືອງກົມຕໍາຫຼວດທະເລຈີນ ໄດ້ນຳໜ້າຄະນະຜູ້ແທນຕໍາຫຼວດທະເລສອງປະເທດ ເຂົ້າຮ່ວມພິທີໄຂລາຍການພົບປະແລກປ່ຽນວຽກງານພັກ, ວຽກງານການເມືອງຕໍາຫຼວດທະເລຫວຽດນາມ-ຕໍາຫຼວດທະເລຈີນ ຄັ້ງທີ 1, ປີ 2024. ພາຍຫຼັງພິທີໄຂ, ຕອນບ່າຍວັນທີ 27 ສິງຫາ, ທ່ານພົນຕີ ເລກວາງມິງ ຮອງຫົວໜ້າກົມໃຫຍ່ການເມືອງກອງທັບປະຊາຊົນຫວຽດນາມ ໄດ້ໃຫ້ການຕ້ອນຮັບທ່ານພົນຈັດຕະວາ Liu Houjie ແລະຄະນະຜູ້ແທນຕໍາຫຼວດທະເລຈີນ.

ທີ່ການຕ້ອນຮັບ, ທ່ານພົນຕີ ເລກວາງມິງ ໄດ້ສະແດງຄວາມປິຕິຊົມຊື່ນຕໍ່ການພົວພັນຮ່ວມມືລະຫວ່າງຕໍາຫຼວດທະເລຫວຽດນາມ-ຕໍາຫຼວດທະເລຈີນ ທີ່ໄດ້ກາຍເປັນຈຸດພົ້ນເດັ່ນໃນການເຄື່ອນໄຫວຮ່ວມມືປະຕິບັດກົດໝາຍຢູ່ທະເລລະຫວ່າງບັນດາປະເທດໃນພາກພື້ນ, ປະກອບສ່ວນສຳຄັນເຂົ້າໃນການສ້າງເຂດທະເລສັນຕິພາບ, ສະຖຽນລະພາບ, ວັດທະນາຖາວອນ, ການຮ່ວມມື ແລະພ້ອມກັນພັດທະນາ.

ທ່ານພົນຕີ ເລກວາງມິງ ສະເໜີໃຫ້ຕໍາຫຼວດທະເລຫວຽດນາມ ແລະຕໍາຫຼວດທະເລຈີນ ຮັກສາຄຸນທາດການປະຕິວັດ, ຮໍ່າຮຽນຢ່າງບໍ່ຢຸດຢັ້ງ, ຝຶກຝົນຫຼໍ່ຫຼອມ, ຍົກສູງລະດັບວິຊາສະເພາະ, ກໍາລັງຄວາມສາມາດເຮັດວຽກ, ສົມທົບກັນຜັນຂະຫຍາຍບັນດາການເຄື່ອນໄຫວຮ່ວມມືກວ່າອີກ, ແນໃສ່ປະກອບສ່ວນເພີ່ມທະວີຄວາມເຊື່ອໝັ້ນ, ເພີ່ມພູນຄູນສ້າງສາຍພົວພັນມິດຕະພາບລະຫວ່າງສອງກໍາລັງ, ສອງກອງທັບ, ກໍ່ຄືການຮັກສາສະພາບແວດລ້ອມສັນຕິພາບ, ສະຖຽນລະພາບ, ຮັບປະກັນຄວາມໝັ້ນຄົງ, ຄວາມປອດໄພຢູ່ທະເລ, ປະກອບສ່ວນພ້ອມກັບພັກ, ລັດ, ກອງທັບສອງປະເທດຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ-ຈີນ ໃຫ້ພັດທະນາຍາວນານ ແລະໝັ້ນຄົງໃນໄລຍະໃໝ່.

leftcenterrightdel
ຄະນະຜູ້ແທນຕໍາຫຼວດທະເລຫວຽດນາມ ແລະຄະນະຜູ້ແທນຕໍາຫຼວດທະເລຈີນ ທີ່ພິທີໄຂ. ພາບ: ເລິມຕວ່ານ

ສ່ວນທ່ານພົນຈັດຕະວາ Liu Houjie ເນັ້ນໜັກວ່າ: ລາຍການພົບປະແລກປ່ຽນວຽກງານພັກ, ວຽກງານການເມືອງຕໍາຫຼວດທະເລຫວຽດນາມ-ຕໍາຫຼວດທະເລຈີນ ຄັ້ງທີ 1, ປີ 2024 ມີຄວາມໝາຍສຳຄັນທີ່ສຸດ, ແມ່ນພື້ນຖານເພື່ອໃຫ້ສອງຝ່າຍເພີ່ມທະວີການພົບປະແລກປ່ຽນ, ແບ່ງປັນປະສົບການ, ຮ່ຳຮຽນເຊິ່ງກັນ ແລະກັນເພື່ອສະສົມຄວາມຮູ້ ແລະປະສົບການຮ່ວມກັນ, ປະກອບສ່ວນປະຕິບັດສຳເລັດໜ້າທີ່ທີ່ໄດ້ຮັບມອບໝາຍໃຫ້ດີຂຶ້ນກວ່າເກົ່າ. ພ້ອມທັງຢັ້ງຢືນວ່າ ຈີນ ແລະຫວຽດນາມ ແມ່ນສອງປະເທດບ້ານໃກ້ເຮືອນຄຽງ ມີພູຜາປ່າໄມ້, ແມ່ນໍ້າລໍາເຊໄຫຼຕິດຈອດກັນ, ມີການພົວພັນມິດຕະພາບທີ່ເປັນມູນເຊື້ອມາແຕ່ດົນນານ. ການພົວພັນຄູ່ຮ່ວມມືຍຸດທະສາດຮອບດ້ານ ຈີນ-ຫວຽດນາມ ແມ່ນພື້ນຖານທີ່ສະດວກເພື່ອໃຫ້ອົງການທີ່ກ່ຽວຂ້ອງສອງຝ່າຍຊຸກຍູ້ ແລະເປີດກວ້າງການພົວພັນຮ່ວມມືໃນທຸກຂົງເຂດ.

ກ່ອນໜ້ານັ້ນ, ທີ່ພິທີໄຂລາຍການພົບປະແລກປ່ຽນ, ທ່ານພົນຕີ ບຸ່ຍກວກອວາຍ ໄດ້ຢັ້ງຢືນວ່າ, ນີ້ແມ່ນຄັ້ງທຳອິດທີ່ກໍາລັງຕໍາຫຼວດທະເລສອງປະເທດ ຈັດຕັ້ງການພົບປະແລກປ່ຽນວຽກງານພັກ, ວຽກງານການເມືອງ. ລາຍການມີຫຼາຍເນື້ອໃນອຸດົມສົມບູນ, ໄດ້ດຳເນີນຢູ່ຫຼາຍບ່ອນໃນນະຄອນຫາຍຟ່ອງ ແລະຮ່າໂນ້ຍ. ທ່ານພົນຕີ ບຸ່ຍກວກອວາຍ ເຊື່ອໝັ້ນວ່າ, ລາຍການພົບປະແລກປ່ຽນຈະເປັນຂົວຕໍ່ມິດຕະພາບ, ປະກອບສ່ວນເພີ່ມທະວີຄວາມເຂົ້າ ໃຈ, ຄວາມໄວ້ເນື້ອເຊື່ອໃຈດ້ານການເມືອງລະຫວ່າງສອງກໍາລັງ, ປັບປຸງ, ເຮັດໃຫ້ສາຍພົວພັນທີ່ເປັນມູນເຊື້ອອັນດີງາມເລິກເຊິ່ງຂຶ້ນຕື່ມ; ແມ່ນກາລະໂອກາດເພື່ອໃຫ້ສອງຝ່າຍແລກປ່ຽນ, ແບ່ງປັນ, ຮໍ່າຮຽນກ່ຽວກັບວິທີການ, ປະສົບການໃນການເຄື່ອນໄຫວວຽກງານພັກ, ວຽກງານການເມືອງ, ປະກອບສ່ວນປັບປຸງ ແລະຊຸກຍູ້ການພົວພັນບ້ານໃກ້ເຮືອນຄຽງມິດຕະພາບ, ຄູ່ຮ່ວມມືຍຸດທະສາດຮອບດ້ານ ຫວຽດນາມ-ຈີນ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະພັດທະນາໃນພາກພື້ນ.

ປັບປຸງຄວາມໄວ້ເນື້ອເຊື່ອໃຈ ແລະຊຸກຍູ້ການຮ່ວມມື

ໃນຂອບເຂດລາຍການພົບປະແລກປ່ຽນວຽກງານພັກ, ວຽກງານການເມືອງຕໍາຫຼວດທະເລຫວຽດນາມ-ຕໍາຫຼວດທະເລຈີນ ຄັ້ງທີ 1, ປີ 2024, ຕອນບ່າຍວັນທີ 27 ສິງຫາ, ຄະນະຜູ້ແທນຕໍາຫຼວດທະເລຫວຽດນາມ ແລະຕໍາຫຼວດທະເລຈີນ ໄດ້ດຳເນີນການພົບປະເຈລະຈາ.

ທີ່ການພົບປະເຈລະຈາ, ສອງຝ່າຍໄດ້ດໍາເນີນການປຶກສາຫາລື, ແລກປ່ຽນບັນດາເນື້ອໃນຈຸດສຸມໃນການເຄື່ອນໄຫວວຽກງານພັກ, ວຽກງານການເມືອງຂອງກໍາລັງຕໍາຫຼວດທະເລສອງປະເທດ, ຄື: ບົດບາດ ແລະໜ້າທີ່ຂອງອົງການຈັດຕັ້ງພັກ; ໝູນໃຊ້ທິດສະດີຂອງພັກເຂົ້າໃນການເປັນເອກະພາບດ້ານແນວຄິດ, ສ້າງເຈດຈໍານົງ, ຄວາມຕັດສິນໃຈໃຫ້ພະນັກງານ, ນັກຮົບ ແລະຊີ້ນຳນາຍ ແລະພົນຕຳຫຼວດໃນຂະບວນການປະຕິບັດໜ້າທີ່.

ທີ່ການພົບປະເຈລະຈາ, ທ່ານພົນຕີ ບຸ່ຍກວກອວາຍ ໄດ້ແບ່ງປັນບາງເນື້ອໃນກ່ຽວກັບການຈັດຕັ້ງ ແລະການເຄື່ອນໄຫວວຽກງານພັກ, ວຽກງານການເມືອງຂອງຕໍາຫຼວດທະເລຫວຽດນາມ. ຕາມທ່ານພົນຕີ ບຸ່ຍກວກອວາຍ ແລ້ວ, ຕໍາຫຼວດທະເລຫວຽດນາມ ໄດ້ກໍານົດເອົາການດໍາເນີນວຽກງານພັກ, ວຽກງານການເມືອງແມ່ນຫຼັກການພື້ນຖານ ແລະເນື້ອໃນສໍາຄັນໃນການເຄື່ອນໄຫວນໍາພາຂອງພັກຕໍ່ກັບກໍາລັງ.

ການເຄື່ອນໄຫວວຽກງານພັກ, ວຽກງານການເມືອງຂອງຕໍາຫຼວດທະເລຫວຽດນາມ ລວມມີຫຼາຍເນື້ອໃນ, ເຊິ່ງໄດ້ສຸມໃສ່ວຽກງານການສຶກສາດ້ານການເມືອງ,  ແນວຄິດ; ຖືເປັນສໍາຄັນໃນການສ້າງຕັ້ງຄະນະພັກ, ອົງການຈັດຕັ້ງພັກໃຫ້ເຂັ້ມແຂງທາງດ້ານການເມືອງ, ແນວຄິດ; ຮັກສາ ແລະເພີ່ມທະວີສາຍພົວພັນອັນໃກ້ຊິດກັບປະຊາຊົນ. ຜ່ານບັນດາການເຄື່ອນໄຫວວຽກງານພັກ, ວຽກງານການເມືອງ, ໃນຊຸມປີຜ່ານມາ, ກໍາລັງຕໍາຫຼວດທະເລຫວຽດນາມ ໄດ້ພັດທະນາຢ່າງຮອບດ້ານ, ເຕີບໃຫຍ່ເຂັ້ມແຂງຂຶ້ນເທື່ອລະກ້າວ, ຄຸນນະພາບສັງລວມ ແລະຄວາມສາມາດກຽມພ້ອມສູ້ຮົບ, ກໍາລັງຄວາມສາມາດປະຕິບັດກົດໝາຍ ແລະກູ້ໄພກູ້ຊີບໄດ້ຍົກລະດັບຂຶ້ນ...; ຢັ້ງຢືນທີ່ຕັ້ງ, ອິດທິພົນຊື່ສຽງສໍາລັບກຳລັງປະຕິບັດກົດໝາຍຢູ່ພາກພື້ນ ແລະໃນໂລກ.

ທີ່ການພົບປະເຈລະຈາ, ທ່ານພົນຈັດຕະວາ Liu Houjie ໄດ້ຕີລາຄາສູງຄວາມໝາຍຄວາມສຳຄັນຂອງການເຄື່ອນໄຫວພົບປະແລກປ່ຽນວຽກງານພັກ, ວຽກງານການເມືອງລະຫວ່າງສອງກໍາລັງ; ຖືວ່ານີ້ແມ່ນກາລະໂອກາດເພື່ອໃຫ້ສອງຝ່າຍຊຸກຍູ້ການຮ່ວມມືໃຫ້ເຂົ້າສູ່ລວງເລິກ. ທ່ານພົນຈັດຕະວາ Liu Houjie ຢັ້ງຢືນວ່າ: “ຫວຽດນາມ ແລະຈີນ ລ້ວນແຕ່ແມ່ນປະເທດສັງຄົມນິຍົມ, ມີຄວາມຄ້າຍຄືກັນຫຼາຍດ້ານໃນວຽກງານພັກ, ວຽກງານການເມືອງ, ມີປະສົບການທີ່ເປັນປະໂຫຍດຫຼາຍຢ່າງເຊິ່ງພວກເຮົາ ສາມາດຮໍ່າຮຽນ ແລະເພີ່ມເຕີມໃຫ້ກັນ. ສິ່ງນີ້ແນ່ນອນວ່າຈະປະກອບສ່ວນເພີ່ມທະວີຄວາມໄວ້ເນື້ອເຊື່ອໃຈລະຫວ່າງສອງຝ່າຍ, ຊຸກຍູ້ການພົວພັນມິດຕະພາບລະຫວ່າງສອງກໍາລັງ”.

ໂດຍ: ເຈິ່ນຮວ່ຽນ