ຢ້ຽມຢາມຮ່ອງຮອຍປະຫວັດສາດ ຢູ່ ຈີນ

ເຂົ້າຮ່ວມນໍາຄະນະມີ ທ່ານພົນຕີ ຟ້າມເຈື່ອງເຊີນ, ຮອງຫົວໜ້າກົມໃຫຍ່ເສນາທິການກອງທັບປະຊາຊົນຫວຽດນາມ; ທ່ານພົນຕີ ເລກວາງມິງ ຮອງຫົວໜ້າກົມໃຫຍ່ການເມືອງກອງທັບປະຊາຊົນຫວຽດນາມ; ພ້ອມດ້ວຍບັນດາສະຫາຍແມ່ນການນໍາຫຼັກແຫຼ່ງຂອງເຫຼົ່າທັບ, ເຫຼົ່າຮົບ, ກົມກອງທີ່ມີການຮ່ວມມືຢ່າງແໜ້ນແຟ້ນກັບຈີນ, ບັນດາທະຫານເຂດທີ່ມີເສັ້ນຊາຍແດນຕິດກັບແຂວງກວາງຊີ ຂອງ ຈີນ.

ຄະນະປະຕິບັດງານ ຮັບຟັງການແນະນໍາທີ່ສໍານັກງານສະມາຄົມຊາວໜຸ່ມປະຕິວັດຫວຽດນາມ. ພາບ: ຫງວຽນຮວ່າ.

ທ່ານພົນໂທ ຮວ່າງຊວນຈ໊ຽນ ຕີລາຄາສູງການປະສານສົມທົບກັນຈັດຕັ້ງ, ຜັນຂະຫຍາຍ, ປະຕິບັດມາດຕະການວຽກງານຊາຍແດນລະຫວ່າງທະຫານຊາຍແດນຫວຽດນາມ ແລະດ່ານຊາຍແດນກວດກາການເຂົ້າ-ອອກເມືອງ ກວາງໂຈ ໃນໄລຍະຜ່ານມາ. ສອງຝ່າຍໄດ້ແລກປ່ຽນຂໍ້ມູນຂ່າວສານເປັນປະຈຳກ່ຽວກັບບັນຫາທີ່ເກີດຂຶ້ນໃນວຽກງານກວດກາ, ຄວບຄຸມຄົນ, ພາຫະນະເຂົ້າ-ອອກເມືອງ.

ຊຸດໂຕະຕັ່ງ ທີ່ລຸງໂຮ່ ແລະບັນພະບຸລຸດນໍາໃຊ້ຢູ່ສໍານັກງານສະມາຄົມຊາວໜຸ່ມປະຕິວັດຫວຽດນາມ. ພາບ: ຫງວຽນຮວ່າ.

ສະແດງຄວາມຍິນດີຕ້ອນຮັບຄະນະຜູ້ແທນຂັ້ນສູງກະຊວງປ້ອງກັນປະເທດຫວຽດນາມ ມາຢ້ຽມຢາມ ແລະເຮັດວຽກ, ທ່ານ Zhao Yongkun ຫົວໜ້າດ່ານຊາຍແດນກວດກາການເຂົ້າ-ອອກເມືອງ ກວາງໂຈ ເນັ້ນໜັກວ່າ, ພາຍໃຕ້ການນໍາພາ, ຊີ້ນໍາຂອງກະຊວງປ້ອງກັນປະເທດຫວຽດນາມ ແລະກະຊວງຕໍາຫຼວດຈີນ, ເຊິ່ງໂດຍກົງແມ່ນກອງບັນຊາການທະຫານຊາຍແດນຫວຽດນາມ  ແລະກົມຄຸ້ມຄອງການຍົກຍ້າຍປະຊາຊົນແຫ່ງຊາດ ຈີນ, ບັນດາກົມກອງຂອງຫວຽດນາມ ແລະດ່ານຊາຍແດນກວດກາການເຂົ້າ-ອອກເມືອງ ກວາງໂຈ ຂອງຈີນ ທີ່ຍາມໃດກໍຕັ້ງໜ້າປະສານສົມທົບກັນຢ່າງແໜ້ນແຟ້ນ, ຮັກສາການປະຕິບັດວຽກງານຄຸ້ມຄອງຊາຍແດນ, ດ່ານຊາຍແດນ ແລະບັນດາການເຄື່ອນໄຫວອື່ນທີ່ກ່ຽວຂ້ອງຢ່າງມີປະສິດທິຜົນ, ຜ່ານນັ້ນປະກອບສ່ວນກໍ່ສ້າງຊາຍແດນສອງປະເທດສັນຕິພາບ, ສະຖຽນລະພາບ, ຮ່ວມມື ແລະພ້ອມກັນພັດທະນາ.

ຄະນະປະຕິບັດງານ ຢ້ຽມຢາມໂຮງໝໍ Nan Xishan. ພາບ: ຫງວຽນຮວ່າ.

ນີ້ກໍແມ່ນການເຄື່ອນໄຫວສຸດທ້າຍໃນການຢ້ຽມຢາມຂອງຄະນະຜູ້ແທນຂັ້ນສູງກະຊວງປ້ອງກັນປະເທດຫວຽດນາມ. ຕີລາຄາຜົນສໍາເລັດຂອງການໄປປະຕິບັດງານ, ທ່ານພົນໂທ ຮວ່າງຊວນຈ໊ຽນ ເນັ້ນໜັກວ່າ ນີ້ແມ່ນການເຄື່ອນໄຫວທີ່ມີຄວາມໝາຍສໍາຄັນໃນບັນດາການເຄື່ອນໄຫວສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ. ການເຄື່ອນໄຫວນີ້ກໍແມ່ນໂອກາດເພື່ອໃຫ້ການນໍາກອງທັບຫວຽດນາມ ແລະຈີນ ເພີ່ມທະວີການພົບປະ, ປັບປຸງຄວາມໄວ້ເນື້ອເຊື່ອໃຈດ້ານການເມືອງ, ເຂົ້າໃຈຢ່າງເລິກເຊິ່ງຕື່ມອີກກ່ຽວກັບມູນເຊື້ອມິດຕະພາບອັນດີງາມລະຫວ່າງສອງປະເທດ, ສອງກອງທັບ.

ທ່ານພົນໂທ ຮວ່າງຊວນຈ໊ຽນ ແລກປ່ຽນກັບຄະນະປະຕິບັດງານ ຢູ່ຂຸມຝັງສົບນັກຮົບເສຍສະຫຼະຊີວິດເພື່ອຊາດ ຟ້າມຮົ່ງຖ໊າຍ. ພາບ: ຫງວຽນຮວ່າ.

ແລກປ່ຽນກັບນັກຂ່າວໜັງສືພິມກອງທັບປະຊາຊົນ, ທ່ານພົນໂທ ຮວ່າງຊວນຈ໊ຽນ ຢັ້ງຢືນວ່າ ການຢ້ຽມຢາມໄດ້ປະສົບຜົນສໍາເລັດຢ່າງຈົບງາມ. ຄະນະໄປຢ້ຽມຢາມສະຖານທີ່ປະຫວັດສາດທີ່ຕິດພັນກັບການປະຕິວັດຫວຽດນາມ ຫຼາຍແຫ່ງ, ນີ້ບໍ່ພຽງແຕ່ແມ່ນໂອກາດເພື່ອໃຫ້ບັນດາສະຫາຍການນໍາ, ຜູ້ບັນຊາບັນດາອົງການກົມກອງໃນກອງທັບ ເຂົ້າໃຈຕື່ມອີກກ່ຽວກັບວິວັດການເຄື່ອນໄຫວປະຕິວັດທີ່ທຸກຍາກລໍາບາກ, ສະຫງ່າອົງອາດຂອງບັນພະບຸລຸດຮຸ່ນຕ່າງໆເທົ່ານັ້ນຫາກຍັງແມ່ນໂອກາດເພື່ອໃຫ້ກອງທັບສອງປະເທດຫວຽດນາມ ແລະຈີນ ມີໂອກາດພົບປະແລກປ່ຽນ, ຮໍ່າຮຽນ, ຍົກສູງຄວາມເຂົ້າໃຈ, ນໍ້າໃຈມິດຕະພາບ, ເພື່ອເຮັດໃຫ້ການຮ່ວມມືນັບມື້ນັບແທດຈິງ ແລະມີປະສິດທິຜົນ.

ທ່ານພົນໂທ ຮວ່າງຊວນຈ໊ຽນ ກ່າວວ່າ: “ຂ້າພະເຈົ້າ ຖືວ່າ ລະບົບບັນດາຮ່ອງຮອຍປະຕິວັດທີ່ຕິດພັນກັບຫວຽດນາມ ໃນດິນແດນຈີນ ໄດ້ຮັບການຮັກສາໄວ້ ແລະເສີມຂະຫຍາຍໃນປັດຈຸບັນນັ້ນບໍ່ພຽງແຕ່ເປັນບ່ອນສຶກສາອົບຮົມອຸດົມການປະຕິວັດທີ່ມີຊີວິດຊີວາເທົ່ານັ້ນຫາກຍັງເປັນ “ສະຖານທີ່ປະຫວັດສາດ” ແຫ່ງນໍ້າໃຈມິດຕະພາບ ຫວຽດນາມ-ຈີນ” ອີກດ້ວຍ.

ໂດຍ: ໄຊຊະນະ