ພຶດຕິກຳສິລະປະຍຸດການທະຫານຫວຽດນາມ ໄດ້ຮັບການກຳເນີດ ແລະພັດທະນາຕິດພັນກັບການຕໍ່ສູ້ສ້າງສາ ແລະປົກປັກຮັກສາປະເທດຊາດ, ໃນເງື່ອນໄຂປະເທດ ຫວຽດນາມ ຕ້ອງຕໍ່ສູ້ຕ້ານສັດຕູຜູ້ຮຸກຮານທີ່ໃຫຍ່ໂຕເຂັ້ມແຂງທົບຫຼາຍເທົ່າ. ສິລະປະຍຸດການທະຫານຫວຽດນາມ ເລີ່ມຈາກພື້ນຖານສິລະປະທົ່ວປວງຊົນຕີສັດຕູດ້ວຍຮູບການກອງຫຼອນ, ສົງຄາມກອງຫຼອນ, ລຸກຮື້ຂຶ້ນຕໍ່ສູ້ດ້ວຍກຳລັງອາວຸດ... ແຕ່ສະຕະວັດ 10, ສິລະປະຍຸດການທະຫານຫວຽດນາມ ໄດ້ພັດທະນາກາຍເປັນສິລະປະເປັນເຈົ້າການ, ບັງເອີນ ບຸກໂຈມຕີສັດຕູຢູ່ຖານທັບ, ສ້າງເງື່ອນໄຂຍາດເອົາໄຊຊະນະໃນການຕໍ່ສູ້ຍຸດທະສາດດ້ວຍການຈັ້ງທ່າຂະໜາດໃຫຍ່.
ໃນຊຸມປີຜ່ານມາ, ບັນຫາເພີ່ມທະວີການປ້ອງກັນຊາດ, ປ້ອງກັນຄວາມສະຫງົບເພື່ອປົກປັກຮັກສາເອກະລາດ, ອະທິປະໄຕ, ທ້ອນໂຮມປະເທດເປັນເອກະພາບ, ປົກປັກຮັກສາເຂດນ່ານຟ້າ, ເຂດນ່ານທະເລ, ຮັກສາສະພາບແວດລ້ອມສັນຕິພາບ, ສະຖຽນລະພາບເພື່ອພັດທະນາປະເທດແບບຍືນຍົງຕາມກຳນົດທິດສັງຄົມນິຍົມ, ໄດ້ຮັບກຳນົດວ່າແມ່ນໜ້າທີ່ສຳຄັນ, ເປັນປະຈຳຂອງພັກ, ລັດ, ລະບົບການເມືອງ ແລະທົ່ວປວງຊົນ. ດ້ວຍທິດນຳເປັນເຈົ້າການປ້ອງກັນ ແລະສະກັດກັ້ນຄວາມສ່ຽງເກີດສົງຄາມ, ການປະທະກັນ “ແຕ່ຫົວທີ, ແຕ່ໄກ”, ມານະພະຍາຍາມສູ້ຊົນສະກັດກັ້ນການປະທະກັນ, ສົງຄາມ ແລະແກ້ໄຂຂໍ້ຂັດແຍ່ງກັນໂດຍສັນຕິວິທີທີ່ສອດຄ່ອງກັບກົດໝາຍສາກົນ, ທົ່ວພັກ, ທົ່ວປວງຊົນ, ທົ່ວກອງທັບ ໄດ້ຕັ້ງໜ້າຈັດຕັ້ງຜັນຂະຫຍາຍການປະຕິບັດຍຸດທະສາດປົກປັກຮັກສາປະເທດຊາດ ໃນສະພາບການໃໝ່ ແລະບັນດາຍຸດທະສາດການທະຫານ, ການປ້ອງກັນຊາດຢ່າງຮອບດ້ານ, ຄົບຊຸດ.
    |
 |
|
ດ້ຽນບຽນຝູ - ສຸດຍອດຂອງສິລະປະຍຸດການທະຫານຫວຽດນາມ ໃນການຕໍ່ສູ້ຕ້ານພວກລ່າເມືອງຂຶ້ນຝລັ່ງ. ພາບ: nhandan.vn |
ບົນພື້ນຖານຜົນງານໃນການຄົ້ນຄວ້າພັດທະນາສິລະປະຍຸດການທະຫານໃນໄລຍະຜ່ານມາ, ມູນເຊື້ອສິລະປະຍຸດການທະຫານຂອງຊາດ, ແນວທາງການປ້ອງກັນຊາດ, ການທະຫານຂອງພັກ, ວຽກງານຄົ້ນຄວ້າ, ພັດທະນາສິລະປະຍຸດການທະຫານ ຫວຽດນາມ ໃນໄລຍະຈະມາເຖິງກ່ອນອື່ນໝົດຕ້ອງເປັນເຈົ້າການຄົ້ນຄວ້າ, ຄາດຄະເນເປົ້າໝາຍສູ້ຮົບ, ກຳນົດບັນດາຮູບແບບສົງຄາມ. ນີ້ແມ່ນບັນຫາທີ່ມີຄວາມໝາຍສຳຄັນພິເສດ, ພື້ນຖານ ເພື່ອຄົ້ນຄວ້າພັດທະນາສິລະປະຍຸດການທະຫານຫວຽດນາມ, ໂດຍສະເພາະແມ່ນການຄົ້ນຄວ້າພັດທະນາຍຸດທະສາດການທະຫານ, ສິລະປະຍຸດບັ້ນຮົບໃຫ້ສອດຄ່ອງກັບພຶດຕິກຳຕົວຈິງຂອງສົງຄາມ.
ໃນເງື່ອນໄຂໂລກ, ພາກພື້ນ ແລະພາຍໃນປະເທດມີການຜັນແປທີ່ຄາດເດົາໄດ້ຍາກ, ວຽກງານຄົ້ນຄວ້າພັດທະນາທິດສະດີການທະຫານກ່ຽວກັບການສ້າງພື້ນຖານທົ່ວປວງຊົນປ້ອງກັນຊາດ, ທ່າສະໜາມຮົບທົ່ວປວງຊົນປ້ອງກັນຊາດ, ທ່າສະໜາມຮົບສົງຄາມປະຊາຊົນ, ທ່າສະໜາມຮົບທົ່ວປວງຊົນຕີສັດຕູຕ້ອງຮອບດ້ານໃນທຸກດ້ານ, ສະໜິດຕິດພັນກັບພື້ນຖານທົ່ວປວງຊົນປ້ອງກັນຄວາມສະຫງົບໃນຂອບເຂດທົ່ວປະເທດ; ພິເສດຢູ່ເຂດພາກຍຸດທະສາດ, ທິດທາງຍຸດທະສາດ, ສະໜາມຮົບຈຸດສຸມຢູ່ 3 ພາກ: ເໜືອ, ກາງ, ໃຕ້. ເພີ່ມທະວີຄວາມສາມາດດ້ານປ້ອງກັນຊາດ, ປ້ອງກັນຄວາມສະຫງົບ, ຍົກສູງຄວາມສາມາດລະດົມທຸກແຫຼ່ງກຳລັງເພື່ອຕອບສະໜອງຄວາມຕ້ອງການດ້ານປ້ອງກັນຊາດ, ການທະຫານໃນໄລຍະສັນຕິພາບ ແລະໄລຍະສົງຄາມ. ສືບຕໍ່ຄົ້ນຄວ້າ, ປັບປຸງເນື້ອໃນ, ແບບວິທີດຳເນີນສົງຄາມປະຊາຊົນເພື່ອປົກປັກຮັກສາປະເທດຊາດໃນເງື່ອນໄຂໃໝ່.
ກອງທັບປະຊາຊົນຫວຽດນາມ ແມ່ນກຳລັງຫຼັກແຫຼ່ງ, ພ້ອມກັບທົ່ວປວງຊົນສ້າງກຳລັງແຮງ ເພື່ອປົກປັກຮັກສາປະເທດຊາດ. ໃນໄລຍະສັນຕິພາບ, ກອງທັບໝັ້ນຄົງເຂັ້ມແຂງ, ມີກຳລັງສູ້ຮົບສູງແມ່ນເຄື່ອງມື ເພື່ອສະກັດກັ້ນຄວາມສ່ຽງເກີດສົງຄາມ; ໃນໄລຍະສົງຄາມແມ່ນກຳລັງຫຼັກແຫຼ່ງແກ່ນສານ ເພື່ອໃຫ້ທົ່ວປວງຊົນຕີສັດຕູ. ເພາະສະນັ້ນ, ຕ້ອງຄົ້ນຄວ້າຈັດຕັ້ງກຳລັງກອງທັບ, ທະຫານລາດປ້ອງກັນຕົວໃຫ້ສອດຄ່ອງກັບທັດສະນະ, ແນວທາງທົ່ວປວງຊົນປ້ອງກັນຊາດ ແລະສົງຄາມປະຊາຊົນຂອງພັກ; ສ້າງໂຄງປະກອບຢ່າງຄົບຊຸດ, ເໝາະສົມລະຫວ່າງທະຫານຫຼວງ, ທະຫານທ້ອງຖິ່ນ ແລະທະຫານລາດປ້ອງກັນຕົວ, ລະຫວ່າງກຳລັງປະຈຳການກັບກຳລັງສຳຮອງ, ລະຫວ່າງກຳລັງສູ້ຮົບກັບກຳລັງຮັບປະກັນການສູ້ຮົບ, ລະຫວ່າງບັນດາເຫຼົ່າທັບ, ເຫຼົ່າຮົບ. ສຸມໃສ່ຄົ້ນຄວ້າໃຫ້ບຸລິມະສິດແກ່ບັນດາກຳລັງປະຕິບັດໜ້າທີ່ປະຈຳການກຽມພ້ອມສູ້ຮົບ, ປົກປັກຮັກສາຊາຍແດນ, ທະເລ, ໝູ່ເກາະ, ໄຫຼ່ທະວີບໃນແຕ່ລະຮູບຖານສົງຄາມ ແລະຮູບການສູ້ຮົບຍຸດທະສາດ, ບັ້ນຮົບ, ກຽມພ້ອມພັດທະນາເປີດກວ້າງກຳລັງໃຫ້ເໝາະສົມ, ຕອບສະໜອງຕາມຄວາມຮຽກຮ້ອງຕ້ອງການຂອງສົງຄາມ. ຄົ້ນຄວ້າກໍ່ສ້າງກອງທັບໃຫ້ມີຄວາມໝັ້ນຄົງເຂັ້ມແຂງດ້ານການເມືອງ, ແນວຄິດ, ຄຸນສົມບັດ, ການຈັດຕັ້ງ ແລະພະນັກງານ, ຈົ່ງຮັກພັກດີຕໍ່ພັກ, ປະເທດຊາດ ແລະປະຊາຊົນ; ກຽມພ້ອມສູ້ຮົບ, ເສຍສະຫຼະຊີວິດເພື່ອຜົນປະໂຫຍດຂອງປະເທດ ແລະຂອງຊາດ, ເພື່ອເອກະລາດ, ເສລີພາບຂອງປະເທດຊາດ ແລະຄວາມຜາສຸກຂອງປະຊາຊົນ.
ສືບຕໍ່ຍູ້ແຮງການຄົ້ນຄວ້າບັນດາຮູບແບບສູ້ຮົບຍຸດທະສາດ, ສິລະປະຍຸດບັ້ນຮົບ ແລະຍຸດທະວິທີຕອບສະໜອງກັບທ່າອ່ຽງພັດທະນາຂອງສົງຄາມໃນອະນາຄົດ. ຍຸດທະສາດການທະຫານຫວຽດາມ ກຳນົດບັນດາຮູບແບບສູ້ຮົບຍຸດທະສາດ, ນັ້ນແມ່ນພື້ນຖານ ເພື່ອຄົ້ນຄວ້າພັດທະນາທິດສະດີ ແລະພຶດຕິກຳກ່ຽວກັບການຈັດຕັ້ງການກະກຽມ ແລະຫັດແອບສູ້ຮົບຂອງແຕ່ລະຮູບແບບສູ້ຮົບລະອຽດ. ດ້ານທິດສະດີ, ແຕ່ລະຮູບແບບສູ້ຮົບມີຈຸດພິເສດລັກສະນະຈຳເພາະ; ແຕ່ລະຮູບແບບສູ້ຮົບ, ສິລະປະຍຸດການທະຫານຕ້ອງ ຄົ້ນຄວ້າລັກສະນະ, ກົດເກນ, ເປົ້າໝາຍ, ຈຸດປະສົງ, ກົນອຸບາຍ, ເລ່ຫຼ່ຽມ, ມາດຕະການສູ້ຮົບຂອງສັດຕູ, ເພື່ອເປັນພື້ນຖານກຳນົດເປົ້າໝາຍ, ຫຼັກການ, ວິທີການສູ້ຮົບຂອງເຮົາ. ດ້ານພຶດຕິກຳ, ສິລະປະຍຸດການທະຫານ, ຕ້ອງສຸມໃສ່ຄົ້ນຄວ້າວຽກງານກະກຽມການຈັດຕັ້ງ ແລະຫັດແອບການສູ້ຮົບ, ການເຄື່ອນໄຫວຂອງຜູ້ບັນຊາ, ອົງການ ແລະກຳລັງເຂົ້າຮ່ວມສູ້ຮົບ. ໃນນັ້ນ, ເອົາໃຈໃສ່ຄົ້ນຄວ້າພັດທະນາສິລະປະການຈັດຕັ້ງ, ຜູ້ບັນຊາ, ບໍລິຫານການສູ້ຮົບຍຸດທະສາດ, ບັ້ນຮົບ ແລະຍຸດທະວິທີ ກໍ່ຄືຄົ້ນຄວ້າ, ປັບປຸງກົນໄກຄຸ້ມຄອງ, ການຈັດຕັ້ງ, ການບັນຊາ, ບໍລິຫານຂອງຜູ້ບັນຊາກຳລັງປະກອບອາວຸດທ້ອງຖິ່ນ, ອົງການການທະຫານ, ຄະນະພັກ, ອຳນາດການປົກຄອງທ້ອງຖິ່ນໃນການສູ້ຮົບປ້ອງກັນຕົວ ແລະຮູບແບບການສູ້ຮົບອື່ນໆ; ຈັດຕັ້ງການປະສານສົມທົບກັບບັນດາພະແນກ, ກະຊວງ, ຂະແໜງການ ສູນກາງ, ທ້ອງຖິ່ນປະຕິບັດການຮັບປະກັນບັນດາການເຄື່ອນໄຫວສູ້ຮົບເປັນຢ່າງດີ.
ນອກຈາກນັ້ນ, ສືບຕໍ່ຍູ້ແຮງວຽກງານຄົ້ນຄວ້າສະຫຼຸບປະຫວັດສາດການສົງຄາມ, ສິລະປະຍຸດການທະຫານຂອງຫວຽດນາມ ແລະໂລກ, ຖອດຖອນບົດຮຽນກ່ຽວກັບມູນເຊື້ອສິລະປະຍຸດການທະຫານຂອງຊາດ ກໍ່ຄືສິລະປະຍຸດການທະຫານຍອດຢ້ຽມຂອງໂລກ, ໝູນໃຊ້ເຂົ້າໃນການພັດທະນາສິລະປະຍຸດການທະຫານຫວຽດນາມ ໃນສົງຄາມອະນາຄົດ; ໂດຍສະເພາະແມ່ນສົງຄາມ, ການປະທະກັນດ້ວຍກຳລັງອາວຸດໃນໂລກທີ່ເກີດຂຶ້ນໃນໄລຍະມໍ່ໆມານີ້ ເພື່ອຊອກຫາວິທີພັດທະນາໃໝ່ ໃນກົດເກນ ກໍ່ຄື ການຜັນແປຂອງສົງຄາມເພື່ອເປັນພື້ນຖານປັບປຸງ, ເພີ່ມເຕີມ, ພັດທະນາສິລະປະຍຸດ ການ ທະຫານຫວຽດນາມ, ໝູນໃຊ້ຢ່າງເໝາະສົມໃນສົງຄາມປົກປັກຮັກສາປະເທດຊາດ.
ໂດຍ: ແສງເດືອນ