ຍົກສູງຄວາມສາມາດຂອງອາຊຽນ ຕໍ່ໜ້າສິ່ງທ້າທາຍເຖິງຄວາມໝັ້ນຄົງ

ທ່ານພົນເອກ ຫງວຽນເຕິນເກືອງ ເນັ້ນໜັກວ່າ ສະພາບຄວາມໝັ້ນຄົງຂອງໂລກ ແລະພາກພື້ນພວມມີການປ່ຽນແປງຢ່າງວ່ອງໄວ, ແຂງແຮງ, ຄາດຄະເນລ່ວງໜ້າໄດ້ຍາກ. ໃນຂະນະສິ່ງທ້າທາຍດ້ານຄວາມໝັ້ນຄົງບໍ່ເປັນການທະຫານ, ຄື: ພະຍາດ, ການປ່ຽນແປງຂອງດິນຟ້າອາກາດ, ໄພທຳມະຊາດ, ຄວາມໝັ້ນຄົງຂອງຊັບພະຍາກອນນ້ຳ... ນັບມື້ນັບຂ້ຽວຂາດ, ບັນດາບັນຫາຄວາມໝັ້ນຄົງທີ່ກ່ຽວຂ້ອງກັບການທະຫານກໍ່ຜັນແປຢ່າງສັບສົນ. ສິ່ງທ້າທາຍເຫຼົ່ານີ້ເກີນຂອບເຂດ ແລະການຄວບຄຸມຂອງປະເທດໜຶ່ງ, ສົ່ງຜົນສະທ້ອນເຖິງສະພາບຄວາມໝັ້ນຄົງຂອງແຕ່ລະປະເທດ, ພາກພື້ນ ແລະທົ່ວໂລກ. ສະນັ້ນຕ້ອງມີການຮ່ວມແຮງຮ່ວມໃຈຂອງປະເທດສະມາຊິກອາຊຽນເວົ້າລວມ ກໍຄືບົດບາດຂອງຜູ້ນໍາກຳລັງສືບຂ່າວການທະຫານ/ປ້ອງກັນຊາດບັນດາປະເທດອາຊຽນ ເວົ້າສະເພາະ ເພື່ອຮັບມືຢ່າງທັນການ, ຮັບປະກັນຊີວິດການເປັນຢູ່ທີ່ມີຄວາມສະຫງົບສຸກໃຫ້ແກ່ປະຊາຊົນໃນພາກພື້ນ.

ທ່ານພົນເອກ ຫງວຽນເຕິນເກືອງ  ຕ້ອນຮັບຫົວໜ້າຄະນະຜູ້ແທນບັນດາປະເທດອາຊຽນ ເຂົ້າຮ່ວມກອງປະຊຸມຜູ້ນໍາປະຊາຄົມສືບຂ່າວການທະຫານ/ການປ້ອງກັນຊາດອາຊຽນ  ຄັ້ງທີ 1. ພາບ: qdnd.vn

ທີ່ການຕ້ອນຮັບ, ຜູ້ຕາງໜ້າຫົວໜ້າຄະນະຜູ້ແທນບັນດາປະເທດອາຊຽນ ໄດ້ແຈ້ງໃຫ້ທ່ານພົນເອກ ຫງວຽນເຕິນເກືອງ ຮັບຊາບກ່ຽວກັບໝາກຜົນຂອງກອງປະຊຸມຜູ້ນໍາປະຊາຄົມສືບຂ່າວການທະຫານ/ການປ້ອງກັນຊາດອາຊຽນ  ຄັ້ງທີ 1  (AMICLC-1); ເນັ້ນໜັກເຖິງຜົນສຳເລັດຂອງກອງປະຊຸມປະກອບສ່ວນເພີ່ມທະວີການຮ່ວມມືໃນຂົງເຂດສືບຂ່າວການທະຫານ/ການປ້ອງກັນຊາດຂອງອາຊຽນ, ຜ່ານນັ້ນປະກອບສ່ວນຊຸກຍູ້ສັນຕິພາບ, ຄວາມໝັ້ນຄົງ, ການພັດທະນາຂອງພາກພື້ນ ແລະ ໂລກ.

ທ່ານພົນເອກ ຫງວຽນເຕິນເກືອງ ພ້ອມດ້ວຍຫົວໜ້າຄະນະຜູ້ແທນບັນດາປະເທດອາຊຽນ ເຂົ້າຮ່ວມ AMICLC-1. ພາບ: qdnd.vn

ທ່ານພົນເອກ ຫງວຽນເຕິນເກືອງ ເນັ້ນໜັກວ່າ: ເນື້ອໃນປຶກສາຫາລືທີ່ກອງປະຊຸມ AMICLC-1 ໄດ້ສະແດງໃຫ້ເຫັນບັນດາບັນຫາທີ່ຕ່າງຝ່າຍຕ່າງມີຄວາມສົນໃຈ, ສະເໜີບັນດາທິດທາງ ກໍຄືຮູບການຮ່ວມມື, ແບ່ງປັນຂໍ້ມູນຂ່າວສານ ເພື່ອແນໃສ່ຮັບປະກັນບົດບາດໃຈກາງຂອງອາຊຽນ ໃນສະພາບການປະຈຸບັນ. ກອງປະຊຸມຍັງເປັນຂີດໝາຍການເຄື່ອນໄຫວທາງການຂອງປະຊາຄົມສືບຂ່າວການທະຫານ/ການປ້ອງກັນຊາດອາຊຽນ (AMIC) ເພື່ອແນໃສ່ເພີ່ມທະວີຄວາມສາມັກຄີ, ຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ ແລະຄວາມເຫັນດີເຫັນພ້ອມລະຫວ່າງ ກຳລັງທະຫານຂອງບັນດາປະເທດສະມາຊິກອາຊຽນ. ກອງປະຊຸມເປັນການຢັ້ງຢືນຄຳໝັ້ນສັນຍາຢ່າງແຂງແຮງຂອງບັນດາປະເທດສະມາຊິກອາຊຽນ ໃນການຫັນເປົ້າໝາຍ “ອາຊຽນ: ວິໄສທັດດຽວ, ສີສັນດຽວ, ປະຊາຄົມດຽວ” ໃຫ້ປະກົດຜົນເປັນຈິງ. ນີ້ກໍແມ່ນເປົ້າໝາຍທີ່ກະຊວງປ້ອງກັນປະເທດຫວຽດນາມ ແລະກອງທັບປະຊາຊົນຫວຽດນາມ ຍາມໃດກໍ່ສະໜັບສະໜູນ ແລະ ມຸ່ງໄປເຖິງ, ເພື່ອສັນຕິພາບ, ສະຖຽນລະພາບ ແລະຄວາມວັດທະນາຖາວອນຢູ່ພາກພື້ນ.

ໂດຍ: ທູຈາງ