ສະຖາບັນການເມືອງ ພົບປະສັງສັນກັບນາຍທະຫານປະຕິບັດໜ້າທີ່ຮັກສາສັນຕິພາບ ຂອງສະຫະປະຊາຊາດ

ບັນດາຜູ້ແທນເຂົ້າຮ່ວມການພົບປະສັງສັນ. ພາບ: qdnd.vn

ໃນໄລຍະການຝຶກອົບຮົມ ທີ່ກົມຮັກສາສັນຕິພາບຫວຽດນາມ ແລະຊຸດຝຶກອົບຮົມຢູ່ຈີນ ແລະໄທ, ນາຍທະຫານສອງຄົນ ໄດ້ສຸດຈິດສຸດໃຈ, ມີຄວາມຮັບຜິດຊອບ, ຕັ້ງໜ້າ, ມານະພະຍາຍາມສູ້ຊົນປະຕິບັດສຳເລັດໜ້າທີ່ທີ່ໄດ້ຮັບມອບໝາຍເປັນຢ່າງດີ. ການນໍາກະຊວງປ້ອງກັນປະເທດ ໄດ້ຕົກລົງຈັດສົ່ງພັນໂທ ເລທິບິກງອກ ໄປປະຕິບັດໜ້າທີ່ເປັນນາຍທະຫານເສນາ ທີ່ຄະນະປະຕິບັດງານ UNMISS (ຊູດັງໃຕ້); ສ່ວນຮ້ອຍໂທ ຫງວຽນຮວ່ຽນແອັງ ປະຕິບັດໜ້າທີ່ເປັນນາຍທະຫານສື່ສານ-ຖະແຫຼງຂ່າວທີ່ຄະນະປະຕິບັດງານ MINUSCA (ສາທາລະນະລັດ ອາຟຣິກາກາງ) ໃນໄລຍະ 1 ປີ.

ການນໍາສະຖາບັນການເມືອງ ມອບຊໍ່ດອກໄມ້ລະດົມກໍາລັງໃຈບັນດາສະຫາຍປະຕິບັດໜ້າທີ່ຮັກສາສັນຕິພາບຂອງສະຫະປະຊາຊາດ. ພາບ: qdnd.vn

ກ່າວຄຳເຫັນທີ່ການພົບປະສັງສັນ, ສະຫາຍຫົວໜ້າການເມືອງສະຖາບັນການເມືອງໄດ້ຍ້ອງຍໍ ແລະຊົມເຊີຍຜົນແຫ່ງການຝຶກອົບຮົມຂອງສອງສະຫາຍ, ພ້ອມທັງຮຽກຮ້ອງໃຫ້ສອງສະຫາຍສືບຕໍ່ຊາບຊຶມທັດສະນະ, ແນວທາງການພົວພັນຕ່າງປະເທດຂອງພັກ, ລັດ ແລະກອງທັບຢ່າງເລິກເຊິ່ງ; ປະຕິບັດລະບຽບວິໄນກອງທັບ, ຂໍ້ກໍານົດຂອງສະຫະປະຊາຊາດທີ່ຄະນະປະຕິບັດງານ ແລະ ກົດໝາຍຂອງປະເທດປະຈໍາຖິ່ນຢ່າງເຂັ້ມງວດ. ປະຕິບັດພາລະບົດບາດ, ໜ້າທີ່ວຽກງານຂອງພະນັກງານ ແລະສະມາຊິກພັກເປັນຢ່າງດີ, ຜ່ານນັ້ນຢັ້ງຢືນລະດັບຄວາມຮູ້, ຄວາມສາມາດຂອງນາຍທະຫານກອງທັບປະຊາຊົນຫວຽດນາມ, ພະນັກງານຂອງສະຖາບັນການເມືອງ, ປະກອບສ່ວນຊຸກຍູ້ການເຄື່ອນໄຫວຮັກສາສັນຕິພາບສະຫະປະຊາຊາດ ຂອງກອງທັບປະຊາຊົນຫວຽດນາມ ໃຫ້ນັບມື້ນັບເປັນມືອາຊີບ ແລະມີປະສິດທິຜົນ; ພ້ອມທັງ, ປະກອບສ່ວນແຜ່ຂະຫຍາຍພາບພົດອັນດີງາມຂອງກອງທັບປະຊາຊົນຫວຽດນາມ; ຮັບປະກັນຄວາມປອດໄພຢ່າງເດັດຂາດໃນວິວັດການປະຕິບັດໜ້າທີ່ວຽກງານ.

ນີ້ແມ່ນຄັ້ງທີ 2 ທີ່ກະຊວງປ້ອງກັນປະເທດ ໄດ້ໄວ້ເນື້ອເຊື່ອໃຈ  ແລະມອບໜ້າທີ່ໃຫ້ສະຖາບັນການເມືອງ ຈັດສົ່ງພະນັກງານເຂົ້າຮ່ວມກຳລັງຮັກສາສັນຕິພາບຂອງສະຫະປະຊາຊາດ.

ໂດຍ: ທູຈາງ