ຜົນການປະຕິບັດງານຂອງກໍາລັງສະກັດກັ້ນ, ຕ້ານຢາເສບຕິດ ແລະອາດຊະຍາກໍາ ທະຫານຊາຍແດນ ໃນ 20 ປີຜ່ານມາ ໄດ້ຮັບການຮັບຮູ້, ຕີລາຄາສູງຈາກພັກ, ລັດ, ບັນດາກະຊວງ, ຂະແໜງການ, ຄະນະພັກ, ອໍານາດການປົກຄອງທ້ອງຖິ່ນ ແລະປະຊາຊົນ. ພົ້ນເດັ່ນແມ່ນພາຍໃຕ້ການນໍາພາ, ຊີ້ນໍາຂອງຄະນະພັກການທະຫານສູນກາງ, ກະຊວງປ້ອງກັນປະເທດ ເຊິ່ງ ໂດຍກົງ ແລະເປັນປະຈໍາແມ່ນຄະນະພັກ, ກອງບັນຊາການທະຫານຊາຍແດນ, ກົມສະກັດກັ້ນ, ຕ້ານຢາເສບຕິດ ແລະອາດຊະຍາກໍາ ໄດ້ຜັນຂະຫຍາຍຮອບດ້ານວຽກງານວິຊາສະເພາະ; ປະຕິບັດວຽກງານເປັນເສນາທິການ, ແນະນໍາ, ຊີ້ນໍາບັນດາກົມກອງທະຫານຊາຍແດນ ປະຕິບັດໜ້າທີ່ສະກັດກັ້ນ, ຕ້ານຢາເສບຕິດ ແລະອາດຊະຍາກໍາ ຢູ່ເຂດຊາຍແດນ, ເຂດທະເລ ໄດ້ເປັນຢ່າງດີ; ຜັນຂະຫຍາຍວຽກງານວິຊາສະເພາະຢູ່ບໍລິເວນຈຸດສຸມຢ່າງຮອບດ້ານ; ຈັດຕັ້ງການຕໍ່ສູ້ກັບການຈັດຕັ້ງ, ເຄືອຂ່າຍອາດຊະຍາກໍາຢາເສບຕິດຂະໜາດໃຫຍ່, ຂ້າມຊາດ.
ກົມສະກັດກັ້ນ, ຕ້ານຢາເສບຕິດ ແລະອາດຊະຍາກໍາ ໄດ້ຕັ້ງໜ້າ, ເປັນເຈົ້າການເປັນເສນາທິການໃຫ້ຄະນະພັກ, ກອງບັນຊາການທະຫານຊາຍແດນ ລາຍງານ, ສະເໜີກະຊວງປ້ອງກັນປະເທດ ປັບປຸງ, ປະກາດໃຊ້ເອກະສານນິຕິກໍາຫຼາຍຮ້ອຍສະບັບ ກ່ຽວກັບວຽກງານວິຊາສະເພາະສະກັດກັ້ນ, ຕ້ານຢາເສບຕິດ ແລະອາດຊະຍາກໍາຂອງທະຫານຊາຍແດນ; ສ້າງແຜນຮ່າງ, ສ້າງຂອບນິຕິກໍາສະດວກໃຫ້ແກ່ວຽກງານສະກັດກັ້ນ, ຕ້ານຢາເສບຕິດ ແລະອາດຊະຍາກໍາຂອງທະຫານຊາຍແດນ. ເປັນເສນາທິການໃຫ້ແກ່ກອງບັນຊາການທະຫານຊາຍແດນ ຊີ້ນໍາ, ສົມທົບແໜ້ນແຟ້ນກັບກໍາລັງທີ່ກ່ຽວຂ້ອງພາຍໃນປະເທດ ແລະກໍາລັງທີ່ກ່ຽວຂ້ອງຂອງປະເທດເພື່ອນໃນການແລກປ່ຽນຂໍ້ມູນຂ່າວສານກ່ຽວກັບສະພາບອາດຊະຍາກໍາ, ລະເມີດກົດໝາຍ; ໜູນຊ່ວຍຜູ້ປະສົບເຄາະຮ້າຍທີ່ຖືກຊື້ຂາຍໃຫ້ເຊື່ອມຕົວເຂົ້າກັບຊຸມຊົນຄືນໃໝ່; ດໍາເນີນແຜນການດ້ານວິຊາການ, ວິຊາສະເພາະ, ຕໍ່ສູ້ກັບຄະດີ; ໄລ່ຈັບບັນດາເປົ້າໝາຍອາດຊະຍາກໍາຢູ່ເຂດຊາຍແດນ, ເຂດທະເລບັນລຸປະສິດ ທິຜົນສູງ. ເພີ່ມທະວີການຮ່ວມມືສາກົນໃນການສະກັດກັ້ນ, ຕ້ານອາດຊະຍາກໍາຈາກທາງໄກ, ຈາກນອກຊາຍແດນ. ຊີ້ນໍາທະຫານຊາຍແດນ ບັນດາແຂວງ, ນະຄອນ ຜັນຂະຫຍາຍໜ້າທີ່ສະກັດກັ້ນ, ຕ້ານຢາເສບຕິດ ແລະອາດຊະຍາກໍາ ຢູ່ຕາມເສັ້ນຊາຍແດນ, ເຂດທະເລ; ຕັ້ງໜ້າຄົ້ນຄວ້າມາດຕະການຕໍ່ສູ້ສະກັດກັ້ນວິທີ, ເລ່ລ່ຽມໃໝ່ຂອງອາດຊະຍາກໍາ; ພ້ອມທັງເອົາໃຈໃສ່ກໍ່ສ້າງຄຸນທາດການເມືອງ, ເຈດຈໍານົດຕັດສິນໃຈ, ຍົກສູງລະດັບຄວາມຮູ້ດ້ານວິຊາການ, ກົດໝາຍ ແລະສະຕິໃນການປະຕິບັດລະບຽບວິໄນ, ກົດໝາຍໃຫ້ພະນັກງານ, ນັກຮົບກໍາລັງສະກັດກັ້ນ, ຕ້ານຢາເສບຕິດ ແລະອາດຊະຍາກໍາ, ຕອບສະໜອງຄວາມຮຽກຮ້ອງຕ້ອງການຂອງໜ້າທີ່.
    |
 |
|
ທະຫານຊາຍແດນແຂວງໄຕນິງ ຈັບເປົ້າໝາຍ ແລະຂອງກາງແມ່ນຢາເສບຕິດໃນຄະດີ TN-1024P. ພາບ: ຢຸຍຫຽນ. |
ຕໍ່ໜ້າທີ່ສະກັດກັ້ນ, ຕ້ານອາດຊະຍາກໍາຢູ່ຕາມເສັ້ນຊາຍແດນທີ່ນັບມື້ນັບໜັກໜ່ວງ ແລະການເຄື່ອນໄຫວຂອງອາດຊະຍາກໍານັບມື້ນັບແນບນຽນ, ມີການກະທໍາໂສສ່ຽງ, ອັນຕະລາຍ; ເພື່ອສືບສວນ, ຕີຖືກເປົ້າໝາຍຫົວໂປ່ ແລະຫຼຸດຜ່ອນອັນຕະລາຍ, ໜູນຊ່ວຍໃຫ້ແກ່ກໍາລັງໂດຍກົງເຂົ້າເຖິງອາດຊະຍາກໍາ, ກໍາລັງສະກັດກັ້ນ, ຕ້ານຢາເສບຕິດ ແລະອາດຊະຍາກໍາ ໄດ້ນໍາໜ້າໃນການກໍ່ສ້າງຊອບແວ, ດໍາເນີນການຫັນຂໍ້ມູນດ້ານວິຊາການ, ວິຊາສະເພາະເປັນດີຈີຕອນ, ຜັນຂະຫຍາຍການຄຸ້ມຄອງ, ຂຸດຄົ້ນ, ຄົ້ນຄວ້າຊີ້ນໍາວຽກງານວິຊາສະເພາະສະກັດກັ້ນ, ຕ້ານຢາເສບຕິດ ແລະ ອາດຊະຍາກໍາ ໃນແອັບຢູ່ໃນສາມຂັ້ນບັນຊາໃນທະຫານຊາຍແດນ.
ເພື່ອໃຫ້ມີຜົນງານດັ່ງກ່າວ, ກໍາລັງສະກັດກັ້ນ, ຕ້ານຢາເສບຕິດ ແລະອາດຊະຍາກໍາ ຍາມໃດກໍປະເຊີນໜ້າກັບໄພອັນຕະລາຍ. ໄດ້ມີຫຼາຍແບບຢ່າງທີ່ສະຫຼາດຫຼັກແຫຼມ, ກ້າຫານ, ສູ້ຮົບເສຍສະຫຼະຊີວິດ, ປະກອບສ່ວນຮັກສາຄວາມໝັ້ນຄົງດ້ານການເມືອງ, ຄວາມເປັນລະບຽບຮຽບຮ້ອຍ, ຄວາມປອດໄພໃນສັງຄົມ, ນໍາເອົາຄວາມສະຫງົບສຸກມາໃຫ້ປະຊາຊົນເຂດຊາຍແດນຂອງປະເທດ. ພົ້ນເດັ່ນຄື: ນັກວິລະຊົນທີ່ເສຍສະຫຼະຊີວິດ ລູ່ກົງຖັ໋ງ (ທະຫານຊາຍແດນແຂວງເຊີນລາ); ນັກຮົບທີ່ເສຍສະຫຼະຊີວິດ ລໍວັນຮິງ (ທະຫານຊາຍແດນແຂວງດ້ຽນບຽນ); ນັກຮົບທີ່ເສຍສະຫຼະຊີວິດ ວີວັນເຍິດ (ທະຫານຊາຍແດນແຂວງແທັງຮວ໋າ); ນັກຮົບທີ່ເສຍສະຫຼະຊີວິດ ໂງຊວນວິງ (ທະຫານຊາຍແດນແຂວງລ້າງເຊີນ) ຫຼື ຮ້ອຍເອກ ຫງວຽນດິ່ງຕາຍ (ທະຫານຊາຍແດນແຂວງເງະອານ) ເຖິງວ່າໄດ້ຮັບບາດເຈັບໜັກ ແຕ່ຍັງເດັດດ່ຽວປາບປາມອາດຊະຍາກໍາ ຈົນຮອດວິນາທີສຸດທ້າຍ.
|
|
 |
|
ກອງບັນຊາການທະຫານຊາຍແດນ ຍ້ອງຍໍຊົມເຊີຍກົມກອງລວມໝູ່ ແລະບຸກຄົນທີ່ມີຜົນງານດີເດັ່ນໃນຄະດີ A3-124p ຕໍ່ສູ້ຕ້ານອາດຊະຍາກໍາຢາເສບຕິດ, ຕົ້ນປີ 2024. ພາບ: ຮຸ່ງຄວາ. |
ໃນໄລຍະຈະມາເຖິງ, ການເຄື່ອນໄຫວຂອງອາດຊະຍາກໍາ, ໄພສັງຄົມ, ໂດຍສະເພາະແມ່ນອາດຊະຍາກໍາຢາເສບຢິດ, ການຄ້າມະນຸດ, ເຂົ້າອອກເມືອງຜິດກົດໝາຍຢູ່ເຂດຊາຍແດນ, ເຂດທະເລ ຍັງຜັນແປຢ່າງສັບສົນ ດ້ວຍວິທີ, ເລ່ລ່ຽມນັບມື້ນັບແນບນຽນ, ມີການກະທໍາໂສສ່ຽງກວ່າ. ກໍາລັງສະກັດກັ້ນ, ຕ້ານຢາເສບຕິດ ແລະອາດຊະຍາກໍາ ທະຫານຊາຍແດນ ໄດ້ກໍ່ສ້າງ, ພັດທະນາຕາມທິດລວມສູນ, ລົງເລິກ, ເປັນເອກະພາບ, ຮັບປະກັນຄວາມຍອດຢ້ຽມ, ກະທັດຮັດ, ເຂັ້ມແຂງ, ປະຕິບັດສໍາເລັດທຸກໜ້າທີ່ຢ່າງດີເດັ່ນ. ໃນນັ້ນຕ້ອງສຸມໃສ່ປະຕິບັດບາງເນື້ອໃນດັ່ງລຸ່ມນີ້:
ທີໜຶ່ງແມ່ນ, ສືບຕໍ່ຊາບຊຶມ, ປະຕິບັດເຂັ້ມງວດ, ມີປະສິດທິຜົນແຜນນະໂຍບາຍ, ມະຕິ, ແຜນການ, ການຊີ້ນໍາຂອງສູນກາງ, ຄະນະພັກການທະຫານສູນກາງ, ກະຊວງປ້ອງກັນປະເທດ ແລະຄະນະພັກ, ກອງບັນຊາການທະຫານຊາຍແດນ ກ່ຽວກັບວຽກງານສະກັດກັ້ນ, ຕ້ານຢາເສບຕິດ ແລະອາດຊະຍາກໍາ, ຕິດພັນກັບໜ້າທີ່ຄຸ້ມຄອງ, ປົກປັກຮັກສາອະທິປະໄຕຜືນແຜ່ນດິນ, ຄວາມໝັ້ນຄົງຊາຍແດນແຫ່ງຊາດ ໄວ້ຢ່າງໝັ້ນຄົງ. ເປັນເຈົ້າການໃນການເປັນເສນາທິການ, ຊີ້ນໍາ, ແນະນໍາບັນດາກົມກອງ ປະຕິບັດວຽກງານສະກັດກັ້ນ ແລະຕໍ່ສູ້ສະກັດກັ້ນ, ຕ້ານຢາເສບຕິດ ແລະອາດຊະຍາກໍາ ຢູ່ເຂດຊາຍແດນ, ເຂດທະເລຢ່າງມີປະສິດທິຜົນ; ເປັນເສນາທິການໃຫ້ຄະນະພັກ, ອໍານາດການປົກຄອງທ້ອງຖິ່ນ ປັບປຸງພື້ນຖານການເມືອງຢູ່ບໍລິເວນທີ່ສັບສົນ, ປະຕິບັດວຽກງານໂຄສະນາເຜີຍແຜ່, ຂົນຂວາຍປະຊາຊົນຕັ້ງໜ້າເຂົ້າຮ່ວມການກ່າວໂທດ ແລະປາບປາມອາດຊະຍາກໍາ, ກໍ່ສ້າງບັນດາບໍລິເວນຈຸດສຸມໃຫ້ປອດໃສ, ໝັ້ນຄົງເຂັ້ມແຂງດ້ານຄວາມໝັ້ນຄົງ-ຄວາມເປັນລະບຽບຮຽບຮ້ອຍ.
ທີສອງແມ່ນ, ເປັນເຈົ້າການ, ຕັດສິນໃຈເດັດດ່ຽວຂ້ຽວຂາດໃນການປ່ຽນແປງໃໝ່ຮອບດ້ານ, ຄົບຊຸດ, ເປັນມືອາຊີບ, ລົງເລິກວຽກງານວິຊາສະເພາະ ໃນທຸກດ້ານ. ສຸມໃສ່ຍົກສູງຄຸນນະພາບ, ປະສິດທິຜົນວຽກງານກໍາແໜ້ນສະພາບການ, ວຽກງານວິຊາສະເພາະພື້ນຖານ, ຕອບສະໜອງຄວາມຮຽກ ຮ້ອງຕ້ອງການ, ໜ້າທີ່ໃນສະພາບການໃໝ່.
ທີສາມແມ່ນ, ເພີ່ມທະວີການປະສານງານກັບທຸກຂັ້ນ, ທຸກຂະແໜງການ, ບັນດາກໍາລັງທີ່ກ່ຽວຂ້ອງ, ໂດຍສະເພາະແມ່ນກໍາລັງຕໍາຫຼວດ, ພາສີ, ຕໍາຫຼວດທະເລ...; ຍູ້ແຮງການຮ່ວມມືກັບກໍາລັງທີ່ກ່ຽວຂ້ອງຂອງບັນດາປະເທດບ້ານໃກ້ເຮືອນຄຽງ, ບັນດາອົງການຈັດຕັ້ງສາກົນ, ເສີມຂະຫຍາຍກໍາລັງແຮງສັງລວມໃນການຕໍ່ສູ້ສະກັດກັ້ນ, ຕ້ານອາດຊະຍາກໍາ, ປົກປັກຮັກສາຄວາມໝັ້ນຄົງຊາຍແດນ, ກໍ່ສ້າງເຂດຊາຍແດນແຫ່ງສັນຕິພາບ, ສະຖຽນລະພາບ, ມິດຕະພາບ ແລະພັດທະນາ.
ທີສີ່ແມ່ນ, ປະຕິບັດວຽກງານສຶກສາອົບຮົມການເມືອງ, ແນວຄິດ, ກໍ່ສ້າງໃຫ້ພະນັກງານ, ນັກຮົບມີຄຸນທາດການເມືອງອັນໜັກແໜ້ນດ້ວຍຈິດໃຈ “ຕັດສິນໃຈສູງ, ເກັ່ງວິຊາສະເພາະ, ຮັກສາຝາມືທີ່ປອດໃສ”, ຕັດສິນໃຈປະຕິບັດສໍາເລັດທຸກໜ້າທີ່ຢ່າງດີເດັ່ນ. ພ້ອມທັງ ປະຕິບັດວຽກງານປ້ອງກັນຄວາມໝັ້ນຄົງການເມືອງພາຍໃນ, ຮັບປະກັນຄວາມປອດໄພໃນທຸກດ້ານຢ່າງເດັດຂາດ.
ທີຫ້າແມ່ນ, ເອົາໃຈໃສ່ກໍ່ສ້າງກໍາລັງສະເພາະກິດສະກັດກັ້ນ, ຕ້ານຢາເສບຕິດ ແລະອາດຊະຍາກໍາ ທະຫານຊາຍແດນ ມີໂຄງປະກອບທີ່ເໝາະສົມ, ຄົບດ້ານຈໍານວນ, ຄຸນນະພາບນັບມື້ນັບສູງຂຶ້ນ, ຕິດພັນກັບແຜນນະໂຍບາຍດັດປັບໂຄງປະກອບການຈັດຕັ້ງ, ບັນຈຸ; ສະເໜີລົງທຶນພາຫະນະອຸປະກອນເຕັກນິກທີ່ທັນສະໄໝ. ພະນັກງານ, ນັກຮົບຕັ້ງໜ້າຮໍ່າຮຽນ, ຍົກສູງຄວາມຮູ້ຄວາມສາມາດ, ດີເດັ່ນກ່ຽວກັບຄຸນທາດການເມືອງຢ່າງແທ້ຈິງ, ເກັ່ງດ້ານວິຊາສະເພາະ ແລະກົດໝາຍ, ຂຸດຄົ້ນພາຫະນະອຸປະກອນຢ່າງມີປະສິດທິຜົນ, ຮັບປະກັນປະຕິບັດສໍາເລັດໜ້າທີ່ຢ່າງດີເດັ່ນ.
ໂດຍ: ໄຊຊະນະ