ລັດຖະມົນຕີກະຊວງປ້ອງກັນປະເທດ ຊີ້ນໍາບັນດາກົມກອງຮັບມືກັບພາຍຸລູກທີ 9 ຢ່າງຮີບດ່ວນ
ກປ.ອອນໄລ - ໂດຍປະຕິບັດຕາມການຊີ້ນໍາຂອງທ່ານນາຍົກລັດຖະມົນຕີ ທີ່ໂທລະເລກທາງການ ສະບັບເລກທີ 1470/CĐ-TTg ລົງວັນທີ 26 ຕຸລາ 2020; ຄໍາເຫັນຊີ້ນໍາຂອງທ່ານພົນເອກ ໂງຊວນລິກ ລັດຖະມົນຕີກະຊວງປ້ອງກັນປະເທດ ກ່ຽວກັບເລື່ອງຜັນຂະຫຍາຍການຮັບມືກັບພາຍຸລູກທີ 9 ຢ່າງຮີບດ່ວນ, ວັນທີ 26 ຕຸລາ, ທ່ານພົນໂທ ຟານວັນຢາງ ຮອງລັດຖະມົນຕີກະຊວງປ້ອງກັນປະເທດ ໄດ້ເຊັນປະກາດໃຊ້ໜັງສືທາງການ ສະບັບເລກທີ 4013/BQP-VP ຂອງກະຊວງປ້ອງກັນປະເທດ, ສົ່ງເຖິງບັນດາອົງການ, ກົມກອງ ຮຽກຮ້ອງຜັນຂະຫຍາຍການຮັບມືກັບພາຍຸລູກທີ 9 (Molave).
ເນື້ອໃນໜັງສືທາງການ ຊີ້ແຈ້ງວ່າ: ຮຽກຮ້ອງໃຫ້ບັນດາອົງການ, ກົມກອງ, ເປັນຕົ້ນແມ່ນທະຫານເຂດ 4, ທະຫານເຂດ 5 ຊາບຊຶມ, ປະຕິບັດໂທລະເລກທາງການ ສະບັບເລກທີ 1470/CĐ-TTg ຂອງທ່ານນາຍົກລັດຖະມົນຕີ ຢ່າງເຂັ້ມງວດ; ເປັນເຈົ້າການຕິດຕາມກໍາແໜ້ນສະພາບການຜັນແປຂອງພາຍຸ; ຜັນຂະຫຍາຍກໍາລັງ, ພາຫະນະຮັບມືຕາມທິດນໍາ “4 ກັບທີ່” ຢ່າງທັນການ.
|
|
ບ່ອນທີ່ພາຍຸລູກທີ 9 ພັດເຂົ້າໃນວັນທີ 26 ຕຸລາ. ພາບ: ສູນອຸຕຸນິຍົມ-ອຸທົກກະສາດແຫ່ງຊາດ. |
ສຸມໃສ່ຮັບປະກັນຄວາມປອດໄພໃຫ້ຄົນ, ພາຫະນະໃນເຂດຖືກຜົນສະທ້ອນຈາກພາຍຸ, ເປັນຕົ້ນແມ່ນໃຫ້ຄົນ, ເຮືອແພ, ພາຫະນະເຄື່ອນໄຫວຢູ່ທະເລ ແລະບ່ອນລີ້ໄພ; ກວດກາຄືນມາດຕະການ, ເປັນເຈົ້າການຍົກຍ້າຍປະຊາຊົນ, ພາຫະນະຢູ່ບັນດາເຂດອັນຕະລາຍ. ອີງຕາມສະພາບການຜັນແປຂອງພາຍຸ ແລະສະພາບຕົວຈິງ, ບັນດາກົມກອງມີມາດຕະການປ້ອງກັນ, ຕ້ານຢ່າງມີປະສິດທິຜົນ, ຈໍາກັດຄວາມເສຍຫາຍຈາກພາຍຸລູກທີ 9 ໃຫ້ຢູ່ໃນລະດັບຕໍ່າສຸດ.
ກະຊວງປ້ອງກັນປະເທດ ໄດ້ສ້າງຕັ້ງສອງຄະນະປະຕິບັດງານ ນໍາໂດຍ ການນໍາກົມໃຫຍ່ເສນາທິການ ແລະການນໍາກົມໃຫຍ່ການເມືອງ, ດ້ວຍການເຂົ້າຮ່ວມຂອງບັນດາອົງການກ່ຽວຂ້ອງທີ່ສັງກັດກົມໃຫຍ່ເສນາທິການ ແລະກົມໃຫຍ່ການເມືອງ, ດໍາເນີນການກວດກາວຽກງານປ້ອງກັນ, ຕ້ານພາຍຸລູກທີ 9 ຢູ່ນະຄອນດ່ານັ້ງ ແລະແຂວງແຄ໊ງຮ່ວາ. ເວລາກວດກາເລີ່ມແຕ່ 09:00 ໂມງຂອງວັນທີ 27 ຕຸລາ 2020. ມອບໃຫ້ກົມກູ້ໄພກູ້ຊີບ ຕິດຕາມເລັ່ງລັດ, ສັງລວມເພື່ອລາຍງານຕໍ່ການນໍາກົມໃຫຍ່ເສນາທິການ, ການນໍາກະຊວງປ້ອງກັນປະເທດ ຕາມຂໍ້ກຳນົດ.
ໂດຍ: ເຈິ່ນຮວ່ຽນ