ນັກຂ່າວ: ຂໍຮຽນທ່ານນາງຮອງລັດຖະມົນຕີ, ທ່ານຈົ່ງໃຫ້ຮູ້ຄວາມໝາຍ, ຄວາມສຳຄັນຂອງການໄປປະຕິບັດງານຄັ້ງນີ້ຂອງທ່ານປະທານສະພາແຫ່ງຊາດ?
ທ່ານນາງ ເລທິທູຮັ່ງ, ຮອງລັດຖະມົນຕີກະຊວງການຕ່າງປະເທດຫວຽດນາມ: ນີ້ແມ່ນການໄປປະຕິບັດງານທີ່ມີຄວາມໝາຍ, ຄວາມສຳຄັນພິເສດທັງຫຼາຍຝ່າຍ ແລະສອງຝ່າຍ. ກ່ອນອື່ນໝົດ, ເລື່ອງທ່ານ ເຈິ່ນແທັງເໝິນ ປະທານສະພາແຫ່ງຊາດຫວຽດນາມ ໄປເຂົ້າຮ່ວມກອງປະຊຸມລັດຖະສະພາສາກົນ IPU-150 ແມ່ນຂີດໝາຍພິເສດ, ສະແດງໃຫ້ເຫັນຄຳໝັ້ນສັນຍາຢ່າງສູງຂອງຫວຽດນາມ ທີ່ເວທີປາໄສລັດຖະສະພາຫຼາຍຝ່າຍສຳຄັນນີ້, ໃນສະພາບການໂລກໃນປະຈຸບັນຮຽກຮ້ອງໃຫ້ແຕ່ລະປະເທດຕ້ອງຮ່ວມແຮງຮ່ວມໃຈປຶກສາຫາລື, ແບ່ງປັນບົດຮຽນ, ວາງອອກຂໍ້ລິເລີ່ມເພື່ອແກ້ໄຂສິ່ງທ້າທາຍລວມ.
ຄວາມໝາຍສຳຄັນນີ້ໄດ້ສະແດງໃຫ້ເຫັນຜ່ານ 3 ຈຸດພົ້ນເດັ່ນດັ່ງນີ້: ທີໜຶ່ງ, ດ້ວຍຫົວຂໍ້ “ການກະທໍາຂອງລັດຖະສະພາ ແມ່ນເພື່ອການພັດທະນາ ແລະຄວາມຍຸຕິທໍາທາງສັງຄົມ”, ລັດຖະສະພາສາກົນ IPU-150 ໄດ້ເລືອກເອົາຫົວຂໍ້ຖືກຕ້ອງທີ່ສຸດໃນສະພາບການໂລກກຳລັງປະເຊີນໜ້າກັບຫຼາຍສິ່ງທ້າທາຍຄວາມໝັ້ນຄົງທີ່ແມ່ນການທະຫານ ແລະຄວາມໝັ້ນຄົງບໍ່ແມ່ນການທະຫານ, ການຂາດຄວາມສະເໝີພາບນັບມື້ນັບເພີ່ມຂຶ້ນລະຫວ່າງບັນດາປະເທດ, ບັນດາພາກພື້ນ, ໃນຂະນະນັ້ນ, ບັນດາຄຳໝັ້ນສັນຍາດ້ານການເມືອງ ແລະແຫຼ່ງກຳລັງໃນບັນດາຂົງເຂດລົບລ້າງຄວາມອຶດຫິວ, ຫຼຸດຜ່ອນຄວາມທຸກຍາກ, ພັດທະນາສັງຄົມ, ຮັບມືກັບການປ່ຽນແປງຂອງດິນຟ້າອາກາດ... ມີທ່າອ່ຽງຫຼຸດລົງ. ຍິ່ງກວ່າເວລາໃດໝົດ, ບັນດາປະເທດຕ້ອງສົມທົບກັນມີການກະທຳ ແລະຊຸກຍູ້ການຮ່ວມມືຫຼາຍຝ່າຍເພື່ອພ້ອມກັນຜ່ານຜ່າສິ່ງທ້າທາຍທົ່ວໂລກ...
ທີສອງ, ເລື່ອງຜູ້ນຳໜ້າສະພາແຫ່ງຊາດຫວຽດນາມ ເຂົ້າຮ່ວມກອງປະຊຸມລັດຖະສະພາສາກົນ IPU-150 ຄັ້ງນີ້ ແມ່ນພະຍານຫຼັກຖານທີ່ມີຊີວິດຊີວາທີ່ພິສູດໃຫ້ເຫັນວ່າ ຫວຽດນາມ ສະໜັບສະໜູນລັດທິຫຼາຍຝ່າຍຢ່າງແຂງແຮງ, ຖືເປັນສຳຄັນບົດບາດຂອງ IPU ກໍ່ຄືສືບຕໍ່ຢັ້ງຢືນວ່າ ສະພາແຫ່ງຊາດຫວຽດນາມ ແມ່ນສະມາຊິກທີ່ເປັນເຈົ້າການ, ຕັ້ງໜ້າ, ມີຄວາມຮັບຜິດຊອບຂອງ IPU...
    |
 |
|
ທ່ານນາງ ເລທິທູຮັ່ງ ຮອງລັດຖະມົນຕີກະຊວງການຕ່າງປະເທດຫວຽດນາມ. ພາບ: ກະຊວງການຕ່າງປະເທດຫວຽດນາມ. |
ທີສາມ, ຫວຽດນາມ ເຂົ້າຮ່ວມ IPU-150 ດ້ວຍຖານະທີ່ຕັ້ງຂອງປະເທດກຳລັງກ້າວເຂົ້າສູ່ສັງກາດໃໝ່, ດ້ວຍຫຼາຍຜົນງານແຫ່ງການພັດທະນາເສດຖະກິດ-ສັງຄົມທີ່ພົ້ນເດັ່ນ, ໃນນັ້ນຍາມໃດກໍ່ຖືປະຊາຊົນເປັນໃຈກາງ, ແມ່ນເປົ້າໝາຍ, ກຳລັງໜູນຂອງທຸກນະໂຍບາຍພັດທະນາ. ດ້ວຍກຳລັງພາຍໃນ ແລະທ່າແຮງດັ່ງກ່າວ, ທີ່ເວທີປາໄສ IPU-150, ສະພາແຫ່ງຊາດຫວຽດນາມ ຈະພ້ອມກັບລັດຖະສະພາບັນດາປະເທດແລກປ່ຽນ, ແບ່ງປັນບົດຮຽນໃນການພັດທະນາ, ຊຸກຍູ້ການຮ່ວມມືສອງຝ່າຍ, ຫຼາຍຝ່າຍໃນບັນດາຂົງເຂດທີ່ຕ່າງຝ່າຍຕ່າງມີຄວາມສົນໃຈ, ຍາດແຍ່ງເອົາການສະໜັບສະໜູນ ແລະແຫຼ່ງກຳລັງຈາກພາຍນອກ ເພື່ອພັດທະນາປະເທດ.
ໃນດ້ານສອງຝ່າຍ, ການຢ້ຽມຢາມ ສ. ອາກເມນີ ແລະ ສ. ອຸສເບກິສະຖານ ຂອງທ່ານປະທານສະພາແຫ່ງຊາດຫວຽດນາມ ແມ່ນການຢ້ຽມຢາມສອງປະເທດໃນຄັ້ງທຳອິດຂອງຜູ້ນຳອົງການນິຕິບັນຍັດຫວຽດນາມ ແລະກໍ່ແມ່ນການຢ້ຽມຢາມຂັ້ນສູງສຸດຂອງການນຳຫວຽດນາມ ຢູ່ສອງປະເທດນີ້ນັບແຕ່ໄດ້ຮັບການສ້າງຕັ້ງການພົວພັນທາງການທູດໃນປີ 1992. ເພາະສະນັ້ນ, ການຢ້ຽມຢາມຈຶ່ງມີຄວາມໝາຍທາງດ້ານການເມືອງຢ່າງເລິກເຊິ່ງກວ້າງຂວາງ, ສະແດງໃຫ້ເຫັນການຖືເປັນສຳຄັນຂອງຫວຽດນາມ ຕໍ່ກັບການພົວພັນມິດຕະພາບທີ່ເປັນມູນເຊື້ອກັບ ອຸສເບກິສະຖານ, ອາກເມນີ ແລະປາດຖະໜາຢາກພ້ອມກັບສອງປະເທດປັບປຸງຄວາມໄວ້ເນື້ອເຊື່ອໃຈດ້ານການເມືອງ, ສ້າງພື້ນຖານເພື່ອຊຸກຍູ້ການຮ່ວມມືໃນຫຼາຍຂົງເຂດ, ນຳການພົວພັນກັບແຕ່ລະປະເທດໃຫ້ຂຶ້ນລະດັບສູງໃໝ່.
ໃນການຢ້ຽມຢາມ, ທ່ານປະທານສະພາແຫ່ງຊາດ ແລະການນຳສອງປະເທດ ຈະແລກປ່ຽນບັນດາມາດຕະການເພື່ອແກ້ໄຂຄວາມຫຍຸ້ງຍາກ, ຂໍ້ຕິດຂັດ, ຊຸກຍູ້ການຮ່ວມມືເສດຖະກິດ-ການຄ້າ-ການລົງທຶນ, ເຊິ່ງເປັນໜຶ່ງໃນບັນດາເສົາຄ້ຳສຳຄັນໃນການຮ່ວມມືສອງຝ່າຍ...
ນັກຂ່າວ: ຂໍຮຽນທ່ານນາງຮອງລັດຖະມົນຕີ, ທ່ານຈົ່ງໃຫ້ຮູ້, ການພົວພັນມິດຕະພາບທີ່ເປັນມູນເຊື້ອ ແລະການຮ່ວມມືຫຼາຍດ້ານລະຫວ່າງຫວຽດນາມ ກັບປະເທດ ອາກເມນີ ແລະ ອຸສເບກິສະຖານ ບັນລຸໄດ້ໝາກຜົນພົ້ນເດັ່ນໃດແດ່?
ທ່ານນາງ ເລທິທູຮັ່ງ ຮອງລັດຖະມົນຕີກະຊວງການຕ່າງປະເທດຫວຽດນາມ: ໃນຊຸມປີຜ່ານມາ, ການພົວພັນມິດຕະພາບທີ່ເປັນມູນເຊື້ອ ແລະການຮ່ວມມືຫຼາຍດ້ານລະຫວ່າງ ຫວຽດນາມ ແລະສອງປະເທດນັບມື້ນັບພັດທະນາຢ່າງແໜ້ນແຟ້ນ, ມີປະສິດທິຜົນ, ບັນລຸໄດ້ໝາກຜົນຕັ້ງໜ້າຫຼາຍຢ່າງ.
ຫວຽດນາມ ກັບ ອາກເມນີ ແລະ ອຸສເບກິສະຖານ ໄດ້ຮັກສາການຢ້ຽມຢາມ ແລະພົບປະທຸກຂັ້ນເປັນປະຈຳ, ໃນນັ້ນລວມມີທັງຂັ້ນສູງ. ຢູ່ເວທີປາໄສຫຼາຍຝ່າຍ, ຫວຽດນາມ ແລະສອງປະເທດໄດ້ຮັກສາການສົມທົບຢ່າງແໜ້ນແຟ້ນ, ສະໜັບສະໜູນກັນຢ່າງເປັນປະຈຳ, ແບ່ງປັນວິທີການເຂົ້າເຖິງຫຼາຍບັນຫາສາກົນ ແລະພາກພື້ນທີ່ຕ່າງຝ່າຍຕ່າງມີຄວາມສົນໃຈ. ຄຽງຄູ່ກັນນັ້ນ, ການຮ່ວມມືເສດຖະກິດ-ການຄ້າຫວຽດນາມ-ອາກເມນີ ແລະຫວຽດນາມ-ອຸສເບກິສະຖານ ລ້ວນແຕ່ມີບາດກ້າວເຕີບໂຕທີ່ຕັ້ງໜ້າ; ການຮ່ວມມືໃນຂົງເຂດວັດທະນະທຳ, ການສຶກສາ, ກິລາ, ທ່ອງທ່ຽວ, ການພົບປະແລກປ່ຽນປະຊາຊົນ, ການນຳບັນດາຝ່າຍໄດ້ເອົາໃຈໃສ່ຊຸກຍູ້.
ຫວຽດນາມ ກັບ ອາກເມນີ ແລະ ອຸສເບກິສະຖານ ຍັງມີຄວາມສາມາດບົ່ມຊ້ອນຫຼາຍຢ່າງເພື່ອເພີ່ມທະວີການຮ່ວມມື ແລະພ້ອມກັນພັດທະນາ, ໃນນັ້ນມີຂົງເຂດການສຶກສາ -ກໍ່ສ້າງ, ວິທະຍາສາດ-ເຕັກໂນໂລຢີ ແລະບັນດາຂົງເຂດທີ່ມີແງ່ຫວັງ, ຄື: ເຕັກໂນໂລຢີດີຈີຕອນ, ພະລັງງານສະອາດ, ວັດສະດຸໃໝ່...
ນັກຂ່າວ: ທ່ານນາງຮອງລັດຖະມົນຕີ ຕັ້ງຄວາມຫວັງໄວ້ຄືແນວໃດຕໍ່ການໄປປະຕິບັດງານຄັ້ງນີ້ຂອງທ່ານ ເຈິ່ນແທັງເໝິນ ປະທານສະພາແຫ່ງຊາດຫວຽດນາມ?
ທ່ານນາງ ເລທິທູຮັ່ງ ຮອງລັດຖະມົນຕີກະຊວງການຕ່າງປະເທດຫວຽດນາມ: ຂ້າພະເຈົ້າ ຕັ້ງຄວາມຫວັງ ແລະເຊື່ອໝັ້ນວ່າ ການໄປປະຕິບັດງານຄັ້ງນີ້ຂອງທ່ານ ເຈິ່ນແທັງເໝິນ ຈະປະສົບຜົນສຳເລັດຢ່າງຈົບງາມ, ສ້າງຄວາມປະທັບໃຈໃນຈິດໃຈເພື່ອນມິດບັນດາປະເທດ ອຸສເບກິສະຖານ, ອາກເມນີ ແລະປະຊາຄົມສາກົນ, ສືບຕໍ່ແຜ່ຂະຫຍາຍ ແລະຍົກສູງຮູບພາບປະເທດ ຫວຽດນາມ ທີ່ບໍລິສຸດຜຸດຜ່ອງ, ສາຍຈິດມິດໃຈຕໍ່ກັບປະເທດເພື່ອນມິດທີ່ເປັນມູນເຊື້ອ, ມີຄວາມຮັບຜິດຊອບຕໍ່ກັບປະຊາຄົມສາກົນ; ສ້າງກຳລັງໜູນສຳຄັນເພື່ອນຳປະເທດກ້າວເຂົ້າສູ່ສັງກາດໃໝ່, ຫັນບັນດາເປົ້າໝາຍພັດທະນາທີ່ວາງອອກໃຫ້ປະກົດຜົນເປັນຈິງ.
ນັກຂ່າວ: ຂໍຂອບໃຈທ່ານນາງຮອງລັດຖະມົນຕີ!
ໂດຍ: ແສງເດືອນ